شعيرلر (قوشمالار)

 

سن اوسان، منده بويام

 

پروفئسور دوقتور محمد تقی زهتابی

سو دئييب دير منه اوولده آنام،    آب کی يوخ

يوخو اؤيرتدی اوشاقليقدا منه، خواب کی يوخ

ايلک دفعه کی چؤره ک وئردی منه، نان دئمه دی

ازليندن منه دوزدانه،  نمکدان دئمه دی

آنام اختر دئمه ييب ديرمنه، اولدوز دئييب او

سو دوناندا دئمه ييب يخ دی بالا، بوز دئييب او

قاردئييب، برف دئمه ييب، دست دئمه ييب، ال دئييب او

منه هئچ واخت بيا سؤيله مه ييب، گل دئييب او

ياخشی خاطيرلاييرام، ياز گونو آخشام چاغی لار

باخچانين گون چيخانينداکی ايليق گون ياييلار

گلمه سن گر، باجينين آستاجا زولفون دارارام

او دئمه زدی کی: بيا شانه زنم بر سر تو

گر نيايی بزنم شانه سر خواهر تو

بلی، داش ياغسادا گويدن، سن اوسان، منده بويام

وار سنين باشقا آنان،  واردی منيم باشقا آنام

اؤزومه مخصوص اولان باشقا ائليم واردی منيم

ائليمه مخصوص اولان، باشقا ديليم واردی منيم

ايسته سن قارداش اولاق، بير ياشاياق، بيرليک ائده ک

وئريبن قوق- قولا بوندان سورا، بير يولدا گئده ک

اولا اؤزگه کولک لرله گره ک آخماياسان

ثانيا وارليغيما، خالقيما خور باخماياسان

يوخسا گر زور دئيه سن، ميللتيمی خوار ائده سن

گون گلر، صفحه چؤنر، مجبور اولارسان گئده سن.

تبريز 22 آذر 1325

 

 

 

بایرام اولاجاقدیر

 کريم ماماغانلی

غم چکمه کؤنول قیش گئده بایرام اولاجاقدیر

یاز قویسا  قدم  بیر گؤزل  ایّام  اولاجاقدیر

ایلنجه ده  مئی  گزدیره جک  اورتادا ساقی

غملر داغیلیب  الده  قیزیل  جام اولاجاقدیر

چال، سؤیله، سئوین قیش گئده بایرام اولاجاقدیر

 

گوللر آچاجاق  یوردوموزون  چنلی بئلینده                                

تورکون بالاسی درس آلاجاق تورکی دیلینده           

باش  قالدیراجاق  اورمو، سراب، اردبیلینده             

شئعرایله  ادب  دریاسی  پندام  اولاجاقدیر             

چال، سؤیله، سئوین قیش گئده بایرام اولاجاقدیر                                       

یاز گلمه ده دیر قارلی سویوق چیلله نه لازیم

تورکجه  دانیشاندا بیر اوشاق  سیلله نه لازیم

مین فیتنه، اویون شانلی- شیرین دیلله نه لازیم

بسدیردا!  الیف  قد  نه قده ر لام  اولاجاقدیر

غم چکمه کؤنول قیش گئده بایرام اولاجاقدیر

 

غم چکمه ظفر طبلینی ارک اوسته  چالارسان                         

ائلدن سس اوجالدیقجا او سسدن گوج آلارسان                      

دیواندا  قورارسان  شووینستدن  اؤج آلارسان         

ساتقینلار اوگون  گؤر نئجه  بدنام  اولاجاقدیر                            

غم چکمه کؤنول  قیش گئده بایرام اولاجاقدیر                           

موردار بو قارانلیق  ابدی  شام  اولابیلمز

یوردومدا  مارال اؤزگه لره رام اولابیلمز

بوندان  سورا  آذر بالاسی  خام  اولابیلمز

دیغلار آنا گؤرسه  بالاسی خام اولاجاقدیر

یوخ قوخما آنا، قیش گئده بایرام اولاجاقدیر

 

سورگونده سن ائی خسته قوش اووهامدان ال چک

گل حاققا دییک حاق، پیسه پیس، گرچه یه گرچک  

بیرلیکده  ظفر وار آتالار سؤیله دی گؤیچک              

بیرلشمه سه  ائللر  یئنه  ناکام  اولاجاقدیر                              

گل بیرلشه لیم، قیش گئده بایرام اولاجاقدیر                                             

تورپاق اویانیر سنده  اویان یول تانی  قارداش

وورما  بو قده ر اؤز کؤکونه  بالتانی  قارداش

تورک اولماسا گر اؤز ائوینین سولطانی قارداش

نه تئل  سوساجاقدیر،  نه دیل  آرام اولاجاقدیر

آنجاق  گؤرورم  قیش گئده  بایرام  اولاجاقدیر

 

دوستو تانیساق دونیادا  بیز اولماریق ایتگین

دوشمانی  قانارکن اونا  بیز باغلییاریق کین            

مین مرتبه اولسون  بیزه ده  لعنت و نیفرین

بیزلرده  اگر ذرره جه  اووهام  اولاجاقدیر

یوخ اولمویاجاق، قیش گئده بایرام اولاجاقدیر

 

***

  نه وارکی؟

اسماعيل اولکر

بير اوجاق تيکه جک سن!

سؤندورمه يه نه وار کی؟

بير آغاج اکه جه کسن !

سينديرماغا نه وارکی؟

 

دادا- داد  وئرجک سن،

کوله، اود وئره جک سن،

قؤل- گاناد وئره جک سن!

سؤندورمه يه نه وار کی؟

 

دورمادان واراجاقسان!

موراد ساراجاقسان،

يان- يانا دوراجاقسان!

يان دورماغا نه وار کی؟

 

قورتولماغا  بوخوودان.

آزالتمالی بو توودان!

های داد سالييب آلوودان،

گئن دورماغا نه وار کی؟

 

گولوش اولاق دوداقدا،

اوپوش اولاق ياناقدا،

باخيشلار آياقدا،

دوندورماغا نه وارکی؟

 

گؤروش منله، گؤر منی،

باريش منله، سار منی!

حاضيرلانميش خرمنی،

يانديرماغا نه وارکی؟

 

İşarə

Aşağıda dərc olan  bayatılar  hörmətli soydaşımız, Naser Səadət-dən  Varliğin səsi dərgisinə çatmışdır.  Naser bəy  Almanıyanin Düsüldüf şahərində yaşayir və inşaat mühəndisi vəzifəsində çalışarkən, öz Ana dili Azərbaycan turkcəsində şeir yazmaqlada məşğuldur. Dərgimiz adina Naser bəyə bu nəcib işdə yuksək başarilar diləyirik.    Varlığın səsi

 

Bayatilar

Su gəlir lilləndirir,
Çəməni gülləndirir,
Mən özüm dillənmirəm,
Dərd məni dilləndirir.

Bu bağlar haram bağlar,
Gülü yox dərəm bağlar,
Zaman belə getsə,
Ürəyim vərəm bağlar.

Dağlar, mənə qar göndər,
Bağlarından bar göndər,
Ya dərdimə şərik ol,
Ya dərmanin var göndər.

Yaralı yaram nəir?
Qəmilə aram nədir?
Bir dərdə saldın məni,
Çəkməsəm çaram nədir?

 Əlimdə ələmim var,
Qizildan qələmim var,
Yaxından görənmirəm,
Uzaqdan salamım var.

Tut ağaci qarmaqdir,
Tutu barmaq dərməkdir.
Sevgilim küsüb gedir,
Əlacim yalmarmaqdir.

Quşum uçdi tüləkdən,
Qolum sindi biləkdən,
Mənimki belə gəldi,
Çərxi dönmuş fələkdən.

Bu dağlar kömürdəndir,
Gedən gün ömürdəndir,
Fələyin bir guşu var,
Dümdüyu dəmirdəndir

Mən öldüm ağlamaqdan,
Ərxə su bağlamaqdan,
Dava- dərman qalmadı
Yarama bağlamaqdan.

Bostanda tağım ağlar,
Qəmdən yarpağım ağlar,
Sağam özum ağlaram,
Ölsə torpağım ağlar.

Ürəkdə yarasizlar,
Dərdsizlər yarasizlar,
Yaralının dərdini,
Nə bilsin yarasizlar.

Əzizim qazan ağlar,
Od yana qazan ağlar,
Qurbət yerdə plənin,
Qəbrini qazan ağlar.

Camalın bənzir aya,
Ay doğdu düşdu çaya,
Cava ömrüm çürüdu,
Günləri saya- saya.

Bu dağı atılaydım,
Qul olub satılaydim,
Vəfasizlar əlindən,
Öləydim qurtulaydım.

Bu dağa dolu düşər,
Qar yağar dolu duşər,
Qəbrim yol ustə qazın,
Yarımın yolu düşər.

Açıq qoy pəncərəni,
Gözüm görsün gələni,
Necə qəbrə qoyarlar,
Yar dərdindən öləni.

Baxcada bar ağlasın,
Yel-yağış qar ağlasın,
Səni məndən ayiran,
Ah çəksin zar ağlasın.

Əzizim dərd alana,
Gəl gedək dərd alana,
Həkim- təbib neynəsin,
Ürəyin qan alana.

Dağ başını qar alıb,
Baxçaları bar alıb,
Namərd, alma canımı,
Bir canım var yar yar alıb.

Gecənin ayına bax,
Ulduzun sayına bax,
Yar yolunda can qoydum,
Verdiyi payına bax.       

***