رحمتليك پروفئسور دوكتور مينائي نين قيسا ترجمه حالي:

 

آذربايجان آنلاين رحمتليك قدرتلي رسام وائل خادمي پروفئسور دوكتور علي مينائي نين دونياميزدان كؤچدوگو خبري ياياندان سونرا، دونيانين هرطرفيندن باش ساغليغي پياملاري آخيب گلمكده ايدير. بيرچوخلاري بو بؤيوك وسارسيلماز انسانين ترجمه حاليني ايسته ميشلر. بيز اونون مفصل حياتي، ياراديجيليغي ومبارزه لري باره ده تفصيل حالدا وئره جه ييك، آنجاق ايندي بو عزيزين يغيجام ترجمه حاليني اونون عؤمور دوستو ومعنوي آرخاداشي اوستادم.ع. فرزانه نين ديالوگوندان نقل ائديريك:
قدرتلي رسام و يورولماز ائل قايغي كشي پروفئسور دوكتورعلي مينائي نصرالله اوغلو 1924
نجي ايلده باكي دا دوغولموش، كيچيك ياشلاريندا عائله سي ايله بيرليكده ايران آذربايجانينا كؤچمك اجباريندا قالميش، معلمليك اختصاصي مكتبي ساييلان دارالمعلمين دن ماذون اولوب ومعلمليكه دوام ائتديرمگله رسامليق ايشي ايله ده ماراقلانميشدير. اونون او تاريخلرده تبريزين تاريخي بنالاري وبو سيرادا گوي مسجدين ياغلي بويا اثري گؤرنلرده اعجاب ياراتميشدير.
ايران آذربايجانيندا 1946- 1945 ايللرينده باش وئرن حركاتدا علي مينائي بير بؤيوك گروپ جوانلارلا اونيورسييته ده آيري- آيري رشته لرده عالي تحصيل آلماغا باكييا گؤنده ريلير. بوفرصتده مهندسليكده فوق ديپلم آلير واونون آردينجا دا تحصيليني تكميل ائتمگه دوكتورا مدافعه ائدير. باكي نين خاورشناسي انسيتتونون شرق ملتلري فرهنگ  ومعمارليغي ساحه سينده باش آراشديريجي وآذربايجان نقاشلار(رساملار) اتحاديه سي نين عضوو وآزاد رسامليقدا اشتغال درجه سينه چاتير. او بورادا آذربايجان فرشي، مينياتور تابلولار وخطاطليقدا ايشه دوام ائتديرير.بغداد دا عبدالكريم قاسم روولتوندان(حركتيندن) سونرا باغدادا دعوت اولونور و اورانين اينجه صنعت آكادمي سينده تدريس ائدير وبير سيرا فرهنگي بنالار مثلا اپراي ملي بغدادي، موزه، كتابخانالاري پلانلاشديرماقدا فعاليت گؤسترير وباشلاديغي قالي، مينياتور وتذهيب(قيزيل سويي ايله بزه مك)  ايشلرينده نمايشگاهلارلا امكداشليق ائدير.ايران عراق ووروشمالاري باشلاياندان سونرا سياسي دليللره گؤره ايشدن قيراغا قويولوب وممنوع الخروج اعلام ائديلير. اوهرترتيب ايله ايدي اوزونو بوتهلكه دن قورتارماغا موفق اولور لاكن اتحاد شورويده گؤردوگو يارامازليقلاردان آچيق انتقاد ائتديگيندن((خالق دشمني)) تانينيميشديرو بلليكله آلمانيايا كؤچورو اورادا بؤيوك تهليكه لر حتي ترورلا تهديد ائديلير وهرحالدا عؤمرونون سون ايللريني اورادا باشا سورور. بونجيب، فداكار، ائل قايغيسي چكن انسان ان چوخلو اثرلر ويازيلار، رسامليق شاهكارلاري قالميشدير. اونون عؤمرونون سون اوتوز- قيرخ ايلينده شهريارين حيدرباباسينا چكديگي مينياتورلاري، اولا بيلرسه اونلارين دؤرد ديلده يعني آذربايجان، فارس، عرب وانگليس ديللرينده نشر ائتمك آرزوسو ايدي. گؤزل ونجيب انسانين نه قدر اينجه وگؤزل بيرآرزوسو!..

 

اوستاد مينائي نين وفاتي مناسبتيله وئريلن بيلديريش:

داها سلام وئرمگه كيم قالدي؟
آلديغيمز خبره گؤره پروفئسور دوكتورعلي مينائي گوزل انسان وآذربايجان اينجه صنعت اوستادي آتميش ايل افتخارلي حياتيندا آذربايجانين آديني وعنوانيني دونيادا اؤجادماغا اليندن گلني اسيرگه مه ين بؤيوك آذربايجان هنرمندي بيزي ترك ائتدي.
علي مينائي بوتون حياتيندا بيرمسئول انسان نمونه سي كيمي خلقينه ويوردونا وفادارقالميش وعؤمور بويو اورگي وطن وخلق اوغروندا چارپينميش دير. بيز بو بؤيوك ضايعه ني اونون حورمتلي عايله سينه مهربان حيات يولداشينا، قهرمان قيزينا وكوره كنينه وايكي گؤزل نوه سينه اؤركدن باش ساغليغي وئرير ووارليغين سسي درگي سي و هابله اوستادين
بوتون تانيش لارينا، دوستلارينا وآذربايجاني سئون لره باش ساغليغي وئرير و مرحومون بؤيوك روحونا رحمت لرو شفقت لر ديله ييريك! روحو شاد اولسون.
وارليغين سسي نين تحريريه هئيتي- آذربايجان آنلاين

 

باش ساغليغي
حيدربابا، دونيا يالان دونيادي،
سليماندان، نوحدان قالان دونيادي.
ااوغول دوغان،‌درده سالان دونيادي
هر كيمسه يه هرنه وئريب، آليبدي،
افلاطوندان  بير قورو  آدقاليبدي .                                                                                     

دوكتورميراب جنابلاري وسركارخانيم مهندس آفاق، خانيم گل نيسا وگؤزومون ايشيقلاري مريم وسهند
درين تاسف و تاثرله زمانه نين اوستادي و اوستاد سيدمحمدحسين شهريارتبريزي نين  شخصيت وهنري نين عاشيقي ،
پروفئسوردوكتورعلي مينائي تبريزي نين آلمان اؤلكه سينده بن شهرينده اينانيلماز واؤرك گؤينديجي اولومونو تسليت دئيير و اولوتانري دان او رحمتليك ايچون باغيشلانما وحورمتلي قالانلار ايچون صبير وتحمل طلب ائديريك.
ايران، تبريز، قزوين مرحومون قارداشلاري قاسم واسرافيل مينائي وبوتون تهران، تبريز، گيلان، آلمان، استراليا وآمريكا دا اولان فاميل وياخين اقرابا طرفيندن.                       

  

يوتوبوري شهرينده كي آذربايجان توركجه سينده فعاليت گؤسترن سهند راديوسونون رحمتليك پروفئسور علي مينائي تبريزي نين حقينده ، مالموشهرينده تلفن باغلانتيسيندا ميرموسي هاشمي ايله دانيشيغي:

س- نئچه مدت دير، پروفئسورمينائي ايله نانيش- سينيز وبو آجي خبري هاردان ونه جور ائشيددينيز؟

ج- سؤنن اولدوزلارا، سلام قالانلارا، آلقيش!
اوستاد مينائي نين آدي ايله بوسون اون ايلده اؤزاقدان آشنا اولدوم،بوكئچن ايللرده آلمانيه نين بن شهرينده رحمتليك له اونون ائوينده گؤروشوم اولدو،
2001- نجي ايلين آگوست آييندا بيرنئچه نفرباكي دان، لندن ده ن گلن وطنداشلاريميزايله بيرليكده قوناغيميز اولوب، آنجاق تلفن علاقه لريميز داواملي واري دير. بو اؤتن آيلاردا خزر دنيزي وبؤيوك قارداشا احتياجيميز يوخدور حاقيندا بير قزه ته ده ياييلان مقاله سي اونون سفارشي ايله اليمه چاتدي وتلفن دا تاپشيرديلار، بومقاله ني تبريزه گؤندريم وشمس تبريزي قزه ته سينده چاپ اولونسون. من بوايشي گؤردوم آمما شمس تبريزي ياساق اولوب باغلانماق دوروموندا ايدي وفكيرائديرم كي مقاله اورادا گون اؤزو گؤرمدي. بير يازي دا  آذربايجان جمهوريتينده  برپا اولونموش بيرينجي، دونيا آذربايجانليلارينين قورولتايي حاقيندا اوراياگؤندريب وكوپيه سيني ده منه گؤنده ره ره- ك، فكير ايسته ميشدير، تاسف له مسافرتده اولدوغوما گؤره جواب وئره بيلمه ميشديم.
 آمما
2000-نجي ايلين فورار آينين ايگيرمي سينده گئجه دوستلاردان بيرسي لندن ده ن تلفن آچيب بو آجي واينانيلمازاوستادين اؤلوم خبريني منه وئردي.

س- رحمتلگين، هنري، كتاب وآيري اثرلريندن چاپ اولمايان ايشلره نه قدمم لرگؤتوروله جك؟

ج- بوگون آلديغيم خبره گؤره، ايكي كتاب يعني، بيرنجي سي، شهريارين حيدرباباسي نين مينياتورلا دؤرد ديلده بوراخيلماسي، ايكينجي كتاب كوراوغلو اوپراسي نين آلمان ديلينده ترجمه سي، بوكتاب دا چوخ قيمتلي شكيللر يئرلشير، هرايكي كتاب اوستادين يوخون قلم داشي دوكتور نعمت رحمتي طرفيندن آلمانيه ديلينه ترجمه اولونوب وبو كتابلارين نشر اولونماسي 2002-نجي ايلده احتمالي چوخدور. همچنين آذربايجانين بوگونه ده ك تانينماميش تاريخي اثرلري نين كلياتي، رحمتي جنابلاري نين همكارليغي ايله حاضيرلانماق حاليندا ايدي وهله- ليك مكمل اولماميشدير. دوستوموز رحمتي ، اوستادين ايستديگينه گؤره چاليشيردي باكي شهرينده كي وباشقا اثرلري بوشهرين مؤزه سينده اوستاد مينائي نين اؤز آدينا يئرلشسين وبوايشده هله سونا چاتما ميشدير. البته كي قالان ايشلرده، اونون اؤزو كيمي، صداقتلي دوستلاري طرفيندن حورمتلي عايله سينين وبويوك لريميزين گؤستريشي ايله داوام تاپاجادير.
اوستاد بوتون بو ماجرالي حياتدا اؤز خالقينا، يوردونا صادق قالدي، قلم وهنرجبهه سينده چوخ باشاريلار قازاندي وهرزامان دانيشاركن اؤزونو 1945- نجي ايلينده يارانان گؤنئي آذربايجانين ملي حكومتينه صادق بيرفدايي سانيردي. دوغوردانداكي بو رحمتليگين دوشونجه سي ونجيب ليك وتواضع- كارليغي بيزلرده ملي ومعنوي روحو يوكسلديردي! روحو شاد  خاطره سي ابدي اولسون...

 رحمتليك پروفئسور دوكتورعلي مينائي تبريزي نين  وفاتي مناسبتيله، آذربايجان آنلاين شبكه سينده آچيلان خاطرات دفترينه 51فقره باش ساغليغي دونيانين هريئريندن اؤجمله ده ن آذربايجان جمهوريتيندن ،گؤنئي آذربايجان وايرانين باشقايئرلريندن، تركيه،قوزئي قبريس ، آمريكا، كانادا، چين، مصر، ايسوچ، نروژ ، دانماركا ، آلمانيا، لهستان ، اوكراينا، انگلستان ، اتريش ، اولكه لريندن آخيب گلميشدير كي اونلاري بيريئرده مرحومون قهرمان قيزي آفاق خانما وارليغين سسي نين بو نمره سينده تقديم اولونور.وارليغين سسي