ناغيللار ولطيفه لر:
 

بهلول باره ده لطيفه لر
دالي يانا بير زاد قوي
گون بير مجلسده آغ ساققاللار بهلول داننده ني دانلييب، نصيحت ائتديلركي پوللاريني كؤرلاماييب دالي يانا بير زاد قويسون. بهلول اوزونده ن گئديب دئدي ياخشي بوندان سونرا . . .
بيرآزدان سونرا  شام آرايا گلنده بهلول بير كاسا خؤره ك گؤتوروب داليسيندا گيزلتدي. شامين آراسيندا
بيرده گؤردو لركي بهلولون داليسيندا پيشيك ر بوغوشورلار.
دئديلر: بهلول گئنه نه ايش چيخارديبسان اوردا ؟
بهلول دئدي:
بير ايش گؤرمه ميشم، بير زاد دالي يانا قويموشدوم ايندي ورثه لر اوستونده ساواشيرلار.

بهلول داننده و بهلول ديوانه
بهلولا هم بهلول ديوانه دئيه رديلر هم د بهلول داننده
بيرگون بير نفر گليب بهلولا دئدي: بهلول داننده!  منيم بير آز پولوم وار نه آليب ساخلاسام قازانار؟
بهلول
دئدي:بير آنبار ده مير آل گؤنده بر آفتافا سو تؤگ اوستونه آلتي آيدان سونرا سات.
كيشي بو ايشي گؤردو ده مير لر پاس باسيب وزنلري چوخالدي سونرا ساندي چوخلو منفعت ائلدي.
بيري ده گلدي دئدي بهلول ديوانه منيم بير آز پولوم وار نه آليب ساخلاسام منه قازانار؟
بهلول دئدي:
-گئت پوللاريين وئر سوغانا وور آنبارا گونده بير آفتافا سو تؤك اوستونه.  كيشي همان ايشي گؤردو بير
نئچه آي گئچديكده گؤردو سوغانلار گؤوه ريب دام دوواري ده ليب ائشيگه چيخيب، هاميسي آرادان
گئديبدير. گلدي بهلولون يانينا دئدي نه اوچون اونا اوجور يول گؤستردين بير ائله پول قازاندي  منه بوجور
دئدين وار يوخوم اليمدن چيخدي؟
بهلول دئدي:
اومنه دئدي بهلول داننده من ده اونا داننده سؤزو دئديم. سن منه دئدين بهلول ديوانه من ده سنه ديوانه
سؤزو دئديم.

آتالار سؤزلريندن نمونه لر:
اتي ديرناخدان آييرماق اولماز.
الدن گئده نه يانما.
آلوو اولماسا پيلوو اولماز.
امير بازاري اود توتسون، منه بير دسمال چيخسين.
انصاف دينين ياريسيدي. (. . . ياريسي ده بيل هاميسييدي)
ارمني دئيه ر مسلمانين سونكو عاغلي (. . .منيم اولايدي)
ائششه ك ائشششه ك ليگي ايله بير يئرده پال چيقق باتسا داها
(اولدوره سن ده) اوردان گئچمز.
ائششه ك ايشلر آت يئيه ر.
ائششه گي كورپودن گئچيب.
ائله ائله كي بيرده قاپييا اه ريك ساتان گلسن.
ائل گؤزو تره زيدي.
ائل باخير، عالم باخير، سنه ده باخير منه ده باخير.
اؤرتولو بازار دوستلوغو پوزار.
اؤزگه آتينا مينه ن تئز دوشر.
اؤزگه ايپي ايله قويويا گيرمه ك اولماز.

تاپباجالار (تاپماجالار)
ايلمه، ايلمه ايلمه سي
ايلمه خاتين دويمه سي
هركيم اونو تاپماسا
يئددي ايلين خسته سي

اويان قالا، بويان قالا
اورتاسيندا ساري مايا

اؤززو، اؤزونه قبير قازار

آهاني هاي آهاني
گزه رجمله جاهاني
گتيريسن اؤلدورمه يه
نه اه تي وار نه قاني

آلتي آشيق بويو وار
هرگئجه ده تويو وار

ائل ياتدي، اوبا ياتدي
قنبر ديلين اوزاتدي

تاپماجالارين جوابي
اوزه رليك
يومورتا
دامجي
يئل
چيراغ (شمع)
قولادان(كلون)