هميشه سن گله سن! ( اوستاد شهرياردان بير سؤيله نيلمه ميش خاطره )

م.ع.فرزانه

عشق دامينه گرفتار اولالي ، زار  اولويام،
نه بلادير كي ، اونا بؤيله گرفتار  اولويام ؟
قدرتيم يوخ كي، قيلام كيمسه يه شرح غم دل،
اؤيله كيم عارضه هجر ايله بيمار اولويام .

( فضولي ليلي و مجنون )

بويوك سؤز اوستادي ، ملا محمد فضولي نين اؤلمز الهي و معنوي سيماسيني گؤز اونونده  جانلانديران بو محتشم توپلانتبدا ، من فضولي ياراديجيليغي نين موسيقي و هاميدان اول بو ياراديجيليغين ان گنيش و گوجلو ساحه سي ساييلان فضولي غزل ليريكاسي نين موغا ماتلانه قدر دريندن و آيريلماز ايلگيلرله باغلي اولدوغوندان دانيشماق ايسترديم . آنجاق بو مسئله يه ياناشار-ياناشماز و اونا عايد قايناقلاري گؤزدن گئچيرمگه باشلار-باشلاماز ، فيكيريم بو موضونو كولگده بوراخدي و اونونلا چوخدا فرقلنمه ين بير خاطره گليب قارشيمداجانلاندي بوخاطره ، معاصرآذربايجان شعر وغزل مكتبي نين ان قدرتلي سون بئشيكلريندن بيري ساييلان اوستاد محمدحسين شهريارين فضولي غزلي و بو غزلده چاغلايان ليريزم دونيا سيله روحي باغليليغي ماجراسينا بير باخيشدير. اون يئددي ايل اؤزومله داشيديغيم بو خاطره ني بوگون سيزينله بؤلوشورم .

1358-نجي ايلين اوللرينده،‌ گونئي آذربايجان معاصر شاعرلري ايچرسينده شهريارين هاميدان چوخ حؤرمت بسله ديگي مبارز شاعر سهندين گؤزله نيلمز اؤلومو ايله ياناشي، تبريزده قورولان خاطره اجلاسيندا شهريار دا چوخ دالغين حالدا اشتراك اتميشدير. او ، بو مجليسده سهند حققينده يازديغي مفصل تاثر نامه ني و داها دوغروسو ايكينجي سهنديه ني اوخودو. اجلاس قورتاراندا ، من سهندين عائله سي و مجليسده اشتراك ائدنلرين منتدارليغيني شاعره بيلديرمك و اونا بيرداها باش ساغليغي وئرمك ايسته ينده، او يئنه برك كؤورلدي و دئدي: باخ،  گؤردون سهندده گئتدي، او هردفعه تبريزه گلنده منه باش چكردي. سن آلله، سن ده آياغين تبريزه چيخاندا مني ياددان چيخارتما . . . و اوندان سونرا هر دفعه يولوم تبريزه دوشنده شاعرين ايسته ييني يئرينه يئتيرمگ خاطره و اوندان حال- احوال بيلمك اوچون زنگ وورار لازم گليرسه شاعرين ياخينلاريندان بيري ايله اونون گؤروشونه  گئدرديم .

1359-نجي ايلين قيشيندا ، تبريزده اولدوغوم سيرادا، يئنه زنگ ووروب شاعردن حال-احوال توتدوم. او چوخ سونوك بير سسله دئدي: گونلريم چوخ آجي گئچير، سويوق امانيمي كسير، نه بير قاپيمي  دؤين وار، نه احواليمي بيلن. گله بيلسن، آخشام اوستو گل، گؤر كي پتويا بورونموشم. بونون آردينجا اليم هئچ يئره چاتماديغيندان، شهريارين ياخين قوهومي و اونون بير پارا ائو ايشلريني يوللانديران آقا ميرشريفه زنگ ووردوم و دئديم: ميري، بالا، اوستادين ائوينده نفت قورتاريب كيشي سويوقدا قاليب. آقا مير شريف دئدي: من دئميشم نفت آپارسينلار، گؤرونور هله آپارماييبلار. بئله ليگله اونونلا بيرليكده تبريزده نفت شعبه سي اولان حيات يولداشيمين عميسي حاج علي آقايا  باش ووردوق . حاج علي آقا بونو ائشيدينجه  دئدي: واي، منه اؤلوم اولسون، باشميز ائله قاريشيقدي كي، هر شئي ياددان چيخاديريق. سيز ناراحات اولمايين، من اؤزوم ايكي ساعاتا جان ايشي يئربه يئر  ائله رم . حاج علي آقا نين  سؤزو ، سؤز ايدي .

آخشام اوستو اوستاد گيله چاتاندا اوتاق ايستي ايدي ، شاعرده پتونو بوراخيب دوشكجه اوسته اوتورموشدو. او مني گولر اوزله قارشيلادي و آلله سني هارادان يئتيردي، لاپ بئزيكميشديم، دئمگله منه يئر گوستردي. خوش - بئشدن سونرا  اليمده كيچيك باغلاماني گؤرونجه دئدي : دئيه سن تهراندان سوغات دا گتيرميسن.

شاعرله قاباقكي آرا-سيرا گؤروشلريميزده بيرچوخ حاللاردا  سؤز گليب آذربايجان غزل دونياسينا چاتاندا، اونون هاميدان چوخ فضولي و واحدين غزللري ايله علاقه لنديگيني دويموشدوم. بونا گؤره ده قاباقكي گؤروشلرده بو ايكي شاعرين ديوان و غزلياتيندان اونا آپارميشديم. بو دفعه ده شاعرين بير نئچه دفعه سؤز آراسي آد چكديگي فضولي نين (( ليلي و مجنون )) اثريني، تهراندا فضولي حققينده حاضيرلادديغيميز موسيقيلي بير كاست ( نوار )  ايله بيرليكده اؤزومله گؤتورموشدوم . كتابي وكاستي هئچ نه دئمه دن اونا وئرديم. او، ((ليلي و مجنونو)) واراقلاييب دئدي: به، به، چوخداندي بونون آرزوسون چكه رم. الين آغريماسين. سونرا دا كاستين اوطرف بوطرفينه باخيب، اونو آستاجا ضبطه بوراخدي. سؤزومون باشلانيشيندا ليلي و مجنوندا ن اوخودوغوم ايكي بيت، مغني روبابه مرادوانين ملاحتلي سسي ايله اوتاغا ياييلدي. شاعر اونو دينله ديكده اوزوندن آيريلاركيمي، باخيشلاري اوزاقلارا، سونسوز لوغا تيكيلدي. سونرا  اؤز-اؤزيله پيچيلداشيركيمي دئدي: نغمه داود، لحن داودي . . . او بيتلرين اوخونماسي قورتاريب سس دگيشيلينجه، نواري بير دفعه يوخ، بلكه بير نئچه دفعه دالا قايتاردي و يني باشدان دينله دي. من اونو  دونياسيندان آييرماق ايستمه سم ده، ديللنديم:  اوستاد، سؤزلرين آردي وار. دئدي بيليرم، قولاق آساجاغام.  آمما بو سس آدامين  اوره يي نين آلوونا سو سپير. بو سس آلله وئرگيسيدي. بونو اوخويان كيمدي ؟ دئديم. ربابه خانم مرادوادي. دئدي: حتما كي، اوتايليدي، دئديم : يوخ ائله بيلرم، ‌بوتايليدي 1325-ده جوان ياشلاريندا اوتايا گئشميش، اورادا آدليم مغني لردن اولموش. دئدي سبحان الله، بو تورپاق، بو ائل-اوبا قوينوندا نه لر بئجه ردير؟

شاعر دينمز اورتوب كيرپيك چالمادانن قولاق آسير و نوارين  سسي سكوتا دا لميش اوتاقدا شوكت خانيم علكبراوانين اينجه و ملوديك سسيله ياييلير :

مني جاندان اوسانديردي، جفادان يار اوسانماز مي؟
فلكلر ياندي آهيمدن، مراديم شمعي يانماز مي؟
شب هجران يانار جانيم،‌ تؤكر قان چشم گريانيم،
اويادار خلقي افغانيم، قارا بختيم اويانماز مي؟
فضولي رند شيدادير، هميشه خلقه رسوادير،
سورون كيم بونه سئودادير، بوسئودادان اوسانمازمي؟

ضبط دن اوجالان سس دوام ائدير. خلقيميزين توكنمز موسيقي ارثي ايچرسينده بيزي دوشوندورن، آرزولاريميزا قاناد وئرن، دويغو لاريميزا ايشيق ساچان، بيزي دريندن كدرلنديرن، دريندن فرحلنديرن ان گوجلو موسيقي هانسيدير؟ بو سورغونون جوابي چوخ آيديندير: موغامات .

آذربايجان شعري نين سؤنمز گونشي فضولي نين ده شعري موغامات قدر زنگين، رنگارنگ،  درين و اؤلمزدير. فضولي شعري هم قالب و هم آنلام باخيميندان موغاماتلا اكيزدير. بو ياخينليق اوراجاقديركي، فضولي شعريني موغاماتسيز و موغاماتي فضولي سيز تصور ائتمك اولماز. فضولي نين غزللري يانيب ياخيلان بير اوره يين آلوودور:

دوست بي پروا، فلك بيرحم، دوران بي سكون،
درد چوخ؟ همدرد يوخ، دشمن قوي، طالع زبون،

فضولي شعرينه بير اؤتري باخيش بئله چوخ آيدين گؤستريركي، فضولي شعري نين ديلي بوگونكو آذربايجان ديليندن فرقله نير. فضولي ديلينده ايشله نن بيرچوخ عرب  فارس سؤزلري وتركيبلري بوگونكو آذربايجان ديلينده آز ايشله نير. بونونلا بئله خلق فضولي شعري نين وورغونودور:

ياخما جانيم، ناله بي اختياريمدن ساقين!
تؤكمه قانيم ، آب چشم اشكباريمدن ساقين!
سو وئرير هر صبحدم گؤز ياشي تيغ آهيمه،
چوخ مني اينجيتمه، تيغ آبداريمدن ساقين!
جور اودي ياخدي مني، يانيمده دورما، اي كؤنول،
بير توتوشموش آتشم، قرب جواريمدن ساقين!
گرچه بيرخاك رهم ، كيمسه مني آلماز گؤزه،
چوخ حقارتله نظر قيلما، غباريمدن ساقين!
شاه ملك محنتم ، خيل وسپاهيم دردوغم،
خيل بيحدو سپاه بيشماريمدن ساقين!

فضولي شعرينده  فيشقيران  بوغم، هجران، حسرت، ايستك، دؤزوم و دويوم، هر بير دويان، دوشونن، سئون، نفرت  بسله ين و بير سؤزله هر بير چيرپينان اورك و آليشان دويغو، اؤز ايسته گينه يئلكن تاپير ...

شرقين عظمتلي عرفان دونيا سيندان چاغلاييب گلن عشق ومحبت فضولي شعري نين ماياسي وتمل داشيدير. بو بشري دويغولار نه اينكه بير شاعر كيمي، بلكه بير انسان كيمي ده فضولي حياتي نين معناسيدير. او اؤز ابدي مرادي اولان عشقين قارشيسيندا،جانيني نذير دئميشدي. عشق اونو(( داخل جرگه كمال )) ائتميشدير. فضولي عشق و محبتين قدرتي ايله حياتين آنلاميني، كايناتين سيريني، خلقين غايه سيني اؤيره نير، فضولي بو عشق ايله دويور، دوشونور، كدرله نير، سئوينير و ياشايير ...

سس  ضبط دن ياييلديقجا شاعر دقتله دينله ييروگاهدان دا نواري دالي قايتاريب ايكينجي دفعه قولاق آسيردي .

نوار قورتارديقدان سونرا اونو آستاجا چيخاردي، اويان بويانينا گؤز گزديريب قابينا قويدو و دئدي: آلله سني هميشه ايشلرينده موفق ائله سين، سن بو گئجه بو كلبه درويشه تك گلمه ميسن، فضولونودا اؤزونله بورا قوناق گترميسن  .سونرا آپارديغيم ليلي و مجنونو اله آليب ورقله دي، بعضي يئرلريني گؤزدن گئچيرديب، نه فيكيرلشديسه، كتابي منه وئريب. آياغا قالخدي و اؤز اؤزو ايله اوتاقدان چيخدي و چوخ چكمه دن سه تاري  ايله قاييتدي  و دئدي:  بيليسن چوخ چوخداندي سه تاري اليمه آلماميشام. اما بو گئجه فضولي اؤز ايلاهي سيماسي ايله  گليب داياندي  گؤزومون اؤنونده. سن آلله گؤتور او ليلي مجنونداكي ساقي نامه لردن  نئچه سيني اوخو ، بلكه من اولاري هاوالانديريم !

غم وئرمه !

غم وئرمه غم عشقه كي، غم آفت جاندير،
عشق آفت جان اولدوغو مشهور جهاندير .
سود ا يستمه، سوداي غم عشقدن هرگز
كيم، حاصل سوداي غم عشق ذنها ندير.    
هر ابروي خم قتلينه بير خنجر خونريز
هر زلف سيه، قصدينه بير افعي ايلاندير. . .
گر ديرسه فضولي كي ، گؤزلرده وفا يوخ
آلدانماكي، شاعرسؤزو البتده يالاندير .

***

بلاي عشق

يارب ! بلاي عشقه ائله آشنا مني !
بيردم بلاي عشقدن ائتمه جدا مني !
آز ائيلمه عنايتني اهل درددن ،
يعني كي، چوخ بلالره قيل آشنا مني !
اولدوقجا من‌، گؤتورمه بلادن ارادتيم ،
من ايسته رم بلاني ، چون ايستر بلامني !..
نخوت قيلوب نصيب فضولي كيمي منه ،
يارب ! مقيد ائلمه مطلق منا مني !

***

اولوبام

عشق دامينه گرفتار اولالي زار اولوبام،
نه بلادير كي ، اونا بؤيله گرفتار اولوبام!..
قدرتيم يوخ كي، قيلام كيمسه يه شرح غم دل،
اؤيله كيم عارضه هجررايله بيمار اولوبام !..
يوخ فضولي، خبريم مطلق اؤزومدن. بس كيم
واله نقش خيال رخ دلدار اولوبام !

غزللر فرقلي بحرلرده اولدوغونا باخماياراق، شهريار اوستادليقلا تاري كؤكله دي و اؤز حزين سسيني تارين اينيلتي سينه قاتدي . . .

اونون مهارتينه آفرين دئديم و مرحبا سؤيله ديم . او تواضع له دئدي: يوخ، مايا مندن دگيل، بلكه غزل اؤزو هاراي چكيب دئيير: من هانسي دستگاهدا سسله نيرم ! من اوگونلرده تهران سينمالاريندا بير فيلم گؤستريليردي 0 فيلمين آدي (( ماهني يوخ، ماهنيني اوخويان )) ايدي من اوستادين جاوابيندا ائله يالنيز بو عنواني ديله گتيرديم 0شهريار قاييديب دئدي : آمما اؤز آراميزدي سن ده سؤزو لاپ ماتينا سالانلاردانسان! گئجه ياريدان گئچميشدي. من گئتمه يه اجازه ايسته ينده، او دئدي ميه ساعات نئچه دي؟ دئديم: گئجه ياريدان گئچيب، دئدي: گؤرورسن خوش ساعاتلار نه تئز گئچير؟ گئجه لر يوخوم گؤيلره چكيلير، گؤزومو اولدوزلارا تيكيرم و اؤزاؤزومه دئييرم: آلله ! گؤره سن سحر هاچان آچيلاجاق؟ و آردينجا اؤزوايله پيچيلداشان  كيمي زمزمه ائتمگه باشلادي:

اولدوز ساياراق گؤزله ميشم هر گئجه ياري
گئج گلمه ده دير يار ، يئنه اولموش گئجه ياري،
گؤزلر آسيلي، يوخ نه قارالتي، نه ده بير سس
باتميش قولاغيم، گورنه دوشورمكده دي داري
ياتميش هامي، بيرالله  اوياقدير، داها بيرمن
مندن آشاغي كيمسه يوخ، اوندان دا يوخاري

كوچه قاپي سينين آرديندا ايديق. او ال وئرنده دئدي: (( هميشه سن گله سن )) و بيردن بيره دولوخسوندو وتيتره رك سسله آرتيردي: آلله سنين او گؤزل آنانا رحمت ائله سين، عزيزه اونو اؤز آناسي كيمي ايستردي . . . ( عزيزه  شهريارين حيات يولداشي عائله سيله بيزله تبريزده قاپي قونشوايديلر ).

آيريلديق، من تبريزين صاف و رؤيائي گئجه لريندن بيري نين درينلرينه جومدوم، شاعرله  گؤروش و اونون ساده و درويش ياشامي، مني يوزلر ومينلر قوجامان تبريزين بو صاف سماسيندا پارلايان علم، ادب، هنر و انسانليق جارچيسي اولان متفكرلرين خاطره سيله اؤزومدن چيخميش بيلمه دن گئده جاغيم ائوي اؤتوب گئچميشديم.