تبريز سنجاغي

قورخورام چاتمياسان كعبه يه آي بئي عربيم
توتدوغون بويولون آخير باشي افغانه گئدر!
يوخودا جنگ ايلمه ، دورآياغا! گوركي نئجه
باسدي توركمانچاي . سئل، ايندي گولوستانه گئدر!
بريا هم باقراو باشدا آناسدا س ميكويان
شكي ، شيرواني وئريب ، داشناقا صبحانه گئدر.
هي راپورت آچما بو سيرري  او((داداش )) تحفه سي دير. . .
قويماكي ، سس سميري خالق مسلمانه گئدر
بوكرم اهلي ! قاليب بيريانا آمما كي ،سنين
آغزي حرفه
سؤ يوشون  ، تكجه نريمانه گئدر!
اوقدر سوسدون عمي دور قيامت گلدي ،
قوشاباش قار قا  ديريلدي گئنه جولانه گئدر .
بيزده قووت هاني كي ، مانع اولا بو يوروشه ؟
چئچنه قان آغلاديب ، ايندي داغيستانه گئدر .
سيبري نين آغ آيي سي قيلچالارين چيرمالاييب .
بحر عممانه حامام ائتمه يه  شاهانه گئدر .
يول تانيشدير اونا بير ايكي يوز اولدن ،
خزرين ساغ ، سولو وار بيرباشا ايرانا گئدر.
آرازين اوتاينا (( شاه )) سئچيلير. باخ سنه نه ؟
هله مولكون كي دييل ! قوي اوزو سحمانه گئدر
شوكتي ، يارسولو، ائلچي بئي ، ايلياسي . . .
سالما حيدر جاني نا ! ائل سنه طغيانه گئدر!
ايش گوجون يوخدو مگر، فتنه ساليرسان اورادا ؟
بوسوخاسوخدا سنه ارمني خندانه گئدر!
قوش دگيل هر كيمي گورجك اونا، كيش كيش ديه سن!
گور نئجه آيري ساليب سان ؟ هره بيريانه گئدر.
شيخمي . پيشه وري ، شاهيني بسدير قينادين ،
ستاري خار  اله دين ! چونكي او تهرانه گئدر ؟
اوچ يئره بولمه بوخالقي ، رنگ به رنگ آددان حذر ائت !
بس دئييلي يوردو داغيلدي ؟ اوزو تالانه گئدر
آذري :شاه سئور اولسا، بيري(( موللا ))، بيري ((سول ))
تك قالارسان آي يازيق ، هامي سي كرمانه گئدر!
انجمن لر بيرليگي چوخدان كونوللرده گئدير،
قورماغين بيله سن ، سويون بير باش دگيرمانه گئدر.
يوخسا بو واقتاقدر هرنه اكيب سن ، بييچه سن !
بيله حالتده ايشين بوش بوتون هديانه گئدر.
حيف ايشين نوتفه سي لاخ- لاخ . ئوزولو باش دير آغا!
ايندي ده ن من گورورم (( توسوسو قليانه )) گئدر
گل اشيد بو قوجا سنجاغين اويودلو سوزونو.
جنوبي قاتما شيمالا . ئوزو فرمانه گئدر

آنا
ايشيق سؤنمز

دا نيشا ندا ديليمده دير
يازيشاندا  يازيمدا دير
اوركده گؤز اؤنونده دير
اؤلكه ميزده ، غريب آنا

توره مه لري فارسلاشير
كيمليگيندن اوزاقلاشير
آنام بو گؤركمه چاشير
ياديرقانير ، نئچون آنا !

قارداشيمي آل ائديرلر
اؤزلرينه قول ائديرلر
اوشاقلاري ياد گئديرلر
بو گؤركمه آغلار آنا !

ديللرده گزرك آدي
ديلي باغلي دوستاقدادير
قار باشينا ياغماقدادير
قارا گونه ، دؤزن آنا !

آنا ديلي ياشاميمدير
قاني داماردا، قانيمدير
بال دئمه يين ، ات قانيمدير
وارليغي دانيلان آنا !

م شبسترلييه
اسماعيل اولكر
اورمو

يول تؤرمه سيندن
يورولماز
بير اژدرها
...
اومودلا
اينامدان تؤكولموش
بير دايانماز هئيكل
...
نسه باغلي سرحد اوزونلوغو،
آياق قابي لارنين باغي !
نسه قاپالي قاپي
قولا قانادا  چئوريلن بير سحيرجيل
يئل !

سيبئريادان استوايا
هر كؤرپو هركند آياقلارينين سسي ايله تانيش:
چؤل چؤل
مئشه مئشه
چؤپ چؤپ
شله شله
اؤدلار يوردونا ايش ديرناغيلا ياناجاق ييغماق اوچون
...
زنگين بير آنا  دؤشو كيمي
هله هله  دادين داماغيميزدادير
ايليك كيمي
سؤموك كيمي
گوج كيمي
هر سؤزون
بئينميزده
قولوموزدا

آياغيميزدادير

يويون !
يويون ،
يات
دينجل
ميشيل
ميشيل
يورغون معجزوموزله قولبويون
ياشلي گؤزلريميزله
اله دوشمز بير توخوم كيمي
بوقانلي تورپاغا اكيريك سني
بيزده توتانماساق
باري توتسون بختيار گله جك
بيتگيلريميزدن
قورتولوش دني !

1377-10-03

آنا ديلي نين دستاني
ميرهدايت حصاري

گلين بير دستان دئييم ، آنا ديلي حاقين دا
نه يئنيش لر، يوخوش لار، گؤروبدور اؤز واقتيندا
نئجه عصيرلر بويو ، اؤز يولونو تاپمادي
اسيرليگه سيخيشدي ، آزادليقا چاتمادي
آمما قوي اول دئييم بيرجه مشهور تاپماجا
چوق ساده كي اوشاق دا باشارار اونو آچا
نه دير؟ هامميني به زه ر،آمما اؤزو لوت گه زه ر
بلي ، اؤزو لوت گه زه ر،آمما هاميني به زه ر
فيكير لشيب جاواب وئر،تئز دئنه كي او نه دي
تاپانمادين قوي اؤزوم،دئييم كي او ((ايگنه )) دي
آمما اونا بير آيري جاواب دا من تاپميشام
چوخلو فيكير ده ن سورا  بو جاوابا چاتميشام
او بيزيم خالقيميزدي اؤزگه لري بزييه ر
اؤز ديلي اولا- اولا،اؤزگه ديلده سؤز دييه ر
عرب، فارسين ادبين پارلانديريب وار ائيله ر
اؤز ادبين دن قاليب ، اؤز ديليني خوار ائيله ر
سايسام اونون خدمتين فارس ديلينه ، علمينه
اوندا قبول ائدره سن ، احسن دييه رسن منه
هاردا بؤيوك دانشمند،شاعر فارسي دا واردي
آختارسان گؤره جكسن‌،  او بيزدن يادگاردي
هر رشته ده،هر ايش ده چوق ماراقلي كتاب لار
توركون بيليجي لري ، فارس ديلينده يازيبلار
قوي بير ساييم نئچه سين ، نمونه چون اونلاردان
سن اؤزونده آختارسان،مين لرجه سين تاپارسان
موسيقي ده ، طب ده ، لغت ده‌، نقاشليق دا
تاريخ ده، جوغرافي دا، شعرده، خطاطليق دا
بيز فارس لارا وئرميشيك چوخلو حاذيق حكيم لر
محقق لر، عالم لر، شاعرلر، منجم لر
فارسين ادبياتين تورك شاعري يوكسه لتدي
ادب آسمانيني ، ستاره يه غرق ائتدي
تبريز ايله شيرواندان چيخان شاعري سايسان
فارسين شاعرلرينين آرتيق اولار ساييندان
ارده بيل دن،طسوج دان،شبستردن،خالخالدان
هله قيراقدا قالسين ، شومالي آذربايجان
محمد فضولي ، صائب ايله خاقاني
( رحمت ) كوزه كناني ، مجير بيلقاني
قطران،همام تبريزدن، مراغه لي اوحدي
شبسترلي شيخ محمود، نظامي گنجوي
سيد احمد هاتف، شاه فضل اله نعيمي
انسانا قيمت وئره ن ، حق شاعري نسيمي
فلكي شيرواني، لعلي ، قاسم انوار
اشرف مراغه اي ، قوام الدين ذوالفقار
شاه اسماعيل ( خطائي ) اونون اوغلو سام ميزا
بير آيري شاعر اوغلو شاهزاده بهرام ميرزا
صفويه شاهلاري ، هامميسي شاعر ايدي
قاجارلاردان دا بعضي بو ايشده ماهر ايدي
بابا كوهي معروف، عتيقي تبريزي
(( الهي )) بيرده (( جامي )) شكيبي تبريزي
حسام الدين چلبي ، حاجي محمد عصار
ابوالعلا، حقيقي ، هم صادقي افشار
((سالم))، ((تاثير)) هم ((شريف)) تبريز شاعرلريندن
او شاعرلر  بئجه ره ن ، علم وهنر شهريندن
موللا مراد طسوج لو، حسين كوزه كناني
خوي دان حسام و مفتون ، هم سالك ايله فاني
((جرعه))، ((ميرعلي خاوري))، ((شرف الدين رامي))
هم ((لطفعلي دانش))،((سهوي))، ((باقي))و((نامي))
شيخ الرئيس (حيرت) هم شاه عباس ثاني
خانيم لاردان پري خان‌، پروين اعتصامي
((مهستي))، ((ماهي خانيم))، (( گوهرآذربايجاني))
اوگول اوزلو شيرين سؤزگؤزل گؤيچك لر هاني؟
آغابگيم جوانشير ، خديجه سلطان خانيم
خاتين لاردان بيري ده تبريزلي حئيران خانيم
تبريزين گول لرينده ن بيرده خانيم ((جمالي))
شهره ي آفاق اولان جمالي هم كمالي
ايرج ميرزا ، طالبوف ، فتحعلي آخوندزاده
اجازه وئر باشيني ، آغريتماييم زياده
بونلار ققديم كي لردي،جديدلرين مين لري
فارسين ادب گولشه نين ائديب ديلر گؤرمه لي
قديم لرين ده حتتا، آدلاريني آپارسام
كتاب لار قارالانار،‌فقط آدلاري يازسام
جغتايي تورك لرين بوردا هله سايميرام
ابن سينا ، فاريابي ، كيم دي  سايا آلميرام
ابوريحان بيروني ، عليشير نوايي
شرقي تورك لري سايسام اليمده ن چيخارسايي
بورا دا فقط آذري تورك لرينين سؤزودور
همان آذري لر كي ، تورك خالقنين گؤزودور
تك جه شاعرليك دگيل بيز باشيديق هرايش ده
هر هنرده علم ده، آزادليقدا، دؤيوشده
نققاشليق ، مينياتور دا، سئحركارليق ائيله ديك
خطي بيزگؤزه لله تديك،گه لين كيمي بزه ديك
اوندا ابداع،اختراع تبريزده ن باش قووزادي
ان ياخشي خط يازانلار بيزيم يوردوموزدادي
ميرعلي تبريزي ، (( علابك )) تبريزي
عبداله صيرفي ، هم (( ميرك )) تبريزي
(( اظهر‌)) محمد ( منشي ) نظامي تبريزي
(( ابراهيم ))، (( علي رضا )) ، ميرزا رضي تبريزي
اونلار اوولاد به اولاد خطاط،خوشنويس اولدو
تاريخين ديوارلاري خوش خط لري ايله دولدو
عبدالقادر مراغي هم اوغلو عبدالرحمان
نوه سي عبدالعزيز ، موسيقي شناس لاردان
اول لغت كتابين،‌تبريزلي قطران يازدي
لاپ كاملين اونلارا ( حسين برهان ) يازدي
اوندان صورا گه له نلر،اونو رونويس ائتدي
اوبير شاهكار ايدي كي،فارس ديلليني ديريلتدي
فارس دادا وار البته شيرن ديللي شاعرلر
آنجاق اونلار اؤزلزي بو امري تاييد ائيله ر
(( تركان پارسي گوي بخشندگان جانند ))
فارسي قوشان تورك لره يوخ دوغرودان همانند
آذربايجانين ديلي‌،‌شعرديلي ، ادب ديلي
هر يئري بير گلستان ، هر گولده يوز بولبولي
شعر و ادب يقين بيل بيزيم نسليميزده دي
شيرين صحبت ، شيرين سؤز ، بيزيم اصليميزده دي
آذري بولبول لري فارسي چهچه ووردولار
آنا ديلي خور اولدو، فارسا بنا قوردولار
فارسين ادبياتي بيزده ن شيرينليك تاپدي
بيزدن آدي يوكسه لدي، بيزده ن بؤيوك لوك تاپدي
فارسين گلستانين دا بيزيم گول لر پاريلدار
او گول لره باخانلار،لذذه ت چكيب شاد اولار
تورك لرين هنري ايدي كي فارسي شكر اولدو
فرهنگي غني لشدي،‌ ديلي پر ثمر اولدو
بيز فارس ديلين اوجالتديق اوزاقلارا  آپارديق
شرقه ، غربه‌،‌شومالا‌،‌آوروپايا آپارديق
دونيادا مشهور ائتديك اعتبارين چوخالتديق
لاكين اؤز ديليميزي ، ياديميزدان چيخارتديق
نتيجه سي نه اولدو ؟ دالي قالديق اؤزوموز
هله دييه بيلميريك آنا ديل جه سؤزوموز
تاپدالييب ازديلر ايل لر بويو بيزلري
ديليميزي باغلادي فارسين شوونيست لري
شومال آذربايجاني آيريلماسايدي اگر
آذربايجان خالقيندان ، ايندي يوخ ايدي خبر
اونلار اولماسايديلار بيزده ن اثر يوخ ايدي
شانلي تاريخيميزده ن ، ديل دن اثر يوخ ايدي
ايندي ايسه خالقيميز تكليفيني آنلايير
آناديلي يول آچير، ايش لري سهمانلاير
هر انسانين حاققي دير آناديل جه دانيشماق
بو حاقي آلماق اوچون ، ايندي گره ك چاليشماق
آغلاماسان ممه يوخ، بودور رسمي دونيانين
حاققيني آلماق اوچون لازم اولسا وئر جانين
حاققي گره ك آلاسان ايسته مك كافي دگيل
ظولمكارا يالواريب ، اينله مك كافي دگيل
حاققي گره ك آلاسان آصلانلارين آغزيندان
ال ساليب چيخارداسان زور ايلن بوغازيندان
قوي ايندي دونيا بيلسين بيزيم ده وار ديليميز
قودره ت لي فرهنگيميز، تاريخيميز، ائليميز
آسمان ادب ده پارلاق اولدوزلار بيزيك
ياز فصلينده شيديرقي ياغان بولوت لار بيزيك
اوجا، گؤي لره قالخان، شاهين تيز پرواز
هنرده مرد ميدان ، ادب ده نكته پرداز
شاعرليك ساحه سينده سبقت دوتان بيز اولدوق
علم زمينه سينده ، بدعت قويان بيز اولدوق
آزادليق ايستيه نده، بيز هر يئرده باشيديق
جنگ لرده بيز ايديك، ائل لره يولداشيديق
ايراني بيز ساخلاديق يابانچي دوشمانلاردان
باشي اوجا چيخميشيق هميشه ميدان لاردتان
ايندي گره ك چاليشاق،داشلي گديك لرآشاق
گونشي اله سالاق،افق لره نور ساچاق
گئچه ني جبران ائده ك،گئجه گوندوز چاليشاق
عالمي حئيران ائده ك ، اود الووا آليشاق
پاس باسميش فيكيرلره ايش ايله صيقال وئره ك
دؤنوب قالميش ديل لره،شكر وئره ك بال وئره ك
هر نه گه لسه ( هدايت ) الين ده ن اسيرگه مه
كؤمه ك ائت قلمين دن، ديلينده ن اسير گه مه .
1358 گؤنش ايلي

قورخولو تهران
م . اعتماد

گيت اي وطنيمده ايلين باغريمي آل قان !
گيت اي ايليين توپراقيمي ظلميله ويران
سنسن مني آواره قويان اؤز  وطنيمده
بلبل لريني لال ايلين شن چمنينده
سنسن ويرن اصلانلارا زندان لاري مسكن ،
حق سؤز يازاني حق دييه ني محو ايلسن، سن
حق صاحبنين سنسن ايدن حقيني پامال ،
حق سؤز دانيشان وقتده حق سؤزلرين ابطال
سنسن اولان هر دورده ظالملره ياور !
مظلوملارا زنداندا ووران قلبينه نيشتر
بو خلقيميزي سنسن ايدن زار- پريشان ،                   
سنسن ويرن حقسيزليغا هر عصرده امكان
سن شيخ محمدلري سالدين يوزي اوسته ،                  
سن قانه بويانديردين اوني حق سؤزو اوسته
سالار ايله - سرداريمين آرامني آلدين ،
حب الوطن اوستنده قارا توپراقا سالدون
بو خلقميزين جهلنه سن باعث اولوبسان!
باغلاردا آچان گللريني پاك يولوبسان
سن ايستميرسن بولار اؤز حقينه چاتسين
يا وارليغي اولسون باشيني باشلارا قاتسين
هر ظلم- ستم گلدي الوندن ايله دين سن
گيزلينده اولان فكري چيخارتسين ئوزه بيردن