ياس تورکلرده قادينلار و کيشيلر مجليسی اولاراق ايکييه آيريلير. کيشيلرين ياس مجليسينی عومومن عرب ديليني ده دوغرو-دوروست بيلمه ين بير آخوند يؤنلنديرر. مرثيه  سؤيلر و عربجه دوعالار ائدر. قادينلارين ياس مجليسي اسکي شامان اينانجينداکي عاميللري هله ده اؤزونده داشيماقدادير. تورکلرده ايلک ديني رهبرلر شامان قادينلار اولموشلار. اسکي چاغلاردا جاوانلار اؤزلريني بوتون توپلوملاردا اخلاقي جهتدن ديني ليدئرلره بنزدرديلر. بو اوزدندن تورک کيشيلري اوزون ساچ بوراخميشلار. گؤيتورک خاقانلاري چين خاقانلارينا يازديقلاري مکتوبلاردا دالغالانان اوزون ساچلاريني کسيب اونلارينکي کيمي قيسالتماياجاقلاريني يازارالار. ايسلام سونراسي تؤره لريميزده اسکي شامان-تورک تؤره سي قادينلارين ياس مجليسلرينده وارليغيني سوردورموشدور. کيشي آخوندون قادينلار مجليسينه گيرمه سي ياساقلانديغي اوچون ياس تؤره لريني قادينلار اسکي تؤره لره گؤره يؤنلنديرميشلر. «آغلاشما» تؤره سي اولاراق گونوموزده ده داوام ائدن بو کولتورده تورک ديلينده حزين و آغريلي باياتيلار سؤيله ييب بير يئرده آغلاشارلار. تورک ديلي اؤز وارليغيني تاريخ بويو قادينلارين ياس تؤرنلرينه بورجلو اولموشدور. قاديندان آخوند اولماديغي اوچون تورک اولوسو اؤز آجيلاريني قادين ياس توپلانتيلاريندا تورکچه ياشامالي اولموشدور. اسکي شامان اينانجيندا دا ياس تؤره نلري شامان قادينلار طرفيندن يؤنلنديريلميشدير. بؤيوک هون ايمپئراتورو آتيللانين ايقتيدارا گلمه سينده ده شامان قادين يارديمچي اولموشدور.

 آغلاشما مراسيمينده هر قادين باياتي سؤيله ييب آغلاماز. داها تجروبه لي، سسي گؤزل و ائل ايچينده بؤيوک حؤرمتي اولان قادينلار بللي کدر و مرثيه  ژانري موغاملاردا باياتي سؤيله ييب هم اؤزلري آغلار، هم ده باشقالاريني آغلادارلار. قادينلارين ياس مجليسي ميلليليک و تاثير باخيميندان کيشيلرين ياس مجليسيندن داها مؤحتشم اولموشدور. چونکو قادينلارين ياس مجليسينده رييا اولماميشدير. قادينلار اؤز ديليميزده باياتي سؤيله ييب آغلاميش و آغلاتميشلار. کيشيلرين ياس مجليسينده رييا اولموشدور. چونکو آخوند پارا قارشيليغي مرثيه  دئميشدير. ان اؤنملييسي ايسه، سؤيله ديگي مرثيه  سؤزلري نين چوخو عربجه اولموشدور. يعني پوزوق بير عربجه. دينله ين کيشيلر آنلاميني بيلمه دن، يالنيزجا پسيکولوژيک بير باسقي آلتيندا اؤزلريني ساختا بير شکيلده دردلي گؤسترمک زوروندا قالميشلار. کاشقارلي نين اثرينده، قوتاتقو بيليکده، کيتابي-دده قورقوددا گونوموزده قادينلار طرفيندن يورودولن ياس تؤرنلري نين علامتلري وار.  

    ‏08‏/04‏/2011