ا شاره

قوشمادا گؤنده ريلن هرايكي ((واسونك)) كؤوره ك قلبيمين نيسكيللريني ديله گتيرمك اوچون يازيلميشدير. لاكين اونلاري ائشيده ن ودويانلار اصرار ائتديلر، اونلار چاپ اولوب ياييلسين. بوناگؤره ده اونلاري ((وارليغين -سسي)) تحريريه سينين سرانجامينا تاپشيريرام، هرجور ايسته سه لر اونو ائله -سينلر

 

باجيم روبابين نيسگيللي خاطره سينه:

ساپ تك چرخه دولانديم،
سوتك ارخه دولانديم.
نامرد فلك اليندن
قورخا- قورخا دولانديم

عزيز باجيم، نجيب باجيم، ناكام باجيم، عؤمور بويو بوتون دردليلرين ونيسگيليلرين، درديني ونيسكيليني اؤز اوره ك دردلرينه جالايان باجيم، يازيقلارين اودونا يانان باجيم!..

سنين واي خبريني ايكي، بلكه ده اوچ آي گئج دويدوم. اونو خسته اولدوغومدان منده ن گيزله ديرميشلر. لاكين دونن آخشام حيات يولداشيم اختر، باجيلاريمدان احوال بيلمك ايسته ينده يالنيز- خانيم باجيدان- بؤيوك باجيمدان خبر توتدو، سنده ن آد چكمه دي من دويدوم كي سنين باشيندا بير ايش وار... سونرا اومني اؤزيله گزيشمه ك اوچون ياخينداكي گؤلمه جين كنارينا آپاردي وديسكينه ديسكينه منه آنديردي...

بيليرديم سن مريض احواليدين. بيليرديم اوزون ايللر دردچكيردين آمما اونو اوزه گلمزدين. بعضي گونلر ائوده وار- گل ائتمه يه طاقتين اولماسا بئله قوناقلارا يئتيشردين. خبري دينله ينده بيرلحظه دايانديم. آنجاق اوره ييم يامان دومانلاندي. اگر بوشالماسايدي يئنه اليمه ايش وئرردي، آمما بوشالدي، هيچقيريقلار ايچرسينده بيرشرفلي عؤمورون خاطره لري، بوتون آيرينتيلاري ايله بيرفيلم كيمي گليب گؤز اؤنومدن سووشدو. سنين كيچيك ياشلاريندان ائوه سو داشيماغين، فرش توخوماغين، اوشاقلارين دگيشيكلريني يويوب، سويا چكمه يين، ايپ اييرمه نين، ايش اوستونده آستادان ائل ماهنيلاريني زمزمه ائتديگين، چايخانا دا توتولدوغون بيرآندا باخيشلاريمدا جانلاندي. باشقا بير اولاي گليب گؤزوم اؤنونه ديره ندي وبيرلحظه اولكي خاطره لري كولگه ده بوراخدي.من بودفعه سفريمده بير مدرس اؤيره تمن كيمي تانينديغيم ايچين بوردا نشراولان بير درگي- نين نمره لريني منه گؤنده ريرلر.

درگي نين غريبه بيرآدي وار((اگردانيشا بيلميرسن، قوي بيز سنين يئرينه دانيشاق!)) درگي نين اوستونده هله بير ساييندا او باخيمدان ياهر دليله اولور اولسون دانيشانماييب، سؤزون دئيه بيلمه- ينلردن عكسلر وئريلير. بودرگي هر واخت گؤزومه ساتاشاندا، سن وخانباجي نظريمده جانلانير.سيز دانيشا بيلمه ينده سيزين آديزدان من دانيشارديم!..

سن درس اوخويا بيلمه دين، لاكين بيرچوخ درس اوخويانلاردان داهادا انساني دوشوندون. درد سني آياقدان سالديغي حالدا، سن چاره سيزلره قورتولوش يولوگزدين. هئچ زامان اونوتماياجاغام، يعني اونودا بيلمه رم. بيردفعه مندن سوروشدون داداش، ياشاماق بوندان ياخشي اولا بيلمزمي؟ ومن دئديم نيه بوندان ياخشي اولا بيلمز قلبيمين قيوريم ساچلي، گول ياناقلي باجيسي؟ يوزدفعه بوندان ياخشي اولابيلر...

سن گؤزلرين يول چكركيمي اؤز اؤزونه پيچيلدادين: من دئييرم كل خلقتده حيات- ياشاماق بيردفعه هرانسانا وئريلير بوناگؤره ده هركس، نئجه ياشاماغي اؤزو هاميدان ياخشي بيلير. تكي بو واركي سن اؤزونو ايسته ديگين قدر اؤزگه لري ده سئوه سن... دئديم: قيزسن فيلوسوفوموشساندا! دئدين ميه سنين باجين دگيلم؟.. سن گئتدين آمما من نه قدرگؤزوم دونيايا باخير سنين پاك خاطره- لرينله ياشاياجاغام وهرزامان سني خاطيرلاياندا بوبيت اوره گيمدن جوشوب دوداقلاريما قوناجاق.

بعداز وفات، تربت ما درزمين مجوي            
درسينه هاي مردم عارف مزار است.
سن گئتدين، وار اولسون انسانليق، ياشاسين ايلقار...

بونيسكيللي خاطره لري بورادا بيتيرمك ايسترديم، آمما، ائله بيل قورتارماق ايسته ميروقلم اؤزونو چكير ومني ده اؤزويله آپارير. من ناهارلار ياآخشاملار ائوه قاييداندا بيرعادت كيمي هميشه ال- اؤزومو صابينلارديم. سن سويو اوزاقلاردان گتيرديگينه گؤره چاليشارديم سويوقناعت ائتمگه، سن هرواخت الين ايشده اولماياندا، منيم ال- اؤزو يوماغيمي گؤرونجه ال- اوز حوله سيني گتيرمك بهانه سي ايله اؤزونو يئتيره ردين،سو قابيني اليمدن آليب سويو جاغلاداردين ومني نصيحت ايلر كيمي دئيه ردين:

داداش ال- اوز يوما سويو قناعت گؤتورمز، نييه اسيرگه نيرسن؟ من نه قدر وارام سيزه سوداشيياجام، سيزين ساققاز اولاجاغام، داداش! منيم آللاهدان ايسته ييم بودوركي، سبب سالسين سن بيرسوآنباري دوزلده سن. اوندا هم من راحات اولارام،هم ده قاپي- قونشو گليب تميزسوآپارارلار. ايللر گئچدي بيز بيرسوآنباري دوزتديره بيلديك. سنين چيچه يين چاتلاييردي. بيرگون دئدين: داداش سني وار اول! مني ده، قونشولاري دا سوداشيماقدان قورتاردين... هئچ بيليسن سني نئجه دوعا ائديللر؟..

آمما بوتون بوياديمدا قالان ودومانلي- چيسكينلي قلبيمي كؤوره لدن آنيلار ايچرسينده بيرخاطره مني هاميدان چوخ دوشوندوره رهاميدان چوخ كؤوره لدر وزامان- زامان گلييب گؤزومون اؤنونده دايانار. اودا بودور: من ناظيم حكمتين شعريله تازا تانيش اولموشدوم.بوشعرلري اوخوياندا منده اونلاري فارسجايا چئويرمك علاقه سي يارانيردي. بيرگون ناظيم حكمت زنداندان بوراخيليب اؤزونو تهلكه دن قورتارماق قصديله گيزليجه توركيه دن چيخاندان سونرا يازديغي شعرلر سيراسيندا ((اوغلوم ممده مكتوب)) عنوانلي بير شعرده يازميشدي. شعرين ترجمه سي يامان باشيمي قاتميشدي، سن گليب مني چاغيراندا كي داداش! بس نييه گلميرسن، دئديم بوردا بيرشعرمني يامان گيره ساليب، اؤزومو اوندان قورتارانميرام. سوروشدون اوشعر نئجه شعرديركي؟ دئديم، شاعر اوندا اوغلونو نصيحت ائلير و وئرديگي اؤيودلرين آراسيندا بئله بيرسؤزو ده وار: اوغلوم، دونيادا بير اوگئي كيمي يوخ،‌اوز آنانين ائوي كيمي ياشا. گؤزل يئه، گوزل ايچ، موسيقي دينله، انسانلارلا قونوش، اونلارا قاتيل!..

سؤزومون آراسينا گيردين وسوروشدون: داداش، اگرسنين بوشاعره يولون وار، سني آللاه، ياز اوندان سوروش كي، شاعر، بيري اگرآنادان دوغولاندا اوگئي دوغولسا نئيله سين،كيمه قاتيلسين؟ اوره ك سفره سيني كيمه آچسين؟ دئديم: منيم نيسكيللي باجيم، اؤزقارداشينا آچسين! دردلريني اونونلا بؤلوشسون! سن گئت، من ده گليرم. باشيمي اووجلاريملا توتدوم، بارماقلاريمي توكلريمه ايليشديرديم((سوروش شاعر آنادان اوگئي دوغولانلار نئيله سينلر؟ آناسيزليق يا آتاسيزليق درديني كيمله بؤلوشسونلر؟ من كدرلريمي هميشه گيزله ده رم،مني باغيشلايين بوكدري گيزله دنمه- ديم!..

اؤلمز طنز اوستادي عزيز نسينين ((بؤيله گلميش، بؤيله گئتمز)) عنوانلي بيرمونوگرافيك اثري وار. وقتيله اليم چاتسايدي اوستادان گيلئ له نرديم و دئيه رديم: اوستاديم هله ليك بئيله گليب، بئله ده گئدير. هله دونيا نامردلرين الينده دير... هله دونيادا اوگئي ياشايانلارين سايي حسابا گلمزدي..

سن آراميزدان چوخ تئز كؤچدون . . .
(ايللر بوندان اول دونياسيني دگيشميش جانيم قارداشيم يعقوبون اونودولماز خاطره سينه)

سن چوخ تئز كؤچدون. دومانلي اوره يين سني طبيعي عؤمرونو ياشاماغا بئله مهلت وئرمه دي... سن بئجرديگين بوداقلار گوله اوتورمادان بيزي ترك ائتدين سنين نه قدرنفسين گليردي، بيرآن اونلاردان، همتلي اوغوللاريندان غافل قالمادين. اونلار سندن سوراگوله اوتوردولار، درسلريني قورتارديلار و ان بؤيوك ايسته ييم بودوركي، اونلاردا سنين كيمي كولگه لي اولسونلار وشرفلي آنالارينا اورك- ديرك اولوب، باشينا كؤلگه سالسينلار سن بيزي ترك ائده نده ن سونرا اوره گيمين دفتريني چوخ واراقلاديم، سندن وسنين خاطره لريندن نه قدر يازماق ايسته ديمسه ده نايل اولماديم. سن دئمه منيم توتقون اوره ييمي ده سني كؤوره لده ن آجي ودؤزولمز درد آغريتماقدا ايدي. هردفعه قلمي اله آلديمسا، او زويدو اليمدن دوشدو. لاكين بيلميرم نه دن ناكام باجيم ربابين دونياميزدان كؤچمه سي وبوخبرين منه،غريب ائلده دئييلديگي سنين اونودولمازخاطره نه قايتماغي منيم گؤز اؤنومه گتيردي سن ذكاوتلي ايدين، اوخوماقدا، يازماقدا يورولماق بيلمزدين سن بيرچوخ درسلريني مدرسه ده آلمادان واساسا سنين و اوبيري لرين مدرسه يه گئتمه يه امكانيميز اولمادان اوخويوب باشا چاتديردين واونون آردينجا ايشه واوگون قاباقجيل آخينينا قوشولدون.سن هرشئيده ن چوخ تئاتر، صحنه وديالوق ايله ماراقلانار وبو دورومدا اؤزونو جانلي حس ائده ردين. هئچ ياديمدان چيخماز هميشه مندن صحنه اثرلري باره ده سوروشاردين ونمايشنامه لر يا نمايشنامه اسلوبدا وپتانسيل ده يازيلان كيچيك خصوصا اگر دراماتيك اولسايدي، سنين دقتيني قازانار وساعاتلاسني اوخوماغا، كؤچورمه يه ودوشونمه يه مشغول ائده ردي.سنين عادي گؤروشلرينده يا ديالوق اجلاسلاريندا شوخ وبعضا كنايه لي آتماجالارين چوخلاري نين خوشوناگليرسه،بعضي- لري ده اونو اؤزونه آليروسنله حساب آچارديلار. سنين بيرخصوصي اوتورومدا سؤز آراسي دئديگين((چاليشاق آدام اولاق!)) يامان غوغا يارادير وتبريزده اركؤيون دوستلاردان بيري ((سن نه دئدين،‌ميه بيزآدام ده گيليك؟)) اعتراضينا، اگر بئله دئسم، آغزيما داش، تورپاق!)) سيز يا اؤزگه سي آدام دگيل. من سؤزوآرايادئديم. آمما دئيه سن اوخ نشانا ده گدي!)) سؤز ائله اوزاندي كي،گليب منه ده چاتدي...سنين شعره- ادبه وهاميدان چوخ تئاتر وبديعي ديالوقا اولان وورغونلوغون وسنين انسانلارين فرهنگي وملي- اجتماعي دوروموندا تئاترا اوستونلوك وئرديگين، سني دراماتيك هنرلر فاكولته سينه سونائتدي. آمما، اورادان آلديغين مدرك، نه صحنه قاپي سيني سنين اوزونه آچدي ونه ده سنه اداري ايشينده اوغورلو اولا بيلدي، گؤمروكده ايشله ين تحصيل امكداشينا دراماتيك هنرلر فاكولته سيني بيتيريب گؤمروكه((من دراماتيك هنرلردن ماذون اولموشام، اطلاعيه سيني يازديقدا، آخماق رياست كل گؤمروكات بوعبارتي يازميشدي: آقاجان! دراماتيك منيم نه ده رديمه ده گر؟ گؤمروكون اوضاعي هاميدان دراماتيك- دير، آللاه روزونو آيري يئره حواله ائله سين! و((وزارت نيرو)) سنين اطلاعيه نين. جاوابيندا آغدان- قارادان هئچ نه ديله گتيرمه دي...سن ياريمادين. سنه وئريلن وعده لرين هئچ بيري باش توتمادي. سن آراميزدان چوخ اركن گئتدين. ان آزي ايگيرمي بلكه ده اوتوز ايل وداها چوخ ياشايا بيلردين.مني اوچ ايل بوندان اول قاپيلديغيم اورك چاتيشمازليغي سني چوخ تئزآياقدان سالدي ومني هرشئيدن چوخ سنين اؤز دوغما آناديلينده يازيب ياراتديغيني گؤرمگه حسرت قويدو... ايندي بويلانيب گئچميشه باخيرام. خاطره لر وآنيلارين بيربه بير گليب گؤزومون اؤنوندن گئچير. بوخاطره لرين ايچرسينده بيرخاطره ني هئچ زامان اونودانميرام. سنين تئاتر وصحنه يه وورغونلوغون. سن تئاتري وارليغيندان وفرهنگيندن اوزاق دوشموش بيرخالقا ان موثر قورتولوش يولو اولدوغونو، هئچ زامان اونوتمادين وبونو هرگون، هرسحرآخشام، هريئرده دؤنه- دؤنه تكرار ائتدين.سن بئله بير تئاترين اوغروندا اؤزونو اودا- سويا ووردوغون ايللرده، من تصادفي اولاراق، فرانسه نين ولايتي يازيچيلاريندان ((سيرك دلقكي)) آدلي بيردرامي ترجمه ائتديم. بيرگئجه اونون ال يازما نسخه سيني سنه وئرديم، داها دوغروسو اونو سن مندن ايسته دين وصاباحيسي ال يازماسيني منه قايتاراندا دئدين: داداش، گئجه اوچ كره اونو اوخوموشام وهراوچ دفعه سينده ده كؤورلميشم واؤز اليمده اولمادان گؤز ياشلاريمي آخيتميشام. بو حيثدن چوخ اوزگونم واؤزومدن اوتانيرام.. دئديم: جانيم قارداشيم، بورادا اوتانماغا يئر يوخدور. بوگؤز ياشلاري بؤيوك بيرهنرمندين، سيرك دلقكي نين انسانا، يازيق وچاره سيز انسانلارا قايغي سيندان جوشور وسنين، منيم ميرزه باغيرحاجي زاده كيميلرين گؤزلريندن آخير.من ده اونو چئويرنده هرسطيرده كدرلنميشه م وگؤزومون ياشلاري ايستمه دن اليمين آلتينداكي ورقه سوزوب. سنله من هئچ، اونو ميرزه باغير حاجي زاده يه اوخوياندا اودا كدرلندي، اودا گؤز ياشلاريني اؤرتمك اوچون  اوزونوبيرطرفه چئويردي كي گؤزياشلاري بللنمه سين.بوياش،‌اوزگونلوكده ن چوخ،بؤيوك بير هنرمندين يازيق انسانلارا بسله ديگي حؤرمتدن وانسان عزتينه ايناميندان سو ايچير. آمما، نيسگيللي قارداشيم! سن بوتون بو تلاشلارينلا صحنه يه چيخانمادين. نه دن؟ باجاريقسيز ايدين؟ يوخ! چوخلاريندان داها يوكسك درجه ده قدرتلي- ايدين. سن اؤز دوغما آنا ديلينده دانيشماغا حاقلي اولماديغين اوچون فارسجا قونوشمالييدين،سنين لهجه ايله دانيشديغين واوتانجاخلييغين سني ديسكينديردي وسن هرزامان دوغما آناديليميزده يازيب ياراتماق ايسته ينده اوزون بيراؤيرنمه دؤوره سي گئچيرمگه اؤزونو ناچار گؤردون ومنيم اصراريم قارشي سيندا  دئدين:داداش، بو هاردان اولار؟ دده مه باشدان دئييم داداش، سن اؤزونه باخما، آمما فارسي يازميشام. ايندي بودفعه گرك فارسي دوشونم توركو يازام. بو چوخ گئج باش توتا بيله جك، گئج باشا گله جك ياعؤمور، ياقسمت!..آرزو ائديرم، اي كاش قالايدين وگؤزونله گؤرئيدين بيزدن سونراكي نسيل نئجه دوغما ديلين سئوير، دوغما فرهنگينه، پارلاق تئاترينا، گووه نير اونو قيمتلنديرير وسنين عؤمور نيسگيليني حياتا گئچيرمگه اينام گؤسترير.سنين بوتون خلقيميزين دردلريني ونيسگيللريني دويان انسانلارين ابدي خاطره سينه عشق اولسون.