· گئرچک ائييتيم چوجوغون ان ياخشي اؤزلليکلريني اوزه چيخارماليدير. بو آماج اوچون اينسانليق کيتابيندان داها اويقون نه اولا بيلر؟ 

  · چوجوغون گئرچک ذهني و فيکري گوجونو ائييتمک اونون ال، آياق، گؤز، قولاق، بورون کيمي بدن عوضولري نين تربييه سي ايله مومکون اولا بيلر. باشقا بير دئييمله چوجوغون بدن عوضولري نين ائييتيمي دوروست و عاغيللاجا روحي ائييتيمله بير يئرده اولماليدير. بو دورومدا ان ياخشي و ان سورعتلي يول چوجوغون ذهني و فيکري اولاناقلاري نين گئنيشله مه سي اوچون اورتايا چيخاجاقدير. بدن و ذهني گليشمه بير يئرده و روحي اويانيشا اويقون بيچيمده گئرچکلشمز و يالنيز ذهني اويانيشا اؤنم وئريلرسه، بونون اولوملو ائتکيسي اولماياجاقدير. روحي ائييتيمدن آماج چوجوغون کؤنلونون تربييه سيدير. ذهنين هر يؤنلو گليشمه سي و تربييه سي بدن و روح يئته نکلري نين اويانيشي ايله داها اولوملو سونوجلار وئرر. بونلار هاميسي بير يئرده بير بوتونو اولوشدورار. بو نظرييه يه گؤره اونلاري بير- بيريندن آييريب اوزرينده تک- تک دورماق بؤيوک يانليشليق اولا بيلر.  

  · ائييتيمدن آماجيم چوجوغون و يا اينسانين جيسمي، فيکري و روحي اؤزلليکلري نين هر طرفلي تربييه سيندن عيبارتدير. يازيب-اوخوما ائييتيمين آماجي اولا بيلمز. بو ائييتيمين آراجلاريندان سادجه بيريدير، يوخسا او، اؤزو-اؤزلوگونده ائييتيم ساييلماز. بو اوزدن ده چوجوق ائييتيميني اونو بير ال ايشينه آليشديرماقلا باشلامانين طرفدارييام. بو، چوجوغو ايلک گوندن ايقتيصادي اينسان اولماغا آليشديرماقدير. بو يوللا هر اوخول ايقتيصادي آچيدان اؤز آياقلاري اوستونده دورار و احتيياجلاريني اؤزو تامين ائده بيلر. يئتر کي، دؤولت هر اوخولون ايلکين ائحتيتاجلارين تامين ائتسين.بو ائييتيم سيستئمي ايله روحي و ذهني تربييه ان يوکسک ائوره سينه (مرحله سینه) واراخاغي اينانجيندايام. بونون اوچون ال ايشلري مئخانيک بيچيمده اؤيره ديلمه مه لي، علمي يؤنته مله بير يئرده اولماليدير. يعني چوجوق آنلامالي و بيلمه ليدير کي، ندن بو ايشي گؤرمه ليدير. بو قونونو جيدي بير گووَنله يازيرام. چونکو بو قونودا تجروبه لريم وار. ايپ اَييرمه نين ايشچيلره اؤیرَديلديگي هر يئرده بو یؤنته مدن يارارلانيلميشدير. منيم اؤزومون بو قونودا ياخشي تجروبه لريم وار. بو یؤنته م، تاريخ و جوغرافييا بيلگيلريندن ده ديشلانميش دئييلدير. تجروبه لريم گؤسترميشدير کي، بو علمي و ديگر عومومي بيلگيلري شيفاهي يوللا داها آسان آنلاتماق اولور. کتبي يوللا موقاييسه ده شيفاهي يول داها آز ائنئرژي و زامان ايتکيسي گرکديرير. چوجوق ال ايشلريني اؤيرنديگي سوره ايچينده حسابلاماني دا اؤيرَنه جه يی طبيعيدير.  

  · من اؤز ضعيفليکلريمي قبول ائديرم. منيم بو قونودا اونيوئرسيتئت دوزئيينده ائييتيميم يوخدور. اورتا اوخولو اوخودوغومدا اورتا سَوييه لي بير اؤيرَنجي اولموشام. سيناولاريمدان کئچرکن چوخ سئوينرديم. اوخولون سئچکين اؤيرنجيلريندن اولما آرزوسونو هئچ عاغليمدان دا کئچيرمزديم. آنجاق يئنه ده ائييتيم قونوسوندا يئني نظرييه لريم وار. نظرييه لريمي اؤلکه مه سونماغي اؤز اولوسال گؤرَويم اولاراق آنلاييرام. آز قالا مني بوغماقدا اولان اوتانقاجليق دويقوسونو بير يانا بورخمالييام. منه گوله بيلر، منی مسخره ائده بيلرلر. بونلاردان چکينمه مه لييم. دوشونجه لريمي گيزلين ساخلاسام يانليشليقلاريمي گؤره بيلمرم. يارقيلاريمدا يانليشليقلاريمي گؤروب اونلاري دوزلتمه يه چوخ هوسلييم. نئچه ايل ايچينده قازانديغيم تجروبه لريمين سونوجونو آچيقلاماق ايسته ييرم. چونکو هر يئرده باشارديغيم قدر بو قوراللارا گؤره داورانميشام. 

  1- من يوکسک ائييتيم، حتّی دونيادا وار اولان ان يوکسک ائييتيم ايمکانلارينا قارشي دئييلم.  

  2- دؤولت سوموت (موشخص) مصرفلر قارشيليغيندا يوکسک ائييتيم خرجيني اؤده مه ليدير. 

  3- اورتا اوخول و يوکسک ائييتيم مصرفلري نين عومومي بودجه دن اؤده نمه سينه قارشييام.

  4- کسين اينانجيم اودور کي، بيزيم کولئجلرده اؤيره ديلن سؤزده ادبي بيلگيلر، يالنيز واخت و عؤمور ايتيرمه يه يارايير، باشقا بير ياراري يوخدور. بونون سونوجو اولاراق اؤلکه ده بير سورو اوخوموش ايشسيز اورتايا چيخماقدادير. آيريجا، بو کولئجلر گنج اوغلانلارين و قيزلارين روحسال ساغليغينا ضرر وئرمکده دير.  

  5- هينديستاندا اورتا اوخولدا و اونيوئرسيتئتده يابانجي ديلده اوخوما يايقينلاشميشدير. بو، اخلاقي و روحي باخيمدان ميلتيميزه و اؤلکه ميزه چوخ ضرر وئرمکده دير. هينديستانين ايستيقلال ساواشي هم ده اؤز ديلينه صاحيب چيخماسي اوچوندور. اؤز ديليميزه هله چوخ ياخين اولدوغوموزدان يابانجي ديلده اوخومانين بيزه نه قدر ضرر وئرديگي نين بيلينجينده دئييليک. اؤزوموز يابانجي ديلده ائييتيلديگيميز اوچون بونون ضررلريني آنلاييب اؤنله ملر (تدبیرلر) آلماليييق. آنجاق نه يازيق کي، آرتيق بو ايش غئيري-مومکوندور. بو سونوجا وارماغيمين سببلريني آنلاتمام گره کير. 12 ياشيما قدر اؤيرنديگيم بوتون بيلگيلر آنا ديليمده ايدي. ايله تيشيم ديليميز ائوده و چئوره ده قوجئراتي ديلي ايدي. او زامانا قدر ماتئماتيک، تاريخ و جوغرافييا حاققيندا بعضي بيلگيلر الده ائتميشديم. اورتا اوخولا گيرديم. ايلک اوچ ايلده يئنه ده ائييتيم ديليميز قوجئراتجا ايدي. آنجاق اوخولون مودورو اينگيليسجه ني اؤيرنجيلرين بئينينه سوخماقدا قرارلي ايدي. بؤيله جه بيزيم زامانيميزين ياريسيندان چوخو بو ديلي و اونون ايملاسيني، تلففوظونو اؤيرنمه يه حصر اولوردو. تلففوظو ايله يازيليشي آراسيندا چوخ فرق اولان بير ديلي اؤيرنمک منيم اوچون قورخونج ايدي. قورخوردوم اينگيليس ديليندن. هر بير سؤزون دوغروجا يازيليش شکليني ياددا ساخلاماق چوخ چتين ايش ايدي. بو سؤيله ديگيمي بير پارانتئز ايچي جومله حساب ائدين، چونکو اساس سؤيله مک ايسته ديگيم قونو باشقا شئيدير. هر حالدا ايلک اوچ ايل چوخ دا چتين دئييلدي. گئرچک ايشکنجه دؤردونجو صينيفدن سونرا باشلادي. هندسه، جبر، کيميا، گؤيبيليم، تاريخ و جوغرافييا کيمي بوتون درسليکلري اينگيليس ديلينده اؤيرنمه لي ايديم. اينگيليس ديلي نين ظولمو او درجه ده ايدي کي، سانسکريتجه ني و اؤز آنا ديليمي ده بو ديلين آراجيليغي ايله اؤيرنمه لي ايديم. آنا ديليميز اولان قوجئراتجا دانيشان چوجوقلار جزالانيرديلار. اينگيليسجه ني يانليش يازيب، يانليش دانيشماق اؤيرتمن اوچون اؤنملي دئييلدي. اؤنملي اولان او ايدي کي، اؤيرنجيلر آنا ديللرينده دانيشماييب اينگيليزجه دانيشسينلار. اؤيرتمه نين بو آچيدان راحاتسيزليغي يوخ ايدي، چونکو اؤز اينگيليسجه سي ده قوصورسوز و عکسيکسيز دئييلدي. بؤيله ده اولمالي ايدي. چونکو اينگيليس ديلي هم اؤيرتمن اوچون، هم ده اؤيرنجيلر اوچون يابانجي ديل ايدي. دوروم گرگين پسيکولوژيک اورتامين اولوشماسي ايله سونوجلانيردي. اؤيرنجي اولاراق بير چوخ شئيلري ازبرله ييب ياديميزدا ساخلامالي ايديق. بير حالداکي ازبرله ديکلريميزي ياخشيجا آنلامير و يا اصلا آنلاميرديق. اؤيرتمن اينگيليس ديلينده هندسه درسي کئچديگينده باشيم دؤنوب گيجلله نيردي. هندسه دن هئچ بير شئي آنلامادان ايره ليله ييرديک. اعتيراف ائتمه لييم کي، آنا ديليمه اولان درين باغليليغيما باخماياراق، بو گون بيله، هندسي و ريياضي قاوراملارين قارشيليغيني قوجئرات ديلينده بيلميرم. ايندي دوشونورم کي، علمي درسليکلري دؤرد ايل ايچينده اوخويوب آنلاماماق يئرينه، اؤز آنا ديليمده اوخوسايديم دؤرد ايله دئييل بير تک ايله هاميسيني قولايجا اؤزومسرديم. ائييتيم آنا ديليمده اولسايدي، مؤوضوعلاري چوخ قولايجا قاورايا بيلرديم. قوجئراتجا سؤز داغارجيغيم داها دا زنگينله شردي. اؤيرنديگيم بيلگيلريمين ائويميزده ده کئچرليليگي اولاردي. آنجاق من اينگيليس ديلينده ائييتيم آلديقجا، گوندن گونه عايله مله منيم آرامدا درين اوچوروم يارانيردي. چونکو اونلار اينگيليس ديليني بيلميرديلر. من ايسته سه ايديم ده، بيلديکلريمي آتاما، آناما اؤيره ده بيلمزديم. چونکو آتامين اوخوموش بيري اولسا دا، حتّی تک کلمه اينگيليسجه بيلمزدي. من بؤيوک بير سورعتله اؤز ائويمده عايله مه يابانجيلاشيرديم. اؤزومو ائويميزده داها اوستون گؤرمه کيمي خسته فيکيرلر عاغليما گيريردي. حتّی گئتديکجه پالتار گئيمه طرزيم ده دَييشدي. بو، يالنيز منه عآيد اولان بير دوروم دئييلدي. هينديستاندا بير نئچه نسل بو شکيلده يابانجيلاشيردي. اوخوماق ايسته ين خالقين بوتون چوجوقلاريني قورخونج يابانجيلاشما قاپساييب قاوورماقدا ايدي. اورتا اوخولدا کئچيرديگيم ايلک اوچ ايل، عومومي بيلگيلريمده آرتيش ساغلامادي. بو ايللر اؤيرنجي نين درسلريني اينگيليس ديلينده اوخويا بيلمه سي اوچون حاضيرليق دؤنه مي ساييليردي. اورتا اوخوللار اينگيلتره نين هينديستان اوزَرينده کي کولتور ايمپئرياليزمي پوليتيکاسي نين اويقولانما مکانلاري ايدي. من اوخودغوم 300 کيشيليک اوخولدا الده ائديلن بيلگيلر اؤيرنجيلرين اؤزَل بيلگي مولکلري ساييليردي. اؤيرنجيلر بو بيلگيلريني اؤز اولوسلاري ايله پايلاشا بيلميرديلر.  

  بير نئچه سؤز ده ادبييات حاققيندا دانيشماق ايسته ييرم: 

  اينگيليس ادبيياتيندان بير نئچه دوزيازي (نثر) و شعر اؤرنکلري اوخوماق زوروندا ايديق. بو، اؤزو-اؤزلوگونده ياخشي ايدي. آنجاق بو بيلگيلرين اؤز خالقيملا ايليشکيلريمي درينلشديرمک اوچون هچ بير ائتکيسي يوخ ايدي. دوشونورم کي، اينگيليس ديلينده اؤيرنديگيم ادبي اؤرنکلري اؤيرنمه سه  ايديم، هئچ ده دَيَرلي بير خزينه ايتيرمزديم. چونکو بو بيلگيلر مني اؤز توپلومومدان داها دا اوزاقلاشديريردي. آنجاق بو يئددي ايل سوره سينجه، قوجئرات ديلينده ريياضييات، کيميا، بيولوژي، سانسکريتجه و ديگر بيلگيلري اؤيرنسه ايديم، اؤز بيلگيلريمي توپلوموملا پايلاشما ايمکانلاريم داها گئنيش اولاردي. آنا ديليم اولان قوجئراتجاني آيرينتيلي بيچيمده اؤيرنه جک اولسايديم، وطنيمه خيدمت ائتمه اولاناقلاريم بير او قدر ده آرتاجاقدي. يازديقلاريمدان اينگيليس ديلينده مؤوجود اولان زنگين ادبيياتي آشاغيلاماق کيمي، بير سونوج چيخاريلماماليدير. «نجيس»لري ساوونماق اوچون ياييملاديغيم «هئريجئن» قزئتي نين سوتونلاري منيم اينگيليزجه يه اولان سايقيمين گؤسترگه سيدير. آنجاق هينديستاني قورتارماق اوچون اينگيليس ديلينده کي زنگين ادبيياتين نئجه تاثيري اولا بيلر؟ اينگيلتره نين ايليملي (معتدل) هاواسي نين هينديستانا تاثيري اولماديغي کيمي. ايقليم اؤزلليگي آچيسيندان اينگيلتره نين گئريسينده قالسا دا، هينديستان اؤز ايقليمينده اؤز ادبيياتي ايله پارلاماليدير. بيز و ائولادلاريميز اؤز ميراثيميزي ديريلديب قورماليييق. باشقا بير مدنييتي اؤيکونسک (تقليد ائتسک)، اؤز مدني ميراثيميزي داها دا يوخسول دوروما سوخاجاغيق. بيز ايدخال ائديلن بَسين (قيدا) ماللاري ايله بؤيويه بيلمريک. من ايسته ييرم کي، هينديستان اؤز آنا ديللري* آراجيليغي ايلله اينگيليس و ديگر ديللرده اولان زنگين ادبيياتلا ايليشکييه گيرسين. تاقورون اثرلرينده کي گؤزلليکلري گؤرمک اوچون بنقالجاني اؤيرنمَم شرط دئييل. من ياخشيجا ترجومه يولو ايله اونلاري اوخويورام. تولستويو اوخوماق اوچون قوجئرات گنجلري نين روس ديليني اؤيرنمه لري گرکمز. روس ادبيياتيني ترجومه يولويلا اوخويا بيلرلر. اينگيليسلرين دونيادا بؤيوک بير اوستونلوکلري وار. دونيانين ان ياخشي ادبيياتيني هاردا اولورسا اولسون، ياييميندان بير هفته سونرا ساده اينگيليس ديلينه ترجومه ائديرلر. شئکسپيرين و ميلتونون اثرلريني اوخويا بيلمم اوچون اينگيليس ديليني اؤيرنمَم نه يه لازيمدير؟ اؤيرنجيلردن بير قيسميني بو آماج اوچون ائييتمک چوخ ياخشي اولار. اونلار دونيانين موختليف يئرلرينده دَييشيک ديللرده ياييملانميش ادبي و فلسفي اثرلري هيند ديللرينه ترجومه ائده بيلرلر. اينگيلتره اؤنوموزه يانليش بير يول قويموش و بيز ده يانليشي دوغرو تصوور ائتمه يه آليشميشيق.  

  اونيوئرسيتئتلر اؤز خرجلريني اؤزلري تامين ائتمه ليدير. دؤولت، يالنيز اؤزونه لازيم اولان کادرلارين ائييتيمينه دستک اولماليدير. ديگر بيليم ساحه لري نين گليشمه سي اوچون دؤولت اؤزل موسسيسه لري تشويق ائتمه ليدير. ائييتيم ديليني زامان ايتيرمه دن دَييشديرمک گره کير. اينگيليس ديلي نين يئرينه يئرل ديللري جانلانديرماق لازيمدير. من اورتا اوخول و اونيوئرسيتئتده تحصيل آلماغا قارشي دئييلم. آنجاق اؤلکه ميزده اولان ائييتيم سيستئمينه قارشييام، قبول ائتميرم. ائييتيم سيستئمي هيند ديللريني تاريخدن سيلمه يه، اينگيليس ديليني اونلارين يئرينه اوتورتماغا چاليشماقدادير. منيم پلانلاريما گؤره اؤلکه ميزده داها ياخشي کيتابخانالار، لابوراتووارلار و آراشديرما مرکزلري اولماليدير. هينديستانا خيدمت ائتمک اوچون دَييشيک بيليم داللاريندا اوزمانلارا احتيياجيميز وار. بو اوزمانلار کسينليکله يابانجي ديلده دانيشماماليديرلار. خالقين ديلينده دانيشمالي و قازانديقلاري بيليم سرمايه سيني بو يوللا اؤز خالقلاري ايله پايلاشماليديرلار. بؤيله اولدوغوندا باشقالاريني تقليد ائتمک يئرينه گئرچک ياراديجيليق اؤلکه ميزده باشلار. سونوج گليرين ده ائشيتجه داغيتيمي ياپيلا بيلر.

  · هيند کولتورو بيزيم دؤنه ميميزده اولوشوم سورَجي ايچينده دير. هينديستانين يئني آيدينلاري بو گون يايقين اولان دَييشيک مدنييتلر توروندن اويقون و يئني بير ترکيب اولوشدوماغا چاليشيرلار. دونيادان تجريد اولموش، قاپيسيني باشقا مدنييتلره قاپاميش قاپالي مدنييتلر اوزون زامان آياقدا قالا بيلمزلر. بو گون هينديستاندا آرينميش هيند مدنييتي نين وارليغيندان دانيشماق دوغرو اولماز. گله جک، بيزيم چاليشمالاريميزي دَيَرلنديره جک. گله جک گؤستره جک کي، بيز هينديستان و بشرييت اوچون يارارلي اولموشوق، يوخسا يوخ.  

  · ائويمين اطرافينا بير ديوار هؤروب پنجره لريني گؤرونمز ائتمک ايستميرم. بوتون اؤلکه لرين کولتورلريندن ائويمين ايچينه کولکلر اسسين ايسته ييرم. آنجاق ان سرت کوله یين بيله، مني يئريمدن ترپه ده بيلمه سيني ايسته مزم. يوردومونون ادبي ذؤوقه صاحيب اولان قادينلاري نين و کيشيلري نين اينگيليسجه ني و يا باشقا ديللري ياخشيجا بيلمه لريني آرزو ائديرم. اونلاردان بکلنتيم بودور کي، اؤز بيلگي بيريکيملريني اؤلکه ميزله و دونيايلا پايلاشسينلار. آنجاق بير تک هينديستانلي نين بيله، اؤز آنا ديليني اونوتماسيني ايستميرم. هئچ بير هيند اؤز آنا ديلي ايله ايلگيلي آشاغيليق کومپلئکسي ايچينه گيرمه مه لي و آنا ديلي نين بيلگي و بيليم ديلي اولا بيلمه يه جگيني سانماماليدير. منجه، مذهب، قاپيلاري سرتجه قاپانميش زيندان دئييلدير.  

  · موسيقي وزن و نظم آنلاميندادير. موسيقي نين ائتکيسي ائلئکتريک تاثيرينه بنزر، درحال ائتکيلر و ايچگووَن اولوشدورار. آنجاق نه يازيق کي، موسيقي ده بير قروپ برهمنلرين کونترولوندا اولان شاستراها* کيمي ايمتييازلي بير قروپون نظارتي آلتيندادير. سؤزون مودئرن آنلاميندا هيند موسيقيسي اولوساللاشماميشدير. موسيقي اوخوللاريندا نوفوذوم اولسايدي، اولوسال ماهنيلارين خور شکلينده اوخونماسيني زورونلو ائدرديم. بو آماج دوغرولتوسوندا بؤيوک موسيقيچيلردن هر کونقره و کونفرانسدا موسيقي ائييتيمي وئرمه لريني ايسترديم.

  · بعضي پئداقوقلار (ائییتیمچیلر) گئنيش تاريخي تجروبه لردن يولا چيخاراق، موسيقي نين ايلک اوخوللاردا درسليک کيمي تدريس ائديلمه سيندن ياناديرلار. بو بو گؤروشه بوتون قلبيمله قاتيليرام. اليميزين ايشه ياتقينلاشماسي اوچون ائييتيمين قاچينيلماز اولدوغو کيمي، سسيميز ده بو بيچيم ائييتيلمه لي و ياتقينلاشماليدير. بدن ائييتيمي، ال ايشلري، رسسامليق و موسيقي اوخوللاردا درسليک حالينا گلمه ليديرلر. چوجوقلارين بو دوغرولتودا يئته نکلري نين اوزه چيخماسينا يارديم ائديلمه ليدير.  

  · گؤزلر، قولاقلار و ديل الدن ده اؤنمليديرلر. اوخوما، يازمادان اؤنجه و رسيم چيزمه حرفلرين يازيليشيندان داها اؤنجه اؤيره ديلمه ليدير. بو دوغال یؤنته م ايزله نيرسه، چوجوغون گليشمه سورعتي يوکسله جکدير. چوجوغون هم حرفلري و هم باشقا شئيلري اؤيرنمه سي گوجله نه جکدير.  

  · چئورمه بير ديوار هؤروب باشقالاريندان آيريلماق ايسته ديگيم سانيلماماليدير. آنجاق بؤيوک آلچاقکؤنوللولوکله بو گؤروشومو آچيقلاماق ايسته ييرم. اؤز کيمليگيميزي و کولتوروموزو ياخشي تانيييب و گليشمه سينده فعال اولدوغوموز زامان باشقالاري نين کولتورو آلقيشلانا بيلر. باشقا کولتورلري هئچ بير بيچيمده اولوسال کولتوردن اوستون بيلمه مک گره کير. باشقا کولتورلري دانماغي و يا آشاغيلاماغي منيم مذهبيم ياساقلاماقدادير. آيريجا، منيم اينانجيم اؤز کيمليگيمي و کولتورومو ياخشيجا تانيييب اؤزل و توپلومسال ياشاميمدا اونو اويقولامامي ايستمکده دير. بونون ترسي اولورسا، اؤز ميللي کيمليگيمين احتيياجلاري آچيسيندان من بير تورلو اينتيهار ائتميش اولوروم.

  · بيليم و بيلگي نين، يالنيزجا کيتاب اوخوماقلا الده ائديله جگي يانليش بير تصووردور. دوشونجه ائوريليشي نين (تکامولونون) ان سورعتلي يولو، ال ايشلريني علمي بيچيمده اؤيرنمکدير. اؤيرنجيلر اؤزلريني ايشچيلر يئرينه قويوب چاليشماغي باشارسالار، ايشسيزليک سورونو اؤز-اؤزونه چؤزوله جکدير.  

  · منجه، چوجوغا اؤيره ديلن بير چوخ بيلگيلرين شيفاهي اولاراق گئرچکلشمه سي داها وئريملي اولا بيلر. عومومي بيلگيلري اؤيرنمه دن اؤنجه، چوجوغو اليفبا اؤيرنمه يه زورلاساق، اونلاري حياتلاري نين ان موتلو چاغيندا بيلگيلري شيفاهي يوللا اؤيرنمه سئوينجيندن يوخسون بوراخاجاغيق.  

  ·ادبييات اؤيرنمک شخصي اخلاق دَيَرلريني بير سانتيم دا آرتيرا بيلمز. شخصييت يئتيشديرمه، شخصييتين اولقونلاشماسي ادبي ائييتيمله ايلگيلي دئييلدير، باشقاجا بير قونودور.  

  · ايلک اوخولون هينديستاندا پاراسيز اولماسي گرکديگينه اينانيرام. آيريجا، بو دؤنمده چوجوغا بير پئشه ده اؤيره ديلمه ليدير. بو تور ائييتيم چوجوغون روحي و بدني ايستعدادلاري نين پارلاماسينا يارديمچي اولا بيلر. ائييتيم اولاييندا ايقتيصادي عاميله ديقت ائتمک لازيمدير. ايلک گوندن چوجوغو ايقتيصادي ذهنييته صاحيب اولان اينسان کيمي ائييتمک لازيمدير. گئرچک ايقتيصاديياتين يوکسک اخلاق اؤلچولري ايله هئچ بير ضيدييتي يوخدور. گئرچک اخلاقي دوزه نين ده دوغرو اولان ايقتيصاديياتا احتيياجي واردير.  

  · هر چوجوقدا ال، بئيين و روحون عئيني سَوييه ده گليشمه سيندن يانايام. آنجاق ايندي اللر ايفليج دورومدا و روحلار باخيمسيزجا بوراخيلميشلار.  

  · چوجوقلار حيات گئرچکلري حاقدا ماراقلانديقلاريندا بيلديگيميز نه وارسا، هاميسيني سؤيلمه لي یيک. بيلمه ديگيميز بير شئي وارسا، اؤز بيلمزليگيميزي آچيقجا اعتيراف ائتمه لي یيک. سؤيله نيلمه مه سي گرکن بير شئي وارسا و چوجوق او حاقدا سورو سورورسا، چوجوق اوزَرينده او قدر کونترولوموز اولماليدير کي، او سوالي بير باشقاسيندان سورماماسي يولوندا اونو راضي سالماليييق. چوجوقلاري حياتين گئرچکلريندن اوزاق توتماماق گره کير. چوجوقلار بيزيم تصوور ائتديگيميزدن ده داها چوخ بيليرلر. چوجوق بير شئيي آنلامازسا، او قدر سوال سوروشار کي، اونو تام اولاراق آنلاميش اولسون. چوجوقدان گيزلين ساخلاماميز گرکن بير مؤوضوع وارسا، بو قونودا ديقتلي اولماليييق. اؤز يانليش ايشلريميزه چوجوق تانيق اولماماليدير. چوجوق بيزيم يانليش ايشلريميزه تانيق اولسا، اونو بيزدن دئييل، باشقا قايناقلاردان اؤيرنمه يه چاليشاجاق. بو دا چوجوغون گووه نيني پوزان اولايدير. بو اوزدن ده چوجوقدان گيزلين ساخلاياجاغيميز اؤزل ايشلريميزين چوجوق طرفيندن بيلينمه مه سينه، گؤرولمه مه سينه چاليشماليييق.  

  · عاغيللي آتا-آنا چوجوقلاري نين يانليش ياپمالارينا ايذن وئرر، بونو فاجيعه  کيمي گؤرمزلر. چوجوق اوچون ان آزيندان بير دفعه  بارماغيني يانديرماسي يارارليدير.  

  · جينسي شهوتيميزي گؤزوموزو قاپاماقلا کونترول آلتينا آلا بيلمريک. من گنج اوغلانلارين و قيزلارين جينسي اورقانلارين قوللانيمي قونوسوندا ائييتيلمه لريندن يانايام. من اؤزومه مخصوص یؤنته مله ائييتيملري منه تاپشيريلميش اولان چوجوقلاري بو قونودا بيلگيلنديرمه يه چاليشميشام. هم قيزلاري، هم ده اوغلانلاري. منيم طرفداري اولدوغوم جينسي ائييتيم، جينسي شهوته غاليب گله رک اونا اخلاقي اؤزلليکلر قازانديرماقدير. بو ائييتيم اؤز-اؤزونه حئيوان و اينسان آراسينداکي موقاييسه ده اينسانين اوستون اولدوغونو چوجوغا آنلاتماليدير. چوجوغا آنلاتماق گره کير کي، حئيوانلا اينسان آراسينداکي جينسي بنزرليک اينسانين حئيوان اولدوغو آنلامينا گلمز. اينساندا روح و اورک ده وار. اينسانين غورور دوياجاغي ساحه حئيوانلارلا اولان اورتاق نؤقطه لر دئييل، حئيواندان آيريلان نؤقطه لردير. کور ايچگودولريميز (غریزه لریمیز) اوزرينه عاغلين و منطيقين حاکيمييتي اولمازسا، اينساني اؤزلليکلريميزی اينکار ائديب حئيوان سوييه سينه ائنه ريک. اينساندا دويقو و سئوگيني حرکتلنديريب رهبرليک ائدن عاغيلدير. آنجاق حئيواندا روح هر زامان ياتميش دورومدادير. اينسان قلبيني اوياتماق، اصلینده اينسان روحونو اوياتماق و اينسان عاغليني اوياتماق دا ياخشي- پيسي آييرد ائتمک اوچون سئزگي گوجونو اوياتماقدير. بو گون بوتون موحيطيميز، کيتابلاريميز، فيکيرلريميز، داورانيشلاريميز بوتونويله سانکي حسابلانميش بير بيچيمده جينسي فعاليتلري تحريک ائتمه يه يؤنلميشدير. بو قورخونج باتاقليقدان اوزاقلاشماق آسان ايش دئييلدير. آنجاق هم اؤزوموزو، هم ده گنجلريميزي باتاقليقدان قوروماغی باشارساق دا، باشارماساق دا بو، بيزيم ميسسيونوموزدور.  

    15.01.2011