اوشاق فولكلوروموز :

ا. بدوستاني

آنالارين دوغما ايستكلريندن جوشان و صاف احساسلاري ايله قانادلانان اوشاق فولكلورو، ائل ادبياتيميزين اولدوقجا گوجلو قوللاريندان سا ييلير. دونيايا تازا گؤز آچان كؤرپه لردن توتموش ايلكين ياشلاريني كئچيرن بالالارو يئني يئتمه لرله ايلگيلي  سئويله نن لايلالار، نازلامالار، اوخشامالار، آرزمالار سانامالار، تكرلمه لر، تاپماجالار، اوشاق ناغيللاري كيمي بؤيوكلرين و ها ميدان  چوخ آنالارين اؤز بالالارينا ياراتقلاري و ياشاتديقلاري ساده، ياراشيقلي و موزون ائل ادبياتيميزين بهره لي و آنا ايستگي قدر دولغون بو گؤزل نغمه لر ظاهري گؤرونوشده اوشاقلاري ياتيزديرماق، اونلارين بويونا اوخشاماق. ديله توتماق و اگلنديرماق خاطره اولسادا ديل آچماقدا، حياتلا آشناليق قاتماقدا، دوغما آناديلي ايله آليشماقدا بير سؤزله حياتين آنلاميني دريندن باشا دوشمكده اونودولماز نمونه لري سيراسيندا يئرله شير .

آختلاريشلار و آراشديرمالار گؤستريركي، درين دوغماليق و توكنمز آنا محبتيندن  چاغلاييب گلن بو سؤزو احساس اينجه ليكلري عصرلر بويو اوزون تكامل يولو كئچيرمگله بيزه گليب چاتميشدير، آنا سودو قدر ايلك مكتب اولموشدور. تاسفلر اولسون كي، دوننه قدر سوادسيز آنالاريميزين سينه سي بو مكتبين توكنمز لايلاري- اوخشامالاري- ناغيللاري و آيري- آيري  ائل سؤزلري و ائل نغمه لري ايله جوشوب- داشديغي حالدا بوگون بيزيم بير چوخ سوادلي آنالاريميز اؤز دوغما ديللرينده  كؤرپه لرينه شيرين- شيرين لايلا دئمه گي، بويونا اوخشاماغي و ناغيل سئويلمه گي ياديرغاميشلار .

ائلين وارليق داياغي اولان آنالارين لايلالاريميزي ، ناغيلاريميزي ائل نغمه لريميزي اونوتمالاري هر بير علته اولور اولسون. صاباح شبهه سيز اوشاقلاريميزين تكجه اؤز آنا ديللرنين اينجه ليكلريني ياديرغاماسي و اونوتماسي ايله يوخ، بلكه اونلارين ملي وارليقدان اوزاقلاشماسي و ملي روحيه دن آيري دوشمه سي ايله نتيجه لنه جكدير صاباح چوخ گئج اولاجاق. بيز بوگون و ائله بوگون كورپه لريميزين معنوي- ملي تربيه سي خاطره ،منليگيميزي و كيمنيگيميزي اوشاقلارا آشيلاماق خاطره لايلالاريميزا ،نازلامالاريميزا و ناغبللاريميزا قاييتمالي و بونلاري بؤيوك ملي- معنوي بير ميراث كيمي قورومالييق .اوشاق  فولكلوروموز بوتون اينجه ليكلري،آل- الوانليقلاري ايله ائل ادبياتيميزين آيريلماز بيرحصه سي ساييلير. فلكلوروموزون   آيري- آيري دامارلاريندان چاغلايان سؤز قورولوشو ،آهنگدارليق، سس اويوشمالاري، تصويردرينليگي اوشاق ادبياتيميزدا اولان اينجه- ليكلرله وحدت تشكيل ائدير. ائله بوناگؤره ده اوشاق فولكلوروموزو بوتون فولكلور مجموعه لرينده خلق ادبياتميزين آيري- آيري نمونه لري سيراسينا گئچير و بيرليكده نشر ائديلير. بئله ليكله اوشاق فولكلوروموزون توپلانماسي و آراشديريلماسي سيخ صورتده عمومي فولكلوروموزون  توپلانيب آراشديريلماسي ايله بيرله شير .

بو باشلانيشي دوغرولتماقدا حيات يولداشيم م. ع. فرزانه نين قايغي لي گؤستريشلريندن فايدالانميشام و آشاغيدا نمونه اولاراق نازلامالاردان نئچه بند گتيريريك ...

نازلامالار  :

آلتيندا خالچا
چالير كمانچا
اون دانا خونچا
گلير قيزيم اوچون                                                       

گوزگوده  دوگمه
توزونو سيلمه
خونچادا تيرمه
گلير قيزيم اوچون  

ائينه ده وار دوز
دؤوره سي صدف
بير زرلي اؤرپك
گلير قيزيم اوچون
 

آغ مايا اللر
بئلينده كمر
قيزيل دويمه لر
گلير قيزيم اوچون

گولوستان باغي
ياشيل يارپاغي
قيزيل بئل باغي
گلير قيزيم اوچون

هر يانا گؤزوك
ايلقاردا دوزوك
بيريليانت اوزوك
گلير قيزيم اوچون

داغلار دا جيئران
بو قيزا قوربان
اون خارا تومان
گلير قيزيم اوچون

هيئواسي ناري
اليمين  باري
اون ساپ ميرواري
گلير قيزيم اوچون
.