شعرلر

آغلار، آغلاماز؟
عباس صابري

بلبل ائدنده ياد بهار، آغلار، آغلاماز؟
مونس اولاندا نوگله خار، آغلار،آغلاماز؟
گوندوز گؤرنده ياريني عاشق وصال ايله
يالقيز قالاندا هرشب تار، آغلار، آغلاماز؟
بيرعاشقي كه اولسا، مي لعل، لبله مست،
بيدار اولاندا اولسا خمار، آغلار، آغلاماز؟
پروانه نين قراريدي آتشده يانماغي،
شمعين اؤزي بو اوددا يانار آغلار، آغلاماز؟
ناصح هميشه عاشقه پند ائتمك ايسته ير
اولسا اؤزي بو درده دچار، آغلار، آغلاماز؟
بير ميلتين كه حقيني بيگانه غصب ائده،
تالان اولان او خلقه، ديار آغلار، آغلاماز؟
بوغدوقجا ظلم الي ائليمين قهرمانلارين
ناحق آسيلميش انسانا، دار آغلار، آغلاماز؟
ظلمه، تجاوزه، اؤلومه، ائيليين قيام
قربان اولان شهيده، مزار، آغلار،‌ آ‎غلاماز؟
جوشغون سرشك چشميله يازدي بو نامه ني
يارب اوخورسا نازلي نگار. آغلار، آغلاماز؟

آذربايجان قاباغيندا
فائق تبريزي

ايمانلا دايان سينه ني وئر گوله يه قوخما
دوشمان گله جكدير ديزه ايمان قاباغيندا
تاريخ بويو آذر ائلي بيرقلعه يه بنزه ر
دورموش  قوپان هرفيرطانا  قاباغيندا
باش ايمه دي سارسيلمادي داغلار قه يه لر تك
تولكي صفت او اولمادي اصلان قاباغيندا
بير چوخلاري تاريخده دوشوندي اوني ازسين
مهو اولدي  اوزي آذربايجان  قاباغيندا

گئديرم:
ائل قيزي/ سحر جباري

گئديرم
گئديرم، اوزون بير يولچولوغا
اينانجيمي، بوخجاما دويونورم، يولا دؤشوب گئديرم
اؤزون بير يولچولوغا
آنامين گؤز ياشلاري آرخامدا، سئوگيسي باغريمدا
گئديرم
سئوديمين باخيشلاري گؤزولريمده
يولا دؤشورم
گئديرم ائليمين وارليق داغينا
سوساميشام او داغين بولاقلاريندان سو ايچم
ايتميش اوداغين مئشه سينده داشلارين آراسيندا آنام
منليگيمي، وارليغيمي، گئچميشيمي، گله جه گيمي
گئديرم اورانين چيچكلريني ياساقلاردان ده لي جيرانلاريني اووجو اليندن قوروماق اوچون
اؤلكه ميزي به زه ين لاله لر اوچون يولا دوشورم
تكجه بير سؤزوم وار
اؤلنده
آناما دئيين منه ياس توتماسين
منيم ياسيمي ساراي باجيمي آرپاچايي آپاراندا توتوپلار
اميره قيز محاليندا عزيز آرخاداشيم اؤلنده گؤز ياشي توكوبلر
آناما دئيين قورخماسين، قيزينين قاني بوش يئره آخيب باتماز
دئيين بيلسين منيم دامارلاريمدا
تومروس آنا، هجرخانيم، نيارين قاني وار
آخماغيلا باتماز
بيرده سئودييم وار سؤيله يين بيلسين
اؤلومده، سئوگيسي ني اوره گيم ده ن سيله بيلمز
بيرده سؤزوم ائليمه، يوردوما، خالقيمادي
سؤيله ديم، هامي بيلسين
اؤلمه ميشم ائليم ياشاديقجا، وارام.

آنا ديليم
فرزام نوروزپور حصاري

من. سنه چوخ بورجلويام
منيم  شيرين  آنا ديليم
من. سني  يازانميرام
منيم  گوجلو آناديليم
ايندي من بير آذري
آمما آديمدير آذري
قيدمتيم وار، قيمتيم چوخ
آمما يازانمام آذري
ايستسم  توركي دئيم
فارسيجا قاريشير ديليمه
بير سؤز ايسترسم دئيم
اؤچ ده ن بيري ديرآذري
ننگ يوخ بوندان بؤيوك
تورك اولادي فارسجا يازا
آذري ديلدن  گئچيب
بابكين يادداشدان سالا
ايندي بيز اؤچ دسته ييك
اؤلكه ده گؤل دسته ييك
اؤچ ائليك بير اولمالي
مملكت بيز قورمالي
حققه مالك اولمالي
آذري بيز اولمالي
بس گلين  هاميليغا
بير دسته گول ترتيب ائده ك
گله جك اولادلارا
بير مملكت تسليم ائده ك.

فرزام نوروزپور حصاري، گونئي آذربايجانين، يئني يئتمه گنجلريندن ديركي، اؤز ميللي وارليغي اوغروندا ميللي، فرهنگي چاليشان مبارزلر سيراسيندادير. ائله بوناگؤره ده آغير شرايطه معروض قالاراق آنا يوردون ترك ائديب بوگؤن سورگونده ياشاماق مجبوريتينده دير.

((ساواش))
اسماعيل اولكر

((جنگ))
كتابلارين
قفسه دن تؤكولمه گي
((جنگ))
آنانين
يئره آتماسي كؤرپه سين
((جنگ))
اوشاغين
امزيگينين تورپاقلانماغي
((جنگ))
داش عصرينين
ياديرغانميش ذهنيتينين جيسيملشمه سي
((جنگ))
آزادليق
نسه حئيوانليغين
اوزه چيخماسينا
الي تاپانچاسينا چاتميش
هر باخار كور دره بگين
عشقه فرمان وئرمه سي
گولون جاوابي گوللة
و
قونداق كؤينگي
سورمه يئرينده
((جنگ))