اوغوزلولارين رسم لری و عادت لري

مير هدايت حصاری

اوغوزلار باره سينده اسلام تاريخچي لري چوخلو افسانه كيمي رسم وعادت لر نسبت وئريرلر. ايلك دفعه اوغوزلارين يوردونا سفر ائدن مسلمان سياح لاري ظاهرا ((مطوع)) خانواده- لريندن اولموشدور.
ياقوت حموي ((معجم البلدان)) آدلي اثرينده يازير: تميم بن بحر مطوعي اوغوزلار يوردونا مسافرت ائتدي. بو سفرآلتي آي چكدي. او يوردلارچوخ سويوق ايدي. بوسياح 20 گون تمام چوخلو بولاقلار واوتلاقلارايله دولو بيابانلاردا گزدي لاكين اوچؤلده حتتا بيركندده گؤرمدي. اوغوزلارين هاميسي ني چادرلاردا وكؤچري حالدا گوردو.  20
گون ده دوباره سفرينه دوام ائتدي. بودفعه چوخلو كندلر وچوخلو عمارت لر گوردو. اونون دئديگينه گؤره اونلارين اهالي سي نين هاميسي آتش پرست و زردشتي وزنديق (مانوي) دينينده ايديلر. سونرا اوپادشاهين شهرينه يئتيشدي. بو شهرچوخ محكم و اونون اطرافيندا چوخلو آباد كندلر وارايدي كي بير- بيرلرينه ياپيشميش ايديلر. اوشهرين 12 بؤيوك و دميردن دروازه لري وار- ايدي بازارلار وكوچه لر جمعيت ايله دولو ايدي. اونلار آل- وئره،‌ تجارته مشغول ايديلر. اونلارين چوخلاري زنديق ايديلر. اورادان چين مملكتينه 300 آغاج دان آرتيق يول ايدي. او داها يازيركي: پادشاهين قصري قيزيلدان ايدي.  900 نفر اونون گؤزتچي سي وار ايدي. اوهمچنين توركلرين ياغيش يا قار طلب ائتمك اوچون ايشله تديكلري نارين داش (قوم) لاردان صحبت ائدير. 1
احمد ابن ذكر ابن فضلان هجري 3-نجي عصرين آخيرلاريندا اوغوزلارين  اؤلكه لرينه سفر ائتميش و ((رساله ابن فضلان)) آدلي بير سفرنامه ده يازميشدير. او بئله يازير:

((. . .سونرا الغزيه آدلي بير تؤرك طايفاسينا يئتيشديك. اونلار صحرا نشين آدام لار- ايديلر. ييلاقدا، قيشلاقدا هميشه قره چادرلاردا ياشايارديلار. ظلمه يا آجي حادثه لره معروض قالديقدا باشلاريني گؤيه ساري توتوب ((بير تانري))- ني چاغيرارلار. طهارت آلمازلار،‌ غسل ائتمزلر و يويونمازلار. خصوصا قيشدا سويوق سو- ايله ايشلري اولماز. آروادلاريني كيشي لردن گيزلتمزلر.

. . . اونلارين ائولنمك قايدالاري بوجوردوركي بير قيزي سئچره ك نئچه دست  خوارزمي پالتار وئريب اونو بير كيشيه نشانلار (آداخلار) لار. او آروادين ((كه بيني)) بعضا نئچه دوه يا مال- قارا اولار. آروادين بؤيوگونون دئديگي قدر، كه بين وئريلمسه او آروادا ال تاپماق اولماز. كه بين وئريلديكده كيشي قورخماز و اوتانماز آروادين ائوينه گئده ر، آتا- آنا وقوهوم لاري نين يانيندا آروادين اليندن ياپيشيب اؤز ائوينه آپارار !

 بيركيشي اؤلسه اونون بؤيوك اوغلو، آتاسي- نين، اونون آناسيندان سوايي آيري آروادي اولموش اولسا، اونلا ائولنه بيلر.

 

تاجرلردن، يادلاردان، كيمسه اوغوزلارين يانيندا ((جنابت)) غسلي ائده بيلمز. مگر گئجه يا اونلارين گؤزلريندن اوزاخ اولموش اولا. بو ايش اونلاري آجيقلانديرار. چونكي ظن ائديرلركي اوشخص بوايش ايله اونلاري جادو ائتمك ايسته- يير.

 

اونلاردان  كيمسه سفره  گئتمه لي  اولسا، دوه لري ومال- قارالاريني وامواليني اؤز

 

1-   بوايشه عربجه استمطار يعني ياغيش طلب ائتمك دئيلير. بو داشلار گويا پادزهر اولوب و مخصوص بير داشلاردي. اونا توركلر ياي ومغوللار جده دئيه رلر اوداشي سويا قوياراق ياغيش يا قار ياغماسيني طلب ائدرلر. وبو ايش اوز وئره ر. يدي وجده تاش دا دئييلير او ايشه واقف اولانلارا ((يايچي)) يايده چي وجده چي دئييلير.

 

احتياجي قدر گؤتورندن سونرا دوستونون يانيندا امانت قويار وسفردن قاييداندان سونرا اونلاري دالي آلار. اونلارين‌((بالا دانيال)) آدلي اميرلريندن بيري مسلمان اولموشدور. لاكين اونا دئميشديلر: ((مسلمان اولسا اونلارا رئيس اولا بيلمز)) و اودا مجبور اولاراق مسلمانليق دان قاييتميشدي. بيركيشي  ناخوش اولدوقدا، اگر غلام وكنيزي اولموش اولسا خدمتينده دورماليديرلار. اونا ائوين بير گوشه سينده بير چادر قورارلار. لاكين اونا ياخين گئتمزلر. اوچادردا قالار تا اينكه يا اؤلر ياساغالار! اگر اوشخصين كيمسه سي اولماسا اونو چؤله (بيابانا) آپاريب، اوردا قويوب گلرلر. او اؤلندن سونرا اتاق شكيلينده بيرچوخور قازار واونون پالتارلاريني گئتيريب، كمربنديني باغلاييب كماني ني آسار وبير آغاج كاسادا ((قيميز)) آدلي ايچكي توكوب الينه وئره رلر. بيرآغاج كاساني دا دولدوروب قاباغينا قويارلار، اؤز ماليني هرنه اولسا يانيندا قويوب اونو اورادا اوتوردارلار وسونرا اوتاغين داميني اؤرترلر. دامين اوستونده بير گنبد دوزلدرلر. سونرا دا اونون آدلاري ومال- قاراسينا هجوم گتيريب بيردن، يوز يا ايكي يوزه دك اونلاردان اؤلدوروب، ات لريني دري، قويروق، باش وآياقلاريندان سوايي پيشيريب يئيه رلر ويئمه- ديكلريني آغاجدان آسارلار ودئيه رلر بونلار اونون آت لاريدير. اونلاري مينيب بهشته گئده ر.

اگر او شخص ديريليگينده  دوشمن لردن كيمسه ني اؤلدورموش اولسا- ياخود ايگيت بيرشخص اولموش اولسا- او اؤلدوردوگي دوشمن- لرين ساييجا آغاجدان شكيل لر دوزلديب قبرينه تاخارلار. دئيه رلر بونلار اونون غلام لاريدير بهشت ده اونون قوللوغوندا اولاجاقلار. 1

توركلرعموميت ده ساققاللاريني يولوب چنه- لري نين اوجوندا بير آز توگ ساخلارلار. توركلر پالتارلاريني تيكه- تيكه اولوب داغيلمايينجا اگين- لريندن چيخارتمازلار.

اوغوزلارين شاهلارينا يبغو (يابغو) دئيه رلر. من اونلارين اترك ابن قطغان آدلي سپهسالارلاريني گؤردوم)). 2

ابن فقيه ((مختصر كتاب البلدان)) آدلي اثرينده بئله يازير:

 

1-      مجله بررسيهاي تاريخي، سال پنجم، شماره4 سال 1349

2-       همان قايناق

 

توركلرين اوست- اوسته 16 شهرلري وار. اونلار چينقيل (نارين داش) لارايله ياغيش يا قار ياغماغيني طلب ائدرلر. بو ايش خصوصا تغزغز (دوققوز اوغوز) پادشاهي نين يانيندا معمول دور دئيه رلر او بو ايشي گون چيخان  سمتينده اولان شهرلرين  اهاليسيندن اؤرگنميشدير. اولار اسماعيل ابن احمد ساماني ايله محاربه يه گيرديكده هواني ائله سويوتدولاركي اونون قوشوني آز قالدي كي  قيريلسين ! اسماعيل ايسه آللاهين درگاهينا  سيزلادي وآللاهين كؤمك ليگي ايله اونلارا ظفر تاپدي !

اخشريوري (شهريوري) دئيير: اوغوزلارين شاهينا تغزخاقان دئييرلر ! قديم بو شاه كورتكين آدلي بيركيشي ايدي. اونون آناسي چين لي ايدي. بوخاقان خلق ايچينه چوخ ندرت ايله چيخار. او آتلاناندا، بؤيوك لر هاميسي اونون يانينا  گلر وكنددن (شهردن)  اونون ائوينه دك ايكي سيرا آدام لار دوزولر. شهرين رئيس لريندن بيري اونون قاباغينجا گئده ر. شاه آتيندان يئنيب، آتيني دهليزدن چيخارداندا، جماعت او آت گئچركن  مقابلينده ديزه كؤچرلر.

تغزخاقان ديناروي (ماني ديني نين بير فرقه سي) مذهبينده دير. لاكين اونون شهرينده وولايتينده ترسالر، ثنوي لر وشمني لرده واردير. بوشاهين 9 وزيري وار.

اورادا بيركسي اوغورلوق تهمتي ايله  توتسالار آياقلارينا بند قويوب قوللاريني بوينونا باغلار و هر بودونا 200 آغاج وكوره گينه ايسه 100 آغاج ووروب بازارين اطرافيندا دولانديرارلار. سونرا هر ايكي ال لريني و ايكي قولاقلاريني  وبورنونو كسرلر! بو زمان جارچي، جار چكيب دئيه ر. هركيم بونو گؤرسه بوگؤره ن ايشي گؤرمز.

اگربيرنفر بيرقيزايله زنا ائتسه 300 آغاج اونا وورولار. بيرماديان وبيرگوموش جام اوندان! آلارلار. اگر ارلي آروادايله زنا ائتميش اولسا هرايكيسي ني شاهين يانينا گتيريب شاهين امري ايله هربيرينه 300 آغاج وورارلار. اوكيشي ني بير چادرا سالارلار تا اورادا بير بوتون كئچه فرش! دوزلديب او آروادين ارينه وئرسين. سونرا همان آروادي او زناكار كيشيه وئررلر. واوآروادين ارينه بير آيري آرواد آليب واونون ((كه بيني ني)) وئرمگه مجبور ائدرلر زناكار ايستر دؤولتلي اولا، ايستر كاسيب، او 300 آغاج اونا وورولماليدير.

اگر بيري آدام اؤلدورموش اولسا اوندان آغير تاوان آلينار بئله كي اونو مستاصل ائده ر. بيرآي  زندان كسرلر و300 آغاج وورارلار. اگر كاسيب اولسا همان آغاج وورماني كفايت ائدرلر. تغزخانين كؤشكو (قصري) وار اونون ديوارلاري و كفي كئچه لرايله اؤرتولوبدور. او كئچه لرين اوستونه اسلام مملكتينده توخونان فرش لردن ساليب اونون- دا اوستوندن چين حريري چكرلر. بونلارين معمولي آداملاري نين هاميسي چؤلچودورلر. چادر وخرگاهلاري وار. شاهين پالتارلاري چين ايپه گي و ابريشم دن دير. لاكين معمولي آداملارين پالتارلاري بئزدن بعضي ده حريردن اولار. اونلارين پالتارلاري يورغان كيمي، قوللاري گئن، اته ك- لري اوزون دور.

شاهين كمربندي جواهرلا بزه نميش دير. اونون مجلسينه، گله ن چوخ اولموش اولسا باشينا تاج قويار او آت اوسته  چيخاندا 30 مين آتلي، هاميسي نين اگنينده زرهلي گئييم اونونلا، آتلانارلار. اورانين ايستي هاواسيندان قورتارماق اوچون سردابه لر قازيب، يايدا چوخ وقت لريني اورادا گئچيره رلر اورانين ياغيشيندان ائولره پناه آپارارلار.

كيشي لر هاميسي كمربند باغلاييب، پيچاق يا قمه تاخارلار. هرنه  لازيم لري اولسا او كمربنددن آسارلار. اصطخري همچنين يازيركي:  اورادا قويونلار ايلده دؤرد قوزودان آز دوغمازلار (ظاهرا ايلده ايكي دفعه دوغورموشلار) بلكه چوخ وقت 5يا6 بالا دوغارلار. هرحالدا ايكي يا اوچ بالابير ايلده دوغماق آز گؤرونر !

 

((توته م)) اعتقادي

اوغوزلولاردا بدوي قوم لاركيمي توتمه (طايفانين مقدس حيوانينا) اعتقادلاري وار. اونلار توتمه اؤز ديللرينده  اونقون دئيه رميش لر. او توتمه سئچيلميش اولان علامته ايسه تمغا (دامغا) دئيليرميش. خواجه رشيدالدين فضل اله جامع التواريخ ده بو اونقون لار و دامغالار بارسينده گئنيش جه سينه صحبت آپاريبدير. اورادا ذکر اولونان توتم لرين چوخو شکار قوشلاری. مثلا شاهين، قرتال (قارتال) طوشنجيل (دووشانجيل) ((سنقور)) اوج و جاقر کيمي آليجي قوشلاردير. توتم غالبا حيوان آدلاريندان اولار. بو رسم اونلاردان مغول لارادا يئتيشميشدي.