زولفو آديگؤزلوف
 

گونتای گنجالپ

 

 

  نئچه ياشيمين اولدوغونو خاطيرلايا بيلميرم. آنجاق چوخ اوشاق ياشدا ايديم. آتام اردبيلده درس اوخويان بؤيوک قارداشيمين يانينا گئتميشدي. دؤنمه سيني صبيرسيزليکله گؤزله ييرديم آتامين. دادلي شوکالاتلارلا دؤنه جکدي. شهرين نه اولدوغونو بيلميرديم. آنجاق دادلي شوکالاتلار خياليمدا شه هه ري گؤزلليک مکاني کيمي تصوير ائتميشدي. قارداشيمين اوردا ياشاماسينا سئوينيرديم. دوشونوردوم کي، ندن قارداشيم مني ده بو دادلي و دردسيز يئره آپارمير؟ دوشونوردوم کي، ندن آتام ائويميزه ته که رله کلر باغلاييب بير آوتوبوسا، بير يوک ماشينينا دؤنوشدوروب سوروب شه هه ره آپارمير ائويميزي؟ بو هاقدا آتامدان بير نئچه سوال دا سورموشدوم. آتام دا گولوب مني باغرينا باسيب اؤپموشدو. ايندي آتام دا قارداشيمين بولوندوغو او گؤزل يئره، اردبيله گئتميشدي.  

  بير گون آناملا بير يئرده آتلاريميزلا تارلادان ائويميزه دؤندوک. حَيَطه گيرر- گيرمز ائويميزدن سيرلي سس دويدوم. موسیقي سسي ايدي. ايلک دفعه  ايدي موسيقي سسي دويوردوم. آتدان ائنيب ائوه قاچديم. آتام مني باغرينا باسيب و «بالاما دادلي شوکالاتلارلا بيرگه بير ده سَسياز (ضبط صوت) آلميشام» دئدي. بو سيرلي و گؤزل گؤرونوملو شئيه ياخينلاشديم. اوخويوردو. هم راديو، هم ده سَسياز. قونوم- قونشو دا ييغيليب گلديلر کي، بو سسيازدان چيخان گؤزل سس ندير دئيه بيلسينلر. ائويميز دولموشدو آداملارلا. آتام سَسيازين کاسئتيني چيخاريب گؤستريردي: «باخين، بونون ايچيندن چيخير بوتون سسلر.» سونرا يئنه ده کاسئتي قويوردو سَسيازا، دينله ييرديک. اوخويانين آديني آتام اونوتموشدو. آنجاق بو سس هامي نين روحونو اوخشاييردي. ياي تعطيلينده قارداشيم کنده دؤندويونده بو اوخويانين آدي نين زولفو آديگؤزلوف اولدوغونو اؤيرَنه جکديم. سادجه بو اوخويانين دئييل، زامان کئچديکجه قارداشيمين يارديمي ايله باکي اوخويانلاريندان بير چوخ کاسئتيم اولاجاقدي. آنجاق ايلک سَس قدر داها سونراکي سسلر روحومون درينليکلريني ائتکيله مه يه جکدي. زولفو آديگؤزلوفون سسي چوجوقلوق خاطيره لريمله قايناييب قاريشيردي. يوخولاريمدا دا بعضن بو سسي ائشيديرديم. ائشيتديکجه ده چوجوقلوق دوشلريم اوزايلارين سونسوزلوغونا، سير دولو بير يئرلره يوکسه ليردي. زولفو آديگؤزلوفون سسي منيم معنوي ذؤوق آنلاييشيمي اولوشدوروردو. اؤيله سانيرديم کي، بير گون زولفو گليب مني آپاريب باکيني گزديريب گتيره جک. زولفونون اوخودوغو بوتون موغاملارين و ماهنيلارين سؤزلريني ازبرله ميشديم. هانسي سؤزو نئجه تلففوظ ائتمه سيني ده ازبرله ميشديم. بعضن اونون سسينه سسيمي بنزده رک موغاملاري اوخوماق ايسته ييرديم. يورولموردوم زولفونون سسيندن. قارداشيم دا زولفونون سسي حاققيندا فلسفي سؤزلر سؤيلردي. دونيالار قدر سئوديگيم قارداشيمين دَيَرلنديرديگي زولفونون سسي منيم اوچون داها دا اؤنملي اولوردو. قارداشيم هر سس حاققيندا بؤيله درين سؤزلر سؤيله مزدي. بؤيله جه زامان کئچيردي. من ياشا دولوردوم. زولفونون سسيندن ده بئزمه دن دينله ييرديم.  

***

  ايللر کئچدي. من آرتيق گنج آدام اولموشدوم. دوشونجه لريم درينله شيردي. ياشلانميش اولان بؤيوک قارداشيملا دوستلوق باغيميز چوخ درين ايدي. بو نجيب اينسان منه چوخ دَيَر وئريردي. بعضن ان ايبتيدایي ايشلرده بئله، منيمله مصلحتله شير، فيکيرلريمله حسابلاشيردي. او قدر گؤزل خاطيرلريميز وار ايدي کي. ايران-ايراق ساواشيندا يارالانديغيمدا اردبيلدن کورديستانا، مريوانا گلميشدي. اينسانين حياتيندا اونا دَيَر وئرن بيري نين اولماسي حياتي معنا ايله دولدورور. قارداشيم منه چوخ دَيَر وئريردي. مريواندا دا باشلادي زولفونون موغاملاريندان اوخوماغا. هم ده اونون نفه سي ايله سانکي. اؤزومو ساخلايا بيلمه ييب قارداشيما ساريلاراق آغلاميشديم هؤنکور- هؤنکور. چوجوقلوق خاطيره لريم ياديما دوشموشدو. آنام، رحمته گئتميش زحمتکئش آتام و چوجوق آرخاداشلاريم، داغلاريميز. اؤزومدن آسيلي اولماياراق «هئيدر بابايا سالام»دان بير نئچه بند ازبر سؤيله مه يه باشلاميشديم. قارداشيم منيم گؤز ياشلاريما دا چوخ دَيَر وئريردي. «آغلاماق گؤزل ايشدير. بؤيوک فوضولي ده يالنيزليغيندا چوخ آغلاميش. دويقوسالليغين زيروه سيدير. اينسانيلشمکدير» دئييردي. قارداشيم هر اولايين آرخاسينداکي درينليگي آنلاتماغا چاليشاردي. من ده اونو دريندن دينلرديم. من ده قارداشيما چوخ دَيَر وئريرديم. ايندي اونونلا يازيشديغيم مکتوبلارا باخيرام. هر بيري بير صنعت اثريدير. عسگرليکده اولدوغوم زامان يازديغي بير جومله هئچ بير زامان اونودولمور. «قارداشيم، اگر قلبيمي بيچاقلا يارسالار اينان کي، سنين تصويرين اوردا آچيقجا گؤرونر» يازميشدي

***

  1992— جي ايلده قارداشيم خرچنگ خسته ليگينه ياخالاندي 46 ياشيندا. چاره ميز هر يئردن کسيلميشدي. حکيملرين ائده بيله جگي بير ايش يوخ ايدي. اؤلومونو گؤزله ييرديک. دئييرديلر ساوالانين آرخاسيندا بير کند وار. اوردا بير شامان وارميش. تورکه چاره يولو ايله ساغالماز خسته ليکلري ساغالديرميش. آنام مني چاغيريب «گئت او شاماني تاپ. بلکه قارداشيني ساغالدار» دئدي. اردبيلدن اهره يولا دوشدوم. او کندين آديني ايندي اونوتموشام. اورايا آرابا گئتمه ديگي اوچون قالان يولو پيياده گئده سي اولدوم. داغلاردان، دره لردن کئچديم. گئديب کنده چاتديم. کند آداملاريندان سوروشدوم کي، بوردا بئله بير شامان وارميش، لوطفا مني اونونلا گؤروشدورون. شامانا وئرمک اوچون اوستومده بولجا پارا دا گؤتورموشدوم. آداملار دئديلر او رحمته گئتميش. باشيندا تالا قار گؤرونن ساوالانین زیروه سینه تيکيلدي گؤزلريم. اؤز-اؤزومه پيچيلداديم: «اولو داغ، بلکه سن بير مؤعجيزه  گؤستره سن، قارداشيما يارديم ائت لوطفا!» شامان آرخاسينجا گئتدييمي قارداشيما دئمه ميشديم. قارداشيم سورَکلي مني سوروشوب دورموش کي، هارا گئتميش؟ هر گئجه قارداشيمين خانيمي ايله بيرليکده نؤوبه ايله اوياق قاليرديق. گوندن گونه اريیيردي قارداشيم. آغري ايچينده ياواش-ياواش اؤلوردو. بعضن حالي نيسبتن دوزَلنده موغاملار حاققيندا دانيشيردي. «جاببار قارياغدي اوغلونون سسي بم، اورتا و زيللري اوخوماغا دا چاتير. آنجاق يعقوب مممدوو «منصورييه»ني چوخ گؤزل اوخويور. بوتون سس ايمکانلاري بوردا اورتايا چيخير. گئنيش سس ايمکانلاري دينله یيجيني دينله مه يه مجبور ائدير. گئرچک بير صنعت ده باخ بو دئمکدير. دينله یيجيني اؤز فضاسينا سالا بيلمه ليدير صنعت اثري» دئييردي.  

  او قدر ضعيفله ميشدي کي، سادجه بير دري بير سوموک قالميشدي. ديلي سؤز توتموردو. بير گئجه چوخ چتينليکله «زولفونون کاسئتيني قوي دينله يَک» دئدي. گئجه ياريسي ايدي. زولفونون کاسئتيني قويدوم. زولفو اوخويوردو. بير نئچه گئجه يوخوسوز قالماق مني يورموشدو. باشيمي قارداشيمين آياغي نين آلتيندا دوشه یين اوستونه قويوب اوزانميشديم. خانيمي دا يانيباشيندا ايدي. مني يوخو آپاردي. زولفونون سسي رؤيالاريمي قاريشديريردي. يوخو گؤروردوم. گؤردوم قارداشيمين باشيندان آغ-آپپاق سوت کيمي بير دومان آياقلارينا طرف ياييلير. آياقلارينا طرف يایيلديقجا، بو آغ دومان سيخيلير، کيچيليردي. گلدي، گلدي ساغ آياغي نين باش بارماغينا يئرلشدي. آرتيق بير آرپا قدر اولموشدو. سيخيليب آرپا قدر اولموشدو. سونرا دا بو آرپا بويدا اولموش آغ سيخيشميش دومان بيردن سورعتله قارداشيمين آياغي نين باش بارماغيندان چيخيب گئتدي، يوخ اولدو. بو زامان قارداشيمين خانيمي مني آغلايا-آغلايا اوياتدي: «اويان، قارداشين اؤلدو...» دئدي. ديکسينيب اويانديم. قارداشيم اؤلموشدو. زولفو آديگؤزلوف اوخويوردو:

«سؤيله اول سنگديله دورماسين آخير گلسين 

  گلمه سه ، اوستومه لوغمان گله اولماز چاره...»

                 او گئجه ياتديغيم اوچون اؤزومو باغيشلايا بيلميرم. سون نفه سينده قارداشيمي يالنيز بوراخميشديم

  دفن و ياس مراسيمي باشلاميشدي... 

    30.11.201010