اؤن سؤز

 

 

حورمتلی وارليغين سسی درگی سينين اوخوجولاری!

 

     بيرمدت آرادان سونرا سيز ديرلی اوخوجولاريميزی يئنی دن درگيميزين اؤزل بوراخيلشی ايله سالاملاييريق! تاسوفله بعضی مادی چتينليکلره گؤره درگيميزين نشری بيرآز لنگيميشدير. آمما بو مسئله نی بيرمقدار دا  اولسا حل ائتديک و يئنی دن سيزلرله گؤروشمه ييميزه چوخ شاديق.

    

     قيد ائتدييميز کيمی، درگيميزين بو نمره سی اؤزل  بوراخيليشدير. چونکی بو سايميز گونئی آذربايجان ادبياتيندا، فولکلوروندا، مطبوعاتدا اؤزل يئری اولان بير شخصيته گؤرکملی اديب، يازيچی و تدقيقاتچی ميرهدايت حصاری نين حيات و ياراديجيليغينا حصر اولونور.

    

   بو بؤيوک اوستادين آنادان اولماسی نين 75 ايلليگی مناسبتی ايله رداکسيا هيئتی اولاراق اؤزوموزه بورج بيلديک، اونون بيتيب توکنمک بيلمه ين صنعت يولوندان، ادبياتيميز، مدنيت تاريخيميز ساحه سينده گؤردوگی ايشلردن صحبت آچاق. ميرهدايت حصاری نين فعاليتی اوقدر چوخ احاطه لی دير کی، اونو بير درگييه سيغيشديرماق البته ممکون دئييل. بورا دا بيز فداکار يازيچيميزين ياراديجيليغينين ان مهم آنلاری حاققيندا، اوستادين شرفينه درگیميزين ايسوچين مالمو شهرينده تشکيل ائتدييی يوبيلئی مراسيمی حاققيندا بحث ائتمه يه، اثرلريندن نمونه لر وئرمه چاتديرماغا چاليشميشيق. درگی نين سونوندا تدبيردن بعضی شکيللره و اوستاد ميرهدايت حصاری نين عنوانينا گلن تبريکلره يئر وئريليب.

    

   بيرداها ديرلی اديبيميز ميرهدايت حصارينی 75 ايلليک يوبيلئيی مناسبتيله تبريک ائدير  اونا اوزون عؤمور، جان ساغليغی و ياراديجيليغيندا اوغورلار آرزيلاييريق!

    

ايستکلی اوخوجولاريميز! سيزلری ده ايکی علامتدار گون باهار بايرامی و يئنی 1385- جی گونش  ايلين  گليشی مناسبتيله تبريک ائديريک! آرزيميز بودورکی، يئنی ايلده خالقيميزا آنجاق خوش گونلر نصيب اولسون، قاراباغداکی، گونئی آذربايجانداکی دردلريميز حل اولسون، باشقا ترقی ائتميش خالقلار کيمی بيزده  فراوان ياشاياق!

 

وارليغين سسی درگيسی نين، يازارلار هيئتی