دونياسين دييشنلر!

 

باش ساغليغي

آلديغيميز خبره گوره محمد رضا نصيريان ، (قاراداغلي) گوزل انسان و حياتيندا آذربايجانين آديني و عنوانيني دونيادا اوجاتماغا سارسيلماز اراده ايله چاليشان بو غيرتلي وطنداشيميز 1/1/1383 تاريخينده بيزي ترک ائديب و ابديته قووشموشدير!

محمد رضا نصيريان، گونئي آذربايجاندا فعاليت گؤسترن گونش پارتياسي نين اردبيل قولونون مسئولو  اوزون مدت آذربايجان خالقي نين ميللي حقوقلاري  اوغروندا وار و قووه سيله يورولمادان چاليشميشدير. بيز بو بؤيوک ايتکيني اونون حورمتلي عايله سينه ، گونش پارتياسينداکي امکداشلارينا و ها بئله اونو سئونلره باش ساغليغي وئريب و او مرحومون اولو روحونا رحمت و شفقت ديله ييريک و بوتون بو ماتمده اولانلارا دؤزوم آرزيسينداييق.

 

آذربايجان ميللي جبهه سي ، وارليغين سسي نين يازيچيلار هييتي

 

منوچهر عزيزي اؤلمز محمدرضا نصيريانين حاققيندا

 

« او بير اوغلان کي پري لر سو ايچرلر چاناغيندا»                        

کيم ايميش او کي پريلر سو ايچرميش چاناغيندا؟!

او « گونش» اوغلو کيمي نور ساچاراق اود ياناغيندا

ظلمته قارشي گئدن اودلو غضب لر دوداغيندا

گئجه نين ظولمو بيچيلميش ايتي کسکين اوراغيندا

او گزه رميش گونشين نور سوراغيندا

او آچارميش سحرين سو فرسيني آل ساچاغيندا

خالقمين قوپ- قورو، چات- چات دوداغيندا

اؤيره درميش آنامين بال ديليني

دوشونرميش ائليني

ياپيشارميش قوجا- آهيل اليني

دارايارميش بالاجا قيزلارين الوان تئليني

او بيراوغلان کي ايگيدلر کيمي سورموش حياتين

او بير اوغلان کي اوجالتدي جهانا تورک آدين

او بيراوغلان کي داياندي، يادا قانديردي ذاتين

دوشمنه قارشي چاپيرتدي آمانسيزجا آتين

بير داها دوغماياجاقديربوطبيعت اونا تاي.

 

باش ساغليغي

آلديغيميز خبره گوره بو کئچنلرده جعفر قوسي (فرزانه) اوستاد فرزانه نين قارداشي گوزله نيلمه ده ن دونيا يا گوز يوموب ، ابديته قووشدو ! جعفر قوسي روزگارين آغير شرا يطينه باخماياراق حيات بويو انسانليق دونياسيندا شرفله ياشادي و شرفله عمرون باشا وئردي. بيز بو مرحوما اولو تانريدان رحمت و شفقت آرزيلاييب و حورمتلي عايله عضولرينه و قايغي کش قارداشي اوستاد محمد علي فرزانه يه باش ساغليغي و دوزوم ديله ييريک.

 

 

 

باش ساغليغي

بوردا بير غيرتلي آتا ياييب دير

آجي- شيرين خاطره سين آتيب دير

قالانلاري درين غمه باتيب دير

او گئدسه ده ياخشيليغي قاليبدير

محبتي اوره کلره ساليبدير.   

منوچهر عزيزي

آذربايجان دموکرات فرقه سي نين غيرتلي فدائي سي ميرشهرود جوادي نين اورمو شهرينده دونياسيني دييشمه سيني اونون حؤرمتلي عايله سينه، قوهوملارينا ومسلکداشلارينا باش ساغليغي وئرير، اولو تانريدان اونا رحمت وشفقت ديله  ييريک.

آذربايجان ميللي جبهه سي

گونش پارتياسي

وارليغين سسي ژورنالينين رئداکسياسي