21 مارت 2003-ايسوچ-مالمو
آذربايجان ميللي جبهه سي
(AZNF)
مراجعت

بيز بوگون  جنوبي آذربايجاندان  دانيشاندا تاريخيميزه  اوتري ده  اولسا  نظر سالمالييق هله خرمي لر  دوروندن بويانا جنوبي آذربايجانين نئچه- نئچه وطن پرور اولادلاري آذربايجانين استقلاليتي اوغروندا مبارزه يه قاتيليبلار، بو تورپاغين بوتولويونون قورونماسي اوچون جانيندان گئچميش بابك، جوانشير وسايره كيمي قهرمانلاريميز هله ده خالقين ديلينده ازبردير.

بيز بونونلا فخر ائديريك. آمما بيزيم قهرمانلار تكجه بابك له، جوانشيرله  بيتمير. ستارخان، شيخ محمد خياباني، پيشه وري كيمي تاريخي  قهرمانلارين آديني دا چكمه مك ممكون دگيل.  بيز تاريخميزدن دانشديق.  بس بوگون  نئجه ! بئله قهرمانلاريميز وارمي؟  بو سئوالا جواب وئرمك اوچون اوز داخليميزه  مراجعت ائتسك كفايت دير. اگر هربير آذربايجان اولادي اوز داخلينده بير شخصيت كيمي اوزونو گورورسه، مطلق ومطلق ((آزادليق)) دئيلن بيركلمه ني اونوتماماليدير. آزادليق دئمكله بيز بيركيمسه يه تضييق گؤسترمك ايستميريك. آماليميز خالقيميزين ديل، مدنييت وتاريخيني برپا ائتمك دير.

اساس يولوموز مبارزه يولودور. مبارزه ميزسه  جنوبي آذربايجاندا دموكراتياني و كيمليگيميزي محو ائدن آنتي دموكراتيك قووه لره قارشي دير.  اگر بونو درك ائتسك بيزيم آزادليغيميزين تامين اولونماسي اوچون قارشيميزدا بيرجغير آچيلاجاق. بيز مبارزه  ائديكده اليميزه سلاح آليب عصيان ائتمگي نظرده توتموروق. بيزمبارزه ميزي اليميزده قلم آلاراق، مدنييتيميزي وتاريخيميزي تبليغ ائتمكله ايرلي سورمه لييك.

تاسف لر اولسون كي 30 ميليوندان چوخ آذربايجانلي نين هله ده بوگون، ايراندا اوز ديلينده نه مكتب لري وار، نه مستقيل شكيلده  نشريات، نه تلويزيون و راديو واسطه سيله آذربايجان ديلينده وئريليشلرگئدير. بو آجيناجاقلي حال دئييل مي؟

ايران ممالك محروسه دن تشكيل تاپميش نئچه ميللتلي بيراولكه ساييلير و اونون  اهاليسي نين  يارسيني تشكيل ائدن آذربايجان ميللتي، يازيقلار اولسون كي، اقتصادي بحرانلارا، مدنييت لري نين آياقلار آلتينا آتيلماسينا، ديل وكيمليك لري نين اللريندن آلينماسينا دوزمو يه ره ك قيزيل چيخان تورپاقلاريني قويوب، وطنلريني ترك ائتمك مجبوريتينده قاليرلار.

نئچه ايلديركي جنوبي آذربايجانين آغير دورومو حققينده ماراق گو سترنلر ايله دانيشيقلار اساسيندا بئله نتيجه آلنيركي، وطنداشلارين آرزو و ايستكلري بوگون بوتون دوشونجه و دويغولارين بيرلشمه سينه وميللي آزادليق اوغروندا سفربرليگه گتيريب چيخارير. بو بيزيم مقصديميزدير.

مقصديميز بشري حقوقلاري اساس توتاراق بين الخالق اولچولره داياناراق تاريخي تورپاقلاريميزدا ياشايان هر بير انسانين ميللي حقوقلاري نين  قورونماسي،  هر بيروطنداشين سئچيم حاققي نين تانينماسي، ميللي قورولوشلاريميزين (پارلمنت، اجرا حاكميتي ومحكمه لر) يارانماسي دير.  گله جگيميز خالقيميزين النيده دير. بوندان بئله بوتون سسلري بيرلشديرمكله آذربايجان ميللي جبهه سي نين يارانماسي ضروري سايلير ومقصدلريميز 12 ماده دن عبارت اولاراق آشاغيداكي كيمي تقديم اولونور:

1-جنوبي آذربايجان وايرانين آيري- آيري بولگه لرينده ياشايان آذربايجانليلارين سياسي، ايجتماعي و مدني حياتلاريندان يارانان طلب لري  نظره آلاراق  همين  طلب لر اوغروندا دونيادا  قبول اولونان  دموكراتيك  و مدني يوللارلا   آذربايجان  ميللي جبهه سي نين مبارزه سي باشلانير.

2-آذربايجان ميللي جبهه سي  آذربايجانليلارين  ايجتماعي حيات ساحه لري نين انكشافي اوغروندا مبارزه ني قارشيسينا مقصد قوياراق، آذربايجانين عين مقصد داشايان ديگر قوروم و تشكيلاتلاري ايله امكداشليغا بويوك اهميت وئرير.

3-آذربايجان  ميللي جبهه سي دونيانين باشقا اولكه لرينده عين مقصد داشايان  وها بئله انسان حقوقلاري بيان نامه سي نين قبولي و اونون حياتا كئچيريلمه سي  اوغروندا فعاليت گوسترن قوروم وتشكيلاتلارلا علاقه ده اولماغي ضروري سايير.          

4-جنوبي آذربايجاندا رسمي ديل آذربايجان توركجه سي اولماليدير. آذربايجاندا ياشايان  ائتنيك گروپلارين آزليغينا باخماياراق آنا ديلي، تاريخ و مدنيتلرينين انكشافي اوچون امكانلار يارانماليدير.

 5-جنوبي آذربايجاندا  و ايرانين باشقا بولگه لرينده فعاليت گؤسترن  مكتب، انيورستت  وديگر علمي ساحه لرده آذربايجان ديلي نين تحصيلي مطلق دير. راديو، تلويزيون ديگر مطبوعات واسطه لري ايراندا، آذربايجانليلارين چوخلوغونو نظره آلاراق،  آذربايجان ديلي، تاريخي ومدنيتينه خدمت ائتملي دير.

6-جنوبي آذربايجاندا، اقتصاديات، سرمايه، تجارت، صنعت وسايره ساحه لرده امكانلار گنيشلنمه ليدير، سرمايه، تجارت، صنعت صاحبلارينين ومتخصص لرين امنيت لريني تامين ائتمكله  وطنداشلاريميزين آنا يوردلارينا دونمه لري اساس مقصد داشيماليدير.

7-آذربايجان ميللي جبهه سي آزادليق، ايجتماعي عدالت، ميللي حاكميت اوغروندا مبارزه آپاراراق قلم، سوز وعقيده آزادليغي محض انسان حاقلارينا حورمتله ياناشيلمانين طرفداري دير.

8-آذربايجان ميللي جبهه سي، جنوبي آذربايجاندا وايرانين باشقا يئرلرينده ياشايان آذربايجانليلارين ميللي و مدني خصوصيتلرين نظره آلاراق، ايستر تحصيل، ايسترسه ايجتماعي حياتدا بوخصوصيتلره لازيمي اهميت وئرمگي قارشيسينا مقصد قويور.

9-شهر-كندلرين وهمچنين يوللارين معاصر شكيلده آبادلاشديريلماسي مطلق دير. يالنيز بونونلا نئچه- نئچه انسان تلفاتي نين و بير چوخ فاجعه لرين قارشيسيني آلماق اولار. سو آخارلاري نين قارشيسيندا سدلرين قورولماسي، ياشيليقلارين برپاسي، اطراف محيطين تميزلنمه سي، كند تصرفاتي (اكينچيليك- مالدارليق وسايره) معارف، طيب و ديگرساحه لرده اونملي آدديملارين آتيلماسي ضروري دير. عموميتله خلقين رفاه و ياشايش سويه سيني قالديرماق وايشسيزليگه سون قويماق اساس هدفلردن دير.

 10-آذربايجان ميللي جبهه سي  جنوبي آذربايجاندا  وايراندا اينسان حاقلارينين  برپاسي ودموكراتيك لشمه سي پروسه سيني  دستكله يير و همين پروسس لرين  انكشافي اوغروندا چاليشاجاق.

 11-آذربايجان ميللي جبهه سي، ايران پارلمنتي نين مقصدلريميزله اوست- اوسته دوشن بوتون قرارلارينا حورمتله ياناشماغي لازم بيلير.

12-آذربايجان ميللي جبهه سي، دونيانين هر يئرينده اونون مرامنامه سيني قبول ائدن و اوز تاريخي وارليقلارينا، صاباحكي ترقي ورفاهينا اينام بسله ين آذربايجانليلاري اوز صفلرينده بيرلشديرير.

وطن پرور آذربايجانليلار!

آذربايجان ميللي جبهه سي سيزي هئچ بيرطبقه لره بولمه دن يوخاريدا قيد اولونان هدفلري منتظم  صورتده حياتا كئچيرمك اوچون اطرافينا توپلانماغا وبو مراجعت  دن  حمايت ائتمگه چاغيرير.

 آذربايجان ميللي جبهه سي نين مؤسس هئيتي طرفيندن :

1- عليرضا نظمی آوشار - آمريکا

2- امير اميراصلاني - آمريکا

3- يونس کهوري - ايسوچ

4- مير موسی هاشمي - ایسوچ

21 مارت 2003

ايسوچ-مالمو

عنوانيميز:
تلفن:
0046736519792
0012096062947
فاکس:
004640912260
0012095238639
ايميل:
info@aznf.org
اينترنت:
www.aznf.org