|
اؤزگه‌سینه قویو قازان اوزو دوشر
|
|
|
بهروز ایمانی |
|
|
بئله روايت ائديرلر كي قديم اوزاق بير كندده بير آنا ايله اوغول بيرليكده ياشاييرميشلار. اونلارين دونيا ماليندان هئچ زادلاري يوخ ايميش. اري اؤلن گوندن بري آرواد، اوغلونون لازم اولان احتياجلاريني تامين ائتمك اوچون آغير زحمتلره دؤزوب، اليندن گلني اسيرگه ميردي. مثلا قونشولارين، قويونلاريني ساغيب، پالتارلارين يوماقلا باشلاريني دولانديريردي. گونلر كئچير، آي دولانير. كيچيك احمد عمللي- باشلي بؤيويوب، جوان بير اوغلان اولوب. آرواد دئيير: اي اوغول ايندي منيم قوجاليق و سنين ده ايشله مه لي وقتين دير. اولماسا بير ايش فكرينده اول، بلكه ياشاييشيميزي دولانديرا بيلك. اوغلان آناسي نين سؤزونه راضيليق وئريرب سحر ايش دالينجا شهره گئده جگم- دئيير. اوزوزه خيرلي سحرلر آچيلسين. سحر آچيلير،اوغلان گئدير شهره. بير چوخلاري كيمي اودا شهرين ميدانچاسيندا دايانير و گؤزله ييركي، بير نفر گليب اونو ايشه آپاراجاق. احمد نه قدر گؤزه‌له يير، گؤرور يوخ اونو هئچ دينديره‌ن اولمادي، اؤزوده ناهارا آز قالير. احمد گؤرور يوخ اگر اون گون ده دايانسا ايش بئله قاباغا گئتمه يه جك. اونا گؤره شهري دولانماغا باشلاييرتي، بلكه الينه بير شئي دولاشسين. اوغلان خيابانلاري، كوچه‌لري گزديكجه اميد سيزلشير. آخيردا گليب، آيري ائولردن گؤزه‌ل و جلاللي اولان بير ائوين قاباغيندا دايانير. بير نئچه دفعه ايسته‌ييركي قاپيني دؤيسون، آنجاق جرات ائله مير. نهايت اوره‌يي چيرپينا- چيرپينا آهسته‌جه قاپيني دؤيور. هاچاندان- هاچانا ائوين اربابي گليب قاپيني آچاندا احمدي گؤروب تعجبله سوروشور: هه اوغلوم كيمي ايسته ييرسن؟ سؤزون نه دير؟ احمد اوتانا- اوتانا باشيني آشاغي سالاراق. ((ايش دالينجا گزيرم- دئيير)). ارباب دئيير: لاپ عجب ائله ييرسن، ائله من ده سنين كيمي بير ايشچي آختاتاريرديم. همين گونده احمد، اربابين ايشچيسي اولاراق گؤزله يير كي، فلان شئيي گتير. گؤرور يوخ، بير گون كئچير اما اربابدان خبر اولموركي، اونا ايش گؤردورسون. سحريسي ده بئله اولور. اوچونجو گون، دؤردونجو گونه كئچنده احمد اربابين يانينا گئديب، بو باره‌ده نگران اولدوغونو سؤله يير. ارباب دئيير: اوغول گئت ايش وقتي اؤزوم دئيه‌رم. بونون اوستوندن بير نئچه گون كئچيب، كئچمه ميش ارباب احمدي چاغيريب، امر وئرير كي، بير اينك كسيب، دريسيني دقتله سويسون. احمد اربابي نين امرينه باش اييب، تئز بير اينك تاپيب، دريسيني سوياندان سونرا، دوه‌لري طويله‌دن چيخاريب، بوش چواللاري اونلارين اوستونه آتيب، اينك دريسيني ده گؤتوروب، اربابلا بيرليكده يولا دوشور. آز گئدير، چوخ گئديرلر، آخيردا اوجا بير داغين اته گينده دوه‌لري دايانديريرلار. ارباب احمده دئيير: تئز اول بو دري ييه بورون گؤروم، نه اولور. احمد خبردن خبري يوخ، ائله درينين ايچينه گيرمه‌سي ايله، سريتلنمه سي بير اولور. ارباب اينك دريسيني احمده بورويندن سونرا، دوه‌لري كنارا چكيب، اؤزوده قاچير، ايري بير داشين داليندا گيرلنير. آز كئچمه‌دن بير نئچه قيرغي گليب، دريني قانادلاري آلتيندا داغين قله زيروسينه آپاريب، يئره قوياندان سورا ديمديكله مه يه باشلاييرلار. او قدر ديمديك له يير لر كي، دري بير نئچه يئردن دليك- دليك اولور. احمد قورخوسوندان دئشيك لري ييرتيب، اؤزونو بير تهر ائشيگه چيخارير. قيرغي لار اوندان قورخوب، اوچوب گئديرلر. احمد باخيب گؤرور داغين، اوستو جواهرلرله دولودور. اؤزوده مين ايل قالسا بوردان آشاغي ائنمك ممكن اولماياجاق. احمد يان- يؤرويه گؤز گزديرنده گؤرور داغدا جواهر قدر آدام سومويوده، وار. اونلاري گؤروب آرتيق قورخويا دوشن احمد بيرده آشاغي باخاندا گؤرور اؤز اربابي داغين اتگينده دايانيب. احمد باغيريب، دئيير: ارباب من بوردان نئجه قورتارا بيلرم؟ ارباب دئيير: اوردا كي جواهرلرين هاميسيني آشاغي تؤكندن سونرا دئيه‌رم نئجه گلرسن. يازيق احمد داغين كله‌سينده هر نه قدر جواهر وارايدي هاميسيني آشاغي تؤكندن سونرا داياندي گؤرسون اربابي اونون آشاغي ائنمه سينه نئجه يول گؤستره‌جك. اما گؤزونه دؤندويوم ارباب دوه‌لريني يؤكله يندن سونرا آرخايين- آرخايين شهره يوللانيب، گئتدي. احمد كور پشيمان دايانيب ايشين آخريني گؤزله‌ييردي كي، بيردن- بيره جثه‌لي بير قيرغي اونون باشي اوستونده دايانير، اونا بير خطر يئتيرمك ايسته ديكده احمد اؤزونو كنترل ائديب، قيرغي‌نين آياقلاريندان برك- برك ياپيشيب، آغيرليغيني داغين آشاغي طرفينه سالير. قيرغي يوخارييا ساري قانادلانير، احمد ده آغيرليغيني آشاغييا سالير. آخيردا احمدين آياغي داغين اته گينده يئره ده‌يندن سونرا قيرغي نين آياقلاريني بوشلايير. قيرغي اوچوب گئدير، احمد شهره قاييدير. احمد توودابانا دئييب بير باشا اربابين قاپيسينا گلير گؤرور كي ارباب اونو تانيمير، تانيسايدي دا احمدين اورادان سالم قاييتماسينا اينانمازدي. چونكي چوخ ايللردن بري بو حيله‌ايله داغين باشينا گؤنده رديگي يوزلرجه جواندان بيري ايندييه كيمي ساغ قاييدا بيلمه ميشدي. اربابين طرفيندن آرخايين اولان احمد قاباقكي كيمي ايش دالينجا گزديگيني، بيلديره‌ندن سونرا ارباب اونو ايشلتمه يي قبول ائله‌يير. ارباب قاباقكي كيمي بير گون بئله ايكي گون بئله احمده هئچ ايش بويورمور. احمديئنه ده اونون علتيني سورشاندا، لازم اولان گون اؤزوم دئيه‌رم، سؤيله‌يه‌رك اونوآرخايين ائله ييب، دئييركي، گئت قيچلاريني بير- بيرينين اوستونه آشيريب، راحت اوتور، هئچ نه‌يين ده فكريني ائله‌مه. وقت تماما يئتندن سونرا ارباب احمدي چاغريب دئيير كي، تئز اول بير اينك دريسي، بير نئچه بوش چووال حاضرلا، بئش آلتي دوه‌ايله چؤله چيخاجاييق. احمد تئز اربابي نين امريني يئرينه يئتيريب. بير اينك كسيب دريسيني سوياندان سونرا، بوش چواللاري گؤتوروب دوه‌لرين اوستونه ساليب يولا چيخيرلار. آز گئديرلر، چوخ گئديرلر آخردا اوجا بير داغين اته‌گينه چاتيرلار. اربابين امري ايله احمد اينك دريسيني يئره سريب، نه ايش گؤرجه ييني اربابدان سوروشاندا، ارباب دئيير، يات بو درينين ايچينده اونو اؤزونه بورو، دئيير: باشارميرام. سيز اول منه اؤيره‌دين، سونرا نه دئسه‌ز اونو ائله‌رم. ارباب دري نين ايچينده اوزانيب، اونو عمللي- باشلي اؤزونه بورويندن سونرا احمد وقتي تلف ائله‌مه‌ييب، دريني ايپ ايله برك- برك سارييير. سونرا دوه‌لري قيراغا چكيب، ايري بير داشين داليندا گيزلنير. بير آز كئچيب، كئچمه ميش بير نئچه قيرغي گليب، دريني چكيب داغين كله سينه آپاريير سونرا دريني ديمديكله‌مه‌يه باشلاييرلار. قيرغي لار دريني ييرتاندان سونرا، اربابا قورخوال وئرير. اؤزونه قوت وئريب دريني بير تهر رد ائدير. قيرغي لار اونو گؤره‌ن كيمي قورخودان اوچوب گئديرلر. ارباب حيله‌نين نئجه اولدوغونو بيلندن سونرا چيغيريب احمده دئيير: دي گؤروم سن او وقت بو داغدان نئجه دوشدون. اگر منه ده اؤيره‌تسن بوتون وار- دولتيمي سنه تاپشيراجاغام. احمد گؤزونه دؤندويوم ده او احمدلردن دئييلدي كي بيرده بو كيمي بوش سؤزلره آللانسين. قاييديب اربابا دئيير: سن اوردا كي جواهرلري بير- بير تؤك يئره سونرا دئيه‌رم نئجه گل. ارباب جواهرلري بير- بير تؤكندن سونرا، گؤزله ييركي، احمد اونون آشاغي ائنمه سينه كمك ائده‌جك. احمدده دوه‌لري جواهرله يوكله‌يندن سونرا، ايسته‌يير يولونو توتوب گئتسين، داغين باشيندان اربابين سسي گلير. احمد بس مني قويوب هارا گئديرسن سني الله منه ده اؤيره‌ت، گليم آشاغي. احمد يولونو گئده- گئده چيغيريب دئيير: من گئتديم، سن ده اورداكي، سوموكلردن اؤيرنيب، گلرسن. بئله ليكله ارباب اؤز عملينه راست لاشير. احمدده اؤز زحمتي نين نتيجه سيندن هميشه ليك اولاراق يوخسوللوقدان قورتاريير.
منبع:
|
|