ائللره وئرين :
ميرهدايت حصاري

اي وطن سنتينه گئدن كروانلار
مندن ده بيرسلام ائللره وئرين
قارانقوش مثالي، خوشبخت انسانلار
بهارين مژده سين گوللره وئرين
((شسبلي))دن((ميشوو))دان((يام))دان كئچنده
قارلي زيروه لرين سويون ايچنده
ائلاتلار داغلاردان دوزه كؤچنده
اونلارين هاي-كووون چؤللره وئرين
آذر اوولاديسان آزاددير ائلين
اولودورمسكنين، زنگين دير ديلين
قره قووه لرين سيندرين بئلين
داغيدين توفاغين سئللره وئرين
بيگانه نه قانير منيم درديمي
آنلايا سؤزومو، بيله قدريمي
يانديرير سازيمي، قيرديرير سيمي
آپارين خبرين تئللره وئرين
عؤمرومو غربتده وئرميشم بادا
عؤمرومون حاصلي چاتيبدير يادا
بير عؤمور وئرميشم بيرقورو آدا
بو آدي آپارين ائللره وئرين
اوره گيم سكوتدان دوشوبدور قانا
بير بئله سوسماقدان گلميشم جانا
آپارين شعريمي آذربايجانا
اوشيرين، شكرلي ديللره وئرين
من ده((هدايتم))‌سيزه صداغا
اؤزوم قفسده يم، ديليم قاداغا
من اؤلسم قويمايين مني تورپاغا
يانديرين كولومو، يئللره وئرين

ساتقينليق :
بختيار وهابزاده

سهل سومبات!
ساتا بيلدين
نه يي نه يه، كيمي كيمه؟
تك اولسايدين،
هئچ آديني توتماز ايديم،
ميكروب كيمي
سپه لندين تاريخيمه.
بابكلرين سينه سيله يول آچديغي
ذيروه لره چاتماق ايچون.
دره كچديك،
تپه آشديق.
بو يوللاردا
نچه
نچه حمزه لرله،
سومباتلارلا قارشيلاشديق.
ساتقينلارين حيله سيندن
نئچه كره
تاريخ اندي ذيروه لردن
دره لرده
سهل
سومبات!
بابكي دشمن الينه ويرن.
يوللاريميزا دييرله دين
خيانتين ايلك داشيني
اؤزونده كي گولوش ايله
سن آخيتدين
بير اؤلكه نين گؤزياشيني.
بو گولوشله
خيانتين زهرينه
بال قاتميسان
بو گولوشله
آناميزي آغلاتميسان...
گاه قؤزيدن، گاه گؤنئيدن
باش قالديران يل كيمي سن
نامردليگن يول يولداشي،
كيشيليگين غنيميسن.
يوز قيزلا، بير((ساغ اولا))
ساتا بيلدين كيشيلري.
ئوزون سويله
آلديقلارين ساتديغينا
دگرديمي؟
آلديغينا
آرزولارين گويرديمي؟
قيزيل گيتدي،((ساغ اول)) ايتدي،
ئوزون ئولدون،
خيانتين
تاريخيمين كوره گينده
دامغا كيمي دورور آنجاق
گوجونه باخ،
عصريميزه چاتدي سسي.
ساتيلانين بويوكلوگو،
ساتقينليغين درجه سي!
دوشدو گلن عصرلره
خيانتين بوز كولگه سي
نئچه- نئچه سهل- سومبات
باش قالديردي او كولگه دن
سسي گلدي او اؤلكه دن، بو اؤلكه دن.
سني چوخ دا قيناميرام
ساتقينلييغي وقتين ئوزو
هنر سايدي
مگر ساتقين اولارديمي
اگر آلان اولماسايدي؟