آشاغيداکی شعير فريدون حاصارلی دان دير وبؤيوک قارداشی اوستاد ميرهدايت حصاری نين 60 ياشی مناسبتيله 1367- جی گونش ايلی تبريز ده  دئميشلر.  بو شعيری يئرلی اولاراق درگيميزين اؤزل ساييندا درج ائتديک.   

قارداشيم ميرهدايت حصاری نين آلتميش ياشی مناسبتيله

 

قارداشيم آتميشی حاخلادی ياشين 

                   سينه ن سؤز يوکودور بول دی يادداشين

زحمتله اؤتسه ده عؤمرون باشا- باش

                   بهره لی، بارلی ذير، دوردور قارداش

تبريک لر دئييره م اورک دن سنه

                   بو آتميش ياشينی من دونه- دونه

آتميش ايل عؤمرون ده چوخ ايش لر گؤردون

                   دونيا گؤروشوندن چلنگ لر هؤردون

طوفان لار اؤنون ده سن سينه گردين

                   کيمسه يه دئمه دين محنتين دردين

چتين ليک لر چکدين گلمه دين جانا

                   نامرد قارشيسيندا دوردون  مردانا

سارسيتمادی سنی نه بوران نه چن

                   دؤيوشدون، ووروشدون افتخار ايلن

ازلدن الينده امکان اولمادی

                   صيفيردان باشلادين بوتون هر زادی

او هوش، او استعداد واردی کی سنده

                   سينه دفتر اولموش هر زاد سينه ن ده

سن معلليم اولدون اؤزون- اؤزونه

                   شرفله ياشادين دوزو- دوزونه

فيکير راحت لی يی گؤرمه دين سه سن

                   عالی تحصيل آلدين مکتب گؤرمه دن

ازلدن اوبايا- ائله وورولدون

                   آنا ديليميزين والهی اولدون

اوشاق چاغ لاريندان شعيری قوشدون

                   طبعين جيلالانيب قاينادين جوشدون

امکانات اولسايدی سنين الينده

                   نه لر ياراداردين آنا ديلينده

حئيف ايلک دفترين اولوندی تالان

                   چوخ اولدی قلمين قاباغين آلان

يازديغين کتابلار قالانيب قالير

                   آدامين اورگين دردلره سالير

بير عؤمور ايشله ييب چکديگين امک

                   گؤره سن نه زامان بهره وئره جک

فولکلور توپلادين ان کيچيک چاغدان

                   اينجی دن- صدف دن، قارادان آغدان

هر نه کسی بيليردی قوجا بابالار

                   هر نه سؤيلويوردی قاری آنالار

بير به بير توپلاييب يازدين دفتره

                   چاليشدين بيری ده دوشمه سين يئره

قيرخ بئش ايل اولارکی او گوندن گئچير

                   قيمتلی يازيلار توزدان دون بيچير

چاپا وئريلمه ييب هله ده قالير

                   دفترين توز باسيب زنگی سارالير

گئجه نی صبحه ده ک ياتمايان گؤزلر

                   اورکدن قايناييب تؤکولن سؤزلر

ديوان باغلاديغين شعير  دفترين

                   يئکانات تاريخی او شاه اثرين

قالاق قالاق اولان سؤز اينجی لرين

                   صنعت عالمينده بيرينجی لرين

حسرت دی هله ده گون ايشيغينا

                   دؤنمويوب تاريخين ياراشيغينا

دئمه قوجاليرام سيننيم چوخالير

                   ياشين چوخالديقجا ذيروه ن اوجالير

دئمه يازديق لاريم حئيف قالاجاق

                   يوخ قارداش مين لرجه  کتاب اولاجاق

چونکی يازديق لارين اينجی مرجان دی

                   ايلک سؤزون، سون سؤزون آذربايجان دی

فريدن حاصارلی- تبريز 1367