ناغيللار و لطيفه لر

حاجي و شيطان

بيرگون بير لوطو آدامين ايشي چوخ دالي دوشموشدو. گونو چوخ پيس گئچيردي. شيطانين اوره يي لوطويا ياندي. يانينا گليب دئدي لوطو باشي نييه بئله غمگين سن؟  لوطو دئدي:  واللاه بيرياندان گليريم گلمير، خرجيلگيم يوخدو بيرياندان  بوشلو دوشموشم وضعيتيم چوخ پيس گئچير. شيطان دئدي غصه ائلمه، من بيرياخشي عربي آت اولارام آپار مني سات خرجله. شيطان بونو دئييب بير ويرد اوخويوب گؤزه ل بيرعربي آت اولدو لوطو سئوينجك آتين جيلووندان ياپيشيب، شهره چيخارتدي. بير دؤولتلي حاجي نين قاپيسي نين قاباغينا آپاردي لوطو حاجيدان نئچه دفعه پول ايسته ميشدي، وئرمه ميشدي. حاجي ائشيگه چيخاندا گؤزو بيرگؤزه ل آتا ساتاشدي. حاجي دئدي: 

- لوطوباشي بو آتي هارادان آلميسان ؟  نه ياخشي آتدي.

لوطو دئدي:

- حاجي آغا بو آتي اميرلردن بيري منه باغيشليب، ساتيرام. آل !

حاجي دئدي:

- نئچه دئييرسن؟

دئدي

- اون مين تومن

حاجي دئدي:

- ياخشي آتدي آمما بو قيمت لره ده يمز

لوطو دئدي:

- حاجي آغا بوندان دا آرتيغا ده ير، پول احتياجيم دي، ساتيرام.

اويان بويان حاجي آتي سككيزمين تومنه لوطودان آليب ائوينه آپاردي.

حاجي آتين شوقوندان يئرده گؤيده دورموردو. بير تميز اوتاغي بوشالديب آتي اورايا باغلادي وپروانه كيمين اونون باشينا دولانيردي، سيغارلييب، تومارلييردي.

آخشام چاغي دا اؤزو آتين جيلووندان ياپيشيب، قاپي قاباغيندا اولان سو لوله سي نين يانينا سووارماغا گتيردي آت آغزيني لوله يه داياييب، سو ايچمگه باشلادي. حاجي دا لذت ايله اونا باخاراق آغزي ايله فيشقيراق چاليردي. بيرده گؤردو آتين آغزي بورنو سو لوله سي نين ايچينه گيريب، ياواش- ياواش سو لوله سي نين ايچينه گئتمه كده دي. حاجي گؤردويونه اينانا بيلميردي كي، او يئكه ليكده آتين باشي بو دارليقدا سو لوله سينه نئجه گيريردي. ديلي توتولوب مات قالميشدي كي گؤردو آتين باشي تمامي ايله سو لوله سي نين ايچينده دي وگؤرسنمير هله آتين بوينودا يارييا كيمي لوله يه  گيرميشدي. وگئت به گئت ايچري گئدير.  

 

آياخلاري لوله يه گيردي.حاجي چيغيريب، باغيريب هاراي چكدي. اوشاقلار حاجي نين دؤوره سيني آليب ايشين نه اولدوغونو حاجيدان سوروشدولار.

حاجي دئدي:

- نه اولاجاق ائويم ييخيليب، سككيزميم تومن ليگ آتيم سو ايچركن گيردي بوسو لوله سينه! اوشاقلار قاه- قاه چكيب گولدولر وحاجيني هويا باساراق دئديلر:

- حاجي ده لي اولموسان يا نه دي؟  او يئكه ليكده آت نه جور بو دارليقدا لوله نين ايچينه گيره بيلر.

حاجي حيرصله نيپ اوشاقلاري قووالادي كي:

- ده لي اؤزوزسوز جد- آباديزدي هله منيم اؤز درديم اؤزومه بس دئييل منه ده لي آدي دا قويورسوز . . .!

بو زمان بؤيوكلرده ييغيشيب، حاجي ني دانلاديلاركي:

- حاجي سنين سققلين آغاريب نه اوچون اوشاقلارايله باش- باشا قوشورسان؟

حاجي دئدي:

- آخي بيلميرسيز منيم آتيم سو ايچنده بو سو لوله سي نين ايچينه گيريبدي. ايندي بولاردا منيم له باش- باشا قوشورلاركي حاجي ده لي اولوبدور!

دئديلر آخي حاجي سن اؤزون بير فيكيرلش گؤر او  يئكه ليكده آت نه جور بو دارليقدا لوله نين ايچينه گيره بيلر بولوله يه بارماقدا زورايله گيره بيلر!

حاجي دئدي:

- واللاه من ده بيليرم كي عاغلا سيغيشان ده ئييل، آمما نه ائله ييم. من اؤزوم اؤز گؤزوم ايله گؤردوم كي آت بو سو لوله سينه گيردي.

جماعت دئديلر بئچارا حاجي ده لي اولوبدور.

حاجي بو سؤزو ائشيتديكده گئنه ده حيرصله نيب خلقه هجوم گتيره رك يامانلاماغا باشلادي. خلق ده اونو هويا باسيب، اويناتماغا باشلاديلار. بو زامان مامورلار گليب حاجيني توتوب اداره يه آپارديلار. اورادا دعوانين سببيني سوروشدوقدا قضيه ني اونلارادا نقل ائلدي. قاضي باشيني توولويوب دئدي، حاجيني ده لي خانايا آپارين، قالار ائوده آرواد اوشاغينا صدمه وورار. ياخشي اولاندان سونرا ائوينه قايتارين.

حاجي ده لي خانادا  اؤزونو ده لي لر  ايچينده گؤردوكده  وحشته دوشوب چيغيريب،  سس سالماغا باشلادي كي:

 - آخي منيم هارام ده ليدير مني نييه بورايا سالميسيز؟

مامورلار دئديلر: حاجي عيب ائله مز  انشااله تئزليگ ايله توختارسان.

صاباح دوكتور گليب:

حاجي ايله كئف- احوال ائتديكدن سونرا بير قدر دانيشديي. حاجي ساغلام آداملار كيمي اونا جواب وئردي.

دوكتور دئدي:

- حاجي! منجه سنين هئچ زاديين دئييل من تعجب ائديرم كي سني نييه بورايا ساليبديلار.

حاجي دئدي،

دوكتور واللاه منيم هئچ زاديم ده ئييل فقط بيرحاق سؤز دانيشديغيم اوچون مني گتيريب، بورايا ساليبديلار.

دوكتور دئدي:

- او حاق سؤز نه دير؟

حاجي دئدي:

- سؤزون دوزو بيرگوزه ل آت آلميشديم. آپارديم سووارام اولجه باشي سونرا دا تمام بده ني سو لوله سي نين ايچينه گيره رك غيب اولدو.

دوكتور گؤردوكي حاجي نين عاغلي چوخدا ساليم ده ييل. گتيريب بيرنئچه ايينه  ووردو. سورا دا نئچه نفر حاجي نين دوستلاريندان اونون ده لي اولدوغونو سوروشماق اوچون گلديلر. چوخلو صحبت ائتديكده هاميسي تعجب ائتديلركي حاجي بوعاغيل هوشوايله نه اوچون ده لي خانه يه سالينيبب. آنجاق فقط آت بارسينده دئديگي سؤزلر اونون ده ليليگيني گؤستريردي.

 اولاردان بير نئچه سي دوكتورون يانينا گليب دوكتورا دئديلركي  حاجي نين هر زادي دوزگون واؤز يئرينده دي فقط بو آت باره سينده دانيشاندا چاشير.  ايندي بير جورلوگ ايله اوكلمه ني اونون باشيندان چيخاردين گئتسين ايشي نين داليسينجا.

صاباح دوكتور گليب حاجيدان سوروشدوكي:

- حاجي آت نئجه اولدو؟

حاجي دئدي آت گيردي سو لوله سينه.

دوكتور دستور وئردي ايكي نفرحاجيني يئره اوزاديب يوغون آغاجلارايله تاپداماغا باشلاديلار. حاجي نين چيغيرماسي گؤيه چيخدي. صاباح دوكتور گئنه گليب حاجيدان سوروشدوكي:

- حاجي آت هارا گيردي؟

حاجي دئدي:

- سو لوله سينه.

دوكتور گئنه امر ائلدي حاجيني سالديلار آغاج آلتينا.

بير آيا قدر هرگون دوكتور حاجيدان بو سؤزو سوروشوردي. حاجي دا همان جوابي وئريردي ودوكتوردا اونو آغاج آلتينا سالديريردي، كي بلكه بو سؤزو باشيندان چيخاردا. بيرگون دوستلاردان بيري حاجي نين يانينا گلدي گؤردو حاجي بئچارا بير ده ري  بيرسوموگ اولوبدور. سوروشدوكي: حاجي نييه بئله اولموسان؟  حاجي دئدي:

بس كي مني ووروب اذيت ائديرلر.

دوستو دئدي:  نه اوچون سني وورولار؟

حاجي دئدي:

- من بيرآت آلميشديم. آت سو ايچنده گيردي سو لوله سينه. اودوركي گونده مني وورورلار كي نييه دئيرسن آت گيريب سولوله سينه.

دوستو دئدي:

- حاجي ائله بير زاد اولمازكي . . .

حاجي دئدي:

- آخي من اؤز گؤزوم ايله گؤردوم كي آت گيردي سو لوله سينه

دوستودئدي:

- توتاخ كي سن دوز دئييرسن. آمما سن گؤرورسن كي بوسؤز اوسته گونده سني وورورلار. دئمه. يوخسا بو كوتك لرين آلتيندا اؤلرسن.

حاجي بير آز دوشونوب دئدي:

- سن دوز دئييرسن بونلار مني اؤلدوره رلر، صاباحدان  داها دئمرم.

صاباح دوكتور گليب سوروشدوقدا، حاجي دئدي:

- آت اليمدن قورتاريب قاچدي.

دوكتور دئدي: آت سو لوله سينه گيرمه ييبدي؟

حاجي دئدي: البته يوخ. او يئكه ليكده آت نئجه سو لوله سينه گيره بيلر؟

دوكتور سئوينيب دئدي: حاجي ياخشي اولوبدور داها بو شلايين گئتسين.

حاجي  ائوينه  قاييتديقدا  سو لوله سي نين قاباغيندا  گئچنده  بيرده گؤردوكي  آتين قولاقلاري  و بورنو سو لوله سيندن ائشيگه چيخيبدير. دئدي:

من بيليرم كي سن اورداسان آمما او كؤتك لرين قورخوسوندان داها دئيه بيلميرم.

 

آتالار سؤزلريندن نمونه لر :

1- اؤزونه اوماج اووا بيلمير. اؤزگيه اريشته كسير.

2- اؤزون يورولموش بيلسه ن، يولداشين اؤلموش بيل.

3- اؤزو ييخيلان آغلاماز.

4- اؤلچمه ميش بيچمه (بيچير)

5- اؤلسون  اويامان كي يئرينه ياخشي گله.

6- اؤلمز خديجه، گؤره ر نوه نتيجه.

7- اؤلمك اؤلمك دي، نه خيريلداماق.

8- اؤلو ائششه ك آختارير ناليني چكسين.

9- اؤلولر دئييرلر به ديريلر حالوا يئييرلر.

10- اؤلوم قاش ايله گؤز آراسيندادي.

11- اؤلومه دئديلر هارا گئديرسن؟ دئدي گئديرم ائو ييخماغا.

12- اولونو اؤز خوشونا قويسان تابوتونو باتيرار.

13- او داغا قار يايغدي بو داغا خبردي.

14- ايت هوره ر كروان گئچه ر.

15- اؤلمك وار، دؤنمك يوخدو.

* * *           

تاپباجالار (تاپماجالار)

1- بازاردا اولماز

تره زيده دورماز

اوندان شيرين زاد اولماز

 

2- بير شئي واريدي يئميشديم

يئمه سه يديم اؤلموشدوم

ايندي اولسا يئمه رم

يئمه سم ده اؤلمرم

 

3- بير حوضوم وار چيممه لي

باشي قيزيل دويمه لي

هركيم اونو تاپماسا

بير قوناقليق وئرمه لي

 

4- بوردا  وورار قيلينجي

ميصرده اوينا اوجو

 

5- تاپ، تاپباجا

ياپ، ياپباجا

ممه لي خوجا

ديشلري يوخ

 

تاپماجالارين جوابي:

1-      يوخو

2-      آنا سودو

3-      سماور

4-      ايلديريم

5-      تويوخ