اوستاد حصاری نين مراسميندن چکيلن شکيللردن وچيخيشلاردان بير نئچه نمونه  

Proqramin aparıcıları: 1- Gulnarə Məməd ova 2- Mir Sadiq Haşimi

Gulnarə:

Əziz qonaqlarimiz, əvvəlcə haminizin axşami xeyir olsun və bu gunku bu əlamətdar tədbirə XOŞ GƏLMISINIZ deyirik!

 

MirSadiq:

Hormətli qonaqlarimiz, sizi hamimiz ucun boyuk əhəmiyyəti olan belə bir gecədə aramizda gorməyə çox sevinirik və bir daha haminiza XOŞ GƏLIB SƏFALAR GƏTIRMISINIZ deyirik!)

G:

Bu gun hamiliqla buraya çox gozəl bir səbəb uçun yiğişmişiq: Guneydəki Azərbaycan ədəbiyyatinin gorkəmli simalarindan, dəyərli yaziçi, şair, araşdirmaci, jurnalist, folklorşunas ustad Mirhidayət Hesarinin anadan olmasinin 75 illik yubileyini qeyd etmək ucun! Ona gorə də  ilk əvvəl uzumuzu hormətli ustada tutub deyirik: Əziz ,sayğidəyər Mirhedayət Hesari bey, sizi 75 illik yubilyiniz munasibəti ilə səmimi qəlbdən təbrik edirik, sizə uzun ömur, can sağliqi, konul xoşluğu  və işlərinizdə, fəaliyyətizdə muvəffəqiyjətlər arzu edirik! (burda Sadiq sən də uzunu tutub ”təbrik edirik, ustad” deyərsən)

 

M.S:

Bu gozəl qələm sahibimizi, sizlərə tanitmağa heç ehtiyac yoxdur. Mirhidayət Hesari illərdir xalqina, dilimizə xidmət etmiş boyuk bir ədibdir. Onun yazib –yaratdiği əsərlər, kitablar, elmi araşdirmalari xalqimiz tərəfindən sevilərək oxunur, oxucular tərəfindən yaradiciliği təqib olunur.

Istərdik ki, ustadi ”məşəqqətli” həyat və fəaliyyətinə qisaca bir nəzər salaq: Mirhidayət Mirhəbib oğlü Hesari 1929-cu ildə Araz kənarında Culfa şəhərində dünyaya göz açmışdir. 14 yaşında atasını itirən Mirhidayət imkansiz bir ailədə böyumuş və təhsil almaq uçun hələ kiçik yaşlarinda ailəsindən uzaq duşmuşdur.

 

G:

Hələ uşaqliqdan bu dunyanin ağirisini-acisini gormuş dəyərli yaziçimiz qarşisina bir amal qoymuşudu:oxumaq, məariflənmək, savadlanmaq. Bir çox açilmayan qapilarin məhz elmin, zəkanin açdiğini dərk edən gənc Mirhedayət məktəb illərində çox başarili olmuşdur. Sonra 2 ali  təhsil: bir lisans və bir mühəndislik mədrəki (Təbiyi və Riyazi) almiş və sonradan fəxri doktorluq adini da qazanmişdir. ...illərdə Mirhidayət Hesari  Iranin hərbi sistemində çalişmiş, sərhənglik dərəcəsinə qədər yuksəlmiş və 11 il ali hərbi məktəbin rabitə fakultəsində (ye’ni “müxabirat danişkədəsində”) ustadlıq vəzifəsində çalişmişdir.

 

M.S:

Sayqidəyər ziyalimiz  bütün bu illərdə öz peşəsiylə bərabər ədəbi yaradıcılığini da davam etdirmişdir. Qələm, söz hər zaman ustadimizin kəsərli silahi olmuşdur ” Deyirlər söz qilincdan itidir” Bəli, çoxlarinin deyə bimədiyini, edə bilmədiyini Mirhidayət Hesari öz yazilari ilə, məqalələri ilə, şe’rləri ilə çox yerində və tutarli şəkildə deyə bilmişdir. Ustadin indiyədək 2250 türkcə və farsca məqalələri İran mətbuatında,  bə’zi əsərləri Türkiyə, Azərbaycan Cümhüriyyətində və Avropada çap olunmuşdur,  8 kitabı müstəqil və 22 kitabı mətbuatda ardıcıl şəkildə basılıb, yayılmışdir və hal hazirda 30-dan artıq təlifatı işiq üzü görmək üzrədir.

 

G:

Hörmətli Mirhidayət Hesarinin ədəbi yaradiciliğindan bəs edərkən onun jurnalistlik, köşə yazari, ədiblik, redaktorluq fəaliyyətini xüsüsilə qeyd etmək lazimdir. hörmetli ədibimiz uzun illər “Nedaye Qaz” jurnalının baş redaktoru vəzifəsində çalişmişdir, “Ürəkdən ürəyə yol” qəzetinin və “Yol dərgisinin” təməl daşını qoyanlardan biri olmuşdur. Hal hazirda  “Varliğin səsi” dərgisi ilə samballi yazilariilə əməkdaşliq etməkdədir. Bizim üçün, “Varliğin səsi “ dərgisinin çalişanlari üçün  belə bir dəyərli qələm sahibi ilə bir redaksiyada işləmək çox böyuk bir fəxrdir. Boyuk bir amali, oxumaq, savadlanmaq, məariflənmək amalini qarşisina qoyaraq ta bugünlərə gəlib çatan böyuk ədibimiz bu gündə bu ideyasini davam etdirərək indi də bizləri “oxudur, məarifləndirir və savadlandirir”.

 

M.S.

Ey ana torpağım! Ey Azərbaycan!

Qoy artsın gün bə gün şövkətin sənin.

Aslanlar becərən igitlər doğan,

Yayılsın aləmə şöhrətin sənin

 

Vətəninə, elinə, dilinə vurğun olan sevimli yaziçimiz Mirhidayət Hesaridir bu sözlərin muəllifi. Ədibin əsərlərində  bu vətən eşqinin, elə-obasina bağliliği, millətinə, onun dilinə,adət-ənənələrnə olan tukənməz sevgini açiq-aşkar görmək olur. Biz hər zaman qədrbilən xalq olmuşuq, zəhmətə, əməyə qiymət verməyi başarmişiq. Xalqi  üçün illərdir xidmət edən, ana dilimizin yaşamasi yolunda , inkişaf etməsi yolunda  qələmiilə külüng vuran hörmətli yaziçimiz Mirhedayət Hesarinin zəhmətinə  çox böyuk dəyər veririk. Bu gün elə bizi buraya toplayan da ustadimiza olan böyuk sevgi və sayğidir.

 

G:

Bəli ,bu gün buraya çox əvəzsiz bir ustad, çox gözəl bir insan olan  Mirhidayət Hesarinin 75 illik yubileyini kutlamağa yiğişmişiq. Ustad bir daha sizi təbrik edirik, hər  zaman sizin kimi deyerli insanlardan ağsaqqal sözu eşitməyə ehtiyacimiz var, hər zaman belə zirvələrdə olmaği sizə arzu edirik! Və beləliklə yubiley mərasimimizi açiq elan edirik!!!

 

 

Gecənin proqrami və aradabizim deyəcəyimiz mətn

 

 

18.00:        Gecənin açilişi

 

G.

Gecəmizin ilk iştirakçılari bizim gül balalarimiz, kiçik dostlarimizdir. Ilk əvvəl gözəl balamiz Səhənd Nəbioğlunu səhnəyə dəvət edirik. Səhənd balamiz bizə şer oxuyacaq:

18.10:        Şe’rlər: Səhənd Nəbioğlu

 

M.S:

Indi də sözu veririk musiqiyə. Bizim Emil balamiz indi sizlərə 2 mahni ifa edəcək . Beləliklə qarmaonda ifa edir Emil Mobarəki.

18.15:        Qarmonda ifa edir Emil Mobareki

 

G:

Məclisimiz yenə gul balalarimizla davam edir. Indi sizə şirin  şəkər qizimiz Nigar Mobarəki gözəl şer oxuyacaq.

18.25:         Şe’rlər: Nigar Mobareki

 

M.S.

Indi uşaqlar yavaş –yavaş meydandan çəkilirlər, sözu veririk böyuklərə!!! Əziz Musa Haşimi bəy“Varliğin səsi” dərgisi adindan ustada urək sözlərini deyəcək. Buyurun Haşimi bey!

18.30:         “Varliğin səsi” dərgisi adindan Mir Musa Haşiminin çixişi

 

G.

 Bu gecə burada bir böyuk qələm ustadının yubileyinə yiğişmişiq ona görə də gecəmiz

şersiz , sözsüz təsəvvur etmək olmaz. Sözü yenə də bizə gözəl bir şer soyləmk isteyən kiçik dostumuz Aydina veririk.

18.45:         Şe’ler: Aydin   , Səttar bəy , Hasən bəy. 

 

M.S.

 Əziz qonaqlarimiz, əziz dəvətlilərimiz bizim üçün belə əhəmiyyətli bir gündə buralara qədər gəlib bizlərə böyuk  şərəf vermisiniz. Bilirik, içimizdə hətta başqa olkələrdən də gələnlər var(mən özum də onlardan biriyem!!!!) Sizi bu diqqətinizə görə alqişlayiriq və indi də sözü elə qonaqlarin özünə veririk. Buyurun, ustadimizi bu əziz günündə təbrik etmək istəyən qönaqlari səhnəyə dəvət etdirik. Ilk sözü veririk , Böyuk  ağsaqqalımız ustad Fəzanə, yə.

19.55:         Soz verilir ustadi təbrik etmək istəyən qonaqlarimiza

 

G:

BƏli, indi gəldik məclisimizin ən onəmli anina, sözu veririk  ustadin özunə. Buyurun Mirhidayət Hesar bey!!!!!Sizi sevənlər, sizə, şəxsiyətinizə, əməyinizə, fəaliyyətinizə dəyər verən bizər sizi dinləmək istəyirik:

19.25:         Ustad Mirhedayət Hesarinin çixishi

 

M.S.

Indi də sizlərə gecənin surpirzlərini təqdim edirik. Bu gün bir ad gününü qeyd edirik, bir də böyuk bir insanin ad gününü, bir də təkcə ad günü dəyil bir yubileyi – 75 illik bir yubileyi kutlamağa buraya yiğişmişiq. HEÇ ad günü də ”ad günü pastasiz” ola bilərmi?Bizə gorə olmadiğindan elə ona gorə də gözəl məclsimizə layiq bir ad günü pastasi sizlərə təqdim edirik. Nuş olsun! Və əlbəttə ustadimizi bir daha səhnəyə pastani kəsməyə dəvət edirik.

19.45:         Gecənin surprizləri

 

G

Əziz ustad Hesari, Əziz qonaqlarimiz!

Proqramımız sona çatir. Haminiza, iştirakiniz uçun təşəkur edirik və ancaq hamımıza belə xoş günlər nəsib olsun.

 

 

20.30                Rəqs edir…..(səmanə)

 

 

 

Səhənd Nəbi oğlu
 

AZƏRBAYCAN- YURDUM MƏNİM

Qayalarda  bitən çiçək,

Çiçəklikdə bir   qayatək,

Ulduzlara  səs   düşəcək:

Azərbaycan, yurdum mənim!

 

Qartalları od  qanadlı,

Oğulları şimşək atlı,

Ana Vətən -  kainatdı

Azərbaycan, yurdum mənim!

 

Dostdan uca zirvə varmı?

Sözdən şirin meyvə varmı?

Bundan gözəl töhvə varmı-

Azərbaycan, yurdum mənim!

 

Məmməd Araz

 

Gedəcək...

Gec çəkmiyəcək Gedəcək

Yordomdan Soyuq

Oxoyacaqlar qoşlarımız

Axacaqlar  Solarımız

Öz havalarında Və

Öz yuvalarında

Gec çəkmiyəcək  Gedəcək

Yurdumdan Soyuq

Daha

Şənlik

Gələcək...

Altay Peyam Urmu 1377

 

 

 

قارموندا ايفا ائدن: اميل مبارکی

 

شعر: نگار مبارکی

AZƏRBAYCAN           

 

Sevimli diyar,                 Mərd ellərin var

Sənsən ilk bahar.            Yaradar, qurar.

Ürəyimizdə                    Mavi   Xəzərin,

Doğma adın var,            Göllərin var,

AZƏRBAYCAN           AZƏRBAYCAN

 

                   Günlər ötüşər,

                   Yaşa  dolarıq.

                   Biz  sənə layiq

                   Övlad  olarıq,

                   AZƏRBAYCAN  

Hikmət Ziya

 

 

YURDUMUZA  ARXAYIQ

Ana yurdun qucağında

Boy atırıq  azad, şən.

Bəslər bizi, səslər bizi

Xoş günlərə bu Vətən.

 

Qoy mahnımız hər terefi

Ağız- ağız dolaşsin

Qoy səsimiz keçilməyən

Meşə keçsin, dag aşsın.

 

Yurdumuza biz arxayıq,

Qorxumuz yox davadan

Sülh var olsun, bahar olsun

Yer üzündə hər zaman!

Zeynal  Cabbarzadə

 

 

اوستاد ميرهدايت حصاری نی تبريک ائدن لر

 

 

اوستاد محمدعلی فرزانه

 

      آذربايجانين باشينی اوجا ايله ميسينيز!  آذربايجانين افتخارلی اوغوللاريندان بيری نين دييرله مه مراسيمینی قورموسونوز. منيم خسته ليگيمه گؤره، بورا گلمه يه آماده لييم يوخودور، اونا گؤره اؤرک سؤزلريمی بير پيام صورتينده تصميم توتموشدوم گؤندرم، آنجاق ائليينمزديم گلمييم، آغير دوروموما باخماياراق، مراسيمين  اهميتينه گؤره اؤزومو بورا چاتديرديم.  ائله همان يازينی يوبيلئی ايشتراکچيلارينا بورادان بئله اوخورام .

عزيز قوناقلار! هامينيزا سالاملار و سايقيلار!

      اؤز نوبم ده، لطف ائديب بو ادبی و فرهنگی اجلاسا قاتيلماغينيزا گؤره سيزلردن تشکور ائديرم. منه بئله گلير کی، بيز، هاميدان اؤنجه حؤرمتلی وطنداش آقا ميرموسی هاشمی نی،  همت و قايغی گؤسترمه سينه، گؤرکملی يازيچی و آراشديريجی و آراشديرماجی، آقا ميرهدايت حصاری نی، سوئده چاغيرماقدا و اوندان اوستون بو محتشم حالدا،  يازيچی نين قوتلانماسی و ديرلنمه سينه تدبير وئرمکده مينتدارليغيميزی بيلديرمک لازيم دير.

     آذربايجانين بوگونکو دوروموندا هر بير ائلينه- يوردونا باغلی اولان، تاريخی وارليغی، ديلينی- فرهنگينی و بيرسؤزله مدنيتينی تانيماقدا و تانيتديرماقدا جان يانديران وطنداشين بورا گليشيندن سئوينير و بونونلا دريندن ايلگيله نيريک. بيز اونلارين سيمالاريندا آنلاييشيلاريندا يارانان يئنيليکلری گؤرور و آدينا  گووه نيريک. اونلارين فراصت، بيليک و ياراديجيليقيندا  يارانان علمی آراشديريلما باجاريغی دوشونجه و قلم سيناغی صاباحين يولونو دوزلتمکده خالقيميزا و يوردوموزا يئلکن اولاجاق و بو يئلکن شبهه سيز وطنيميزی و ائليميزی آيدين صاباحلارا چيخاراجاق.

     من، ديرلی امکداشيميز حصاری نين خاراکتر ياراديجيليغی ايله ياخيندان ايلگی لنديغيم اوچون دييه بيليرم کی، بيزيم چاليشقان وطنداشلاريميز آراسيندا، حصاری سئچگين انسانلار سيراسيندا قيمتلنديريلن  بيريسی دير.  اوندا زامانلا ياناشماق، سسينی زامانين قاباقجيل سسينه قاتماقدا توکنمز انرژيسی و پوتانسيالينا شاهد اولموشام.

     حصاری وارليق درگیسی نين بير قوروجالاريندان اولماسادا، بير آز سونرا بو قافيلييه قوشولسادا، او چوخ تئزليکله بو توپلومدا اؤزونه يئر آچميشدی. قلمداشلارين هابئله  دوستلارين حورمت و قايغی سينی قازانميشدير.

     آذربايجان ديلينده «يوتوبورودا» ياييلان «سهند راديوسو» وئريليش لری نين چوخوندا اونون يازيلاريندان يئری گلديکده اؤرنک لر و نمونه لر وئرميشدير.

     البته اونون بو احترام قايغييا لاييق اولدوغو، اونون شخصيتيندن، علميندن، گؤردوگو ايشلردن  و متانتيندن ايرلی گلير. او، تحربه ده، اولا بيلسين هاميدان چوخ دينله ين، هامی دان آز دانيشانلاردان ساييلير. آمما او ديالوگ و مباحثه لرده هئچ حالدا بیطرف و اعتناسيز قالمير. يئری گلينجه يانليشلارين و شبهه لی  يازی لاردان، نظريه لردن هر کسين ناحيه سيندن اولور اولسون گؤز اؤرتمور، اؤز آمانسيز تنقيد  سوزگجيندن کئچيردير.

     حصاری وارليغا قوشولاندان اؤنجه اوزون  ژورناليست ليک  تجربه سی کئچيرميشدی واونون چوخ فارسجا مقاله لری و اثرلری اولموشدور، لاکين او، آذربايجانجا يازماغا باشلاديغي گوندن، اونون يازی لاريندا ادبی اوسلوب گوندن- گونه، يئتکين لشميش، باخيشلاريندا وآراشديرمالاريندا اولان علمی  و منطق ليق اونون ايستر تاريخی آراشديريجی يازيلاريندا، ايسترسه ده گونده ليک مسئله لردن اؤزونو آيدين شکيلده گؤسترير.

    حصاری نين ياراديجيليغی چوخ ساحه لی اولسادا چوخ دا  قيافه لی اولدو. اونون يکان (يئکن) بؤلگه سينه  آراييب، داراييب توپلاديغی فولکلور بوگونه قدر آذربايجانين آيری- آيری بؤلگه لری ايله رابطه ده يازيلميش منوگرافی لرین سيراسيندا هاميدان مفصل ومستند اثر ساييلير.

بيز قلمداشيميز حصاری يه  اوزون عؤمور و ايشلرينده  باشاريلار آرزيلاييريق!                                       

مالمو- ايسوچ  10-9-2005

 

 

    

بويوک رسول اوغلو

İstəkli qonaqlar,

Ürəyimin ən dərinliklərindən gələn saygı və sevgi ilə bu məclisdə iştirak edən  xanımlar və bəyləri  səlamlayır , bu vəsilə ilə böyük ustad  dəyərli Azərbaycan yazıçısı Mir Hidayət bəy Hidayətin 75- ci doğum gününü təbrik edirəm. Böyük zəhmətlərə qatlanaraq bugün Malmoda bu mədəniyət ocağında görkəmli yazıçımıza bu münasibətlə törən hazırlayan əziz dostum cənab Musa bəy Haşımı və varlığın səsi jurnalı məsullarına öz təşəkkür və minnətdarlığımı bildirirəm.

Yaxlaşıq 30 kitab müəllifi və çeşitli məqalələr yazan böyük yazıçımızın toplumda tanındığı üçün vaxtınızı alıb onu tanıtmağa çalışmıyacağam. Hər kesin bildiyi kimi dəyərli ustadımız ömrünün ilk çağlarından başlıyaraq müxtəlif siyasi-ictimai və milli sahələrdə yazmış və dəyərli fikirlər orataya atmışdır.        ” Sümerdən Atropatene” qədər mətbuatda ardıcıl çıxan fikirlər milli təfəkkürün bariz nümunəsi kimi ustad tərəfindən yazılmış dəyərli bir əsərdir.

1993-ün bahar çağlarında rəhmətlik Əli bey Kəmalının hazırladığı və geçirdiyi Savə-nin Türk şairlərindən olan rəhmətlik“ Telimxan”-ı anma törəninə  toplaşan 200-300 nəfər Azərbaycanlı içərisində bugün bu məclisdə iştirak edən əziz dost və qardaşımız Dr. Fərzanə bəy ilə birgə qocaman ədəbiyatçımız sayın Mir Hidayət bəy Hisari- də iştirak etmişdi. O illər Tehranda və Güney azərbaycanda geçirilən mərasimlərdə Azərbaycançılıq təfəkkürünün Türkçülük mehvəri etrafında firlanmasına yardımçı olmaq məqsədi ile “ Almas ıldırımın seçilmiş şeirlər” kitabın ərəb əlifbasında çap edib yaymışdım. Həmən artırmalıyamki, bu kitabın yayılmasında böyük əziyətlərə qatlanarq bəzi sözlərin deyişdirilməsinə məcbur edilmiş olsaqda , milli hərəkətimizə yeni bir cəhət verəcəyindən arxayın və sevincliydik ki, elədə oldu. O kitaba önsöz yazan zəmanəmizin dede qorqudu cənab Dr. Heyətidə hədəf alaraq “ Keyhani Havai qazetində”  əleyhimizə yazılan və pan türkist adlandıraraq bizləri hədə qorxuluyan bir məqalə də əslində bu kitabın milli təfəkkürdəki dirçəlişə edəbiləcəyi təsirin  bir göstərcəsi idi. Ona görədə  bu kitabı payliyan Tehranda “ Əndişe- nov “ kitab evinin müdürü və  başqa dostların yardımı ilə Savə səfərində sərgiləyib və milli düşünən cavanlarımıza təqdim etməkdən çox sevincliydik. Sevincimdən dərimə siğmirdimki, ilk olaraq Türklük və Türkçülük yolunda bu boyda bir hərərkəti gərçəkləşdirirk.

Ancaq çıxışlar başladı və söz üstad Hisari bəyə verlidiki, Savə Türklürinin                  ( Xələc Türkləri) tarixi haqqında məruzə etsinlər. Açığını söyləməliyəmki , üstad sözə başladığı zaman sanki mən yatmışdım , ürək oxşuyan bahar nəsiminin duyğulu sızıltısı oyandırdı və özümə qaytardı.

Çünkü ustadın “ xələc Türkləri “ haqqındakı məruzəsi , tələbəlik zamanında Dr. Rza Nur-un “ umumi Türk Tarixi “ kitabında oxuduğum “ xələc Türkləri “ haqqında yazdıqlarından daha dərin , daha elmi və daha dəqqətli olmaqla birlikdə eyni halda “ Almas Ildırım “ təfəkküründə olan Türkçülük şuurundan qat-qat yüksəklərdə dayanmaqdaydı. Üstəlik Xələc Türklərinin yaşadıqları və ya köç etdikləri müxtəlif ölkə və bölgəri tam dəqiqliyi ilə araşdırıb sunmağı alqış və şükrana layıq bir elmi tədqiqat idi . Böyük ustadımızın o çıxışının məndə yaratdıgı ümid və güvən hələdə gözlərimin önünə böyük gələcəyin gözəl günlərin tərsim edir və əminəmki həmin sözləer nəticısindədirki, bugün ulu millətimizin təfəkkür dairəsində Türklük duyguları ən üstün məqamda dayanmaqdadır. Varlıq jurnalının müxtılif sayılarında ustadın yazdıgı məqalələr və habelə həmin jurnalın redaksiyasında xidmətlərindən aldığımız feyz və kəsb etdiyimiz həqiqət yolunun düzgün körpüləri gələcəyimizin ışiq sancaqlarıdır. Özəlliklə ustadımızın söz dağarcığındakı gənişlik, danışığındakı temkinlik, üzündəki nur, ürəyindəki səfa və səmimiyət hər dinləyiciyə və milli məzlumiyət yükü altında ezilən canlara can verir və can Azərbaycan yaradır.

Fikrimcə ustadımızın ən böyük müsbət sifətləürindən biridə elmə bağlılıq və həqiqəti heç bir şəkildə təhrifə yol verməməsi ilə bağlıdır. Səfəviyə zamanı yazılmış “ Qara məcmuə “ kitabı haqqinda son zamanlar Varliq jurnalında ustadın yazdığı məqalə və vurguladığı elmi görüşlər bu təfəkkürün bir nümunesi kimi iftixarla söylənilməldir.

Sözlərimin sonunda bir daha ustadımızı 75 illiyi münasibəti ilə təbrik edir , ona uzun ömür cansağlığı arzulayır və haqqı- hüququ danılılmış millətimizin yolunda dahada böyük işlər görəcəyinə arxayılıqla inanıram.

Dərin sevgilərimlə : Böyük Rəsuloğlu

 

 

 

داداش اصلان زاده

حورمتلی بايانلار و بايلار، عزيز قوناقلار، سالاملار!

بوگون منيم اوچون بير عزيز گون دور، اونا گؤره عزيزدير کی، اوستاد ميرهدايت حصاری نين 75- جی ايل دؤنومو قوتلانما تؤره نينه وارليغين سسی درگيسی طرفيندن دعوت اولموشام.  عزيز گون دور اونا گؤره کی، اوستاد حصاری نين ياخيندان گؤروب 75-جی ايل دؤنومون حضورا تبريک ائده جه يم.

اوستاد حصاری نين ديرلی و دولغون اثرلرينه گلديکده، اونودولمايان اثرلری وچکديگی زحمت لر خالقيميزين اويانيش دؤنمينده بؤيوک و مثبت رولو اولوب و اولاجاق دير. من نه زامان عاليم لريميزی، قهرمان يازيچیلاريميزی بئله بير طنطنه لی تؤرن لرده گؤدوگومده، سئوينج وهيجانا قاپسانيرام.

نئچه ايل بوندان اول، عزيز اوستاد فرزانه نين ده 75- جی ايل دؤنومو مراسيمی، ميرموسی هاشمی بگين دعوتی ايله «وارليق جمعيتی» طرفيندن ائله بو سالوندا توتولموشدور. اوستاد فرزانه ايندی ده بو سالوندا حضوری واردير.

من سئوگی وسايقی ايله مينتدارليغيمی بو عزيز اوستادلاريميزا بيلديريب و اونلارا محکم جان ساغليغی و ايشلرينده يوکسک باشاريلار آرزيلاييرام. بيرداها بيلديرمک ايسه ييرم کی، اوستاد   حصاری نين ارزشلی اثرلری آذربايجانين مبارز وشريف ميللتي نين خاطره سيندن چيخماييب، آذربايجان ميللتی نين يولونون يولچوسو اولاجاق وخصوصيله گنجلريميزی بيليم سلاحينا مجهز ائده جک دير.

   کئچميشده کی يازارلاريميز تربيت ائتديکلری، آذربايجان ميللتی نين قهرمانلاريندا بؤيوک رولو اولموشدور.  معاصر قهرمانلاريميزدان  فريدون ابراهيمی دن  آد آپارماق اولار. او نئجه قودوز و وحشی رژيمين قارشيسيندا ميللتينه و وطنينه لايقجاسينا قهرمانليق گؤستردی. دوشمن بئله ديزه کوچدو. فريدون ابراهيمی، دوکتور ذهتابی نين ديرلی اثرينده«تورکلرين اسکی تاريخی» کيتابيندا، اؤز  ميللتی نين قهرمانلارينا توخونارکن، نه قدر ايچدن يازديغی بللی دير. تاريخ اونون قاباغينا وظيفه قويدوغو زامان، اؤزوده ، او قهرمانلارا تبديل اولدو و اؤز وظيفه سينه ميللتی نين و وطنی نين قارشيسيندا قهرمانجاسينا سينه گردی. ايندی اونون قبری ، بير آبيده و يازيارتگاه کيمی آذربايجان ميللتی نين معيادگاهی اولوب و اولاجاق دير.

عشق اولسون آذربايجانا، عشق اولسون عاليم لريميزه، عشق اولسون اوستاد ميرهدايت حصاری- يه!

من بير نئچه سطر شعيرايله حضورونوزدان تريبونو ترک ائده جه گم!

چوخدان دير اوزونه حسرت قالديغيم

دوغما  قارداشيمدان  آرالييام    من

قوی دوست دا بيلسين، دوشمن ده بيلسين

هله  اؤلمه ميشم، يارالييام من

هاردا آلنی آچيق اينسان   گؤرسه نير

هاردا مکتب دن چوخ زندان گؤرسه نير

بيلين اورالييام،  اورالييام من

چوخدان دير توی- بايرام  گؤرمه ييب بابام

خرمنده اؤزگه   اوچون  ايش  گؤرور   آتام

ستارخان دير بابام،  بابک دير آتام

ايندی بيلدين می؟   هارالييام من

چوخ ساغ اولون

مالمو- ايسوچ  10-9-2005

 

 

 

   

عبدالله اميرهاشمی (جوانشير)

سالام حورمتليي يوبلئي اشتراكچيلاري، سالام حورمتلي استاد مير هدايت بيك حصاري و سالام سائين خانم لار وبيگ لر!

سالام وارليق سسي درگيسينيين ديرلي رئداكسيا هيئتينين صدري مير موسي هاشمي جنابابلاري ويوبلئيي آپاران سائين گولناره خانيم، میر صادق و آيدين بيگ.

عزيزلر! بوگون وارليق سسي نين تشبثي ايله سائين ميرهدايت بيگ حصاري نين 75 ابلليك يوبلئي   مالمو شهرينده كئچيريلمه سي نين شاهدي ييك و چوخلو قوناقلار دانمارك دان، نوروج دن، انگلستان دان و ايسوچين باشقا شهرلريندن بورادا تشريف بويورموشلار. خاطيرلاديم كي، مندن اول ميرهدايت بيك حصاري نين حيات و ياراديجيليغي حاققيندا صحبت ائدن سائين استاد فرزانه و بويوك آقا بيگ رسولوند، ستار بيگ سئوگين صحبت ائديب و ده يرلي مقاملارا اشاره ائتديلر. منجه بورادا سائين  حصاري نين بوتون حيات و ياراديجيليقي باره ده دانيشماق ممكن دئييل. آمما بو گوزل انسانين    خالقي ميزين ياراتديغي ناغيل لار، افسانه لر، لطيفه لر باره ده آراشديرمالاري ،  مثل لر و عاشيق پوءزيياسينين رنگارنگ صحيفه لرينده آراييب اوزه چيخارتمالاري آذربايجان كولتورونون انكشافيندا خصوصي يئري وار. بورادا ميرهدايت بيك حصاري نين خالقي ميزين كئشديگي يول و باشينا گلديگي حادثه لري خصوصي دقتله آراييب اوزه چيخارتماسي اوخوجولارينا يني تحفه لردن حساب ائتمك اولار. اونون  فعاليتي ساحه سي خالق شفاهي ادبياتيميزدا ادبيات تاريخي ميزده ادبي تنقيد شناسليق  باره ده  يني آدديم لاردان ساييلير. بو آدديم لاري جناب حصاري اؤزونه مخصوص وسواس و دقت له  ايزله ميشدير.

 من اونون يازيلارينا وارليق درگي سي و نويدآذربايجان غزه تلرينده راست گلدييم بير واختدا، آذربايجان فولكولورو، افسانه لر، حكايه لر باره ده عموميت له ادبياتي ميزين كتبي و شفاهي ساحه سينده آپارديقلاري تدقيقاتلاريني گونوموزون ضروري ايشلريندن اونون واسيطه سي ايله گورولدويونون قرارينا گلديم. نويد آذربايجاندا بير نئچه ماراقلي موضولاردا، ادبيات تاريخي ميزدن گوزل مقاملاري بو گونه چاتديرميشلار. جناب حصاري يازيلاريندا ميللي حكومته خوش مناسبت بسله يير و اوندان قاباق و اوندان سونرا باش وئرن حادثه لري، وطن ژورنالي نين اؤ دؤرده خالقي ميزي معارف لنديرمه سينده رولونو، شاعرلر مجلسي نين يارانماسيني، ميللي حكومتين مغلوبيتين دن سونرا خالقي ميزين آچيناجاقلي و فاجعه لي حياتيني و فرقه نين طرفدارلارينين تعقيبه و زندانا، سورگونه گوندريلمه سيني يادداشتا آلير.

 منجه  اؤ اينسان كي، آذربايجانين ميللي حكومتي نين كئشيينده دايانير و اؤنون داوام چيلارينا و ايده آللاريني داشييان لاري آلقيش لايير اؤ حقيقتا ده آذربايجان ائولادي دير و اونا اوزون عؤمور و ياراديجيليغيندا اوغورلار آرزو لاييريق. بوگون بيزيم معين قدر آذربايجانين تاريخي نين و ادبياتي نين باره سينده ايشلر گورولور آمما ايش گوره ن لرين سايي آزدير.مير هدايت بيگ حصاري بو ساحه ده قيمتلي ايشلر گوروبدور. من بورادا اونون يازديغي بير قيسا ماراقلي مقامي دقتينيزه چاتديريرام. جناب حصاري بيگ آذربايجان شخصيت لرينين بيوگراف لاري باره ده يازديق لاري مقاله لرين بيرينده       خواجه نصيرالدين طوسي حاقدا بير گوزل نكته ني آچيقلايير. او يازير:

خواجه نصيرين چوخلو دوشمانلاري و موخاليفلري وار ايدي. يئري دوشدوكجه اونون چوغوللوغونو هولاكو خانا ائدر ميشلر. بو باره ده بعضي افسانه لرده واردير كي همان اؤ موخاليفت لرين شيدتيني گوسترير. هولاكوخانين آناسي اولدوكده كيمسه اؤنا دئميشديركي سنين آنان يئنگي مسلمان دير (عربجه بيلمير). انكير –مونكورون ( نكيرين) جاوابيني وئره بيلمز. ياخشي سي بودوركي خواجه ني ده اؤنونلا قوبلويالار كي، اوردا اؤنا كمك ليك ائتسين. هولاكو بو ايشه راضي لاشير بو زامان خواجه ماجرادان خبردار اولور و هولاكوا دئيير: قوربان اؤمودوم وار كي، يوز ياشاياسيز. اؤلوم هامييا وار سولطانا وار فاغيرادا وار. سيز مني اؤزوز اؤچون ساخلايين فيلان كسي ( همان شخصي ) آناز ايله قويلايين و خانين امري ايله بئله ده اؤلور.

عزيز تدبير اشتراكچيلاري بيز بورادا بديعي ادبياتي ميزين ساحه سينده زحمت چكن جناب حصاري نين   ايشيقينا توپلاشميشيق. اؤنون يازيچي شاعير و خالق خادم لري باره ده دوشونجه لري و قناعت لري حاققيندا اپي زوت لار دانيشيريق. اميد ائديريك ائله بير شرايط يارانسين كي ميرهدايت بيگين ياراديجيليغي باره ده گونئي آذربايجاني ميزدا طنطعنه لي ديگر تدبير لرين و سمينار لارين شاهدي اولاق.

بورادا جناب حصاري بيگه اوزون عمر، جان ساغليغي، يني ياراديجيليق آرزولاييب و بو تدبير اشتراكچيلارينا و ترتيباتچيلارينا خصوصيله جناب مير موسي هاشمي بيگه تشكرومو بيلديريره م. دقتئ نيزه گوره ساغ اؤلون.  

10-9-2005   مالمو

 

 

حسن انتظارجو

حورمتلی، خانيملار وآقالار، عزيز قوناقلار. هامينيزا سالاملار.

اوستاد حصاری! 75- جی آد گونوز مبارک اولسون. سيزه، اورييمين ايچيندن گلن نئچه بيت شعير يازميشديم و بو گؤزل موناسبته گؤره،  بئله اوخوماق ايسترديم:          

عزيز اوستاد، ميرهدايت حصاری!

قوتلاييريق  بئله   بارلی   باهاری

بيزه چوخدور، بوگونون  ايفتخاری

سويداشلارين سئوير، سنين  غيرتين

خالق ايچينده واردير، قدرين،  قيمتين.

قلمين نور ساچيب آذربايجانا

اثرلرين  ياييلييب دير  هر يانا

قرآن کيمی يول گؤسترير اينسانا.

کئچدی او گونلرکی، فارس، تورکو دانسين

اولو   بير  تاريخيم،     کؤلگه ده    قالسين

حصاری، حاصارسيز يازار سؤزونو

ائللرينه سؤيلر،  سؤزون   دوزونو

تورک ديلين دانانين  اويار  گؤزونو.

حسن ام سئورم حاق سؤزو  دييم

آغ - قارانی سئچيب  دوزونو  دييم.

چوخ ساغ اولون

10-9-2005   مالمو- ايسوچ   

 

 

سايين   سئوگين

آنا يوردوم آذربايجان

ای آنا  تورپاغيم! ای آذربايجان!

قوی آرتسين گون به گون شووکه تين سنين

اصلان لار بئجه ره ن ايگيت لر دوغان،

ياييلسين عالمه شؤهره تين سنين.

 

آزادليق نغمه سی  سندن    اوجالدی،

ميللت لر سسين دن الهام لار    آلدی.

هئيبه تين  شاهلاری تورپاغا   سالدی،

تاريخه  نقش اولدو  قدره تين    سنين.

 

ظولمه قارشی   چيخدی  قهرمانلارين،

جوانشير،  کوراوغلو  تک    اوغلانلارين.

ستارخان،  باغيرخان،    حيدرخانلارين،

ظولمه باش اگمه ييب، ميللتين سنين.

 

«بابک» ين يارلاری  «قيرميزی   پوشلار»،

«هجر»ی، «نبی» نی  ائل لر   آلقيشلار.

چوخ کئچير، پائيزلار چوخ کئچير  قيشلار،

ديل لرده   نقل  اولار  صحبتين   سنين.

 

سهند، ساوالانين باشی  اوجالسين،

دونيا ياشاديقجا قالسين  قوجالسين.

ائل لرين هر  يئرده ظفرلر   چالسين،

اوجالسين عالم ده  صولتين   سنين.

 

«اورمو» درياسی نين سويو درمان دی،

«خزر» ين ساحلی   اينسانا    جاندی.

«موغان» ين دوزلری آل دی  الوان دی،

قيزيلدان   آرتيق دی توربه تين   سنين.

 

سنين قوجاغيندا من  بير گل   کيمی،

دوغولدوم   بؤيودوم     قرنفيل  کيمی.

سنسيز هر ساعاتيم کئچر ايل کيمی،

گلمه سين     زوالا   عزتين    سنين.

 

سنی سئوميه نلر خوار اولسون گؤروم،

ياراماز دوشمانين زار   اولسون   گؤروم.

تاريخين، ادبين  وار   اولسون     گؤروم،

بو سؤزه ضامين دی،    همتين  سنين.

 

ای اودلار  تورپاغی   ای  آنا وطن،

«هر يئرين گل اولسون هر يئرين چمن»

(هدايت)   وطنين آزاد ايسته سن،

آرتار خلق ايچينده حؤرمتين سنين.

 

ديرلی خانيملار و بئيلر، حؤرمتلی قوناقلار،   سالاملار وسايقيلار!

زحمت چکيب اوزاق يوللاردان گلميسينيز، من ده استهکلم دان گلميشم. بيز آرتيق بو سالونا عادت ائتميشيک. بوسالوندا، وارليغين سسی درگیسی نين ايکی بؤيوک و نهنگ امکداشی نين دوغوم گونون بيز کئچيرميشيک. بؤيوک اوستاديميز فرزانه بئيين ده ائله دوغوم گونو بورادا ايدی. دوکتور فرزانه بئی  ايندی ايسه «وارليق» درگيسيندن صحبت گئدنده! بيزه ديل اؤيردن، بيزی بورا چاتديران سيزلر اولموسونوز، باشدا دوکتور هيئت اولوب. اجازه وئرين دوکتور جواد هيئت جنابلاری نين، اوستاد ميرهدايت حاققيندا  يوبيلئيه گؤندرديگی يازينی اوخويوم:   [دوکتور هيئتين يازيسی اوخوندو، آلقيش دان سونراچيخيش دوام ائتدی]

بوردا دا، بيزيم وارليغيميز اولان «وارليق» درگيسيندن الهام آلينميشدير،  ائله اونا گؤره ده آقای هاشمی ، مالمو شهرينده نشر اولان درگی لرينه بو يوکسک آنلام داشييان آدی سئچميش و «وارليغين سسی» قويموشلار.

چئوده يی دور ايله ديلر

ياری بولبول ايله ديلر

گوله چئويرديلر  منی

ميسکينيمی اريدد يلر

بير ار- بير ار اويوددولر

ديل بيلمزديم اؤيرتديلر

ديله چئويرديلر منی

چوخ ساغ اولون

10-9-2005    مالمو- ايسوچ  

 

 

 

جبار ستار اوغلو

عزيز  قوناقلار، حورمتلی خانيملار و جنابلار!

   من بيرداها يئنی دن، سيز عزيزلری سالاملاييرام وحورمتلی هاشمی بيگ دن و امکداشلاريندان، اؤز تشکورومو ومنتدارليغيمی بيلديرمک ايسترم کی، بئله بير گؤزل مجلسين قورولماغينا تشبوت ائديب لر.

   بومجلس، منی نئچه ايل اؤنجه توتولموش گؤرکملی عاليميميز، دوکتور محمد علی فرزانه- نين 75- ايلليک يوبيلئینی خاطيرلاتدی و چوخ موتلويام کی، يئنه ده ، ايسوچين مالمو شهرينده عين مکاندا بير باشقا عاليميميزين ، يعنی سايين اوستاد ميرهدايت حصاری جنابلازی نين 75- ايلليک يوبيلئينه شاهد اولورام. بو گؤزل مناسيبته گؤره ، اوستادی تبريک ائديب و اولو تانريدان اونا، اوزون عؤمور و جان ساغليغی آرزی ائديرم.

   آنا وطن آذربايجانين بو حساس چاغيندا عاليم لره و ضياليلارا احتياجی چوخ وار، چونکی بونلارديلار کی، عصر بويو ميللتيميزه آپاريلان آسيميلاسيا سياستينه قارشی موباريزه ائديب و ائديرلر و ميللتين اويانيشينا و اؤز ميللی کيمليگی نين و وارليغي نين تانينماسيندا بيليم سل چابا گؤستريرلر.

   گلين عاليملريميزی، حياتدا اولارکن ديرله نديرک و عزيزلنديرک و اونلارا مادی معنوی دستک اولاق! تانری تورکو قوروسون

   10-9-2005 مالمو- ايسوچ

 

 

شهناز شايسته

حورمتلی خانيملار، بئيلر وعزيز قوناقلار! هامينيزا سالاملار وساييقيلار!

من آذربايجان قادينلار جمعيتی«سويل» طرفيندن اوستادين 75 – جی ايل دؤنومون تبريک دييرم و اونا جان ساغليغی وگله جک گونلرينده باشاريلار آرزيلاييرام. ساغ اولون     

 

 

روباب قزوينی

حورمتلی خانيملار، بئيلر وعزيز قوناقلار!

هامينيزا صميمی سالاملار!

   بيز هاميميز بوگون عزيز اوستاديميز ميرهدايت حصاری نين، 75- جی ايل دؤنومو و مدنی چاليشمالاری ايله باغلی، آغيرلاما مراسيمی نين طنطنه لی شکيلده کئچيريلمه سی نين شاهيدييق.

   بوگؤزل تدبير بوتون آذربايجانليلارا، خصوصيله بيز خارجده ياشايان آذربايجانليلار اوچون فخردير. بوناگؤره کی، عؤمور بويو خالقيميزين باش اوجاليغی وسعادتی اوغروندا قلم جبهه سينده سارسيلماز اراده ايله چاليشان دوکتور حصاری، بئله بير آلقيشلارا لاييق دير.

منده، فورصت دن فايدالانييب، بو شانلی گونو اوستاد ميرهدايت حصاری جنابلارينا و اونون حورمتلی عايله سينه تبريک دئييب و اوستادا، جان ساغليغی و اؤز ايشلرينده بؤيوک    موفقيت لر آرزيلاييرام. همچنين بو گؤزل مراسيمی برپا ائدن «وارليغين سسی»  درگيسينده چاليشان  وطنداشلاريما يورولماياسانيز دئييرم، هابئله اونلارا اؤز ايشلرينده بيرداها باشاريلار آرزيسيندايام.

چوخ ياشايين

10-9-2005  مالمو- ايسوچ   

                            

  

عيواض مدبر ينگيجه

عزيز وحورمتلی اوستاد حصاری بئی و اوستاديميز فرزانه جنابلاری، حورمتلی خانيملار و بئيلر، سالاملار وسايقيلارلا!

   سئوينديريجی وغرور ياراديجی آندير، اوستاد ميرهدايت حصاری نين بو محتشم يوبيلئنده ايشتراک ائتمک. وبوناگؤره ده، بو تريبونون آرخاسيندا اؤزومه غرور دويورام. شوبهه سيز، اوستاديميزين يازيلاری و ياراديجيقلاری ميللتيميزين يولونا ايشيق ساچيب، بو گونکو وگله جک نسيللرين تورک، آزاد و ميللی روحو گليشمه سينده يوکسک رول اويناياجاق.

   آرزو ائديرم کی، ميللتيميز ايراندا اؤز تاريخی يئرينی قازانييب، دونيادا قبول اولونموش   بين الخالق حقوقلاری چرچيوه سينده ، اؤز ميللی حکومتينی ياراديب و بيرميللت کيمی بوتون ديرلی اينسانلارينا، يازيچیلارينا، شاعرلرينه، آنا وطن قوينوندا داها طنطنه لی وشانلی ديرلمه مراسيم لری برپا ائتسين.  

سوزومون سونوندا، بو گوزل مراسيمين برپا اولونماسينا گؤره، بيرداها، ايسوچين مالمو شهرينده نشر اولان، «وارليغين سسی» درگيسی نين امکداشلارينا اؤز صميمی تشکورومو بيلديريرم!  ساغ اولون

10-9-2005 مالمو- ايسوچ

 

     

                                               

 ماری انتظارجو

قيزيل دان قيمتلی،    سرای دان  اوجا

هر جوان دان جوان ،   دونيادان   قوجا

چؤرک ده ن مقدس، شکرده ن شيرين

آذربايجان   ديلی دير،        آنا   ديليم.

اولو شاعريميز خليل رضا

ديرلی خانيملار و بئيلر!

هامينيزی صميم قلبدن سالاملاييب وخوش گلدين دئييرم. هاميميز بو طنطنه لی مراسيمده توپلانميشيق کی، اوستاد ميرهدايت حصاری نين 75- جی آد گونون و آذربايجان خالقی اوغروندا عؤمور بويو قلم جبهه سينده چاليشمالارين تبريک ائدک.

منده بو گؤزل فرصت دن فايدالانييب، گورکملی عاليم، مهربان اينسان،  اوستاد حصارينی بو موناسيبته گؤره اورکدن تبريک ائديرم. و اونا  اوزون عؤمور و ايشلرينده بؤيوک باشاريلار آرزولاييرام.

حورمتله: ماری  انتظارجو

10-9-2005 مالمو- ايسوچ

 

 

ايشتراکچيلارین بیر عده سی و اوستاد حصاری

 

 

 

 

تشکور

بو گؤرکملی تدبيرين يوکسک سويه ده کئچمه سينده، معنوی و مادی جهتدن امک لری اولان سويداشلاريميزا اؤز صميمی تشکور و منتدارليغيميزی بيلديريريک!

وارليغين سسی درگسی