دوقتور جواد هئيت

تهران    10-سپتامبر2005

 

دوقتور مير هدايت حصاری باره ده بير نئچه سؤز.

آقا ميرهدايت حصاری اوزون ايللردير وارليق درگی سی نين گؤرکملی يازيچيسی و وارليق يازيچيلار هيئتی نين عضوو دور. او عين زاماندا شاعر، محقق، فولکلور شناس و آذربايجان ساحه سينده تورکلوق دور. تاريخ و ادبياتيميز ساحه سينده آپارديغی آراشديرمالار و  يازديغی مقاله لری وارليق درگيسی نين صحيفه لری نين بزگی اولموش و اوخوجولاريميزين ماراقينی  جلب ائتميشدير. حصاری بگين آراشديرما ساحه سی چوخ گنيش دير. او تورکجه و فارسجانين ديل و ادبياتينا درين دن بلد اولدوغو اوچون هر ايکی ديلده  تحقيقات آپارير و اونودولموش ادبی اثرلری و تاريخی شخصيتلريميزی اوزه چيخاردير و بيزلری اونلارلا تانيش ائدير.

حصاری بيگ عين زاماندا گؤرکملی شاعردير. اونون شعرلری مضمون و محتوالی  و دويغولودور. اوزون ايللردن بری وارليق ين بوتون سايلاريندا اونون  مقاله لری و شعرلری درگی نين ان ماراقلی و فايدالی حيصه لرينی تشکيل ائتمکده دير.

اونون مقاله و شعرلری باشقا درگی و قزت لرده ده چيخماقدادير. حصاری بيگ او قدر چاليشقان بير آراشديريجی و يازيچی دير کی، وارليق درگيسی اونون هامی مقاله و شعرلرينی يايماغا کفايت ائتمير و بير چوخ درگی و قزت لرده ده اونون اثرلری نشر ائديلير. بونا باخماياراق دئيه بيله رم کی حصاری بيگ وارليق درگی سی نين تمل پايالاريندان بيری دير.

حصاری بگين اوشاقليق حياتی چوخ چتين و محروميتله گئچميشدير بو اوزدن او مدرسه تحصيلينی آپارا بيلمه ميش وچاليشاراق ائشيکده اوخويوب امتحان وئرميش و ليسه تحصيلينی ببيتيرندن سونرا اوردويا داخل اولموش و 30 ايل خدمت دن سونرا آلبای(سرهنگ) درجه سيله امکلی اولموش، اوندان سونرا داها چوخ فرهنگی ايشلرله مشغول اولموشدور. او، اوردودا ايکن لندن اونيورسيته لريندن مهندسليک ديپلومو آلميش و اوردو فاکولته لرينده معلم- اوستاد وظيفه لرينده چاليشميشدير.

او باکی دا آذربايجان اونيورسيته سی نين فخری دوقتورودور.

بوگون اونون 76 ياشی واردير. او  جولفادا آنادان اولموش آمما اصلا يکانلی دير. اونون اثرلری چوخ شاخه لی و سايلاری دا بير يازيچی نين عؤمرونه  سيغماياجاق قدر چوخدور. بورادا ان موهوملرينی درج ائديريک.

ايندييه قدر 2250 مقاله و شعرلری ايران، آذربايجان تورکيه و آوروپادا ياييلميشدير. [ 60 ] جلد کيتاب مولفی دير. 450 مقاله سی آذربايجان و قشقائی شاعرلری باره ده آنکارادا بؤيوک ادبيات پروژه سينه گؤندريلميشدير.

فولکلور ساحه سينده ايکی کيتابی و اونلارلا مقاله سی چيخميشدير.

بير چوخ مطبوعات اورگانلارييلا همکارليغی اولموش و اوزون ايللردن بری وارليق درگی سی نين تحريريه هئيتی عضوو  و فعال يازيچيسی دير.