دوكتورسيدمحمدحسين مبينين(شيمشكين) دگرلنديرمه مراسمي تبريزين سردريسينده.

 

شمس تبريز هفته ليگي نين وئرديگي معلوماتا اساسا، دوكتور سيدمحمدحسين مبين(شيمشك) شاعره سخنور، ائل قايغي كشي وجزاميلرآتاسي نين جمعه گونو شهريورين 23- اينده سردري فرهنگ ومدنيت ائوينده دگرلنديرمه مراسيمي گئچيريلميشدير بوسردري يازيچيلار وهنرمندلري- نين همتي ايله قورولموش اجتماعدا چوخ بؤيوك سايدا اوستادلار، شاعرلر، دوكتورلار، بيلگينلر وعلاقمندلر اوستاد دوكتور سيدمحمدحسين مبينين اللي ايلليك فرهنگي- ادبي چاليشمالاري وپزشكي خدمتلريندن تجليل ائتمك اوچون توپلاشميشديلار.

مراسمين باشلانيشيندا، حميد سخامهر دوكتورون خدمتلري ايله ايلگيلي شعري اوخودولار. اونون آردينجا اوستاد عزيز دولت آبادي ده دوكتورون خدمتلريني دگرلنديرمكده شعر اوخودولار.

دوكتورحسين صديق(دوزگون) تهران دانشگاهلاريندا آذربايجان ديلي اوستادلاريندان، شيمشكين ادبي ومطبوعاتي فعاليتلريني قيمتلنديردي واونون آردينجا عاشقلار گروپو مجليسي هيجانلانديرديلار. دوكتورعلي اكبر ترابي(حلاج اوغلو) دوكتور مبينين اوستون شخصيتيني دگرلنديرمك انسانليغين كرامتيني دگرلنديرمك دئمك اولدوغونا تاكيد ائتدي.

مقصودسامع، كانونون مسئولو ومراسمين كاتبي تريبونا آرخاسينا گئچدي ومراسمين نئجه قورولماسيندان گزارش وئردي. رضا غفاري اؤز مقاله سيني((ادبيات نه اوچون دور)) موضوعوندا اوخودو واوشاقلارين يئني يئتمه وكيچيك ياشلاري يئرلي پالتارلارلا دوكتور مبينين شعرلريني اوخودولار.حسين نجفي برنامه نين دواميندا بابا باغي جزاميلرينين، عندليبي عنوانلي شعريني اوخودو. اوستاد يحيي شيدا ((آذربايجانين خلف اوغلو)) عنوانيله دوكتورمبينين شخصيتي واونون ادبي وانساني دورومونو قيمتلنديردي وآذربايجاني فرزانه لر يوردو آدلانديردي. علي نظمي نين شعري نين آردينجا، آذربايجان موسيقي مكتبي نين گروپو طرفيندن اوستاد حسن دميرچي رهبريتي ايله اجراء‌ ائديلديكدن سونرا، دوكتور مبين مجلسده كي لرين پاك وجوشغون آلقيشلاري آراسيندا تريبونا گئچدي. مجلسده كي لرين چوخونون گؤزلري ياشارميشدي.اوستاد مبين كؤرك سسله سؤزه باشلادي. اوجزاميلرين شرايطيندن سؤز آچدي وجزاميلره خدمتي انسانيته خدمت كيمي كرامت ساندي وآرتيردي:

اگر بومراسم بوعزيزلرين شرايطيني طرح ائتمك اوچون اولماسايدي، اينانين بومراسيمين قورولماسيني قبول ائتمزديم. دوكتورمبين سؤزلرينده مسئوللارين وخالقين بونلارين ياشاييش شرايطينه وجزاميلرين روحي ورواني چاتيشمامازليقلارينا يؤنلده رك دئدي: من جزاميلرايله ياشاييرام وياشاياجاغام.اونلارين حياتي منه ياشاماغي اويرنمكده الهام منبعي دير...

* * *

بوخبرين يوته بورودا( سوئده) سهند راديوسوندان ياييلماسيله اوستادمحمدعلي فرزانه، تلفونلا دوكتور سيدمحمدحسين مبينه جانلي پيام گؤندرديلر. اوستادين اورك آغريسي ايله قونوشدوغوديالوگدا دئييلردي: سؤزوم بوتون انسان كرامتينه حؤرمت بسله ينلرله، بوتون انسانلارين دردلريني اؤز دردلري بيلنلرله، وبوتون آتيلميش واونو دولموش انسانلارين قايغيسيني چكنلرله دير.

 من دوكتور سيدمحمدحسين مبيني، بوآزاده وشرفلي انساني، چوخ ايللر اولدن وچوخ ياخيندان تانيرام. ان آزي اللي ايلدن بري. يعني اونون تبريز دانشگاهي طب فاكولته سي طلبه سي اولدوغو ايللردن تانيرام. دگرلنديرمه اجلاسيندا دوكتور مبينه وئريلن((جذاميلرآتاسي)) عنواني، نه قدرحقيقته اويغون وياراشيقلي عنواندير. من اونون دگرلمه اجلاسينداياشلي گؤزلر وكؤورك اوركله سؤيله- ديگي بوسؤزلري((اگربواجلاس بوعزيزلرين مسئله- سيني طرح ائتمكدن ساري اولماسايدي، اينانين بومراسيمين اجراسينا بويون قويمازديم)). دوكتورمبين سؤزونو بيترمه دن جماعتين ومسئوللارين تبريزين بابا باغيندا ساخلانان جذاميلرين ياشاييش وروحي شرايطينه آرتيقدان- آرتيغا دقت وعنايت ائديلمه سيني بيلديردي. او اوركدن قوپوب انسانليغي دويان اوركلرين سيمينه زخمه ووران سؤزلريني بئله سونوجلادي:

من جذاميلرله ياشاييرام واونلارين ياشامي، حياتدا منيم الهامچيم ساييلير.من دوكتور مبينده اولان اؤرك گيزيلتيسيني دويورام واونون هربيركلمه سينه اينانيرام. من آرزو ائديرم تبريزين سردريسينده چالينان زنگي بوتون امكانلاري ومالي استعدادلاري اولان آذربايجانليلار وانسانليغا قايغي وحؤرمت بسله ينلر ائشيدسينلر خالقيميزين بوتون ساحه لرده مدرسه، كتاب، دفتردن توتموش كلينيكلره، مطبوعاتا، جوربه جور انجمن لر ومدني اوجاقلار ياراتماغا احتياجي وار، ييخيلماقدا اولان آذربايجاني يئنه قالديرماق اولار، بويالنيز اوزونو آذربايجانلي بيلن وآذربايجاني اؤزلري نينكي بيلنلردن آسيليدير.

بوگونكو دونيادا هرجهتدن باخيرساق اولكه ميز دوكتور محمدحسين مبينلريله قات- قات، ايندكي شرايطدن اوستون ، آباد وخلقيميز سانيلي وگؤوه- نيله جك خلق اولابيلر...