آذربايجان ديلينين تاريخي حققينده بعضي ملاحظه لر

ميرزه رحيم

خلقين ان بؤيوك ثروتي اونون ديلي دير آناديلي. خلقي ياشادان. اونون وارليغين تاريخه چئويرن. سايسيز- حسابسيز عصرلره ياشيد ائدن. كئچميشيني ايندسينه. اينديسيني گله جگه باغلايان. گله جگيني زنگين لشديرن وابدي لشديرن آناديلي. ائلي، اوباني دوغمالاشديران، آنا وطنه چئويرن ديل- آناديلي. چوخ  ميليونلو آذربايجان خلقينين تؤكنمز ثروتي، واري- دؤولتي، چوخ عصرلي تاريخين ينيلمز، سينماز، داغ گوجلو داياغي، اوزه- يي دوغما آذربايجان ديلي دير. آذربايجان ديلي تاريخين چتين سيناقلاريندان اوغورلا چيخميش، تاريخ بويو بير- بيريندن آغير اولان سيخينتيلارا متانتله سينه گرميش، ياد ائللي اشغالچيلارين قيلينجي، مهرلو، يازيلي- يازيسيز، دؤولت تمنالي ديل تصنيفلري قارشيسيندا ينيلمز قايا كيمي دايانميش اؤزلوگونو، اؤزونو بوگونوموزه قدر قورويوب ساخلاميش. ايندي ايسه انسان امگي ودوشونجه سينين بوتون ساحه لريني آنلاشيقلي طرزده، باشا دوشوله جك شكيلده ايفاده ائدن زنگين بير انسيت واسطه سينه چئويريلميشدير. ايندي آذربايجان ديلي دونيانين ان انكشاف ائتميش ديللري سيراسيندا دورور. انسانين ذهني فعاليتينين ائله بيرساحه سي يوخدوركي، بو ساحه يه داير فكيرلر، دوشونجه لر، عمومي لشديرمه لر، نتيجه لر آذربايجان ديلي واسطه سيله ائشيدنه ئوگره ننه، اوخويانا تام آيدينليغي ايله چاتديريلماميش اولسون، علمين، تكنيكين، اينجه صنعتين چئشيتلي بولمه لرينه دايرآذربايجان ديلينده كتابلار چاپ ائديلميش وائديلير. عالي مكتبلرده بيليك ئوگره ديلير، راديو، تلويزيوندا بو ديلين اوره كلري فتح ائدن نغمه لي سسي اوجالير.

چوخ ميليونلو آذربايجان خلقنين توكنمز ثروتي- دؤولتي، چوخ عصيرلي تاريخين ينيلمز، سينماز، داغ گوجلو داياغي، اؤزه يي دوغما آذربايجان ديلي دير.

ائله بيرآذربايجانلي تاپيلمازكي، اؤز آناديلينين كئچميشي،  اينديسي  وگله جگي حققينده دوشونمه ميش اولسون. بو ديلين عصرلر بويو كچديگي  يول حققينده  فكيرلشمه سين، دوغرودان دا ديليميزين تاريخي، اونون قديمليگي حققينده نه دئمك اولار؟ بووقته قدر همين مسئله باره سينده معين ملاحظه لر سويله نميشدير. بئله مدعا ايره لي سورولموشدوركي، آذربايجان ديلي، سلجوقلار آذربايجاني اشغال ائده ندن سونرا، يعني11-نجي عصردن سونرا يارانميشدير وگويا بوتورك ديللي قبيله لره قدر بورادا آذربايجان ديلي يوخ ايدي. بوفكيرله راضيلاشماق اولارمي؟ بومدعا تاريخي حقيقته اويغوندورمو؟  البته. يوخ.

تاريخدن معلومدوركي. 11-نجي عصرده سلجوقلار تكجه آذربايجاني دگيل، بوتون قفقازي وداغستاني اشغال ائتميشديلر. بودا معلومدوركي. همين اراضيده تؤرك ديللري ايله قوهوم اولمايان ديللرده دانيشان چوخلو خلقلر اولموشدور. اگرسلجوقلارين گلمه سي اونلارين اشغال ائتديگي يئرلرده كي خلقلرين ديللريني تماميله دگيشديره بيليرديسه، بس نه اوچون ارمني ديلي وياگورجي ديلي، هابئله داغستانداكي ديللر (لزگي، ساخور. قريز، لك، روتول وسايره) دگيشيب سلجوقلارين ديلينه چئويريلمه دي؟ سلجوقلار اوواخت ايراني، عثماني، مصري وبيرسيرا باشقا عرب اؤلكه لريني ده دوتموشلار. عيني مدتلي وعيني شرايطلي سلجوق اشغالي نتيجه سينده فارسلارين ويا عربلرين ديللري، يعني فارس وياعرب ديلي نييه دونوب تورك ديللريندن بيري اولمادي؟ تاريخدن بودا معلومدوركي، هله سلجوق اشغاليندان چوخ- چوخ اول آذربايجاني عربلر اشغال ائتميشلر. عربلرين آذربايجاني اشغال ائتديگي وقتله سلجوقلارين بواؤلكه ني اشغال ائتديگي وقت آراسيندا تخمينا 350-400 ايلليك بيرتاريخي دؤر واردير. بس نه اوچون بئله بير اؤزون مدت عرضينده آذربايجان خلقينين ديلي دونوب عرب  ديلي اولمادي؟

تاريخدن معلوم اولدوغو كيمي اووقت خلافتين امريله مينلر عربلر آذربايجانين منبت يئرلرينه كؤچورولور، بوردا مسكن سالان اوتوراقلاشير وبورانين ساكنينه چئويريلديلر. تاريخين سونراكي گئديشي گؤستردي كي. نه اينكه آذربايجان ديلي عرب ديلينه چئويريلمدي. عكسينه اووقت آذربايجاندا مسكن سالميش عربلر اؤزلري تماميله آذربايجانليلاشديلار.

عربلردن ده چوخ- چوخ اول بيرنئچه يؤز ايلليكلر عرضينده آذربايجان اولجه هخامنشي لرين، سونرا ساسانيلرين دؤولتينه داخل اولموشدور. لاكين آذربايجانليلارين ديلي نه قديم فارس ديلينه، نه ده پهلوي ديلينه، نه ده معاصر فارس ديلينه چئويريلمدي.

دئمه لي. آذربايجان ديلي سلجوقلارين آذربايجاني توتماسيندان قاباق دا واريدي وبوديل بوگؤن دانيشديغيميز، يازديغيميز آذربايجان ديلي ايدي. قفقازداكي باشقا ديللردن (گورجي، ارمني وساير)  فرقلي ياولاراق، آذربايجان ديلي اووقت آذربايجان اشغال ائتميش سلجوقلارين ديلي ايله قوهوم اولموشدور، يعني ياخينليق اولموشدور.

عموميتله دونيا ديللري بيرنئچه قوهوم ديللر عائله سينه بولونور.  مثلا هند- اوروپا  ديللري عائله سي،  تؤرك ديللري  عائله سي  وسايره.عائله لره داخل اولان ديللر قوهوم ديللر حساب اولونور. مثلا كورد، تاجيك، فارس، پشتو ديللري هند- اوروپا ديللري عائله سي داخلينده قوهوم اولدوغو كيمي، آذربايجان ديلي ايله سلجوقلارين ديلي ده تؤرك ديللري عائله سي داخلينده قوهوم ديللر اولموشدور.

تاريخين سونراكي گئديشي گؤستردي كي. نه- اينكه آذربايجان ديلي عرب ديلينه چئويريلمدي. عكسينه  او وقت آذربايجاندا مسكن سالميش عربلر اؤزلري تماميله آذربايجانليلاشديلار.

بوناگؤره ده سلجوقلارين ديلي اووقت آذربايجان ديلي ايله قايناييب قاريشميش. بوديلين، يعني آذربايجان ديلينين داهادا ياييلماسينا، هله اودؤرده گنيش فعالليق دايره سي كسب ائتمه سينه شرايط ياراتميشدير.

بئله ليكله، تاريخين عيني كيفيتلي واوخشار حادثه لريني توتوشدورماقدان اونلاري يان- يانا قويمادان دوغان نتيجه بيزي تاريخي گرچكليگه داها چوخ اويغون اولان بئله بيرفكيره گتيريب چيخاريركي، آذربايجاندا سلجوقلاردان اول ده آذربايجان ديلي موجود اولموش وبوديلده دانيشميشلار. بئله فكيري دوغرولدان، اونو تصديق ائدن شاهدلر وارمي؟ آيدين مسئله ديركي، هرهانسي بيرديلين تاريخي، اونون كچميش دؤرلرده كي دورومو حققينده داها ياخشي معلوماتي بوديلده يازيلميش منبعلر، يعني همين ديلين يازيلي آبده لري وئره بيلر. لاكين تاسفله قيد اولونماليديركي. آذربايجان ديلينده 13-نجي عصردن اولكي دؤرلره عايد يازيلي آبده لر هله ليك الده يوخدور. آنجاق بو، بيزه اساس وئرميركي، ديليميزين  13-نجي عصردن قاباقكي دؤرونو اؤيرنمه يه ك. بوساحه ده هئچ بيرايش گؤرمه دن اوتوراق ويازيلي منبع تاپيلماسيني گؤزله يه ك. اوناگؤره كي. اولا. ديلين تاريخيني اويرنمك اوچون بو ديلده يازيلميش چئشيتلي متنلر يگانه منبع دگيلدير. ايكينجيسي. ديلين قديم دؤره لري حققينده بو وياديگر درجه ده معلومات وئرن بيرسيرا باشقا منبعلرده وارديركي. بونلار چوخ وقت آيري- آيري يازيلي آبده لرين يارانديغي تاريخدن داها اوزاق كئچميشه عايد اولان ماراقلي وقيمتلي دليللري عكس ائتديريرلر.

13-نجي عصردن اولكي دؤرلرده،خصوصا ده سلجوق اشغاليندان قاباقكي عصرلرده آذربايجان ديليندن خبر وئرن منبعلر هانسيلاردير. ديليميزين تاريخيني تدقيق ائتمك اوچون بونلاردان نئجه استفاده ائتمك اولار؟

معلوم اولدوغو اؤزره، شفاهي خلق ادبياتي نمونه لري يازيلي ادبياتدان چوخ اوللر يارانميش، نسللردن- نسللره اؤتورولموش، آغيزدان- آغيزا ديلدن- ديله كئچميش وزمانه ميزه قدر گليب چيخميشدير. شفاهي خلق ادبياتينين نثرقولونقللر، روايتلر، لطيفه لر، داستانلارين نثرقسمي وساير  نقل چيلرين، عاشقلرين وعموميتله بوادبيات نمونه- لريني سويله ينلرين دانيشيق طرزينه، لهجه سينه اويغون اولاراق معين سؤز، ايفاده، جمله دگيشيك- ليگينه اوغرايا بيلر. لاكين شفاهي خلق ياراديجيليغينين شعرله يارانميش حصه سي- باياتيلار، قوشمالار، لايلالار، تاپماجالار، آتالار سؤزلري وساير. وزن، قافيه ومعين اؤلچوايله باغلي اولدوغو اوچون، دئمك اولاركي، دگيشمير وايلكين فورماسيني  داها چوخ ساخلاميش  اولور. بوناگؤره ده شفاهي خلق ادبياتي نين شعرقولوندا ديلين قديم خصوصيتلرنين، هابئله خلقين تاريخي ايله باغلي قديم حادثه لرين بو وياديگر درجه ده عكس اولونماسي حالينا راست گلينير. بئله بير باياتيني نظردن كئچيره ك:

وئرمه خزره مني

چكر بازاره مني

يادا كنيز وئرينجه

سالا مزاره مني

بو باياتي نين مضمونوندان آيدين ديركي، اؤلوم مزارا قويولماق خزرين الينه دؤشمكدن اوستوندور،چونكي خزرين الينه دؤشمك ظلم واذيتلره دچار اولماق بازاره چكيليب قول كيمي ساتيلماق، دوغما يوردودان هميشه ليك آيريلماق دئمكدير. بس بو ((خزر)) كيمدير؟  بوباياتي هانسي تاريخي حادثه نين عكس صداسيدير؟

تاريخي منبعلردن معلومدوركي، كوچري هون قبيله لريندن اولان خزرلر هله ائراميزين 392-نجي ايلينده بؤيوك دسته لرله شمالدان- دربند كئچيديندن آذربايجانا گوجلو باسقين ائتميشديلر. اونلاربورادا كندلري تالان ائتميش، اهاليني غارت ائتميش، چوخلاريني اسير آليب آپارميشديلار. بوهجوملار،  تالانچي باسقينلار سونراكي عصرلرده ده دفعه لرله تكرار اولونموش. 12-نجي عصرين اورتالاريندا ايسه لاپ شدتلنميشدير. آيدين مسئله ديركي، بوسايسيز- حسابسير هجوملار، باسقينلار، تالانچيليق اووقت آذربايجان خلقينده خزرلره قارشي نفرت حسي ياراتميشدير وبودا شفاهي ادبياتدا اؤزعكس- صداسيني تاپميشدير. باياتي نين مضمونوايله تاريخي حادثه لرين اويغونلوغو گؤز قاباغيندادير. بونا گؤره ده دوشونمك اولا كي. همين باياتي خزرين باسقينلارينا قارشي وبوباسقينلار دؤرونده يارانميشدير. اؤزوده باشقا بير ديلده يوخ، محض آذربايجان ديلينده، ساده وآنلاشيقلي خلق دانيشيق ديلينده يارانميشدير. تاريخي فاكتلارلا بئله سسلشمه، بئله اويغونلوق گؤستريركي، همين باياتي ائراميزين 4-7- نجي عصرلرينده يارانميشدير. يعني سلجوقلارين آذربايجاني اشغال ائتمه سيندن آزي بئش يؤز ايل اول دئييلميشدير.

يوخاريدا قيد ائتديگيميز كيمي، شفاهي خلق ادبياتي نمونه لري ديليميزين، خلقيميزين تاريخيني اؤيرنمك اوچون قيمتلي منبعلردن بيري دير. بوناگؤره ده بوادبياتين خلق آراسيندا، اوبادا ياييلميش بوتون نمونه لريني قيده آلماق، توپلاماق هربيرآذربايجانلي نين بورجودور.

آذربايجان ديلينين تاريخيني، خصوصا سلجوقلارين اشغاليندان اولكي دؤري اؤيرنمك اوچون قيمتلي اولان منبعلردن بيري ده آذربايجان اراضيسينده كي چئشيتلي يئرلردن (شهر، محله، كندد، كوچه،‌اوبا، داغ، مئشه، گؤل، يايلاق، قيشلاق، تالا، اكين يئرلري، اوتلاقلار، باغلار وسايره) آدلاردير. بوآدلارين معين حصه سي اوزاق كئچميشده يارانديغي اوچون ديلين قديم خصوصيتلريني، خلقين تاريخي ايله باغلي چئشيتلي حادثه لري بو وياديگرشكيلده عكس ائتديرير. معاصر دؤروموزه قدر قورويوب ساخلانير. نمونه اوچون آذربايجان اراضيسينده ((عرب)) سؤزو ايله باغلي كند آدلاريني نظردن كئچيره ك.

تاريخدن معلومدوركي. عربلر آذربايجاني اشغال ائتديكدن سونرا يئرلي اهالي اؤزرينده نظارتي آرتيرماق واؤزخيرلرينه اولان بيرسيرا باشقا مقصدلر اوچون عربستان يارديم آداسينداكي چئشيتلي عرب قبيله لريندن دسته- دسته آذربايجانين ان زنگين و منبت يئرلرينه كؤچورور. اونلارا بؤيوك امتيازلار وئرير، بو تورپاقدا  مسكن سالمالاري  پروسسي 7-نجي عصرين سونلاريندا باشلاميش، چئشيتلي فاصله لرله دوام ائتميش. 9-نجي عصرين اوللرينده آذربايجان ديلينين تاريخيني، خصوصا سلجوقلارين اشغاليندان اولكي دؤري اؤيرنمك اوچون قيمتلي اولان منبعلردن بيري ده آذربايجان اراضيسينده- كي چئشيتلي يئرلردن (شهر، محله، كندد، كوچه، اوبا، داغ، مئشه، گؤل، يايلاق، قيشلاق، تالا، اكين يئرلري، اوتلاقلار، باغلار وسايره.

باشا چاتميشدير. بئله بير پروسس نتيجه سينده آذربايجان اراضيسينده ساكنلرين عربلردن اولان ياشايش بؤلگه لري كندلريارانيردي. طبيعي ديركي. بو يئني ياشايش يئرلرينه وئريلميش آدلارين يارانما تاريخييده 7-نجي عصرين سونو 9-نجي عصرين اوللري آراسينداكي مدته تصادف ائده بيلر. آذربايجان اراضيسينده همين دؤروده بوتاريخي حادثه نتيجه سينده يارانميش توپونيملر كند آدلاري ايندييه قدرگليب چيخميشدير. حاضردا آذربايجاندا بيرسيرا كندلر وارديركي. بونلارين وقتيله عربلرين ياشاديقلاري كندلر اولماسي همين كندلرين آدلاريندا اؤز عكسيني تاپميشدير. مثلا:  عرب شال لاش، عرب قديم، عرب بصره،‌عرب اوشاغي، عربساروان، عرب اوجاغي، عربلر، عرب ينگجه، بونلاردان باشقا آذربايجانين چئشيتلي يئرلرينده عرب آدلي دؤرد كند واردير. بوتون بوآدلارين قورولوشو، اونلارين تركيبينده كي سؤزلرين معناسي وبير- بيريله بيرلشمه قايداسي آچيق- آشكار گؤستريركي. بونلاري آذربايجانليلار ياراتميشدير. عربلرين مسكن سالديغي بويئرلره همين آدلاري آذربايجانليلار قويموشدور واؤززوده آذربايجان ديلينده. باشقا سؤزله آدلارين اؤزو اونلاري داشييان كندلرده مسكن سالميش عربلرين هارادان. عربستانين هانسي طرفيندن گلميش اولدوقلاري باره ده ده تصور يارادير. مثلا، عرب شالباش باشينا شال (يايليق) باغلايان   عربلر  (بدوي عربلر)  عرب بصره- بصره دن كؤچوب گلميش عربلر. عرب ساروان ساروانليق پئشه سيله مشغول اولان عربلر. عرب قديم- قديمدن مسكن سالميش عربلر وساير. گؤروندوگوكيمي. آذربايجانجا اولان بوكند آدلاري سلجوقلارين آذربايجاني اشغال ائتمه سيندن آزي اؤچ يؤز ايل اولكي تاريخي حادثه لرله علاقه دار يارانميشدير.

بوردان بئله نتيجه ده چيخيركي. ايستر آذربايجان اراضيسينده، ايسترسه ده بوبؤلگه ايله قديمدن قونشو اولان خلقلرين ياشاديغي اراضيسينده ديليميزين، تاريخيميزين قديم دؤرلريندن خبر وئره بيلن، بوگؤنوموزه قيمتلي قديم معلوماتلار چاتديران يئر آدلاري واردير وبونلاري قيده آلماق، خصوصا اونلارين خلق آراسيندا ياييلميش واريانتلاريني توپلاماق هربيرآذربايجانلي نين  بورجودور.

آذربايجان ديلينين تاريخيني اؤيرنمك اوچون قيمتلي معلومات وئرن منبعلردن بيري ده ارمني وگورجي ديللرينده يازيلميش تاريخي اثرلردير. آذربايجان خلقي ان قديم دؤرلردن ارمني وگرجي خلقلري ايله قونشو اولموشدور. بوخلقلر تاريخ بويو بير- بيريله ايجتماعي- سياسي، ايقتصادي وباشقا تئللرله باغلي اولموش. ياد ائللي اشغالچيلارا قارشي بيرگه مبارزه آپارميشلار. تماميله طبيعي ديركي. كوكوقديملره گئديب چيخان بوقارشيليقلي علاقه- لرين ايزي علامتي همين خلقلرين قديم يازيلي آبده- لرينده وعموميتله ديللرينده قالميش اولاجاقدير معاصرارمني وگورجي ديللرينده موجود اولان قديم آذربايجان ديلي سؤزلري حققينده عالملر آز يازميشلار. لاكين بورادا بيز بئله بيرجهته دقتي جلب ائتمك ايسته ييريك كي. هم آذربايجان هم ده ارمني عالملري 5-7-نجي عصرلرده وسونراكي دؤرلرده قديم ديلينده يازيلميش تاريخي منبعلرده يؤزلرله آذربايجان ديلي سؤزلرينين ايشلنديگيني معين ائتمشلر. مثلا 5-6نجي عصرلرده آيريق- آيروق بوگونكو ((آريق)) و((سونسوز، اولمايان)) معناسيندا، آروغ- آريغ اينديكي ((آرخ)) معناسيندا، تئل بوگونكو ((ساچ)) و ((تئل)) معناسيندا، اوت حاضركي ((اوت علف)) معناسيندا، 7-نجي عصرده قديم ارمني ديلينده يازيلميش ((آقوان تاريخي)) اثرينده آوچي ايندكي ((اؤوچو)) معناسيندا. ((چوپچو، توكه چاره حكيم)) معناسيندا. كوكيار ((شيمشك)). معناسيندا خاقان ((خاقان)) معناسيندا. تانگري خان‌ ((الله)) معناسيندا. 8-نجي عصر ارمني يازيلي منبعينده- ياپينچي اينديكي ((ياپينجي)) معناسيندا وساير.

ديليميزين، تاريخيميزين قديم دؤرلريندن خبر وئره بيلن، بوگؤنوموزه قيمتلي قديم معلوماتلار چاتديران يئر آدلاري واردير وبونلاري قيده آلماق، خصوصا اونلارين خلق آراسيندا ياييلميش واريانتلاريني توپلاماق هربيرآذربايجانلي نين  بورجودور.

گورجي ديلينده. ائله جه ده داغستان ديللرينده معيشت. پئشه، عادت- عنعنه، وسايره يه باغلي چوخلو آذربايجان ديلي سؤزلري قديم دؤرلردن ايشلنمكده دير.

بورايا قدر دئديكلريميزين هاميسي بئله ائتمگه اساس وئريركي. هله 4-7-نجي عصرلرده آذربايجان دانيشيق ديلي بوتون قفقازدا ياييلميش بيرديل اولموش بواراضيده كي چئشيتلي ديللي خلقلر بير- بيريني باشا سالماق وباشا دؤشمك اوچون آذربايجان دانيشيق ديليندن عمومي انسيت واسطه سي كيمي استفاده ائتمشلر. بوفكيري آشاغيداكي دليللرده  ثبوت ائدير:  1-آذربايجان راضيسينده وائله جه ده داغستانين خصوصا جنوبوندا ياشايان لزگي، قريز، ساخور، رتول، تاباساران، لاك، آوار وساير خلقلرين اكثر حيصه- سي (خصوصا ياشليلار) اؤز دوغما ديللري ايله ياناشي آذربايجان ديليني ده بيلير وبيري ديگري ايله بو ديلده دانيشيرلار.  2-قديم يازييا وادبي عنعنه يه مالك اولان قونشو ارمني خلقينين بيرسيرا شاعرلري هله 11-نجي عصرده  وبوندان سونراكي عصرلرده ارمني ديلي ايله ياناشي آذربايجان ديلينده ده شعريازميشلار. بوتون  ايسه كوكو داها قديملره گئديب چيخير.

بورايا قدر دئديكلريميزين هاميسي بئله ائتمگه اساس وئريركي. هله 4-7-نجي عصرلرده آذربايجان دانيشيق ديلي بوتون قفقازدا ياييلميش بيرديل اولموش بو اراضيده كي چئشيتلي ديللي خلقلر بير- بيريني باشا سالماق وباشا دؤشمك اوچون آذربايجان دانيشيق  ديليندن عمومي انسيت واسطه سي كيمي استفاده ائتمشلر.

آذربايجان دانيشيق ديلينين 4-7-نجي عصرلرده فورمالاشديغيني وگنيش ياييلميش اولدوغونو گؤسترن باشقا دليللر واردير. ايندي اونلارين يالنيز آدين چكمكله كفايتله نيريك. گله جكده ايسه بونلارين هربيريسي باره ده آيريجا دانيشاجاقدير:  1- ((كتاب ده ده قورقود)) داستانلارينين ديل خصوصيتلرينين مقايسه لي تدقيقي گؤستريركي. بوراداكي بويلارين بعضلري 11-نجي عصردن چوخ اول   يارانميشدير.2) 11-12-نجي عصرلرده آذربايجان شاعرلرينين (خاقاني شيرواني، نظامي گنجه وي وساير)     فارس ديلينده يازيلميش اثرلرينده آذربايجانجا ائله سؤزلر، سؤز بيرلشمه لري وحتا جمله لره راست گلينيركي. بونلار عموم خلق  آذربايجان دانيشيق ديلي اوچون داها سجيه وي دير.

نتيجه:  آذربايجان ديلي سلجوقلارين اشغاليندان چوخ- چوخ اول موجود اولموشدور وديليميزين همين دؤروده كي تاريخيني تدقيق ائتمك اوچون علاقه دار منبعلردن قارشيليقلي شكيلده استفاده اولونماليدير.

صص 33 تا38  - 1361-نجي گؤنش ايلي باكي دا چيخان تاريخي- ادبي مجموعه ده ن.