شرقي آذربايجانين((اصلاح طلب)) اوستانداري اساسي قانونون19-15 ماده لري باره ده بوتون ايران تورك سويلولاريني سوددن آچدي ...

محمد علي فرزانه

اينترنت ومطبوعاتدا وئريلن خبرلره گؤره، شرقي آذربايجانين ((اصلاح طلب)) اوستانداري،‌دوكتور سبحان اللهي جنابلاري تبريزده روزنامه مخبرلري- ايله آپارديغي مصاحبه سينده بوتون آذربايجان وايران تورك سويلولاريني سوددن آچدي.

او، اؤز مصاحبه سينده آناديلي نين مكتب لرده رسما درس وئريلمه سيني ((توسعه)) ايله اوز- اوزه قويوب وتوسعه نين حسابينا 19-15 اساسي قانون ماده لريني اهميت سيزسانيب واونوسئوال آلتينا آپاردي.

مطلبي داها آيدين باشا دؤشمك اوچون اوستاندارجنابلاري نين اؤز دئديكلريندن دينله يك:

اوستاندارجنابلاري بئله بويويور.

((. . . قانون اساسي ميه حكم قرآني دير؟ مومكوندور بيرزامان قانونون تصويبينده بير اصولي نظره آلالار وسونرا معلوم اولاكي، اونون اجراسي مملكتين صلاحينا دگيل. آيا واقعا (ايشين) چتينليگي ائله15-نجي اصل دير.نييه گرك بومسئله ني  يئلله ييب واونا وقت قوياق؟ اصلاكتابلاردا توركو يازيلدي. سونرا نه ايش گؤرمك ايستيرسيز؟ بوندان هانسي شئي اليزه گليب چاتير؟..

مگر قانون اساسي آيه قرآن ديركي، اونون هراصلي نين اجراسي واجب ساييلسين؟ بونونظره آلماقلاكي آذربايجانليلارين چتينليگي توركي آذري (؟!) ديل وادبياتي دگيل واونون اؤيرنمه سي چوخدا اهميتلي ساييلا بيلمز . . .))

بواجتهاددان سونرا آقاي اوستاندار آتايانا نصيحت ائديركي، بو ايشده اصرار ائتمك وآياق ديره مكله سيز توسعه نين هانسي قسمتينه ال تاپا بيلرسيز؟ نه اوچون استيرسيز اؤزوزو تمدن قافله- سيندن دالا قوياسيز؟!

بوتون بوفرمايشلر آچيق- آيدين اصلينده ائليميزين ان بيرينجي حقوق طبيعي وانساني سيني كؤلگه ده بوراخماق ونئجه دييه ر اوشاغين باشيني قاقالي ايله توولاماق دئمكدير.

بوگون بيزيم خلقميزين ان اصلي وتاخيره سالينماز حقوق مدني سي اؤز دوغما ديلينه يئيه- لنمك، اونوبيررسمي درس كيمي بوتون تورك سويلومنطقه لرده اوخويوب اؤيرنمك، بوديلي بير وارليق وملي- مدني ميراث كيمي لايقينجه قيمتلنديرمك، اونا آراشديرما اوجاقلاري قورماق ويئري گلينجه اونا حتي آكادمي ياراتماق لازمدير.  بوگون هرخلقين دوغما ديلي اوخلقين ملي- مدني هويتي نين ان جانلي وثيقه سيدير. . .

بيزبوتون بونلاري نظره آلماقلا ائليميزين و ديليميزين آغ ساققالي اوستاد فرزانه يه مراجعه ائديب ورجاء ائتديك بومسئله نين نه يئرده اولدوغونو آچيب آيدينلاتسينلار وبيرمسئول حكومتي مقامين ايگيرمي دؤرد ايل باش سريمه- سيندن وگئجيشديرمه دن سونرا قانون اساسي نين اجراسيني طلب ائدن علاقمند، صاحب نظر وبيلگين آداملارين گويا شبهه لي وهويت سيزكيمسه لر اولدوغونو نه ساياق معنا داشينديغيني آيدين- لاشديرسينلار وايندي بوخصوصدا اوستاد فرزانه- نين سؤزلريني دينله ييريك:

اوستاد فرزانه : هامينيزا سالاملار، سايقيلار و ايشلرينيزده باجاريقلار آرزوسيله. بيليرسيزبيزده بير دئييم وار دئيه رلر: ها، باخ ايندي گلدين مطلب اوسته! اوستاندار جنابلاري اوزون ايللردن سونرا حكومتين چك- چئوير ائتديگي ان اساسي و حاشا ائديلمز حق طبيعي وانسانيسيني و ياداها دوغروسوبيرخلقين وارليغي نين، كيمليگي نين، كولتور وهويتي نين جانلي وثيقه سي اولان ديليني، آذربايجانا ((توسعه)) گتيرمك بهانه سيله گيروو گؤتوره . . . من بوندان هئچ باش آچانميرام بيرخلقيين، بير اؤلكه نين تاخيره سالينماز طبيعي- انساني حقوقونو، يعني اؤز دوغما ديلينده اوخوماغين، يازماغين و اؤيره نمه يين ((توسعه)) برنامه سي ايله هارا دا ايلگيسي اولابيلر؟

لاكين، هردفعه اولدوغو كيمي،‌بو باش سينديران داش بودفعه ده اؤزطرفيميزدن، يعني بيرآذربايجانلي- اليله بيزه آتيلير.

دوكتور سبحان اللهي جنابلاري نين آذربايجان وارليغي نين جانلي تجسمي اولان ديلي ايله سياسي قوندوم- كؤشدوم اويناماسي مني نهايت درجه ده حيرتلنديردي. گئچميش ايللرده، آقاي دوكتور سبحان اللهي اؤزونو بيرينجي يا ايكينجي مجلسه كانديد ائتديكلري سيرادا من تبريزده ايديم. اوزاق بيرعائله وي ايليشيك آرادا سلام عليك اولدوغونا يول آچميشدير. او واختلار من بيرگليشي گؤزل گؤروشده ديليميز واونون مكتبلرده رسمي باره ده سؤز آچديم. دوكتورسبحان اللهي مني دينله يندن سونرا دئدي: بونا هئچ سؤز يوخ كي بو ديل و بوادبيات بيرصاحاب تاپماليدير.

من دئديم: بوديل وادبيات بيزيمكيدير. بيز اونا صاحاب دورماساق كيم صاحاب دوراجاق؟ بوقيسا صحبت منده بئله بيرقناعت ياراتدي كي، آقاي دوكتوربومسئله اوسته دوشونور. بوفاكت وبيرچوخ آيري-آيري فاكتلار گؤستريركي حاكميت  15-نجي واونونلا ياناشي اولان آنا ياسا (قانون اساسي) ماده لريني عمله گئچيرمكده نه اينكه مثبت وعملي بيرآدديم گؤتورمك فكرينده دگيل، بلكه اؤز عامللري ايله سويو بولانديرماق واوماده- لري ده كان لم يكن ائتمك روياسيندادير.

ايندي بوآچيق وآيدين سياستي گؤرمكله سوروشابيلرسيز تكليف نه دير؟ يا داها دوغروسو نه ائتمه ليييك؟

بورادا يالنيز بيريول قالير اودا بودوركي بوتون ايراندان قيراخدا ياشايان گؤنئي آذربايجان تورك سويلولاري اؤزلري اؤز آنا ديللرينه، اؤز ملي وارليقارينا، كولتور ومدنيتلرينه يئيه دورسونلار وبوتون بالفعل وبالقوهامكانلاردان ا وز ديللريني اويرنمك واؤيرتمكده، اؤز ملي وارليقلاريني تانيماق و تانيتديرماقدا ال بير وسؤزبير اولسونلار. هر ايش بيرليكدن والده اولان امكانلاردان باجاريق وايناملا فايدالانماق ايشين باشليجا چاره سيدير.

بوگون ايراندا گئدن بؤيوك ملي-دموكراتيك انتباه(اويانيش) گؤستريركي بوگون اؤلكه ده اؤز ديللرينه اينانانلار، اؤزملي وارليقلارينا گؤوه ننلرين سايي گوندن گونه چوخالماقدا وحركت درنيلشمكده دير.(مقاومتده) بيزسؤزدانيشماقلا يوخ بلكه امكانلاريميزدان فايدالانماقلا ميدانا گيرمه لييك بلكه ده ائله گونو،  بوگون اؤز وارليقلارينا، كيمليكلرينه، ديل ومدنيتلرينه حؤرمت بسله ينلر بوتون تورك سويلولاري نين بيرديل ومدنيت قورولوشو قورماق واورادا بيرلشمك گون مسئله سي ساييلير، صاباح گئج اولابيلر.