ناغیللار ولطیفه لر:

 

*********************************************

 

خئیره سؤیله مز

  

  بعضی آداملار هرنه سوروشسان انسانا پیس خبرلر وئره رلر. خئیر سؤز آغیزلاریندان چیخماز. بونلارا خیره سؤیله مز آدام دئیه رلر. بیرگون بیری مشهد دن قاییتمیشدی کند اهلی پئشوازا گلمیشدیلر. هامی خوش گلدین دئییر وزیارت قبول دئیه الینی سیخیردیلار. بیرزامان  گؤردو بیرمشهور خئیره سؤیلمز شخص لردن بیری قاباغا گلیر اه ل وئریب اؤپوشندن سونرا مشهددن گله ن آدام اؤز یانیندا دئدی من بوندان هرکیمی سوروشام دئیه جک کی اؤلوب دور یاخشی سی بودور بیر قره ایتیمیز وار اونو سوروشوم دئسه ده  اؤلوب دور جهنمه جن، اهمیتی یوخدور. بو منظور ایله دئدی:

-         فلانکس بیزیم بیر قره ایتیمیز وارایدی او نه حالدادیر؟

خئیر سؤیلمه زغمگین قبافه توتاراق جواب وئردیکی:

-         اؤلدو دا...

مشهدی کیشی اورگینده گولومسنه رک،  گئنه سوروشدو.

-         ایت نه جور اولدو اؤلدی؟

خئیر سؤیلمه ز دئدی:

-         واللاه او ساری اینه گیز موندار اولاندان سونرا اونون اه تین دن یئمیشدی اودورکی  اؤلدو.

مشهدینی بیر آز نیگرانلیق باسدی دوباره سوروشدو:

-         اینه ک نییه اؤلدو بس...؟

خئیره سؤیلمز بیر آه چکیب دئدی:

-         ائح...صاحابسیز مال اوجور اولاردا... رحمت لیک آنان مرحوم اولاندان سونرا داها اینه گه باخان اولمادی اؤلدو دا. مشهدی نین بده نی سیلکه لندی.

-         ای وای دئدی... آنام اؤلوب دور؟  اونون کی بیر زاد دگیلدی.

خئیره سؤیله مز کدرلی حالدا:

-         واللاه نه دئییم...  اوغلان لاریزین قویویا دوشوب اؤلمه گینی ائشیدنده بیردن ائله یازیغین باغری چاتدادی... بئچارا...

مشهدی کیشی ایکی اه للی باشینا ووراراق:

-         اوغلان لار قویویا دوشدولر؟... اونلار قویو باشیندا نه قاییریردیلار؟

خئیره سؤیله مز بیر آز دوروقسوناراق:

-         ائح بابا... نه قده رکی رحمت لیک آنالاری ساغ ایدی اوشاقلاری قویمازدی ائودن  ائشیگه چیخسین لار. آمما...

مشهدی کیشی باشینی، ساققالینی یولوب آغلایاراق سوروشدوکی:

-         توفاقین داغیلسین بو خبرلرین ایله... دی گؤروم بیزیم ائوده  ساغ قالان وار یایوخ؟

خئیره سؤیله مز دئدی:

-         واللاه من بوندان آرتیق بیرزاد بیلمیرم. آنجاق ایندی گله نده گؤردوم کی سیزین کوچه قاپیزی پالچیقلاییب لار ایکی نفر حیه طیزه سامان بوشالدیرلار.

 

ایسسی بیر یاننان (یاندان)، فارسی بیر یاننان

بیری یای فصلینده تهرانا گلمیشدی. تهرانین دا یایی ایسسی اولار. قاییداندان سونرا سوروشدولارکی:  فیلان کس خوش گئچدی؟

دئدی:

- نه خوش گئچه جک ایسسی بیریاننان،  فارسی بیر یاننان، دده می یاندیردیلار.

 

اوسته کی یورغانی گؤتور ترله دیم!

     بیری قیزدیرمیشدی، ائوده هر نه وار ایدی اوستونه سالدیلار گئنه ده دئییردی اوشویورم. تک بیر سوایله دولو قازان قالمیشدی  اونودا او بیری شئی لرین اوستوندن قویدولار. ناخوش ترپشدیکده قازانین سویو تؤکولدو اوستونه.  چیغیراراق دئدی:

-         اوسته کی یورغانی گؤتورون دئیه سن ترله دیم!

   

آدینی دئمه باس بئلیمه!

بیری ده یئنه قیزدیرمیشدی،  ائوده هر نه وار ایدی سالدیلار اوستونه، یئنه دئییردی کی اوشویورم. بیری دئدی کی داها بیر زاد قالماییب تکجه بیر پالان قالیب. ناخوش دئدی:

- آدینی دئمه قوی بئلیمه!

***************************************************************************

 

تاپباجالار ( تاپماجالار)

****************

1- بوردا وورار قیلینجی

میصیرده اوینار اوجو

 2- تاپباجا تاپدیم باجا

   ایته وورسان  ایت ده قاچا

 3- تاپ او نه دی تاپباجا

آیاخلاری یاپباجا

گؤزلری پیالاج

4-  جاوانلیقدا قاچماز

قوجالیقدا قاچار

5- چین اوتاق

چین، چین اوتاق

قیرخ پیلله کان

مین بیر اوتاق

       تاپماجالارین جوابی

*****************

1- ایلدیریم

2- که سو (نیمسوز)

3-  دوه

4-     یئل قووان کولو

      5 -  کلم

 

آتالار سؤزلریندن نمونه لر:

*************************************

1-     اوتانماسان اویناماغا نه وار

2-      اوت کوک اوسته  بیتر.

3-     اوجالار مگر ییخیلا، آلچاقلار دولا.

4-     اوجوز اه تین شورواسی اولماز.

5-     اوجوزدان باهاسی اولماز.

6-     اوجونو توتدو اوجوزلوغا گئتدی.

7-     اوخو آتیب، یایی ( یایینی) گیزلدیر.

8-     اود ایله سو بیر یئرده قالماز.

9-     اوزاقدان باخانا دؤیوش هاسات (آسان) گله ر.

10- اؤرکدن اؤرگه یول وار.

11- اوزون آدامین آغلی توپوغوندا اولار.

12- اؤز وئرنده آستار ایستییر.

13- اوشاق آنادان یئتیم قالار.

14- اوشاق ایله اوشاقلیق ایله مک اولماز.

15- اوغرو ائو اولماز ائو صاحابینی ائولیک دن سالار.

 

**************************************