«منوچهر عزیزیی ایله دانیشیق»                                           

 

هانسی گوناها منی اؤلکه دن چیخیلماز ائتدیلر

 

عزیزی جنابلاری!  اجازه وئیرن بیرینجی سووالیمیزی بئله باشلایاق.  ائشیتدیک کی ایسوچ اؤلکه سینه اوچان زامان سیزین بو سفرینیزیه مانع اولموشلار. بو ایشین سببی نه ایدی؟                                                                         

عزیزی : من ایسوچه دعوت اولوندوغوما گؤره  ایکی بفعه  دولتین امنیتی اورقانلاری طرفیندن چاغیریلاراق اونلاردان خبرسیز بو سفره حاضیرلاشماغیما گؤره مندن گیلئی لیک ائتدیلر. منده اونلارین بو گیلئی نین جاوابینا دئدیم : پاسپورتون هئچ یئرینده بئله بیر اجازه نین آلینماسی قئید اولماییب دیر. اونلار جاواب وئردیلر بیز ایسته ییردیک سیزی دعوت ائدنلری تانیا سینیز، چونکی اونلار اول سلطنت طلب ایدیلر، ایندی ده تجزیه طلب دیرلر وممکندور سیزدن اؤز مقصدلری اوچون سو استفاده  ائتمیش اولالار. جاواب وئردیم : منده ائله اونا گؤره گئدیره م کی نه اورادا قالاسیییام ، نه ده ساتقین آدامام کی مندن سوء استفاده ائده بیلسینلر نه ده اقتدارین علیهینه دانیشماق قصدیم وار. سونرا منه تکلیف ائتدیلرکی سیز اورایا اؤلکه نین سفیری کیمی گئدیر سینیزکی امیدواریق سامباللی داوراناسینیز! لاکین جاواب وئردیم من اؤز مستقیل فیکیریمله گئدیره م ومستقیل فیکیریمله ده قاییداجاغام.

آنجاق، نئجه کی بیلیرسینیز، طیاره یه مینن چاغی پاسپورتومو آلاراق سفریمه مانع اولدولار ونهایت  منی تبریزین نؤمره بیر انقلاب محکمه سینه چکدیلر.

سئوال - سیز کیملرین طرفیندن دعوت اولونموشدونوز؟

جواب- من آذربایجان میللی جبهه سینین طرفیندن دعوت اولونموشدوم. من اونلارین فیکیرلری وایدئیالاریلا  تانیش اولدوغوم اوچون، اونلارین دعوتینی قبول ائتمیشدیم

سئوال -میللی آذربایجان جبهه سینین هدفلری ومقصدلری ندیر؟

جواب- اونلارین  هدف ومقصدلری، گونش پارتیاسینین هدفلرینه یاخین دیر.  اونلارین دا عقیده لری  بودورکی، آنا یاسادا یازیلمیش آذربایجان وباشقا خالقلارین حقوقلاری اجراء ائدیلمه لیدیر

سئوال - گونش پارتیاسیلا، آذربایجان میللی جبهه سینین آراسیندا بیرلشمه قویولموشدور؟

جواب- بئله بیر قراریمیز یوخ ایدی

سئوال - انقلاب محکمه سینه مراجعت ائتدینیزمی؟

جواب- بلی من  تبریزین انقلاب محکمه سینه مراجعت ائتدیم. منه عایید ائدیلن اتهامی سوروشدوم، دئدیم منیم گوناهیم  اولمادان منیم، اگر اتهامیم وارسا محکمه تشکیل وئرمه دن شیکایتچی تانیمادان ، نییه منیم سفریمه مانع اولاراق چیخیلمازلیغا جزالاندیرمیسینیز. چونکی اؤلکه دن بیری نین قانونی چیخیشینا مانع اولماق اؤزو مجازاتدیر!

انقلاب محکمه سینده منه جاواب وئردیلرکی، سیزین گوناهینیز پان تورکیست اولماقدیر. آمما من درحال  جاواب وئردیم بیزیم آنایاسا میزدا پان تورکیست آدیندا جورم  یوخدور وعمومیتله قانوندا عقیده آراددیر اؤزمده پان تورکیست دئییلم

سئوال - سیزجه بو اویون بازلیقلارین مقصدی وسببی نه اولا بیلر؟

جواب- اونلارین نظریجه من آزاد فیکیرلی اینسان اولدوغوما گؤره منیم سفره چیخماغیم اونلارین آپاردیقلاری سیاستلرین ضدینه باشا گله ومنیم خاریجه سفر ائتمه ییم اؤلکه نین  واقتدارین ضررینه باشا گله. لاکین اونلار عمومیتله منیم حاققیمدا سهو باشا دوشموشلر. چونکی منیم اقتداردان قانونی طلب لریم اولسادا، اونون علیهینه دئییلم وهئچ قوروم وپارتیاایله ده مقاویله باغلامایاجاغام. آنجاق کی، بیزیم حاققیمیزدا اولان  بئله بیر شبهه لر بوشبوتون یانلیش وعبثدیر.

سئوال - سیزه وورولان اتهامین سونوجو حاققیندا نئجه فیکیرله شیرسینیز، عمومیتله سیزی نه کیمی گوناهلاندیریبدیرلار

جواب- من بیر جلسه محاکمه اولموشام، منیم گوناهیم گویا پان تورکیست لیکدن علاوه، تجزیه طلب لیک و اقتدارین علیهینه تبلیغات کامپانیاسی آپارماقدان عبارت اولونموشدور.

سئوال - سیزین خارج سفرینیزه مانع اولماق نئجه سسلندیریلدی؟

جواب-منی آوروپایا دعوت ائده نلربو احوالاتی ائشیدن کیمی اونو بوتون تشکیلاتلارا چاتدیردیلار. چونکی قویولان  قرارا گؤره من آوروپانین بئش اؤلکه سینه گئتمه لی ایدیم. بو باره ده چوخ اعتراضلار اولوندو کی، نییه قانونسوزلوق اولاراق منیم سفریمه انگل تؤره دیبلر

سئوال - سیز بوغیر قانونی عمله داییراعتراض ائتمیسینیزمی؟

جواب-من همن محکمه نین علیهینه شیکایت ائتمیشم. منی دعوت ائدنلر، بو باره ده میللت لر تشکیلاتینا واینسان حقوقلارینی مدافعه ائدن تشکیلاتلارا اعتراض وشیکایت ائتمک قرارینا گلمیشدیلر، من هله لیک بو ایشه راضی اولمادیم او زاماناجاکی محکمه میزین سون قراری نئجه نتیجه له نیر. من یالنیز تهرانداکی بیرلشمیش میللت تشکیلاتی واینسان حقوقلازینی مدافعه ائدن تشکیلاتا، پرزیدنته وایرانین عالی محکمه سینه شیکایت ائتمیشم

سئوال - بو پروبلملر اورتایا آتیلماقلا بئله آنلاشیلیرکی، گونش پارتیاسینین طالعی دقت مرکزینده اولاجاقدیر. سیزجه گونش پارتیاسینین طالعی نه اولاجاقدیر؟

جواب-سؤزوزون قووتینده منجه ده بو اویونلارین هامیسی گونش پارتیاسینین باشیندادیر پارتیا قانونی مرحله لرینی کئچیریب بو ایشدن دؤرد ایل سؤوشور، لاکین داخیلی ایشلر  ناظیرلیگینده بو قئیدیاتا  باخان ماده 10 کمسیون هله بو گونه قده ر غیرقانونی اولاراق جاواب وئرمه میشدی. لاکین، داخیلی ایشلر ناظیرلیگیندن بیرمحرمانه مکتوبدا، پارتیانین نظامنامه سینه  دؤرد ایراد قئیده آلینیب دیرکی، بیریسی پارتیانین عنوانی نین تورکی اولماسی، دیگری ایسه گویا کی تقدیم اولونان تاسیسچیلر پارتیا اداره چیلیگینده ضعیف آداملاردیر، هابئله بویورموشلارکی، سیزین ایستکلرینیز تجزیه طلب لیکدیر وسونونجو ایراد، سیزین مقصدلرینیز ایران خالقلاری نین بیرلیگینی پوزماقدیر!؟

البته بو ایرادلارین هامیسی بوش سؤز اولاراق هئچ بیر قانون فاکتی ایله اثبات اولونمور، چونکی قانونون هئچ بیریئرینده تورکی آدین غیر قانونی اولدوغو قئید اولونمامیشدیر. بونلارین هامیسی بهانه دیرکی، گونش پارتیاسینا قانونی فعالیت ائتمه یه اجازه وئریلمهسین! وآسیلی ساخلانسین!

سئوال - آنجاق بیزه بئله بیر خبر چاتیبدیرکی، سیزه وئریلن بیررسمی مکتوب اساسیندا گونش پارتیاسی  غیرقانونی اعلان ائدیلیب وسیزین فعالیتینیزین قاباغی آلینیب دیر. حتی اومکتوبدا قئید اولونوب فعالیت ائتدیگینیز تقدیرده قانونا جلب اولوناجاقسینیز.

جواب-بو مکتوبو تبریز فرمانداری گؤنده رمیشدیرکی، او اؤزو اجرایی بیر مسئولدور ومحکمه آدامی دئییل دیرکی، بیر پارتیانین فعالیتین قاباغینی آلسین یا اوغیرقانونی اعلان ائده بیلسین. بیر پارتیانین غیر قانونی اعلان ائدیلمه سی عالی محکمه نین قانون اوزرینده وئردیگی قرارلارلا حیاته کئچه بیلر. یوخسا هئچ بیر اجرایی اورقانین حاقی یوخدور بیرپارتیانین فعالیتینه مانعه یارادا بیلسین! وبوایش فرماندارین وظیفه لریندن دئییل.

سئوال - بس بئله لیکله گونش پارتیاسی فعالیت ده دیر.

جواب- گونش پارتیاسی فعالیتده دیر ورسمی اجازه نامه سینی گؤزله ییر!

سئوال - بس بو حسابلا پارتیانین فعالیتین دایاندیرمامیسینیز؟

جواب- خیر!  مختلیف شهرلرده اؤنملی شخصیت لرله اجلاسلاریمیزی آپاریریق، بیان نامه لریمیزی خالق ایچره یایاراق حتی تبریز فرماندارینادا گؤنده ریریک ومختلیف موضوعلاردا وجریانلاردا عکس صدا گؤسته ریریک. آنجاق مسئله بوراسیندادیرکی، نییه بیزیم قئیدیات ورقه میزی وئرمیرلر.

سئوال - سیزجه اقتدارلا، آذربایجان میللی حرکت فعال لاری نین آراسیندا یارانمیش کدورتلری وبدبین لیکلری نئجه اورتادان قالدیرماق اولار؟

جواب- منجه بئله بیر آنلاشیلمازلیقلاری اورتادان قالدیرماق چوخ راحاتدیر. اولا بوکی، هر ایکی طرفین سیاسی- ایجتماعی مسئله لره داییر فیکیرلری آچیق وآیدین اولاراق، حقیقتله دوزگون یاناشسینلار قانونلا، اورتایا آتیلان « قرمزی خط»  نه دئمکدیر؟ قانون اوزرینده خایین له خدمت ائده نین فرقی بللنسین. اگر بونلار آچیق- آیدین آراشدیریلسا، اینسانلارین حقوقو شخصیت لری قورونسا وقانون اوزرینده خالقیمیزین حقوقو اؤده نیلسه، قانونا دوزگون عمل ائدیلسه هئچ واخت خالقلا- اقتدار آراسیندا ذره جه کدورت قالمایاجاقدیر. بوتون پروبلملر حل ائدیلرکن، هر شئی اؤز قایداسیندا اولاجاقدیر.