|
|||
|
آچيقلاما : ايك دفعه بو مقاله 20/3/89 تاريخينده و باغلانميش وئبلاگيمدا يايينلانميشدير هر بير ملتين ديلی او ملتين وارليق و موجوديت نشانه سی دير. ديل دئديکده يالنيز بو گونکو گونئی آذربايجانين راديو تلويزيون مرکزلرينده دانيشيلان اوزدن ايراق تورکجه يوخ، ديليميزين قايدا قانونونا اويغون اصيل و دوزگون تورکجه ميزدن عبارتدير. بعضی لری ‘ ديلدن پاسدارليق ائتمک ( "فارسي را پاس بداريم " ) و ديلين يابانجی سؤز و کلمه لردن قورونماسينی آنجاق فارس ديلينه لازيم و واجيب گؤرور و بو نوسخه نی باشقا ديللره يازماغي مصلحت گورمورلر ! حتی اوزون ايللر بويو يابانجی (اجنبی) اؤلکه لرده او جومله دن آمريکا و انگلستان دا ياشايان فارس ديللی لرين اوشاقلاری ‘ فارسجانی سليس دانيشا بيلمه ييب و ياشاديقلاري اؤلكه لرين لهجه سينده دانيشاندا، فارس آيدينلاری يئری-گؤيو بير- بيرينه تيکير و بئله بير فاجعه نين !! نئجه قاباغينی آلماق اوچون مين بير پروژه و پراگرام حاضيرلاماق فيکرينه دوشورلر ؛ آنجاق بيزيم معصوم اوشاقلاريميزين اؤز اولكه سي و آؤز يوردوندا دوغما آنا ديلينده يازيب – اوخوما حاقيندان محروم قالماسينا بو باصطلاح آيدينلار نه اينكي افسوس يئمير و بير گؤز اوجو ايله ده باخميرلار ؛ دئموكراسي دان مدافعه ائتمك قيشقيريقلاري دا دونيا انسانلاري نين قولاغيني باتيرير ! بو مملكت ده چوخ اقليت ساييلان و حتي چوخلاري نين يانيندا ‘ ديل يوخ ‘ لهجه ساييلان و قزوين شهري نين تاكستان منطقه سينده آز بير عده نين دانيشديغي تات ديلينه "تات ديلي سئميناري " ( سمينار زبان تاتي ) قويولور و بو ملتين پولو ايله خارجي اؤلكه لردنده " تات ديلي متخصصي ! " بو سمينارا دعوت ائديرلر ( تهرانين كانال 1 تلويزيونونون ساعات 14 خبري ؛ 14 / آذر / 1378 ) ولي بو اؤلكه ده ياشايان ان آزي 30 ميليون تورك ديلينده دانيشان انسانلارين اؤز شخصي هزينه و امكانلاري ايله بير آخشام چاغي موسيقي و شعر مراسيمي كئچيرمه يه الك دن – ساجا كئچيب ‘ فاسلار دئميشكن " هفت خوان رستم دن كئچندن سونرا " بير گون مراسيمه قالاندا اونو لغو ائديرلر ! اوزدن ايراق بير عده ادعالي فارس آيدينلاري ‘ دونيا دئموكراسي سيندان دانيشاندا اؤزلريني ان دئموكرات و مدني آدام كيمي گوستريرلر ‘ لاكين بو دئموكراسيني اؤلكه ايچينده فارس ديللي اولمايانلارا ايسته ينده ‘ و انسانلارين ان ايلكين حاقي ساييلان يعني آنا ديلده تحصيل آلماق مسئله سينه گتيرنده آشيري شوونيست لر سيراسيدا دايانيرلار ! بئله بير مسئله ايله تام ايلگيلي ‘ سيد محمد خاتمي ‘ ايرانين كئچميش جمهور رئيسي نين ‘ " مدنيت لر دانيشيغي " ( گفتگوي تمدنها ) موضوعسو آيدين بير دليل دير ؛ خاتمي جنابلاري دونيانين بوتون ديل و مدنيتينه تام حؤرمت و سايقيسيني گوسترديكده دونيا سويه سينده آدي ديللره دوشدو و آقاي خاتمي نين دئموكرات و آيدين فيكيلري بير سياستچي اولدوغو هر گون تبليغ اولوردو ؛ لاكين همين آدام ‘ ايران داخيلينده غير فارس ديل و مدنيت لرينه بير گؤز اوجو قدرده باخيب قايغي گؤسترمه دي و ايراندا فارس اولمايان ديللرين مكتبلرده اوخونماسي اوچون ايران اساس قانونون ‘ سينيق – سالخاق 15-جي ماده سيني دا نه اينكي اجرا ائتمه دي بلكه داها چوخ اصرارلا دئدي " فاس ديلي ايرانليلارين وحدت ديلي دير " !! بو جومله نين معناسي بودور كي ‘ ايراندا باشقا ديللرده يازيب – اوخوماغا كيمسه نين حاقي يوخدور ؛ چونكو بو ايش وحدتي پوزار !! جناب خاتمي اؤزو سيد اولاراق و سيدلرين سوي- كؤكو 14 معصومه و عرب و سامي سوي – كؤكونه چاتماسينا هئچ بير شك و شوبهه اولمادان و سامي لرين ‘ باصطلاح آريايي سوي – كؤكوايله هيچ بير باغليليغي اولماديغي حالدا ‘ خاتمي جنابلاري ‘ اؤزونو آريايي سوي-كؤكوندن گؤستره رك آذربايجان و موغان سفرينده آذربايجان توركلريني ده " آريايي خالص !!" آدلانديرماغا اصرار ائديردي و بو جومله سيندنده چوخ لذت آپاريردي ! بو اؤلكه ده توركلر ‘ نفوس باخيميندان ‘ نسبي اكثريته ماليك اولاراق و ديليميز دونيانين ان قانونلو ديللريندن بيري اولارکن و بو ديلده مين ايلدن بو گونه قدر دگرلی مکتوب اثرلر يازيلديغی حالدا اونون دونيا سويه سينده تانينميش ادبی اثری اولان "دده قورقود" کتابيندان و بو كيتابين 12 داستان و بويوندا دالغالانان محبت موضوعلاري ‘ انسانلارين برابر حقوقا ماليك اولمالاري ‘ قادينلارلا كيشي لرين ارزش و اعتبار باخيميندان بير سويه ده و حتي بعضي داستانلاردا قادينلارين مبارزه مئيدانلاريندا كيشي لره اوستون گلمه سي ‘ ار ايله آروادين بير – بيرلرينه وفادارليغي و حتي بوگونكو مترقي و مدني دونيانين معيارلارينا اويغون انساني – اخلاقي موضوعلار بو كيتابين داستانلاريندا دالغالاناركن ‘ ايرانين راديو - تلويزيون ‘ درس كيتابلاري و ملت بودجه سي ايله چاپ اولان سرتاسري مطبوعاتيندا بير جومله ده اولسون بئله ‘ دده قورقود كيتابي نين متنيندن سؤز آچيلمير ‘ لاكين ملت بودجه سي ايله حاضيرلانان راديو – تلويزيون برنامه لريندن توتدو گونده ليك مطبوعات ‘ درس كيتابلاري ‘ سينما موضوعلاري ‘ تياتر و يوزلرله جمعي رسانه لرده ‘ حكيم ابوالقاسم فردوسي نين " كه رستم يلي بود در سيستان منش كردمش رستم داستان " افسانه سي ‘ ايكي – اوچ ياشلي اوشاقلاريميزدان توتدو 70 – 80 ياشلي انسانلاريميزين بئينينه هر گون سوخولماقدادير ! بعضي لري ائله تصور ائديرلر كي ‘ بو مملكت ده يالنيز فارس ياشايير و يا ايران آدلي اؤلكه يالنيز فارسلارا عايددير و فارس ديلي و مدنيتيندن باشقا بو اؤلكه ده هئچ بير كبمسه نين ديل و مدنيتيندن سؤز آچيب و مملكت ايمكانلاريندان فايدالانماغا حاقي يوخدور ! آما كيمسه بئله فيكيرلشرسه و ايراندا ياشايان غير فارس ملتلري و اونلارين ديل – مدنيت ‘ تاريخ ‘ فولكلور ‘ هويت و وارليقلارينا اعتناسيز قاليب و معنوي وارليقلارينا حقارت گوزو ايله باخارسا ‘ ايرانا قارانليق بير گله جك ترسيم ائتمه سينه شك ائتمه سين ! بو اؤلكه ده اسلامدان سونرا 1000 ايل و آراسي كسيلمه دن گوجلو امپراطورلوقلار قوران توركلرين بو گونكو اوولادلاري نين تاريخي حافظه سينده ‘ كئچميشدن چوخ افتخارلي تصويرلر وار ‘ و بو افتخارلي تصويرلردن بيري ده 1000 ايلليك تورك امپراطورلوقلاري چرچيوه سينده ياشايان هئچ بير غير تورك ملتلرين دين ‘ ديل ‘ مدنيت ‘ هويت و وارليقلاري ‘ قدرتله حؤكم سورن توركلر طرفيندن نه اينكي تحقير اولماميش بلكه داها گوجلنميشدير ! لاكين همين 1000 ايل حؤكم سوردويوموز اؤلكه ني جانلاريندان كئچميش انسانلايميزين قاني باهاسينا بوتون وارليغيميزلا دوشمانلاردان قورودوغوموز حالدا ‘ ايندي ايچينده ياشا ديغيميز اؤلكه ده تحقير اولوروق و بعضي لري ‘ ايراني ‘ يالنيز فارس ديللي گؤسترمه يه چاليشاراق ‘ اونون ايچينده ياشايانلاري فارس قازانينندا اريتمك فيكرينده ديرلر و غير فارس ديللي لرين ‘ اؤزلليكله توركلرين ابتدايي مكتبده درس اوخوماغا اؤز ديللرينده بئله مكتب لري يوخدور ! بو گون آرتيق ايران چرچيوه سينده ياشايان غير فارس ملتلر ‘ بئله بير سياستين اؤنه سورولمه سينين نه قدر يانليش اولدوغونو دريندن دويور و بو سياستين نه قدر خطرلي اولدوغونو گؤز اؤنونه سرگيله مگي بير وظيفه سانيرلر ! هر حالدا بوگون ايران چرچيوه سينده اکثريت اولدوغوموز حالدا اقليت حقوقونا بئله ماليک اولماديغيميز شرايطده آنجاق اؤزوموز بو يازيق آنا ديليميزين قايدينا قالمالی، اونون مکتب- مدرسه و بيلیم يوردلاريندا (دانشگاهلاردا) اوخوماق شرايطينی حاضيرلاماغا وار قوه ميزله چاليشمالييق ! بو وظيفه هر بير انسانی، اسلامی و ملی دوشونجه لی آذربايجانلی و تؤرک ديللی آيدين و ضيالينين چيينينده آغيرليق ائدير ! آنا ديلينی سئومک، بو ديلده تحصيل آليب ‘ يازيب ياراتماق و اونو انکيشاف ائتديرمک طبيعی بير دويغو و حاقدير ؛ کيمسه ده بو دويغو اولماسا يقين کی او انسان خسته دير و حکيمه مراجعت ائتمه لیدير؛ يا دا بئله بير کيمسه ‘ ديلينی، هويتينی و مدنيتينی تحقير ائده نلرين قارشيسيندا مقاومت جراتی اولماديغينا گؤره آؤز ديلیندن و مدنيتيندن مدافعه ائتمک يئرينه‘ زهرلی جريانلارا قوشولوب آسيميله اولماني داها آسان و راحت گؤردوكده ‘ هويت سيز بير موجود کيمی ياشاماغی اوستون توتور ! بيز وجدان قيشقيريقلارينا جواب وئرمه لی ‘ ديليميز ‘ مدنيتيميز و كيمليگيميز ی قورويوب يئنی نسليميزه تحويل وئرمه لييک. بئله بير آغير وظيفه نی يئرينه يئتيرمه سک يقين کی گله جک نسليميز بيزی لعنتله ياد ائتمکده حاقلی اولاجاقدير ! انساني حاقيني تانيان ‘دوزگون تاريخينی اويرنن ‘ دوغما ديلينی، ميلي موسيقي سيني ‘ فولکلورونو، مدنيتينی هويت و وارليغيني قورويان هر بير آذربايجانلی و تؤرک ديللی انسان‘ طبيعي كي ‘ اؤز ملتينين حقيقی ‘ ايناملي و ايمانلي نماينده سی دير ! منبع: گونئی آذربايجان اؤيرنجی سايتی |
|||
