اودلار يوردو آذربايجانا اؤتري  بير باخيش:

ميرموسي  هاشمي

آذربايجان 1813 ايللرينده گلستان و 1828 ايلينده تركمانچاي آنلاشمالارينين نتيجه سينده ان بويوك خيانتلر ه معروض قالسادا،  آذربايجانين اورگيندن آخان وخئير-بركت دوغوران واولكه ني چيچكلنديرن آراز چايي، خاينجه سينه بيرخالقي ايكي يئره بولوب تاريخي جغرافياسي نين حدود چئوره سيني پوزسادا، آنجاق عموميتله خالقميزين وطن سئور اولادلاري بو آجي وچركين اولايلاري درين  نفرتله خاطيرلاييرلار. بو مركب ملي فاجعه اوستوندن 2 قرنه ياخين گئچسه ده اينديه قدر هله  اونودولماييب و اونودولماياجاق. او قانلي ساواشلاردا  قجر سلسله سيندن  اولان عباس ميزا و اونون سردارلاري و 25 مين  قره پاپاق ائللرينين قوچاق ساواشچي لارينين روس  سالداتلاري نين  قارشيسيندا كي امانسيز دويوشلري وقهرمانليق لاري هله ده تاريخيميزين پارلاق صحيفه لرينده گؤزه چارپير. بو قانلي ساواش لاردا اؤلنلرين، ديدرگين دوشنلرين ،باجي- قارداشدان، آتا، آنالارين اولادلاردان، جاوان گلين لرين حيات يولداشلاريندان محض ا تي ديرناقدان آييرماق كيمي  گونو گوندن اوركلريميزده روس امپرياليزمي و فارس فئوداليزم و شوونيزمينه نفرت ياراديب و ياراتماقدادير، ائله بو سبب لره گؤره آذربايجان خالقنين يالنيز كئچن يوز ايل ايچرسينده نئچه آزادليق حركاتينا اشاره ائتمگي اويغون گورورم :

تصادفي دگيل ديركي بيرينجي  دونيا ساواشي و چارليغين داغيلماسي سونوجو، قوزئي آذربايجاندا ملي آزادليق حركاتي ديرچلدي  وخالقين عصياني نتيجه سينده  ملي اسارته سون قويولدو. دوغودا بيرينجي آذربايجان جمهوريتي رحمتليك محمدامين رسولزاده نين ليدرليگي آلتيندا ياراندي. تاسف اولسون كي 1920- نجي ايل آوريل و ماي آيلاريندا سوسياليزم داشيني سينه لرينه ووران لار هومانيزم دن دانيشانلار ولادئمير لنين نين فرماني ايله روسون 11- نجي اوردوسو طرفيندن جوان جمهوريت اشغال و يئرايله يكسان اولدو ، چوخلو انسانلار اؤلدورولدو ، قارانليق زندانلارا آليندي وچوخ لاري سورگون دوشدورلر. اوجمله دن محمدامين رسولزاده بو دفعه ده سويت لر و داهي دوغروسو كومونيست روسلارين اسارتينه دوشدولر ژوزف استالين و اونون امكداشلارينين جنايتلريني چئشيتلي  قايناق لاردان آراييب تاپماق چوخدا چتين دگيلدير. 

گونئي (جنوبي ) آذربايجاندا افراطي ناسيوناليزم گوني گوندن  ديرچلمكده ايدي، نيه كي قوزئي آذربايجانداكي وطنداشلارينين روسلار الينده اسارتلري بير طرفدن و تهران حكومتينده كي استبداد چي لارين ظلم و عدالتسيزليگي باشقا طرفدن خالقي عصيانا دوغرو يؤنتمكده ايدي، ائله جه ده  1920 نجي ايلين آوريل آينين 15 ده  دمكرات پارتياسي  شيخ محمدخياباني نين ليدرليگي آلتيندا يارا نيب و ملت اونونلا سس سسه وئريب آزادستان حكومتيني  ياراتدي و آز زاماندا گونئي  آذربايجان تورپاقلاري،قوزئي آذربايجان مبارز لرينين سيغيناجاق مسكنينه  چئويريلدي. شيخ محمد خياباني روسلارا وئرديگي خبردارليق دا قيد ائتميشديركي بوتايا يوروش گتيريلسه بوتورپاقلار تجاوزكارلارين مزاري اولاجاقدير !

يئنه تاسف اولسون كي ايچريده كي ساتقين لارين خيانتلري نتيجه سينده چئشيتلي ترفند لرله آزاديستان حكومتي قاندا بوغولدو و هدايت مخبرالسلطنه نين فرماني ايله بؤيوك آزاديخواه مجاهد شيخ محمدخياباني 1914-1920 تاريخينده اولدورولدو واونون پاك پيكري تبريزين كوچه وخيابانلاريندا يئرلرده سوروتلندي!

1925- نجي ايللرينده پهلوي لر سلاله سي چاغلاريندا گونئي آذربايجاندا تضييق لر‌، (فشارلار) باسقي لار، قات قات چوخالدي، سياسي سونگو آلتيندا ملي دوشونجه لر وحركتلر سوسدورولدو وسويت لربيرليگي آلتيندا روس كمونيست لري  اليله علاقه لر قوزئي آذربايجان ايله داياندريلدي آمما بو چيركين وغيرانساني سياست لر مثبت ناسيوناليزم دويغوسوني گئديكجه يوكسلديردي و تاريخين گوسترديگي كيمي، يئنه ثابت اولدو كي، هئچ بير اولوسو(ملتي) اوزون مدت دولت لرين سياسي باسقي سي و اسارت بويوندوروغو آلتيندا ساخلاييب و ملي وارليغين دانماق اولماز!!  عدالت سيزليگ آتشينده يانان آذربايجان اولوسو ايكينجي دونيا ساواش نين سونلاريندا  ميرجعفر پيشه وري و اونون امكداشلاري ايله بيرليكده ياراتديقلاري دمكرات فرقه سي نين رهبرليگي چرچيوه سينده  1945- نجي ايلين 21 آذر گوني آذربايجانين ملي حكومتيني  ياراتديلار وآزاديستان حكومتنين بايراغي يئنيدن قالديريلدي و ملتيميز بير داها اورك آرزيلارينا نايل اولدو،  تاسف ايله ملي حكومتين عمري آز اولدو و 1946- نجي ايلين 21 آذرگوني بوگنج حكومت پهلوي حاكميتي  و ايچري ساتقينلارين  سيخ امكداشليغي و خارجي امپرياليست دولتلرين حمايتي ايله قاندا  بوغولدو وآزادليق مشعلي بير داها سوندو ، مينلرجه ميلتميزين اؤز آندلارينا صادق قالان بالالاري  وحشي جسينه اؤلدورولدو،  اشكنجه لرآلتيندا، قارانليق دوستاقلارا و سورگونه  معروض قالانلارين سايي حسابا گلمز اولدو بو يوروش ده معصوم اوشاقلارين درس كتابلاري قالاق- قالاق يانديريلدي و بو دهشتلي ظلمه هئچ بير آزاديخواهليق ادعاسيندا اولان دولت واورگانلار اعتراض ائتمدي، يالنيز قوزئي آذربايجانداكي قهرمان شاعيريميز صمد وورغون 1952- نجي ايلينده پاريسده اشتراك ائتديگي صلح كنفرانسيندا  گوئني آذربايجاندا گئدن ظلمه و يانديريلان كتابلارا گؤره اوجا سسله اعتراضلارين دونيا خلقلرينه بيلديرميشدير و ساغ اولسون يئنه اونلار كي گؤز ياشيله يازديلار: آنالارين صاف سودوندن من صاف مرحم ائده جگم، من تبريزه يارالاري ساغاتماغا گئده جگم ( مرواريد دلبازي )1

( 1‌ ) قوزئي آذربايجانين معروف قادين شاعرلريندن دير كي 90 ياشيندا اؤتن گونلرده دونياسين دئييشدي .

ملي حكومتدن سونرا پهلوي سلاله سي و پان- ايرانيست تئوريسين لري ان دهشتلي آسميله سياستيني آذربايجان تركلري قارشيسيندا  دوام ائتديلر و بش دانا معروف فراماسونر لوژلاري ،  يعني :

( لژ كوروش 1960) ( لژ اصفهان 1968 ) ( لژ خيام 1962 ) ( لژ آريا 1960 ) و (لژ صفا 1963 ) ميلادي ايللرينده ياراتديلار كي انقلاب اسلامي ايراندا غلبه چالاندان سونرا بو لژ لارين پاياسي تيتره دي آمما اونلارين اصلي عضولري هله- ده موجود عامل لرينين نفوذلاري ايله اسلام جمهرريتنين فرهنگي اورگانلاريندا اؤز حياتلارينا دوام ائتمكده ديرلر !

1356- نجي ايلين 29 بهمن گوني بوتون آذربايجان آناسي ساييلان تبريز شهريندكي ملي يوروشلر پهلوي حاكميتينين تملين قالديردي و 1358- نجي ايل تبريز ، اورميه و باشقا شهرلر و كندلرده گئدن خلق مسلمان حركاتينين ميليوني يوروشلرينده ملي ايستك لر چيچكلندي، آنجاق بو حركاتدا قاندا بوغولدو، آيت الله شريعتمداري عمرونون سونونا دك دهشتلي دوروم دا ياشادي!!

بو حقيقتي جسارت ايله اعتراف ائتمك اولاركي دشمنلريميز  چئشتلي ترفندلر له اوز ايستديكلري اورك آرزيلارينا چاتميشلار  نيه كي بعضي آذربايجانليلاري  بو اوزون مدت ده اوز دوغما ديليندن، زنگين كولتوروندن، پارلاق تاريخيندن اوزاقلاشديرميشلار ، تصادفي دگيل كي، سايسيز وطن داشلاريميز فارسلاشيب لار ،البته اونلاري  چوخ دا سوچلو گؤرمك دوزگون اولا بيلمز بوناگوره كي ايللر بويو پان ايرانيزم قووه لرينين شدتلي تبليغاتينا معروض قالميشلار و اوز ايچريلرينده اينامسيزليق، هويت سيزليك و قورخو ايله اوز به اوز اولموشلار ،حتي چوخلاري بوگون خارجده فعاليت گوسترن آذربايجانلي وطن داشلارينين ،فرهنگي اجتماعي فعاليت لرينه قوشولماقدان دا امتناع ائديرلر و بيله بير آسيميله سياستيني باشقا ملتين ساده انسانلارينا اعمال ائدن پان ايرانيزم قووه لرينين سوچو (گناهي ) قات- قات آرتيق دير .

آنجاق تاريخي واراق لاديقجا  آيدين اولور كي، بير ملتين اوز دوغماد تشكيلاتي  اولماليدير كي اوملته جان يانديرماغي اوزونه بيرينجي وظيفه سانا. بوساحه ده ايكينجي دونيا ساواشيندان بري بوتون استقلالين الده ائدن ملت لرين ملي وارليق لاري انكشاف ائديب وبونا اورنك اولاراق نئچه اؤلكه ني  قيدائديرم: هندوستان -پاكستان- اندونزي- ويتنام- سودان- غنا- الجزاير- و . . .

1990 - نجي ايللرينده آزادليق يئلي بوتون دوغو (شرق) اوروپا ،آسيا،گونئي آفريقا دا اسمك ده- ايدي ،آلمان خالقي نين آراسيندا كي ديوارين تيكه لري دونيا اولكه لري موزه لرينده نمايشه قويولدو. امپرياليستلرديزه چوكمك مجبوريتينده ايدلر، بو آرادا آذربايجان خالقينين تاننميش دشمنلري ساييلان شونيزم روس وپانرانيزم قووه لري آرتيق قورخودايديرلار ائله جه ده 1989 نجي ايلين اوكتبر آيي بو قووه لرين تشبث لري ايله مسكو وتهران آراسيندا بويوك ايش بيرليگي آنلاشماسي نين امضالانماسي بوتون خالقيميزا خصوصي ايله آيدينلاريميزا آيدين اولموشدور، آمما اسارته سون قويماق اوغرونداهئچ بير آنلاشما ياداكي سلاح و مرمي  يارارلي دگيلدي، ائله جه ده 1990- نجي ايلين 20 ژانوار آييندا قوزئي آذربايجاندا خالق عصيانيندا يوزلر انسان روس اوردوسونون دهشتلي وغيرانساني يوروشلرينده شهيد اولدولار و چوخلاري يارالاندي .قوزئي ده كي وطن داشلار نخجوان حدود لاريندان باشلاياراق 90 كيلومتر آراز ساحللرينده چوخلو حدود مانع لرين قالدريب وگمرك تاسيساتين اله كئچيرديرلر، آز مدت ده مينلر وطن داش اوزون ايللردن سونرا تيكانلي مفتوللاري قيريب يادلار الي ايله يارانان حدود دان كئچميش و بير بيرلريني  چيچك و شيرني ايله قارشي لاييرلار  اوچاغلار (زمانلار) تهران اسلام حكومتنين سلاحلي قووه لري قوزئي حدودلاريندا سفربرليك وظيفه سي داشييرديلار .

ژانوار آينين اوچونجو گوني گوستريلن نمايشلرده بير نفر شهيد اولور، آذربايجان ژورناليستي آلمانيه نين D. P. A.  مخبرينه دئميشدير كي بو اويانيش و بحراني دوروم لار ايكي آذربايجانين وحدت آماجينا دوغرو يونلمكده دير ( گئتمكده دير ) نهايت  1991 نجي ايلده  قوزئي آذربايجانين مستقيلليك قازانماسي اوزون آيريليق دان سونرا  اوز عزيزلرينه حسرت قالان ملتين بير بيره قووشماسي و اورتاق شنليك و كدرلريني بير - بيريله پايلاشماسي بوتون دونيا تلويزيالارينين تماشاچيلاريني و قزته لرين اوخوجولارريني بويوك تاثير آلتينا آلميش و روس شونيزمي نين يوخوسون گوزلريندن قاچيرميشدي. بو ملي حركاتين  بويوك اهميتي روس امپرياليزمينه ، ايكينجي دونيا ساواشيندان سونرا مثلي گورونمه ميش حادثه ايدي نيه كي آذربايجان  ناسيوناليزمي نين آتشي يئر آلتيندان ائله پوسگوردو كي، بوتون روس شوونيزميني قورساميش و بو آتش بوگون گونئي آذربايجاندا يئر آلتيندا يانير و پان ايرانيزمين طالعي ده تيز ياگئج روس شوونيزميندن آيري اولا بيلمه يه جكدير‌!!

نئجه ده كي 1992- نجي ايلين ژانوار و فورال آيلاريندا قوزئي آذربايجانين باكي،گنجه ، شيروان و . . . شهرلرينده وحدت شعارلاري بير داها ملي دويغونو گوئني آذربايجاندا قالديردي، 1992 - اينجي ايلين ژوئن آيي يوزلر اونيورسته ده كي آذربايجانلي طلبه لر بو شعارايله (( آذربايجان بير اولسون ، مركزي تبريز اولسون )) تبريزين خياوانلارينا يوروش  گتيرديرلر و قوزئي ده كي وطنداشلارينين  قاراباغ دا ارمني  داشناقلاري طرفيندن اولمه لريني  شدتله قيناديرلار !

آذربايجان ملتينين طالعي دونيا ملت لريندن باشقا دگيل بوسيرادا آلمانيا كره ويتنام يمن و . . . اورنگ گتيرمك اولار  . ايكي آذربايجان تئز يا گئج معنوي مبارزه لري نتيجه سينده سون آماجلارينا  يعني بيرلشيب و بوتون دونيا دا داغيلميش وطنداشلاري آنايوردلارينا توپلاماقدا بويوك نائليت لر الده ائتمكلرينه آرتيق اينانيريق .

 بومقدس مبارزه بوتون دونياداكي دموكراتيك ، انسان حقوق لاري يوللاري ايله ئيرلي گئده جك وخالقيميز هئچ بيرخارجي دولتين  قئيوميتي آلتينا گئتميه جكدير و بو حقيقته تاريخ ياخشي شاهد اولموش و اولاجاقدير. لاكين خلقلر بو تاريخي و ملي ايسته يي  اودلو سلاح و انسانلارين قاني باهاسينا يوخ، بلكه ده اؤز ملي حقانيتينه ، اؤز گوجلوفرهنگينه ايناناراق وگووه نه رك الده ائده- جك. حق آلماليدير بير حقيقت اولسا ،بو حقيقتي آلماقدا اؤز ادراكي ،اؤز تاريخي ملي اويانيشيندان الهام آلماليدير .خلق بو ايشده هئچ كيمه وكالت وئرمير بو اونون اؤز مساله سي دير و اونو ملي   اويانيشينا،تاريخه وعدالته اويغون شكيلده حل ائتمه- ليدير!

 اراضي پايلاماقلار:

بوگونه قدر قوزئي آذربايجانين تاريخي جغرافياسي- نين تورپاق لارين روس امپرياليزمي،قونشو اولكه- لره پايلاييب اوجمله دن روسيه، گورجستان، ارمنستان، تركيه و حدودا 120000كيلو متر مربع اراضي دن يالنيز 86600 كيلومتر مربع يه دوشموشدور وارمني لرين 1993 نجي ايلده  بير بيري نين آردي سيرا اشغال ائتديگي قره باغ،كلبه- جر ، لاچين ، زنگلان ، قبادلو ، جبرئيل ، فضولي و اقدم ، بوبولگه لري ايسه حدودا 20 فايز يئني دن آزالميشدير !

گونئي آذربايجانا گلديكده  1937 م ايلينده رضاخان  دونومي  آذربايجان  دوغو و باتي اولاراق ايكي يئره بولونميشدير ، باتي آذربايجانين مركزي اورميه شهري ، دوغو آذربايجانين مركزي تبريز شهري و بو آرادا آذربايجان  تورپاقلاري ايچرسينده اولان ، همدان ،قزوين ،زنجان و اردبيل  بولگه لري آيري لاراق حدودلانميشدير . سونرا  محمد رضا پهلوي و اسلام جمهوريتي دونومو آيري آيري  رايونلارا(استانلارا ) بولونموش دير و حدودا 300000 كيلومتر مربع اراضي يه مالك اولان گونئي آذربايجانين اراضي سي 250000 كيلومتر- مربع يه يئنميشدير .

بورا ده ك  تاريخي ايستكلر،حادثه لر وحقيقت لر قيد اولوندو آنجاق قوزئي آذربايجان   بير باغيمسيز ( مستقيل ) رسپوبليكا كيمي بيرسياسي جغرافيادا  يئرلشيب دير هله ده معين قونشو اولكه لرين گيزلي شكلينده ،پرده آرخاسيندا فتنه لري دوام ائدير . دمك اولار كي بو آغيرشرايطي جاوان جمهوريت حل ائتمگه چاليشماقلا معيين اوغورلار قازانيب و قازانماقدادير . بو جغرافيادا ياشايان وطن داشلاريميز آكادميك سويه سينده  آناديلينده تحصيل ائديرلر آمما گونئي آذربايجاندا يعني ايرانين بوگونكي سياسي جغرافياسيندا دوروم بام باشقادير يعني  بير آذربايجان تركي اؤز آناديلينده ابتدائي مدرسه دن ده محروم دور باشقا بيرنجي انسان حاقلاري و . . . اؤز  يئرينده دورسون .

بير آذربايجان وطن داشي كيمي مينلركيلومتر آنايوردومدان اوزاقلاردان يعني ديدرگين لر اوجاغي سوئدن  يالنيز ائل اوبا وخالقينين قايغي سين چكيب بوآتشين آلودا يايان عزيزباجي وقارداشلاريملا درد- لشمك مجبوريتينده يم!

ملي مساله ميزه گوره گوروشلري آشاغيداكي كيمي اؤچ يئره بؤلمك اولار :

1- ملي حركاتا اينانميانلار ياداكي احتياط ايله ياناشانلار :

تاسف اولسون كي بوقشر اؤز ائليندن اوباسيندان اؤزلليكله ملي وارليغيندان اؤزاق دوشن وطن داشلاريميزديرلار و بو قووه لر رضاخان دووروندن باشلايان آسميله سياستينين قوربانليقلاري ساييريرلارو اؤ قدرفارسلاشيب لاركي،بيرچوخوحتي پان ايرا نيزم تفكوروني  چئشيتلي دوشونجه لرله داشيرماقداديرلار و ايراندا بير دمكرات مركزي حكومتين ،خالقلارا آزادليق  وئرمه سينه اينانيرلار و اله جه ده ايران اوپوذوسيونوندا  اسلام جمهوريتي قارشيسيندا چاليشماقلاري آيدين دير، بعضيلري ده يالنيز راحت چيليق وسرمايه توپلاماق فكيرينده -ديرلر، بو وطنداشلار ( جن بسم اله دان قورخان كيمي آذربايجان آديندان  قورخورلار ) حتي  اولكه نين ديشنده ده ملي - مدني فعاليت گسترن آذربايجانلي وطنداشلارينين موسيقي كنسرت لرينده يا فرهنگي ييغينجاقلاريندا  اشتراك ائتمكدن ده امتناع ائديرلر وبو ساحه ده چاليشانلارا  نه بيليم، پان توركيزم تجزيه طلب و . . . دامغالاري وورورلار  ائله بوردا رحمتليك ميرزاعلي اكبر صابرين بير بيت شعريني قيد ائتمگي يئرلي گورورم :

ملت نئجه تاراج اولور- اولسون، نه ايشيم وار؟!

دشمنلره محتاج اولور- اولسون ، نه ايشيم وار ؟!

2- آذربايجانين ملي مساله سينه دويغو (احساس) ايچرسينده راديكال شكيلده ياناشانلار :

بو وطنداشلار هر شيئي ايده آل گورمكله ايستيرلركي بئش ايلليك يولو بئش گؤنده گئدسينلر ، بيله بير پرنسيب سيزليك و سوورماميشدان آلچي دورماق و قورا اولمادان مويز لولاق داورانيش لاري چوخلاريني اينجي دير و چوخلاريني آذربايجان توپلوم لاريندان اؤزاقلاشديرير نيه كي اؤزلريندن باشقا هركيمسه يه بير (( چي )) كلمه سي قونداريرلار اورنك اوچون ( ايرانچي ، سولچو ، آذربايجانچي و! ديشده (خارجده) بيرميليوندان آرتيق آذربايجانلي- نين آكتيو اولماديقلاري نين  وبوچوخلوغون  مادي-معنوي گوجلري نين  قووه دن فعله كئچيريله بيلمه سينين  سبب لريندن بيري ده بودور. گوره سن آذربايجاني وآذربايجانلي ني سئومگه بير اولچو، معيار وارمي؟ آذربايجانين آزادليغي هانكي قيمته قورتولور، قورتولسون، بوتون خالق آرادان گئدسين، اولكه تالانسين، اشغال اولسون و بو آغالار اوچون اونملي دگيل! اوفاق حادثه لري شيشيرديليب، بوش تبليغات لار گوني گوندن چوخالير، بونئچه ايللرديركي  دئيه سن 24 ساعات دان سونرا گونئي  آذربايجاندا انقلاب  وجوده گله جكدير. بيله بير ياراماز حركات لار خالقيميزدا اينامسيزليق يارادير و دوزگون چاليشانلارين دا ايشلرينه لطمه وورور. البته كي دشمنلريميزين ايستكلري بيله بير تاكتيك لردير نيه كي خالقيميزين ملي حركاتي گوجلو تشكيلات ايچرسينده و دوزگون ايستقامتده گئتمه سين و ائلييه بيلسين لر تاريخ بويو تؤرتديكلري فتنه فسادلارايله  معيين  اتهاملارلا اوجمله دن پاني تورگيزم و . . . آدلارايله ملي حركاتيميزي تملده دارماداغين ائدسينلر!

 3- آذربايجانين ملي مساله سينه علمي ، فلسفي، منطقي گؤروش لرله ياناشانلار :

آذربايجان ملتي عصيرلربويو دور قان دنيزلريندن كئچيب وكئچميشي گله جگينين داشلي وچانقيلي و تهليكه لي يوللارينا ايشيقلي چيراغ بيلير ، ائله جه ده مشروطيت انقلابينين رهبرلري دميشكن( هئچ چاغ (زامان) انقلاب ايله اوينامايين ، اوچاغ انقلابا ال وورون كي گؤردوگوز ايشين امگين آلاسينيز ) و بويوك مجاهد شيخ محمد خياباني دا چاليشيردي ملت آيدين اولسون و اؤز آتشين چيخيشلاريندا بوسوزه تاكيد ائدميشدير كي  ملت آيدين اولورسا آلديقي آزادليقي ساخلار.آيدين دير كي آذربايجان عسگري كملگين، ملي وارليغين اؤيرنمه سه و منيمسه مه سه اونون قوروجوسو اولا بيلمز  وآزادليق دشمنلرينين اويونجاقي اولار!! بوتون اجتماعي، صنفي صنفلر آيدين لاشماسا آلينان آزادليغين حمايتچي سي اولا بيلميه جه ييك!! ا لبته چوخلو ساواشلاردا دا بيله اولموش،  آماجلار فتح اولونوب آمما زامان كئچديكده دوشمانين تعروضونه  معروض قالميش دير! بوگون چوخ سئوينمه ليدير كي  آيدينليق جبهه سينده ملي وظيفه داشيران وطنداشلاريميز اؤزلليكله گؤنئي آذربايجاندا ملتين دؤننين ، بوگونون، صاباحين چوخ ياخشي دوشونورلر و بوناگوره ملي، فرهنگي حركاتي آماجلارينين ان يوكسك زيروه سينده يئر وئرميشلر. تصادفي دگيل كي بويولدا چاليشانلار ملي وارليق- لارينا، اينام بسله ييب لر، بوش شعارلار وئرمه دن آناديلي كلاسلاري ، تاريخ ، موسيقي، نشر يات و . . . ساحه لرينده يورولمادان چاليشيرلار سئچديكلري استراتژي و اونون تاكتيك لري دوزگون تشبوث لرايله اويغون گئتمكده دير  . تصادفي دگيل كي ايچري ده بو قدر اعتراض نمايشلري گئدير و پارلمنت ده آذربايجان نماينده لري بيرليكده ملتين ايستكلريني ديله گتيريرلر .تصادفي دگيل كي يوز مينلر وطنداشلاريمز آذربايجان سرداري بابكين آغيرلاماق مراسمين اؤز مدنيت لرينه لاييق داغلاردا طنطنعه لي شكيلده قيد ائديرلر !

خالقيميزين صاباحكي آزادليغي و اونا سعادت قازانديرماق اوغروندا معنوي ووروشماسيني اؤزونه شرف بيلن ،خالقيميز سئچديگي  يولون يورولماز يولچوسواولوب وملي مساله يه گلديكده گرچك- لر آجي اولورسادا كيمسه نين آجيغي گليرسه ده ديله گتيريب و حقدن مدافعه ائدمك وظيفه سي بوتون ائلينه و اوباسينا يانان وطن اولادلارينين بوينونا دوشور . هاميميز بوگون كي وگله جك نسيلين قارشيسيندا بويوك وظيفه داشيريرييق، گرچكلري بيان ائتمك هر تك، تكميزين ملي و اجتماعي بورجودور، كئچن يانليشليقلاري، جنايتلري ، خيانتلري آچيقلاماق ، دوست و دوشماني سئچمكده آرتيق يارديمجي اولاجاق و گرچكلري دئمك دن و يازماقدان گرك قورخوموز اولماسين !

بعض وطنداشلاريميز  آغا آغ، قره يه قره، دئمكدن امتناع ائديرلر ، داورانيش لاري تام ملاحظه كارليق فورماسيندادير ، نيه كي شخصي دوستولوق مناسبتلرين داها ملي مساله دن بيله بيله اوستون توتماقداديرلار ايستمه ديكلري اجلاسلار دا يالنيز شخصي مناسبتلر دويغوسونو نظره آلاراق اشتراك ائديرلر ، اله بو شخصي داورانيشلار چوخلو پروبلم لر يارادير : بيرينجي سي بيله بير توپلوملاري برپا ائدنلر اؤز ايشلرينين دؤزگؤن ايستقامته يؤنلمه سينه ( گئتمه سينه )اينانيرلار و تكرار سونوج وئرمه ين توپلوم لاري آغير مادي و معنوي  دورومدا دوام ائتمگه چاليشيرلار ، ايكينجي بيله دير كي ، باشقا وطنداشلارين تشكيلات لانما پروسه لرينده آز مدتلي اولورسادا منفي تاثير لر بوراخيرلار، نيه كي خالق كوتله سي بوگون آستا آستا ملي مساله يه ماراق گوسترمكده دير ، بيله ناساليم رغابت لري گؤرنده انسان سوست لاشير و تشكيلات يارانمير و خالق حمايتينه دايانمايان بير تشكيلات قورولسادا اوغورسوزاولار.تاسف- لراولسون بو يارامازليق لار بوتون بير گوجلو سياسي تشكيلاتين بوشلوقوندان آرايا چيخير و گوجلريميز داغيناق اولور ، بئله ليكله خالقيميز باشسيز واولكه ميز صاحابسيز قالير و بوآرادا  يالنيز پان ايرانيزم قووه لري ميداندا آتلارين چاپيرلار، اله بو اوتن ايللرده گوئني آذربايجانين آيدين لارينين حتي يازديق لاري مكتوب لاريني دا  جوابسيز بوراخميشلار ، بوناگؤره كي كسرلي و گوجلو تشكيلات سيزليغيميز بو عالي جنابلارا آيدين دير !!

بوگون گونئي آذربايجاندا ملي آزادليغين اويانيش بايراغي آيدينلاريميزين اللريله قالديريليب و خالق كوتله سي ايچرسينده ده يوكسلمكده دير، گئديركي اولوسوموزدا معنوي بير انقلاب و اخلاقي بير تحول ياراتماقلا آزادليق قاپي لاريني آچماغا نائل اولسون، تاسف ايله بعضي لري بيله بيله،بعضي- لري بيلمزدن آذربايجان ملتينين مركب قانلي فاجعه- له  ريندن هله ده درس آلماييب ، ائله بوگون ده اولوسوموزون باغيمسيز مبارزه لريني چاشتيرماغا جان آتيرلار بلكه ده باغيمسيز و ملي حركاتيميزين تملين باشقالارينا باغلاسينلارو اؤزلريني بيزلره آغا بيلنلر و ملي ثروتميزه گؤز تيكنلر آذربايجان وآذربايجانليلارين طالعيني ايستديكلري كيمي الده ائتسينلر.

ياشاديغيميز بو عصيرده هئچ بير وطن سئور آذربايجانلي بيله چركين شرايطه بويون ايمز ، ائله بوگون ده گونئي آذربايجانين ثيقل مركزي تبريز دير وهاميميزآنايوردوموزدا آغير شرايط ايچرسينده آپاريلان ملي - فرهنگي مبارزه دن الهام آليب و سؤزده يوخ ، بلكه ده پراكتيك (عملي)  شكيلده  ميلتيميزين حق سس لريني قالديرمالييق ! آنجاق بوگون ده باشقا تشبوث لرله بوتون آذربايجانليلاري اؤز باشينا تمثيل ائتمك آديله بيله بير اويونلارا گيرنلر بيلمه لي ديرلر كي، تاريخين آجي حادثه لرينين تيكرار ائديلمه سينه بيرداها سهو دئمك اولماز ، بلكه ده محض خيانت ساييلار وخيانتكارلاري دا  صاباحكي گون ملت باغيشلاماياجاقدير!!

تاسف لر اولسون كي كئچن خيانت لرين اودلاري بوگون هله ده بوتون قوزئي ده ، گونئي ده و دونيا اولكه لرينه سپه لنميش آذربايجانليلاري يانديرير و اولكه ميز تيكه تيكه پايلانيب دير وهله ده تالان اولموش ملي وارليغيميزي وكيمليگيميزي بوتونلوگله الده ائده نه قدر بومقدس لاكين  داشلي - چانقيلي يوللاردان كئچمليك !