ائسوچين يوتوبورو شهرينده كي ياييلان آذري توركجه سي راديوسونون آپاريجي سي  ناهيد خانيم زنجانچي نين آذربايجان آنلاين شبكه سي مسئولو ميرصادق هاشمي ايله 29-4-2001 تاريخينده مصاحبه سي:

س: صادق بيگ  ممكنسه اوزونوزو آذري توركجه سي راديونو دينله ينلرينه تانيتديرين!

ج: هر شيئي دن اؤنجه آذربايجان توركجه سي راديو سوندا چاليشانلاري هابله بو راديو نو دينله ينلري اوركدن سالاملاييرام من صادق هاشمي كوكوم جنوبي  آذربايجانلي اورمو شهريندن دير،  1973 دوغوملويام ،حال حاضيردا  Mälardalenانيورسته سينين اؤيرنجيسيم  .

س: نئجه اولدو آذربايجان آنلاين شبكه سيني يارادماق فيكرينه دوشدونوز؟ بوساحه ده راديوموزو دينله ينلره بيرقيسا اولورسادا معلومات ورسنيز منتدار اوللوق

ج: اوشاقليق چاغلاريندان آتا، آنا وبوتون عايله عضولرينده ملي وارليغيميزا علاقه وحورمت بسله- مه گي حيس ائتديم و گوجلو بير روحيه ايچرسينده بويا باشا چاتماق حياتيمدا هرشيئدن آرتيق مني سئوينديردي، اله بوناگؤره ده آذربايجان خلقنين زنگين ديلي، ياشلي فرهنگي و پارلاق تاريخي موجود فاكتلارا گؤره خصوسي ايله بو سون يوز ايلده آزادليق دشمنلري طرفيندن دانيليب ،تحقير اولونماسي، معصوم اوشاقلارين آنا ديلرينده تحصيل آپارماقدان محروم اولونماسي حتي 1946- نجي ايل درس كتابلارينين قاراق قالاق  پهلوي حاكميتي طرفيندن يانديريلماسي، تئاتر، سينمانين تورك ديلينده ياساق اولماسي و . . . ايچريمده ومعنوي بير انقلاب ياراتدي. بيزيم تاسفله دنيا چرچيوه سينده بيلگي باخيميندان چوخ چتين شرايط ده ياشيريقق سسلريميزي باشقالاري اؤز سليقه لري و خوش گلديگي كيمي تانيرديريرلار و بونا گؤره بير مستقل انترنت شبكه آذربايجان آدينا و آذربايجانچليق شعاري ايله ضرورتين حيس ائتديك.

1997-نجي ايل اعتباري ايله بيزيم سايتيميز آذربايجان آنلاين شبكه سي آدينا انيورسته آلتيندا  ايشه باشلادي، اؤنجه چوخ چتينليك لر قارشميزداايدي، آنجاق وطن سئوگيسي غربت اولكه ده ياشاماغا باخماياراق بيزي بو يولدا اراده لي ائتدي.

آذربايجان آنلاين بيرينجي دفعه آذربايجان موسيقي سي ايله ايشه باشلاييب، سونرا 1998- نجي  ايليندن بويانا آذربايجان كينوسوندان، سونرا خالق ماهنيلاريني  يازيلي شكيلده بوشبكه ده يئرلشديرديك. آيري جا انترنت ده ياييلان آذربايجان ديلي راديولاري دا بورادا لينك ائتديك ، بوگون امكان چرچيوه سينده درگي و قازته لري- ده اوخوماق اوچون مكميل لشديرمگه چاليشيريق   سرويس لرين گوجلنمه سي مالي يارديم طلب ائدير.

س: بو هوما مكافاتيندا اولان (هوماي) كلمه سي نه آنلامدادير كي سيز بو مكافاتا نايل اولموسونوز ؟

 ج:  هوماي مكافاتي بير ملي مستقيل ، اجتماعي مكافات ،يعني  انگليس جه  National Public Prizeتورك خالقلاريندان قالان بويوك بير مكافات، نئچه ايلدير بو مراسم باكي دا آذربايجاندا  كئچيريلير، مختلف اجتماعي ساحه لرده آذربايجان اوچون ايلين خدمتكاري سئچيلير .داها معلومات  www.humay.com آدلي اينترنت صحيفه سيندن اوخوماق اولونور  2000- نجي ايلينده 17 كاتوگوري ( بولوم )  اولاجاييدي و بونلاردان بيري ده آذربايجان حاقيندا گوزل اينترنت پروژه سي سئچيله جگيدي كي كئچن ايلين سونلاريندا باكي يا چاغيريلديم و اورا دا  اونلار اشتراكچي لارين آراسيندا بيرينجي ليك ( هماي ) مكافاتينا لاييق تانينديم !

س: سيز آذربايجان آنلاين نين آدرسيني بويورا بولرسينيز ؟

ج: www.azerbaijan-online.com

 س: بو سايتيدا نه لر ياييلير ؟

ج: موسيقي  دئديگينيز كيمي آذربايجان كينوسوندان وآذربايجان خالق ماهنيلاري اينترنت ده ياييلان آذربايجان ديللي راديو لار و ياخين ليقدا دا جنوبي آذربايجاندا چيخان قازته لريميز، اودا يعني امكانات چرچيوه سينده باشلانيب و انشاالله  جورله نه جك  بو قازت مسئله سي.

س : چوخ ساغ اولون. آذربايجان  جاوانلارينا نه كيمي پيامينيز اولابيلر :

ج: جاوانلار، گنج لريميز خصوصي ايله گؤنئي آذربايجان گنجليگي بير اويانيش  دورو كئچيردير، بو دؤرون ان اساس خصوصيتي جاوان وطنداشلارين علمين بوگونكو نائليت لرينه ال تاپماق و اونو دريندن منيمسه مك و صاباح يارانان آزاد و خوشبخت حياتدا اونلا خلقيميزين اولادلارين علمي،فني فرهنگ ايله تانيش ائتمك دير.

من ده بيرآذربايجانلي كيمي مين لركيلومتر اوزاق دا بيله بير آرزوينان كي علمي دوشونمك بوگؤن هر انسانين ياراشيغي دير ،بو كاروانا قوشولموشام و هله دانشگاه دا  اولدوغوم حالدا دا  تام مساله لري ايله ياخين دا اوغراشميشام. بو اوغراشما مني آذربايجان آنلاين الكترونيك خطي ني يارادماغا فرصت قازانديرميشدير.

راديو آپاريجي سي: چوخ ساغ اولاسينيز ، بيز سيزه بوندان آرتيق موفقيت لر آرزو ائديريك و بونو اشيدمگه منتظريك !

سون.