اوغوز خلقي نين يازيلي ادبياتي
ميرهدايت حصاري
اوغوز طايفالارينا مربوط اولان ((دده قورقود)) آدلي قيمتلي ومهم بيركتاب  اليميزده واردير. بوكتاب تورك طايفالاري، خصوصا اوغوز طايفالاري باره سينده يازيلميش و دونيا بويو ادبيات وفولكلور ساحه سينده بيرشاهكار ساييلان حماسي(اپيك) بيراثردير. بوكتابدان تقريبا بيركامل نسخه آلماندا ((درسدن)) كتابخاناسيندا وسونرالاردا بيرناقص نسخه ((واتيكان)) كتابخاناسيندا تاپيلميشدير.

بوكتاب بيرمقدمه واون ايكي بوي (داستان) دان تشكيل اولموش ومقدمه دن سونرا بيرحكمت لي مقاله ده گتيريلميشدير.

ايلك دفعه آلمان بيليجي سي ((فئليشر)) آلمانين سلطنتي كتابخاناسي نين فهرستيني (كاتولوگونو) حاضرلاياركن بوكتابا راست گليب واوكتابين بيرينجي صحيفه سينده ((10- نجي هجري عصرينده احمد پاشانين كتابخاناسينا گيرميشدير عبارتي يازيلديغينا گؤره اونوميلادي 16-نجي عصرده يارانيلميش بيراثركيمي ثبت ائتميشدير.

ميلادي 19-نجي عصرين اول لرينده آلمان بيليجيسي ديتسDIZ بو کتابين اوزوندن بيرنسخه گؤتوروب و اونون باره سينده تحقيقه باشلاياراق، دپه گؤزون بساتين الينده اؤلمه سي (بساط دپه گؤزواؤلدوردوگي) آدلي داستاني آلمانجايا ترجمه ائديب، چاپا بوراخميشدير.

ديتس دن سونرا بؤيوك آلمان عاليمي ((نولدكه)) ميلادي 1859-دا((دده قورقود)) نسخه سيني يئني- دن اوخويوب آلمانجايا ترجمه ائتدي. لاكين اونونن چوخ حصه سيني اوخويا بيلمه ييب، دوشونمه ديكده، اونو نشر ائتمكدن چكينميشدير.

اوندان سونرا مشهور روس عاليمي ((بارتولد)) (نولدكه نين) يادداشتلاريندان فايدالاناراق، ايشين داليسيني توتموش و1894-ميلادي دابوكتاب باره- سينده بيرمقاله يازومش واونون بعضي قسمت لريني روسجايا چئويرميشدير.

20-نجي عصرين اول لرينده، استانبول دا ملي واسلامي اثرلرين تدقيقي انجمني بو كتابي نشر ائتمك قصدينه دوشدوكده، عثمانلي بيليجي لريندن رفعت معلم بوايشي بوينونا آلاراق اوخطي نسخه ني بعضي شرح لر وحاشيه لر(ايضاح لار) ايله1915-نجي ايلده چاپا بوراخميشدير.1

كتابين عنواني ((كتاب دده قورقود علي لسان طايفه اوغوزان)) دير. كتابين مقدمه سي نين نثري متن ايله فرقلي اولدوغو گؤرسه ديركي بو مقدمه سونرادان بو داستانلاري ييغان و يانسخه ني قديم  متن دن كؤچوره نين واسطه سي ايله يازيلميشدير. كتابين مؤلفي ويايازيليش تاريخي معلوم دگيل. نظره گله ن ميلادي 15-نجي (هجري 8-نجي) عصرين اول لرينده ييغيلميشدير لاكين داستانلارين اوز وئرمه تاريخ لري اوندان چوخ قديم راخ اولماليدير.

داستاندا گله ن((گنجه، بردع، آلينجا قلعه سي، گؤيجه گؤلو، دربند، درشام)) كيمي يئر آدلاري وهابئله شرقي آناطولي دا دوران ((دره بوزان)) (طرابوزان)، بايبورد وماردين (اوردا يازيلان كيمي) كافرلر الينده اولان شهر آدلاري حادثه لرين آذربايجاندا اوز وئرديگي ياخود گئچميش تاريخي حادثه لردن الهام آلاراق آذربايجاندا دوزه لينمه سي ثبوته يئتيشير.

گؤرونوركي اوكتاب سلجوقي لرين واوغوزلولارين دئديگيميز آناطولي شهرلريني فتح ائتمه ميشدن، يعني ميلادي12-نجي عصردن قاباق ييغيلميشدير.

كتابين مقدمه سي بئله باشلانيلير: ((بسم الله الرحمن الرحيم. رسول عليه السلام زمانينه يقين (ياخين) بيات يرتندان(يوردوندان) قورقوت آتا آدلي بير ار قوپدي اوغوزون اوكيشي، تمام بيليجيسيدي، نه دير(دئيه ر) اولردي. غايبدان درلو خبرسويلردي. حق تعالي آنك كؤكلنه الهام ايدردي.))

كتابين مقدمه سي بوعبارت ايله قورتارير: ((قورقوت اوغوز قومنك مشكلي حل ايدردي. هر نه ايش اولسه قورقوت آتا طانشمينجه (دانيشمايينجا) ايشلمزلردي هرنه كه بيورسه- ايدرلردي. سؤزين طوبت (توتوب) تمام ايدرلردي.))

بومقدمه سي سونرا ((دده قورقودك حكيمانه دورت مقاله سي)) آدلي بيرحكيمانه ونصيحت لي مقاله گتيريليب. اورادا آروادلارين اؤرت دسته يه بؤبونمه سي باره ده ((اوزان طرفيندن قادينلرك دورت قسمه تقسيمي)) آدلي مقاله گتيريلير. سونرا 12-داستاندا بير- بيريندن آيري وعين حالدا بير- بيرينه مربوط اولان اوغوز طايفالاري نين مختلف ياشاييش صحنه لري وخصوصا اميرلرين وبيگ زاده لرين قهرمانليق لاريندان نمونه لرگتيريلير. ان سون داستانين مضموني طاش اوغوزون (خارجي اوغوزلارين) ايچ اوغوزا عاصي اولماسي، حكايه سيدير. كتاب اصلده172 صحيفه دير توركيه ده وباكي دا وايراندا دفعه لرله چاپ اولونموشدور.

 1- آيري تحقيقاتچي لاردان، توركيه ده پروفئسور محرم ارگين، اورخان شائق، آذربايجاندا حميد آراسلي، جمشيدوف ودميرچي زاده ايراندا، دوكتور جواد هيئتين، ونئچه مترجم لردن اوجمله دن (سازمين سؤزو) آدلي منظومه نين قوشاني شاعرسهند (بولود قارا چورلو) دن آد آپارماق اولار