عزيز محسنی

 

اوستاد ميرهدايت حصاری حاققيندا

بؤيوک تدقيقاتچی، گؤرکملی عاليم، احساسلی شاعرو يازيچی اوستاد مير هدايت حصاری ايله 26 ايل بوندان قاباق تانيش اولموشام. قولدور محمد رضانين سلطنتی دئوريلدی، اسلامی انقلاب، هر بير ائل سئور، وطن سئور، آزادليق سئور وطنداشين اورگينده شانلی بير گله جگه دوغرو، اوميد ياراتدی. اؤلکه ده نسبی آزادليق وجوده گلدی. آزادليق سئون اينسانلار فعاليته باشلاديلار. ايللر ايله آغير ايشکنجه، عذاب آلتيندا اينله ين آذربايجانليلار، باشقا وطنداشلار کيمی، اؤز انجمن لرينی ياراتديلار، اؤز دوغما آنا ديل لرينده، روزنامه، مجله، کيتاب نشر ائديب  خلقی داها دا آيدينلاشديرماق اوغروندا مئيدانا قدم قويدولار. انجمن آذربايجان بئله بير انجمن لردن ايدی، تهراندا دمشق خيابانيندا ايشه باشلادی. گونش مجله سينی نشر ائتمگه، ادبی اجلاسلار ياراتماغا، آذربايجان ديلينده کلاسلار قويماغا،  ديليميزی، تاريخیميزی، مدنيتيميزی آذربايجان کوتله لرينه تانيتديرماغا قدم قويدو. هرهفته انجمنين عمارتينده بؤيوک يغيناق اولوردو، انقلاب باره سينده، آزادليق و دئموکراسی حاقيندا، آذربايجان يازيچی، شاعر، صنعتکارلاری باره ده صحبت گئديردی. بئله بير گونلرين بيرينده، بيز آذربايجان ضيالی لاری، يازيچيلاری و قلم صاحبلری، انجمنين سالونوندا توپلانميشديق، ديليميز، شعريميز باره ده صحبت گئديردی. بيردن قوناقلارين بيری خواهش ائتدی تريبون دالينا گئتسين و بير شعر اوخوسون، هامی آلقيشلادی، تازه قوناق شعرينی اوخوماغا باشلادی. ناطقين "جيغالی تجنيس"ی داواملی آلقيشلار ايله قارشيلاندی.

... بيلمه ديک   دنيادا  نه   قالما قالدی

پوزولدو  باغ  بوستان، داها   نه  قالدی

عزيزيم نه قالدی   نه قالماقال، نه قالدی 

جفاسينی بيز چکديک صفاسی کيمه قالدی

تمدن   کاروانی  کئچير    (هدايت)      

هر کيم  بو کارواندان  قالدی،  دالا قالدی

من بو معنالی و گؤزل جيغالی تجنيسی ائشيدن کيمی، عزيز دوستوم، قلمداشيم رحمتليک گنجعلی صباحی دن سوروشدوم، بو جناب هدايت که بئله بيرگؤزل، سليس شعر اوخودو کيم دير؟ هارادا تحصيل آليب، شمالی آذربايجاندا، تورکيه ده، هارادا...؟   او اوستاد حصاری ايله بير نئچه واخت ايدی کی، تانيش ايدی، منه جاواب وئردی، بو جناب معلم سيز، مکتب سيز اؤز عشق، و حددن آرتيق زحمتی سايه سينده، اؤز دوغما آنا ديلينی اؤيره نيب دير و بو ديلده مقاله لر يازير، شعر سؤيله يير، او دا نه شعرلر، گل، گؤر.  من بورادا، ياخيندان اوستاد حصاری ايله تانيش اولدوم ... تاسف لر اولسون، بو نسبی آزادليغين عؤمرو چوخ آز اولدو، انقلاب دان بير ايکی، اوچ ايل سونرا انجمن لر باغلاندی، آنا ديليميزده چيخان روزنامه لر و مجله لرين قاباغی آليندی، گونش درگی سی نين دؤردونجو سايی  چاپخانادا بوغولدو،  بير نئچه واخت بو عزيز و تازه دوستدان خبريم اولمادی. خلقیميزين وارليغی اولان وارليق درگی سی، دوقتور هئيت جنابلاری نين جديت و زحمتی سايه سينده اؤز حياتينا دوام وئرمه گه ادامه وئردی. بيزلردن بير چوخوموز توپلانديق بومجله اطرافينا يئنه اوستاد حصاری ايله گؤروشمک، دانيشماق، دردلشمک باشلاندی، من گؤردوم، بو يورولماز اينسان، ديليميز، ادبياتيميز، تاريخيميز اوغروندا سارسيلمادان چاليشير، هئچ يورولماق، دايانماق، مايوس اولماق بيلمير.  عزيز قلمداشيم حصاری ايله موختليف خاطره لريم وار، واختينيزی توتمورام، فقط بو سون خاطيره می چوخ قيسا صورتده دئمک ايسته ييرم.

اوستاد ايله بيرليکده باکييا يولا دوشدوک، آذربايجان دانشگاهی طرفيندن بيز ايکی نفره فخری دوقتورا وئريلمک اوچون بيزی باکی يا دعوت ائتمشديلر. من قلمداشيم حصاری ايله بير هفته  مهمانخانادا بير اوتاقدا ياتيب دوردوق. دئمک اولار بوتون واختيميز بيرگه صرف اولونوردو. تمام بو يئدی گون، من بير دفعه ده گؤرمه ديم او، حتا 10 دقيقه ده گئجيکسين. هميشه حاضر سلاح، مرتب ايدی. آمما بيرگون بير محفله گئتملی ايديک، گؤردوم دوستومدان خبر يوخدی، چوخ تعجب ائله ديم، سونرا معلوم اولدو، آقای حصاری، گئديب باکی نين بازارلارين گزسين و اؤز نوه لری اوچون، مو ناسب سوقات تاپسين، حقيقتده بونو بيلندن سونرا چوخ خوشحال اولدوم. گؤردوم، بو عاليم، گؤرکملی يازيچی و شاعر عينی زاماندا نه قدر مهربان و نه قدر محبت لی بير اينسان دير.

     خاطيره لر، شيرين و اونودولماز خاطره لر چوخدور، بونلاردان واز کئچيرم، ايندی بو گورکملی اوستادين ياراديجيليغی باره ده قيسادا اولموش اولسا دانيشماق ايسته ييرم.

اوستاد حصاری نين بو گونه کيمی يازديقلاری کيتابلارين تعدادی بئله دير...

[...30 جلد چاپ اولموش دور ، ... 30 جلد چاپا حاضيرلانميشدير.]

اوستاد حصاری نين بو کيتابلاردان باشقا 1000 دن آرتيق تخصصی و علمی مقاله سی، 1000 دن آرتيق ژورناليستی مقاله و ترجمه لری، موختليف اؤلکه لرده، ايران، تورکيه، شمالی آذربايجان، ايسوچ و... مطبوعاتيندا چاپ اولوبدور. بو گونکی گونده اوستاد حصاری، بير بؤيوک عاليم، تدقيقاتچی، ادبيات شناس، تاريخچی، شاعر، يازيچی و ژورناليست تانينير. اونون بير نئچه تدقيقی کيتابی نشره حاضيردير، سؤز يوخدور کی يولدا اولان بو اثرلر، چاپ و نشر اولموش اثرلری کيمی، آذربايجان ديل، ادبيات، فولکلور ومعارفی نين اينکشافی يولوندا اؤنملی رول اويناياجاقدير.

اوستاد حصاری نين تدقيقی مقاله لری باره ده گرگ اطرافلی يازماق و دانيشماق، من بورادا آنجاق اونون  شعرلری باره ده چوخ مختصر دانيشماق ايسته ييرم.

اوستاد حصاری اؤز دوغما آنا ديلينی، بوتون وارليغی ايله سئوير، او شعرلرينده دوغما آنا وطنينه،شيرين آنا ديلينه، من کيمم عنوانلی شعرينده بئله سؤيله يير:

من کيمم؟  بير عاشيق، بير جاندان کئچن                 

بير عشقين  باده سين   دورمادان   ايچن،

من کيمم؟   ياخشينی  ياماندان  سئچن                  

من  گلديم    دونيايا   عاشيق     اولماغا،

...   ازلدن   سئوگيليم     وطندير،   وطن                 

وطن سيز     دونيانی    نئيله ييرم  من؟

ائلين ايسته مه ين،  ديلين   سئومه ين                  

نه لايق،     (هدايت)   ديری    قالماغا؟

گونش سيز گونلر ديوانيندا، "آناديلی مسئله سی" شاعرين روحونون درين ليکلرينه کيمی ايشله نمه سينی  بو دردلی شاعر، سليس، آخيجی و اوره يه ياتان بير ديل ايله بئله بيان ائدير:

" آنا  محبتی،   آنا     سودی ايله                

گيره ر  هر اينسانين جسم جانينا"

" آناديلی ايسه،  آنا  سسی ايله       

قاتيشار   آدامين     اتی،    قانينا"

 

شاعر، بو سؤزلری دييه ندن سونرا  بئله بير قناعته گلير کی، ائل لرين آزادليق زامانی چاتيبدير، بو ائل لر، بو خلق زنجيرلره باغلانان ديل لرينين زنجيرلرينی قيراجاقلار. زامان چاتيبدير و بو دا زامانين حؤکمودور.

"يئتيشيب  ائل لرين  آزادليق چاغی،   

گلين"شوونيزمه" سون قوياق ايندی"

"قول لاردان زنجيری، ديل لردن باغی

واختی يئتيشيبدير، بيز قيراق ايندی"

اوستاد حصاری تواضعکار و نجابتلی بير اينسان دير، او، عؤمور بويو  خلقی نين و ديلی نين آزادليغی اوغروندا يورولمادان چاليشيب و بوتون وارليغی ايله بونا اينانير، زامان چاتيب، او گون گله جک،بوخوولار، قاندال لار قيريلاجاق. اونون اؤز قان قارداشلاری حتا بوتون ازيلن، تاپدالانان، مظلوم اينسانلار، گونش رنگلی کؤينکلرينی گئييب، حياتلارين باهاريندان کئچه جکلر.

من حؤرمتلی دوستوم و تواضعکار عاليم، شاعر و يازيچی اوچون جان ساغليعی آرزولاييرام. اونون گله جک نائليت لرينه امينم، و اونون کيمی، او صفالی، آيدين گونلری بوتون اينسانلارا، خصوصيله، ايل لر بويو تاپدالانيلان، ديلی، منليگی ازيلن وطنداشلاريما اورکدن آرزولاييرام.

عزيز محسنی

تهران  - 10 سپتامبر2005