ايران آذربايجانيندا بايا تيلارين ييغيلماسي و نشري تجربه سيندن
( م.ع.فرزانه نين لنكران فولكلور سئميناريندا معروضه سي )

م.ع.فرزانه

باياتيلار و يا جنوب آذربايجانين بير سيرا بؤلگه لرينده دانيشيقدا دئييلديگي كيمي، (( بوياتيلار )) گؤنئي آذربايجاندا اولدوغو كيمي، گؤنئي آذربايجاندا دا شفاهي خلق ادبياتيميزين اولدوقجا كنيش اؤلچوده ياييلميش و ائل عاشيقلاري ايله خلق كوتله لري طرفيندن جور به جور فردي مناسبتلرده و اجتماعي رسوم- مراسيمده سئويله-سئويله قونوشولان و دينله نيلن نوعلريندن بيريسيدير.

اينجه سؤز قورولوشو و درين بديعي- اجتماعي مضمون و آنلاملارلا آشيب داشان باياتيلار، رنگارنگ دويغو و دوشونجه دولغونلو و غني افاده چالارليغي باخيميندان، فولكلور و خلق ادبياتيميزين سينه لره سيغماز و كتابلارا يئرلشمز ان صاف و تميز بديعي ياراديجيليق گوزگوسو اولموشدور. باياتيلار تاريخ بويونجا نسيللرين بسله ديگي آرزو و نيسگيللرين، داشيديغي سئوينج و كدرلرين و ياشاتديغي دويوملارين ((صبير داشي و غم پيچاغي)) اولموشدور.

عصريميزين بؤيوك حصه سيني قاورايان كئچن يئتميش ايلده، قوزئي آذربايجاندا فولكلور و خلق ادبياتي نوعلرينه عايد ماترياللاري توپلاما، آراشديرما و نشر ايشي اوغورلو اولدوغو و هرجور امكانلاردان فايدا لانديغي حالدا، گونئي آذربايجاندا حاكم كسيلميش سياسي شرايطدن آسيلي اولاراق، آيري- آيري فولكلور و شفاهي خلق ادبياتي نوعلريني توپلاما ونشر ايشي اوغورسوز لوقلار و جوربه جور چتينليكلر و مانعه لرله اوز اوزه گلميشدير . بو اوغورسوزلوق و چتينليكلر ، اساسا ايراندا اللي ايلدن چوخ سورن پهلوي ديكتاتورلوغونون آشيري ناسيوناليزم و شوونبزمه آرخالانديغي دوورده، باشقا ايران خلقلرينده اولدوغو كيمي، آذربايجان خلقي نين ده اؤز دوغما آناديلينده يازيب- اوخوماسيني و حتي اوتانمازجاسينا قونوشماسيني بئله ياساق ائتميشدير بير خلقي ان چيركين تشبثلره ال آتماقلا اؤز ملي وارليغيندان، آنا ديليندن، كيمليگيندن اوزاقلاشديريب، اونا قوندارما و باياغي ملي- مدني كيمليك قوراشديرماق، اونون آنا ديليني ياساقلانديريب لاغا قويماق و يئري گئلينجه اونون زنگين فولكلورونا عئيرتي دون بيچمك بو آغير ايللرده گؤنئي آذربايجان خلقي و اونون ملي- مدني وارليغي نين توش اولدوغو آغير بلالاردان اولموشدور.

لاكين ، آسيميليا چيليق استيلاسي بوتون آغيرليغي و دؤزولمزليگي ايله خلقي اؤز آنا ديليندن و ملي وارليغيندان آيري سالا بيلمه دي. بو اوغورسوز ايللرده خلق كوچه ده- باجادا، ايش يئرلرينده، شهرده فرش كارخانالاريندا و ييغوا لاردا، كندلرده، تارلالاردا و دويونلرده باياتيلاري و خلق ماهنيلاريني نسلدن نسله چاتديرديلار، آنالاراؤز كؤرپه لرينه لايلا سؤيله ديلر و ناغيل دئديلر، دونيا گؤرموش  قوجالار آتالارسؤزلريني قورودولار و آغ بيرچكلي آنالار چيخيلمازليغا و ديدرگينليگه اوغراياندا و الي هرياندان اوزولنده يئنه باياتيلارا قاپيلديلار و اؤز دومانلي- چيسگينلي  طالع لريني بونلارين كؤنولده اينانج و اينام يارادان گوزگوسونده گزديلر:

عزيزيم ياخشي گلسين،
ياخشي  توت ياخشي گلسين
توتموسان علي فالين،
سور باشا ياخشي گلسين.

ائله بونا گؤره ده، هئچ تصادفي دگيل كي، ايراندا و گؤنئي آذربايجاندا بو اللي ايلدن چوخ دوام ائدن ديكتاتورلوق  و قولدورلوق شرايطنده هر وقت موقتي و گئچي جي ده اولسا، آزادليق و دموكراسي استبدادا اوستون گلينجه شفاهي خلق يارادجيليغيندا ايلك اؤنجه باياتيلار بو باهارين گليشي نين موشتولوقچولاري اولموشلار و بيز بونون جانلي نمونه سيني 1941 نجي ايلده ايرانين متفق  دؤولتلر اوردولاري طرفيندن اشغال ائديلديگي و رضاخان ديكتاتورلوغونون دئوريلمه سي ايله يارانان ديل، قلم و مطبوعات آزادليغيندا گؤروروك . بو ايللرده آرا- سيرا تبريز و تهران مطبوعاتيندا باياتيلاردان نمونه لر وئريلير و 1945-46 نجي ايل گؤنئي آذربايجاندا ملي- دموكراتيك حركاتين غلبه چالماسي و آنا ديليميزده روزنامه، نشريه و كتابلارين ياييلماسي ايله ده بونلاردا اؤزونه ايلكين و باشليجا يئر آچان نمونه لر يئنه ده باياتيلار اولور. 1945 ده تبريز ده نشر اولان شفق مجله سينده ( 5-نجي ساي ) م. ع. قوسي ( بو گونكو فرزانه ) طرفيندن باياتيلارا عايد بير آراشديرما ايله بيرليكده، باياتي نمونه لري درج ائديلير. ايلك جدي تجربه ساييلان بو يازيدا وئريلن باياتيلار عموما تبريز ده آغيزلاردان توپلانميشدير. اونون آردينجا 1946-نجي ايلده (( آذربايجان )) روزنامه سي نين صحيفه لرينده فولكلورا  گنيش يئر آچيلير و ضياليلاردا فولكلور توپلاماغا ايلگي ياراتماق اوچون روزنامه نين 294-نجي ساييندا ببئله بير بيلديريش درج ائديلير :

(( آذربايجان خلق ادبياتي- آذربايجان فولكلورونون ان گنيش و زنگين ساحه سي  اولان (( خلق ادبياتي )) حيصه سيني توپلاييب نشر ائتمك آرزوسيله بوگوندن باشلياراق آذربايجان روزنامه سينده بير ستون آچيلير .

آذربايجانين بوتون منطقه لرينده اولان بوتون ماراقلي و هوسكارلاردان تمنا ائديليرآذربايجان فولكلورونون بو حيصه سيني تكميلي صورتده توپلانماسي اوچون يوخاريداكي موضوعلارا عايد معلوماتلاريني دقتله توپلاييب آذربايجان روزنامه سي اداره سينه گؤندرسينلر . آذربايجان زوزنامه سي )) .

بو بيلديريشين آردينجا م . ع . فرزانه نين فولكلوروموز و اونون چوخ ساحه لي نوعلري باره ده وئريلن آراشديرما ايله بيرليكده بير چوخ يئني باياتيلار درج ائديلميشدير. روزنامه نين بوندان سونراكي سايلاريندا دوام ائدن فولكلور نمونه لري نين توپلانما ايشينده بير چوخلاري تبريزدن و باشقا شهرلردن اشتراك ائديرلر و بو نمونه لر سيراسيندا باياتيلاردان علاوه بير سيرا آتا سؤزلري و مثللر ،  لطيفه لر و سايره ده روزنامه يه يول تاپير. بئله ليكله ده آذربايجان روزنامه سي بير نوع آذربايجان فولكلورو  اورگانينا چئوريلير .

گؤنئي آذربايجاندا يارانان ملي- دموكراتيك حركات يالنيز بير ايل دوام ائتدي . خلقين اؤز ملي مدني وارليغينا گوونمه سي و آنا ديلينده يازيب اوخوماسي دونيا سياستيني  اؤز ايستكلري يؤنده  يورودنلرين قارشيسيندا قوربان كسيلدي .

اولكه  بير داها زندانلار . اعداملار ، سورگونلر ديارينا چئوريلدي . قلملر سينديريلدي ، كتابلاريانديريلدي ،ملي تئاتر  قاپاندي ، ملي اركستر سوسدو  و دونن داغلارا و چؤللره سس سالان شاد نغمه لر يئرينه بو دردلي

آغيلار سيزلاماغا باشلادي :

عزيزييه م، وار درديم
يوخ درمانيم، وار درديم،
خار اكنلر گول دردي
من گول اكديم، خار درديم.

 آزالماز منيم درديم ،
سازالماز منيم درديم ،
مئشه لر قلم اولسا ،
يازيلماز منيم درديم . ‌

انسان آزادليغي نين امانسيز قان ايچن دوشمنلري تكجه انسانلارين كرامتيني يوخ، حتي سؤزون كرامتيني بئله آياغا ساليب تاپداديلار. باياتيلار سيراسيندا چاپ  ائديلميش بو باياتي :

آرازي آيير ديلار‌،
قومونان دويور دولار ،
من سندن آيريلمازديم
ظلمنن آيير ديلار

محكمه يه چكيلدي و اوزون اوزادي سئوال- سورغو و آختاريشلار ياراتدي

لاكين، (( آذزبايجاني يوز ايل سوسدوردوق )) ادعاسيندا اولانلارين قانلي رؤياسي پوزولمادي . هله هاميسي 6 ايل گئچمه دن ايراندا نفت صنايعي ملي لشمه سي و انگليس لرين ايراندان قوولماسي ايله  آذربايجان هرطرفلي گؤزآلتي ساخلانيلديغي حالدا ، اولكه ده ملي- مدني ديرچليش ايله بيرليكده آزادليق يئلي اسمه گه باشلادي . آنجاق بو ملي- مدني ديرچليش ايراندا آمريكا انگليس غارتگرلري نين مبارشتي و دربارين ايش بيرليگي ايله 28 مرداد كودتاسينا و بو دفعه دموكراتيك حركتلرين بوتون ايراندا فاجعه يه اوغراماسينا سبب اولدو.  1953 دن سونرا كودتانين ان قيزغين چاغيندا هئچ گؤزله نيلمه دن بير معجزه باش وئردي .

بو معجزه شهريارين حيدر بابايا سلام منظومه سي نين مئيدانا چيخماسي و هرطرفده ديلديشه دوشمه سي ايدي. جيدر بابانين بئله بير آغير شرايطده سسلنمه سي بوتون اوره گي دردلي آذربايجانانليلارا بير اميد داياغي و روح يوكسكليگي باشلانيشي ايدي. تهراندا تبعيد حاليندا ياشايان آذربايجان آيدينلاري طرفيندن (( حيدر بابا درنگي )) تشكيل ائديلدي و تبريزده يني نسل اؤز ملي مدني وارليغي باره ده دوشونمگه باشلادي . آنجاق هله آذربايجان ديلينده كتاب بوراخماق امكانسيز و روزنامه لرده فولكلور نمونه لري وئرمك چتين ايدي .

1962-  يه قدر دوام ائدن (( قزل قلعه )) استبدادي آغير ضديتلرله  اوز به اوز گلميشدي . گوندن گونه اؤلكه ده سياسي قدرتي گوجله نن آمريكا بير (( رفورم )) باش توتماسي طلبينده ايدي . ايران اليگارشبسي  و اونون باشيندا دربار (( رفورمو )) منيمسه يه بيلمه ديگيندن موقتي اولاراق بير چكيشمه و دالاشما دؤوري باشلير و آمريكانين ايسته يي شاه طرفيندن (( آغ انقلاب )) شكلينده اورتايا چيخير.

ايكي- اوچ ايل چكن بو چكيش- بركيشده موقتي اولاراق بير آچيق فضا يارانير. بو ياريمچيق آچيق فضا تبريز و تهراندا آذربايجان ديلي، ادبياتي و فولكلورو ايله  ايلگيله ننلري ده حركته گتيرير. تبريز ده صمد بهرنگي و اونون امكداشلاري يئرلي روزنامه لرين بيرينده آذربايجان فلوكلور نمونه لري و بير پارا نظم و نثر اثرلر بوراخماغا باشلاييرلار. فولكلور نمونه لري ايچرسينده يئنه باياتيلار داها اؤنملي يئر توتور. بو حركتين بير طرفي صمدين((يارا- يارا)) مجموعه سيني توپلاييب چاپ ائتمگله نتيجه له نير. صمد- بو آنتولوژو ماهيت داشييان مجموعه ده قوزئي و گونئي آذربايجان شاعرلري نين شعرلريندن سئچمه لر ايله بيرليكده يوزدن چوخ باياتي دا گتيرميشدي .

او بو باياتيلارين كتابدا يئر وئريلمه سيني بو سؤزلرله آچيقلاييردي : ((قاباقدان فكريمده يوخ- ايدي كي،باياتيلاري دا بوكتابدا يازام.آمما سورا حئيف سينيرلانديم و اؤز- اؤزومه دئديم : هاردان بئله بير اورگه ياتان دادلي- دوزلي ساده شعر تاپاجاقسان ؟ اونا گؤره باياتيلاري دا بوردا يازديم . گرك بيلماق كي ، بولارين چوخي تبريزده دئييلن باياتي لاردير. او بيريسي آذربايجان شهرلرينده ده آيري باياتيلار واردي كي، هله ليقدا ائلييه بيلمه ديم بورادا يازام . بوايش سورا لاردا اولا بيلر. ((ياره  ياره))، صمد بهرنگي ( ص. قارانقوش ) ايكينجي چاپ ، بهار 1359 ص 6 )

صمد بوكتابدا (( آذربايجان )) شعريني چاپ ائتديگي اوچون محكمه يه چاغريلير و سئوال- سورغوياآلينير. صمده آذربايجان فلكلورونا يارانان آليشقانليق اونون افتخارلي حياتي نين سونوناقدردوام  تاپدي و هامي نيز ياخشي بيليرسنيز كي اونون مرموز اؤلومو صمدين يئنيدن معنوي دوغولوشونون  باشلانيشي اولدو و اونون ابدي لشمه سي ايله نتيجه لندي .

بو سيرادا تهراندا سورگون كيمي ياشايان م. ع. فرزانه طرفيندن چوخدان حاضيرلانميش ((باياتيلار ))مجموعه سي ده ايلك دفعه آيريجا مستقل كتاب شكلينده تبريزده چاپ ائديلير .   12..دن چوخ باياتييا اؤزونده يئر آچان بو مجموعه آيدينلار و خلق كتله لري آراسيندا ياييليب ال به ال گزسه ده ، اونون ايكينجي چاپينا (( آريامهري )) رژيمده امكان وئريلمه ميشدير . مجموعه نين ايكينجي و داها سونراكي چاپلاري ( باياتيلار بو گونه قدر دفعه لرله و هر دفعه يئني توپلانان باياتيلارين اونا آرتيريلماسي حسابينا باسيلميش و تيراژ باخيميندان ايراندا نشر اولان فولكلور كتابلاري آراسيندا بيرنجي يئري توتموشدور )) جمهوري اسلامي نين قورولوشو ايللرينده اولموشدور) باياتيلارين 1964-ده چيخان بيرينجي چاپينا يازيلميش 15 صحيفه ليك فارسجا باش سؤزده  باياتيلارين بديعي سؤز خصوصيتلري،عاشيق شعري ايله تاريخي ايلگيلري ، مضمون وآنلام رنگارنگ ليكلري دوشونجه اينجه- ليكلري باره ده باشليجا ملاحظه لر ايره لي سورولموشدور. بو ملاحظه لرين بو گونكو شرايطده باياتيلارين تانيتديريلماسيندا بؤيوك تاثير گؤسترديگي اوچون ، اوباش سوزدن خلاصه حالدا بعضي پاراگرافلار آشاغيدا نقل ائديريك :

(( آذربايجان شفاهي خلق ادبياتيندا  باياتي آديله تانينميش و يوردون هر طرفينه ياييلميش دؤردلوكلر  اؤلكه ميزده چاغلايان منظوم خلق ادبياتي نين نوعلريندن بيريدير .

باياتيلار سؤز ييغجامليغي  آنلام گنيشليگي و موسيقي آخارليغي ايله   فولكلوروموزون جذبه و دويغو دوغوران بديعي اثرلري سيراسيندا يئر آلير .

ساده خلقين ياشايش ، قايغي- اورك سؤزو و روحي احتياجلاريندان مايالانيب و اولدوقجا آخيجي و صميمي سؤزلرده قاليبلانميش بو گؤزل و جاذبه لي نغمه لر ، ائله بير اينجه ليگ ، دوغماليق ، صافليق و صميميت ايله يوغرولموشدور كي ، اويوشان آهنگ و توتوملو سسله اوخونورسا،اوره يي جوشدورور واحساسين اوزونه گؤزياشي چيله يير

باياتيلارين بديعي خصوصيتلريندن بيري اونلاردا اولان ييغجامليق و آخارليليق دير . باياتيلار خلق ديلي نين  توكنمز اينجه ليكلريني گنيش اؤلچو ده اؤزونده بسله يير.بو دويغو يا  قاناد وئرن نغمه لرين قيسا و آخيجي مصراعلاري هر جور سؤز ساختاكارليقلاري و ياراشيقسزليقلاردان اوزاق اولماقلا برابر، سؤز صنعتي نين  تعبير، تشبيه، كنايه، جناس، مجاز و  باشقا بو كيمي بديعي خصوصيتلريني  اؤزونده عكس ائتديرميشدير.

باياتيلار، مضمون و آنلام جهتدن ساده و پاك انسانلارين عشق ، آرزو ، شادليق ، كدر گؤزگوسو اولدوغو حالدا ، اونلارين رسم- رسوم، اينانج و ملي داورانيشلاري نين آچيلماميش كتابيدير . . . انسانين جسمي و روحو ظلم ، زوراكيليق ، اجتماعي عدالتسيزليك بويوندوروغو آلتيندا  اينله ديگي ، سئوينج و گولوش دوداقلاردا دونوب قالديغي ، عشق ، ايستك و آرزو لارين گولله نيب بوي آتماق و ثمره چاتماق عوضينه اميدسيزليك و اوغورسوزلوق قايالارينا توخونماسي، اوره يي كؤورلدير و اونون نغمه لرينه غم جالايير:

آغلارام ، آغلار كيمي،
دومانلي داغلار گؤنلوم ،
درديم وار داغلار كيمي،
نيسگيللي باغلار گؤنلوم.
خزان اولدوخ ، تؤكولدوخ،
نه آچيلار ، نه گولر،
وئرانا باغلار كيمي .
هميشه آغلار گؤيلوم .

آذربايجان دياري جغرافي دوروم و طبيعي زنگينليكلر اوزوندن، عصرلر بويو سومورگه چي استيلاچيلارين آت اوينا تديغي و علم گزديرديگي ديار اولموشدور. بو آمانسيز هجوملار و غارتلر خلق  حياتي نين امن امانليغيني پوزموش و اونلاري اؤز يوردديووالاريندان ديدرگين سالميشدير. وطندن اوزاق دوشمك و غربت آجيسي بير چوخ باياتيلارين يارانيب سسلنمه سينه سبب اولموشدور .

غربته دوشدو يولوم،
عزيزييه م ديلن گز ،
دشمن آليب ساغ-سولوم،
باغدا گوله ديلن گز .
ائلدن آيري دوشه لي،
غربتده خان اولونجا ،
بوخوولانيبدي  قولوم.               
وطنينده ديلن گز

بو باش سؤزون اصلي فارسجا اولدوغونا باخماياراق بير چوخلاري و بوسيرادا قوجامان معارف خادمي رحمتليك ميرزا جبارخان باغچه بان اونو باشدان آياغا ازبرله ميشدير. او دئيه ردي گئجه لر يوخوم گويه چكيلنده گؤزلريمي يومورام و سؤزلري تكرار ائديرم . چاليشيرام اونلاردان بير كلمه سي بئله اونودولمانين ... صمد اؤزو و امكداشلاري و هاميدان چوخ بهروز باياتيلار مجموعه سيني و اونون آردينجا دا (( آذربايجان گرامري نين اساسلاري )) و (( سازمين سؤزوونو )) گؤرونجه صمدين محبتلي بير مكتوبدا يازديغي كيمي ،قانادلانيب گؤيلره اوچماق وحق قاپيسين آچماق ايسته ميشديلر  ...

او تاريخدن ، بو اود يئنه كول آلتيندا ياشامالي اولدو ، آما ياشادي .  1978 بهمن انقلابيندان سونرا  يئنه كتابلارو نشريه لر چيخماغا باشلادي ، يئنه باياتيلار چيچكلندي . صمد حقينده ان گؤزل باياتيلار عاشيقلارين ايفا سينا يول آچدي . م.ع. فرزانه نين باياتيلاريندان علاوه باشقا باياتيلارمجموعه لري ده چيخدي. بونلارين بير قسمي كؤچورمه و تكراري اولورسا ، بير قسمينده يئني باياتيلارايئر وئريلدي. خلق آراسيندا  ملي مدني شعورون يوكسليشي ايله فولكلورا دا گوندن گونه ايلگي آرتماقدا و درينلكمكده دير. يئري گلميش كن آذربايجان ادبيات و مطبوعاتي نين دگرلي خادمي يحيي شيدا نين توپلاييب نشر ائتديگي اجتماعي مضمونلو باياتيلار مجموعه سيندن آد چكمك يئرلي دير.