پروفسور دوکتور جاواد هئيت

 

گونتای گنجالپ


   
دَيرلي اينسانلار حاققيندا يازي يازماق بير رومان يازماقدان داها چتيندير. چونکو گئرچک بير دَيَري يانسيتماق چتين ايشدير. «دَير» اولوشدورما، «دَير»لي اولما هر زامان بؤيوک ديره نيش و موجاديله گرکديرميشدير. هئچ بير دَيَر بيردن- بيره وار اولماز، وار ائديلمز. اوزون بير سورجين و ائوريليمين اورونو اولاراق بير «دَيَر» آشاما-آشاما، ائوره-ائوره و ذره-ذره اولوشار. اؤزلليکله اؤزگورلوگون اولماديغي يا دا اؤزگورلوگون قيسيتلي اولدوغو اورتاملاردا دَيَر ايجاد ائتمک، دَيَرلي اولماق بؤيوک اؤزوئريليک گرکديرَر. چونکو «اؤزگورلوک» يارارلي اولما، وئريملي اولما اولاناقلاريني گئنيشلتمک دئمکدير. بو اوزدن ده ديرلي اولما يولونداکي چابالاييشلار ديرک اولاراق هم ده اؤزگورلوک يولوندا ساواشيم آنلاميندادير. آنجاق بو ساواشيم اينتئللئکتوال پلاندا گئرچکله شر. ساواش، باريش اوغروندا اولور. بو ساواش، اؤزگور دوشونجه نين تقليده و قارانليقلارا قارشي چيخماسيدير. باريش، «وارليق»لارين کندي ايلکه لري اساسيندا اويوملو گليشمه سيدير. «وارليق»لارين اوچورولماسي، تخريبي وار ايسه، باريش دا مومکون اولاماز. دَيَرلي اينسانين ايجاد ائتديگي دَيَر کندي بيرئيسل ياشامي ايله سينيرلي قالماز. توپلومسال ياشامي، اولوسال تاريخي و اينسانليغين اورتاق ائوريليشيني ده دريندن ائتکيلر. اولوسلارين کندي دَيَرلي اينسانلاريندان ائتکيله نيمي آيدينليغا دوغرو ايره ليله مه يه يولا آچار. ايشيغي گؤسترن آيدينلار اولور. چونکو اولوسلار کندي اردملي و اؤرنک شخصييتلري نين تيمثاليندا تمثيل اولورلار. بو آچيدان بعضي اردَملي کيشيلرين گئرچکدن بير ميلت قدر دَيَري وار. بو اردملي اينسانلاريميزين ان اؤنمليلريندن بيري حاققيندا ناچيز گؤروشلريمي بيلديرمک، يازماق ايسته ييرم. «ناچيز» دئييرم چونکو دوکتور هئيت دوهاسيني و سئوگسيني، دوکتور هئيتين اينسان هاقلاري فلسفه سيني، اينسانسئورليگيني و عدالت آنلاييشيني آيرينتيلاري ايله آنلادا بيلمک منيم ضعيف قلميمين عؤهده سيندن گلمز. سادجه من تورک اولوسونا منسوب اولان بير بيرئي اولاراق بويونومدا و ويجدانيمدا اولان دوکتور هئيته قارشي وفا بورجومو اؤدمک ايسته ييرم. دوکتور هئيت بوتون ذره لري ايله تورک اولوسونون معنويياتيندا، ديلينده، آرزولاريندا و اولکولرينده يئرلشميشدير. بؤيله سينه بير اولو اينسان حاققيندا گؤروشلريمي، دويقولاريمي بيليديرمک ايسته ييرم. بؤيوک يوکسليشيميزين و وار اولوشوموزون سببکاري حاققيندا يازماق ايسته ييرم.

**

    ايراندا دئوريمين يارارلي طرفلري ده اولدو. تورکلر آچيسيندان يارارسيز طرفي نين داها دا قابارماسي نين سببي ايراندا ياشايان تورکلوگون ميللي کيمليکدن، ميللي بيلينجدن يوخسون اولماسي ايدي. بو يوخسونلوق اوزوندن چوخ فورصتلر الدن چيخميشدير. يوخسا اينقيلاب سونراسي ميللي هاقلاريميزا چاتا بيلرديک. آنجاق بو ايستک يولوندا هئچ بير توپلومسال دئوينيم اولمادي. اولوسال کيمليگين يوکسليشي دوغرولتوسوندا بير داياناق اکسه ني (مئحوري) يوخ ايدي. نه اوزاق کئچميشده اولموشدور نه ده ياخين کئچميشده. بو داياناق اکسه نيني اينشاء ائتمک گره کيردي. ايشته دوکتور هئيت دوهاسي ايران تورکلري نين عاغليندا مدني بير دئوريم گئرچکلشديرمک اوچون اورتايا چيخميشدير. دَيَرلي اولماق وار اولان دَيَرلري بير چاتي آلتيندا مرکزلشديريب بوتونلشديرمک دئييلدير يالنيزجا. وار اولاني دوزَنلي بيلگي حالينا گتيرمه نين ياني سيرا چاغداشلاشما اولاناقلاريني ساغلاماق، يوخارييا دوغرو يوکسليشين يولونو آچماقدير هم ده. دوکتور هئيت بو باخيمدان بير فرد کيمي دئييل، بير نئچه ايستعدادلي فرد کيمي فعاليت گؤسترميشدير. سويوق ساواش دؤنَمي نين ايدئولوژيلر ساواشي اولدوغو بلليدير. آنجاق زامانين اؤته سينه يوکسلنلر بو دؤنَمين آلداديجي، کئچيجي اولدوغونو آنلايابيليرديلر. جاواد هئيت بونو آنلاديغيندان، هم ده چوخ دريندن آنلاديغيندان «زامان»ين اؤته سينده کي احتيياجلارا گؤره داورانميشدير. يعني بير اولوسون تاريخده وارولوش تمللريني و ايلکه لريني گؤز اؤنونده بولوندورموشدو. سويوق ساواش دؤنمينده مينلرجه اينسانيميز ساغ- سول ايدئولوژيلر يولوندا اؤلدورولدولر. هم ده بؤيوک جسارت گؤستره رک اؤلوردولر. ايچريگي اولمايان بو جسارت ايراندا جايديريجي سوسيال پسيکولوژي اولوشدورموشدو. تورک ميللي کيمليگي يولوندا چاليشانلارا آشاغيلاييجيليق آنلاميندا «پانتورکيست»، «تورکييه جاسوسو» دئييرديلر. آنجاق زامانين ايره ليله مه سي ياواش-ياواش گئرچکلري اورتايا چيخاراجاقدي.

      اينقيلاب اولدوغوندا من چوخ آشاغي ياشدا ايديم. بؤيودوکچه گؤزومون اؤنونده جريان ائدن اولايلارا تانيق اولدوردوم. تورلو- تورلو ايدئولوژيلردن ائتکيلنمه مک مومکون دئييلدي. ائتکيله نيم دؤنَمي دويقوسال و اوسسال پلاندا بيتمه ديکجه، ائتکيله مک اولاناقسيز اولور البتته. اوخويا بيلمک اوچون شهره کؤچموشدوک و شهر حياتينا باشلاميشديم. شهرلرين کيتاب ماغازالاريندا هر دفعه گؤزلريم ويترينده مينلرجه فارسجا کيتابين ايچينده بير تک تورکچه «وارليق» درگيسينه توخوندوغوندا ايچيمده بيلينمز سورولار شکيلله نيردي. اؤيرَنجي حياتيمداکي ماددي عکسيکليک کيتاب و درگي آلماغا ايذن وئرمزدي. بو اوزدن ده درگيلرين بير سوره سونرا ايکينجي الدن داها اوجوز ساتيلديغي زاماني بکلرديم. بؤيله جه منيم اوچون حئيثييت اؤرنگي اولان دوکتور هئيتله تانيش اولوردوم اوزاقدان-اوزاغا. تانيش اولدوقجا دا ايلگينج اولايلارلا قارشيلاشيرديم. بير فرد اولان جاواد هئيته قارشي بوتون ايدئولوژيک اؤرگوتلر، دؤولت دوزه نينده گئنيش ايمکانلاري اللرينده بولوندوران شخصلر و حتّی دؤولت اؤزو ده قارشي ايدي. کيمليگيني ياخشي تانيماديغيم جاواد هئيتي ميتولوژيلرين قهرمانلارينا بنزه ديرديم اؤز چوجوقلوق خياللاريمدا. بو قدر انگللره قارشي نئجه چيخا بيلير، نئجه چيخارا بيلير بو درگيني کسينتيسيز اولاراق؟ عرب اليفباسيندا چيخان و بيزلر اوچون اوخونماسي چوخ آسان اولان بو درگي واسيطه سي ايله تورک ديلي نين قراماتيکاسي ايله، شعر صنعتي ايله، تورک تاريخي ايله، تورکييه نين و آذربايجانين ميللي شخصييتلري ايله تانيش اولوردوم. بو اوزدن ده حياتيمدا ايلک اؤيرتمه نيم وارليق درگيسي اولموشدو. ميللي دويقولاريم گليشديکجه اردبيلده يالنيزليق حيسس ائديرديم. شعرلريمي اوخوياجاق بيريسي يوخ ايدي. آنجاق «وارليق» درگيسينده بعضي آدلارلا تانيش اولوردوم. تانيش اولدوقجا دا يانليزليق دويقولاريم گئدريلميش اولوردو.

      درگي نين آدي نين «وارليق» اولماسي چوخ اؤنملي ايدي. چونکو «وارليق» فلسفي بير قاورامدير. درين آنلامي وار. بوتونلشديريجيدير. تورک کيمليگي اؤزونو هم اؤزگون بير «وارليق» هم ده «وارليقلار»ين بيرَشيمينده (ترکيبينده) کنديسيني گؤسترميش اولوردو. بو درگي اونودولموش اينسانلارا دَيَر و مورال وئره رک، اونلاري توپلومون سايقين اينسانلارينا چئويريردي. شهرييار «هئيدر بابا»ني يازديقدان سونرا اونوتدورولماغا چاليشيرليردي. بيليم دونياسيندا اونلنميش جاواد هئيت کيمي بير اينسان شهرييارا مورال وئره رک اونون هم تورکچه يازماسيني تشويق ائديردي، هم ده شاعيرين دَيَري نين هانسي سئويملي بير آشامادا اولدوغونو گؤسترميش اولوردو. شهرييار ياراديجيليغيني «وارليق» درگيسي اؤودوکچه يئني شعرلر شاعير طرفيندن ايشيق اوزو گؤروردو. «وارليق» درگيسي نين بو نجابتلي توتومونو شهرييار گؤزل بير شعری ايله اؤوه جکدی:

  «هر چند قورتولماق هله يوخ دارليغيميزدان، 

  آنجاق بير آزادليق دوغولوب وارليغيميزدان. 

   «وارليق» نه بيزيم تکجه آزادليق قوشوموزدور، 

  بير موژده ده وئرميش بيزه همکارليغيميزدان.  

  به-به، نه شيرين ديللي، بو جنّت قوشو طوطي، 

  قندين آليپ ايلهام ايله ديندارليغيميزدان.  

  ديل آچمادا کارليق دا گئدر، کورلوغوموز دا، 

  چون لالليغيميز دوغموش ايدي کارليغيميزدان.  

  دوشمن بيزي البير گؤره، تسليم اولو ناچار، 

  تسليم اولوروق دوشمنه ناچارليغيميزدان.  

  هر اينقيلابين وور-ييخي سون بنناليق ايستر، 

  دستور گرک آلماق داها مئعمارليغيميزدان.  

  هوشيار اولاسيز، دوشمني مغلوب ائده جکسيز، 

  دوشمنلريميز قورخورو هوشيارليغيميزدان.  

  بيرليک يارادين، سؤز بير اولا بيز کيشيلرده، 

  يوخلوقلاريميز دا بيته جک «وارليق»يميزدان.»

     سهند، هميد نوطقي، فرزانه کيمي شاعيرلر و آراشديرماجيلار، دوشونجه سي ايدئولوژيلرين قارانليقلارينا گؤمولموش تورک توپلومو اوچون بؤيوک بير صبيرله تانيديليردي. من گنجليک ياشيما گيرديکچه بيلگيسل احتيياجلاريم دا آرتيردي. دوکتور هئيتين شخصييتي حاققيندا بيلگيلريم ده آرتيردي. تبريزين سويلو عايله لريندن اولان بؤيوک ايراده لي بو اينسانا ايچدن-ايچه معنوي باغليليق هيسس ائديرديم ياخيندان بولوشوب حضوروندان فيضياب اولماغيم مومکون اولماسا دا. شهرييارين باکي شاعيرلرينه، باکي شاعيرلري نين شهرييارا يازديقلاري مکتوبلار ايراندا ياشايان تورکلرين «آيريليق»، «هسرت» و «قوووشما» دويقولاريني ائستئتيک بيچيمده گونجللشديرير، درينلشديريردي. دوکتور هئيت، سويوق ساواشين ان قاتي واختيندا طيبب بيلگيلري نين گوجو ايله گونئي و قوزئي آذربايجان آراسيندا معنوي ايليشکي برقرار ائده بيلميشدي. موسکووايا ائتديگي علمي سفرلري ايله و اورادا دوکتور نورالدين رضايئو کيمي عاليملرله تانيش اولماقلا گئرييه دؤندويونده يئني بيلگيلر، يئني خبرلر و ادبي معلوماتلارلا دؤنوردو. بوتون بو ايليشکيلر گله جکده بؤيوک آيدينلانما پروژه سي نين آلتياپيسيني اولوشدوراجاقدي. بو ايليشکيلر اورتاميندا بختييار واهابزاده کيمي ياخشي شاعيرلريميزين اثرلري گونئي آذربايجاندا و ايراندا بيلينه جکدي. بختييار واهابزاده، پروفئسسور دوکتور جاواد هئيتين علمي و معنوي فعاليتلريني «بيچاق و قلم» آدلي شعرينده دَيَرلنديرميشدي. واهابزاده نين شعرلري «وارليق» درگيسينده ايرانداکي اوخوجولاري دا ائتکيله يه جکدي. «وارليق» درگيسي نين هانسي نؤمره سينده اولدوغونو اونوتدوغوم واهابزاده نين بير شعري او زامان منيم ميللي دوشونجمه تکان وئرميشدي. او زامان بو شعري ازبرله ميشديم و هئچ بير زامان دا ياديمدان چيخماز:

 «فيلين آياغينا هله کؤرپه يکن، 

  زنجيرلي، قيفيللي قاندال ووردولار. 

  نييه؟ چونکو اونون گله جگيندن، 

  آغير ضربه سيندن چوخ قورخوردولار. 

  * 

  گونلر آيا دؤندو، آيلار ايل اولدو، 

  بؤيودو بالا فيل يئکه فيل اولدو. 

  * 

  او ائله بيلدي کي، ائله ساندي کي،  

  بزکدير، زيينتدير قانداللار فيله. 

  او ائله بيلدي کي، ائله قاندی کي، 

  دده- باباسي دا ياشارميش بئله. 

  * 

  اونو اينجيتمه دي بو توتساق حالي 

  يقين کي، بو منيم حاققيمدير دئدي. 

  فيل اؤز آياغيندا گؤردو قاندالي، 

  محبوس اولدوغونو قانا بيلمه دي. 

  * 

  ضررسيز حئيواندير گؤردولر بو فيل، 

  آزاد ائيله ديلر اونو زنجيردن. 

  آنجاق ائله بيل کي، او، هئچ فيل دئييل، 

  بير آدديم آتمادي دوردوغو يئردن. 

  * 

  يئري، يئري دئيه ووردولار اونو، 

  قالخمادي، قامچييا باشيني اَيدي. 

  آخي آزادليغين نه اولدوغونو، 

  فيل هاردان بيله يدي، فيل نه بيله يدي؟! 

    بيز بو بيلگيلري بير تک شخصييتين حسابينا الده ائده بيليرديک: جاواد هئيتين.  

     دوکتور هئيت، حياتيني ايدئولوژيلر يولوندا فدا ائدن تورک گنجلري اوچون چوخ آجيميشدي. اونلارين بعضيلري پهلوي رئژيمي ايله سيلاحلي ساواشدا يارالانيرديلار. بو يارالانانلاردان بير نئچه سي نين ياراسيني دوکتور هئيت سارميشدي. بونلاردان بيري ده گنج و ايستعدادلي شاعيريميز اوختاي اولموشدور. اوختايين ليريک شعرلري بو گنج آدامين ايچينده نه قدر درين سئوگي نين وار اولدوغونو گؤسترمکده دير. اوختاي قيسا عؤمرونده تورک ديلينده بير شعر کيتابي يازا بيلميشدي. «من محبت يوللاريندا— جان قويماغا يارانميشام» سؤيله ين اوختاي گئرچکدن ده ياشاميني اينانديغي ايدئولوژي يولوندا قوربان وئرميشدي. اوختايين سون آنلاريني دوکتور هئيت گؤرموش، اونون يارالاريني سارميشدي. ايراندا دئوريم اولدوقدان سونرا دوکتور هئيت اوختايلا اولان خاطيرلريني فارس ديلينده ياخشي رومانلار، تورک ديلينده ده بعضي شعرلر يازان يازار رضا براهنييه آنلاتميشدي. دوکتور هئيت و اوختايين خسته خانادا بولوشمالاري رضا براهني نين يازديغي «اؤلدورولنلرين شرقيسي» آدلي روماندا اؤز عکسيني تاپميشدير. بو روماندا دوکتور جاواد هئيت، دوکتور جودي کيمي تصوير ائديلميشدير. ايشته بؤيله جه دوکتور هئيت توپلومسال و اينتئللئکتوال ياشامیميزين بوتون قاتمانلاريندا يئرلشميشدي. جاواد هئيتي ايختيصاصينا گؤره حکيم کيمي تانيييريق. آنجاق او، ديلچي، تاريخچي، ژورناليست، فيلسوف کيمي ده بيلينمکده دير. فلسفي اثرلر يازديغيني داها سونرا ياخيندان تانيش اولدوغوموز زامان اؤيرنه جکديم. بو فلسفی اثرلر هله ياييملانماميشدير.

     سويوق ساواش بيتميشدي. بير چوخ ايدئولوژيلر کنديليگيندن بو ساواشين بيتيمي ايله ائش زاماندا تاريخه گؤمولدولر. بو زامان دوکتور هئيتين گؤردوکلري ايشلر اؤز نتيجه سيني گؤسترمه يه باشلاميشدي. ميللي کيمليگين درکي يولوندا دوکتور به يين اون ايللر ايچينده اولوشدوردوغو قايناقلار و بيلگيلر اليميزين آلتيندايدي. دوکتور هئيتي يئنيدن کشف ائديرديک. آنجاق سويوق ساواشين بيتيمي ده بيزه آجيلار گتيردي. قاراباغ ساواشي باشلاميشدي. ساوونماسيز، سيلاهسيز و يالنيز اولان آذربايجانا ائرمنيلر سالديرير اينسانلاري آمانسيزجا اؤلدوروردولر. ائرمني- روس بيرليکلري نين اورتاق سالديريسي خوجالي اولاييندا وحشيليگين زيروه سينه چاتميشدي. او زامان من باکييا يئني گلميشديم. ايزديحاملاردا تاريخدن آز-چوخ خبري اولان 90-80-70 ياش آراسيندا ناراحات کيشيلرين اؤز-اؤزونه «انور پاشا»، «نورو پاشا» پيچيلداديقلاريني دويوردوم. بؤيوک روحلاردان ايمداد بکلنتيسي وار ايدي. تام بو سيرادا دوکتور هئيتين تورکييه جومهورييتي نين باشباکاني سولئيمان دمرله يازديغي آچيق مکتوب ياييملاندي. دوکتور بئي خوجالي قيرغينينا ايشاره ائدير و ندن تورکیه نین سوسقون دوردوغونو سوروردو.  او زامان دوکتور هئيتين بو مکتوبو چوخ تاثيرلي اولدو. ان آزيندان پروفسور دوکتور جاواد هئيتين نئجه ويجدانلي بير تورک اولدوغو تورک تاريخي اوچون بللي اولدو. ايللر سونرا دوکتور بئيله ياخيندان گؤروشوب بولجا صؤحبتيميز اولدو. دوکتور بئي بو مکتوبلا باغلي بونلاري سؤيله ييردي ايچي ياناراق: 

    «خوجالي فاجيعه سيني ائشيتديگيمده حياتيمدا هئچ بير زامان اؤرنگي گؤرونمه ميش روحي سارسينتي ياشاديم. گؤزلريمدن ياش اؤز-اؤزونه آخيب گئديردي. نه ائده بيلرديم؟ تورکييه بؤيوک ائلچيسيني آراديم تئهراندا. گؤروش ايسته ديم. گئتديم گؤروشونه. يوکسک سسله ائلچي ايله دانيشيرديم. چوخ گرگين ايديم. او دا راحاتسيز ايدي. ائلچي ده راحاتسيز ايدي و مني آنلاييردي. سونرا تکليف ائتدي کي، سولئيمان دمرله بير مکتوب يازيم.» دوکتور هئيت بو سؤزلري دانيشارکن سانکي خوجالي فاجيعه سي نين آجيلاريني يئنيدن ياشارجاسينا گؤرونوردو. من ايسه، عصريميزين و تاريخيميزين بو بؤيوک اينساني ايله ياخيندان دانيشمانين حضورو ايچينده ايديم.  

    آزربايجاندا و تورکييه ده دوکتور هئيتين بير چوخ علمي کونفئرانسلارينا قاتيلديم. بو کونفئرانسلاردا دوکتورون سسيني ائشيتديگيمده هر زامان دريندن دويقولانديم. بعضن گؤز ياشلاريم ذؤوقلو بير شکيلده اؤز-اؤزونه آخي وئريردي. دوکتور هئيتين سسي چوخ ائتکيله یيجيدير. چوخ اوزاقلاردان گلير، اوردان، تاريخين و گله جگين اوراسیندان، درينليگيندن. کاشقارليدان، نوايدن، فوضوليدن، ديلدن و تاريخدن دانيشديغيندا سانکي کاشقارلي نين کندي سسيني دويار کيمي اولوردوم. يا دا بيلينمز ارميش بير تورک بيلگه سي نين سسيني. بير کره سينده کنديلرينه «اوستاد، سيزين بو سئوگي و بيلگي دولو سسينيزي دويماق منه معنوي حضور گتيرير. چوخ دويقولانيرام.» سؤيله ديم. 

    بو گون بو دَيَرلي اينسانين دوغوم گونودور. 85 ايل وئريملي و سئوگي دولو بير ياشام. قلبيميزده سن بؤيوک اوستاد. 

  25.05.2010