|
بيرميللتين حاق سسيني بوغماق اولارمی؟!
سني
گؤردوم ياس ايچينده،
وجودوما اود الندي.
بوخوولاردا قالان کينيم،
يوز يئريندن شاخه لندي.
اؤلدو نئچه ايگيدلريم،
تورپاغينا قان چيلندي.
بسدير اميد، بسدير
شوبهه،
جلادلارا بسدير گومان،
قالخ آياغا آذربايجان!
«آل قاييت»
بيلديگينيز
کيمي، ايران دولتي نين رسمي اورگاني ساييلان «ايران روزنامه سي» اؤزل ساييندا،
۱۳۸۵-جي ايل
ارديبهشت آيي نين
۲۲ سينده جمعه گونو، تورکلره قارشي «آپارتايد» سياستي نين بيرداها
ميندار اوزون آچماقلا، آذربايجانليلاري غضبلنديردي.
او عرفه ده
آذربايجانلي اؤيرنجيلرين اعتراضي ايله بيرگه عموم خالق اعتراض نمايشلري خوي، خلخال
و... شهرلرينده کئچيريلدي. لاکين اؤيرنجي لرين، خصوصيله تبريز انيورستت لرينده
«آپارتايد» سياستينه قارشي محتشم ميتينگ لري، نهايت خرداد آيي نين بيرينجي گونو
تبريزده عموم خالق حرکتينه چئويريلدي. [۱۳۵۶-جي ايلين
۲۹ بهمن حرکتين گؤرنلر بئله
اعتراف ائديرلر:«
۱۳۸۵-جي ايل خرداد آيي نين بيرينده تبريزين هرطرفيندن سيل کيمي
آخييب خيابانلارا گلن سويداشلارين، ميللي- مدني حرکتلري،
۱۳۵۶- جي ايلينده کي، ۲۹
بهمن حرکتين کؤلگه ده قويموشدو.]
قوجامان
تبريزين سسينه، اورمو، سولدوز، زنجان، اردبيل، اهر، مشکين شهر(خياو)،
مياندوآب (قوشاچاي)،
ماکي، ميانا، خالخال، موغان، کليبر، گرمي، طارم، زونوز، مرند، يامچي، خوي، قزوين،
همدان، زرن، باهار، انزلي، تهران، کرج، قم و... شهرلريندن«
ياشاسين آذربايجان.
هاراي
هاراي من تورکم. آذربايجان ميللتي، چکمز بئله ذيللتي. يا آزادليق، يا اؤلوم. منيم
ديليم اؤلن دئييل- اؤزگه ديله چؤنن دئييل و... »
دييه، بوشعارلارا وئريلن سسلر،
بوتون
اودلار يوردونو بورودو !
قيد ائتمک
لازم ديرکي، گونئي آذربايجاندا باش وئرن عموم خالق حرکتي، مطلق خارجده ياشايان
هانسي بيرشخصين، قروپون، تشکيلاتين ياداکي يابانجي بيردؤولتين گؤستريشي ايله،
بيرگئجه ده يارانمادي! داها دوغروسو، اعتراض دالغالاري ايللر بويو، فرهنگي،
ايجتماعي، ايقتصادي، سياسي محض ميللي حقوقلاري تاپدالانان آذربايجانليلارين
سارسيلماز اراده لري نتيجه سينده، اورتايا چيخميشدير. آنجاق بو تاريخي حرکتده بوتون
وطنداشلارين اؤزلليکله آذربايجان فعاللارينين يوکسک روللاري اولموشدور. بونا گؤره
ده ميللي حرکت آدلاندي.
بوگونه دک اعتراض
آکسيالاري ايله باغلي، بعضي سويداشلارين گؤزل آراشديرمالاريندان و چيخيشلاريندان
فايدالانساق دا، يئنه مثبت و ضعف نقطه لري خاطيرلاماق ضروري خاراکتر داشايير.
[خصوصيله ضعف نقطه لري!] بونا گؤره بيرپارا گؤزه چارپان مقاملارحاققيندا فيکيريمي و
تنقيدي باخيشلاريمي عزيز اوخوجولارلا پايلاشماق ايسته ييرم. بلکه ده تنقيدلر
بعضيلرينه خوشا گلير اولماسين. آمما امينم کي، هر وطنداشين ساغليم تنقيدي،
حرکتيميزي شفافلانديريب و ساغليم ايستقامتده گوجلنمه سينه سبب اولاجاقدير.
مثبت نقطه لر
- بو سون يوز
ايلده، بيرينجي کره(دفعه) اولاراق، حرکتي کسکين شکيلده، آذربايجان تورکو آديله
تانييب و تانيتديرماق!
- حرکتين ايلک
باشلايشي آذربايجان اؤيرنجيلري وميللي آکتيولري طرفيندن کاناليزه اولوب و سرعتله
ياييليب و کوتله نين حمايه سين قازانماق.
- گونون شرايطينه
اويغون تاکتيکلرين سئچيلمه سي.
- ايرانين سراسري
سياسي اورگان و تشکيلاتلاريندان اوزاقلاشماق و...
ضعف نقطه لر:
- ايران اسلام
حاکميتي نين بعض مسئوللاري، گونئي آذربايجاندا، سياسي تشکيلاتين بوشلوغوندان
فايدالاناراق بعض شهرلرده آغير فاجعه لر تؤره ديلدي و سويداشلاريميزدان
۲۰ نفردن
آرتيق هلاک اولدو، يوزلر نفر يارالاندي و يوزلر نفر ياخالانييب و زندانلارا
بوراخيلدي.
- بيرپارا
خبرلراولدوغوکيمي، واختيندا و معين کاناللاردان ياييلمادي، عکسينده، شبهه لي خبرلر
نامعلوم عنصرلرطرفيندن ياييليردي. اولايلاري شيشيدمک مقصديله خالقي حقيقتدن
اوزاقلاشديرماق و تخريباتچليق ايشلري ايله حرکته راديکال استقامت وئرمگ،
آيدينجاسينا حيس اولونوردو. بو ياراماز ايشده، امنيت قووه لري نين رولون گؤزدن
قاچيرماق اولمازدي. بو شيوه لرله حرکتي پارچالاماغا و نهايت سوسدورماغا
چاليشيرديلار.
- تاسفله خارجده
بعضي بارماق سايي اولان شهرت طلب و دويغوسال شخصلر و قوروملار، آذربايجان ميللي
حرکتين منيمسه مکله، ميللت ايچرسينده جانلانان ميللي حرکته استراتژي وتاکتيک
پلانلاري جيزماق نمايشلرينه باشلاديلار. ترکيه ده و آذربايجان جمهوريتينده، بير
پارا سويه سيز ايشلره ال قاتانلار اولدو. بعضيلري، ايران دا فدراليزم قورماق آماجي
ايله، گونئي آذربايجان آدينا اجنبي اؤلکه لرين پارلمنت لرينده، چيخيشلاردا
بولوندولار. بئله ياراماز داورانيشيلار، گونئي آذربايجاندا تمناسيز چاليشان
آکتيولرين آغير وضعيت لريني قات- قات چتينلشديردي. حاکيميت، گرگين دورومدان
فايدالاناراق، آذربايجانليلارين ميللي و مدني حرکتين خارجي دؤولتلره باغلادي.
قوندارما اتهاملار اؤزرينده خالقيميزا ديوان توتولدو! سويداشلارين آجي طالعي
هاميميزي هميشه کي کيمي ايندي ده کدرلنديرير. قدارجاسينا آسييب- کسمه لر هله ده،
داوام ائتمکده دير
تاسفله ايچريده
بعضي فعاللار! خارجدن حرکتي منيمسه ينلره کسکين رياکسيا گؤسترمه ديلر. بو ضعف
حرکتده يارامازليقلارا سبب اولدو. حتي حرکته يئني قاتيلان بعضي وطنداشلاريميز بئله
دوشونوردولرکي، او گونلرده آذربايجاندا انقلاب وجوده گله جک و مدني حرکتين
پرنسيپلرين وانتظاميني پوزانلار اولوردو. بو ساحه ده آذربايجان
اؤيرنجيلري نين خارجه کسکين جوابلاري سئوينديريجي حال ايدي. بو تدبير بيرداها ثبوت
ائتدي کي آذربايجان ميللي حرکتي نين تملي گونئي ده دير!
حرکتين بئش اؤنملي
نقطه لري:
بيرينجي:
وطنداشلارين ميللي ومدني اعتراضلاري بوتون دونيا ايجتماعيتين اينسان حقوقلاريندان
مدافعه ائتمگه چاغيردي! دونيا بيرداها بيلدي کي، ميليونلار گونئي آذربايجان
تورکونون ميللي وارليغي، ايران اسلام دؤولتي طرفيندن، چاغداش عصرده، گؤز
اؤنونده اينکار ائديلير.
ايکنجي:
آذربايجانليلاري آسيميله اولموش بيرقوم تانيديران پان ايرانيست لرين يوخوسون
گوزلريندن قاچيرتدي. حتي بو غيردموکرات عنصرلر، اوتانمازجاسينا، آذربايجان حادثه
لرين اؤز آدلارينا باغلاماغا جهد گؤسترديلر. اؤزلرينه منسوب اولان مديالاردا، يالان
معلومات يايماقلاري نين هرطرفلي شاهدي اولدوق. نه ايسه، سويداشلاريميزين آذربايجان
آديله مستقيل حرکتي، «آپارتايد» مفکوره سي داشايانلارين بوش ادعالارين، بيرداها
ثبوت ائتدي.
اوچونجي:
فارس شونيست لري نين قوللوغوندا اولان و آذربايجان ميللي حرکتينه تحقير گؤزوايله
باخان، [مانقورتلار] چاش- باش دوشدولر. يقين کي، بوحرکت، اونلاري گونو-
گوندن، آذربايجان حقيقت لرينه اينانماقا ماراقلي ائده جک دير.
دؤردونجي:
آذربايجان ميللي فعاللاري نين ايللر بويو صرف ائتديگلري امکدن، آلديقلاري ثمره لي
نتيجه، ها بئله، ميللتيميز! اؤز گوجونه اينانييب و گووه نمه سي سئوينديريجي حال
ايدي.
بئشنجي:
آذربايجان ميللي فعاللارينين حرکتدن آلديقلاري ياخشي تجربه لر. [صادق يولداشلاري
آراييب تاپماق! آغا- آغ، قارايا- قارا دئمک! رابطه يئرينه ضابطه حاکيم اولماق!
حاضيرليق اولمادان هئچ بيرحرکته ال وورماماق! تشکيلاتلانماق !
ايران حاکيميتي و
اپوزوسيونون رياکسياسي:
اودلار يوردونا
مشهور اولان آذربايجان، ساکت اولسادا، ظلمت قارشيسيندا دهشتلي توفان قالخپدار. اؤتن
حادثه لر بو دهشتلي توفانين کيچيک علامت لريندن بيري دير! ائله بونا گؤره ده
حاکيميت باشچيلاري سارسيلدي. و بوآغالار، بير- بيرينين آردينجا، آذربايجانليلارين
ميللي- مدني حرکتين آمريکا، اسرائيل و سايره باغلاياراق، دينج اينسانلاري، «ارازل و
اوباش» آدلانديرديلار.
قيد ائديم کي،
پهلوي رژيمي ده
۱۳۵۶- جي ايل تبريزده اوز وئرن
۲۹ بهمن حرکتين، آرازين اوتايينا
باغلاميشدير، بو بوش اتهام
۱۳۵۷- جي ايلين ۲۲ بهمن آييندا حاکيميتين محو اولماسي
ايله سونوجلاندي. البته بوگونکو افترا و تهمت لرده جوابسيز قالماياجاق! يقين
کي، خالقيميزين سونسوز نفرت وغضبيله قارشيلاناجاق. بونو گله جگه بوراخيريق...!
دئمک اولار
آذربايجانليلارين اعتراض آکسيالارينين خبري، ايران ايسلام حاکيميتي نين و اونون
داخلده و خارجدکي اپوزوسيونون راديو وتلويزيونلاريندا، مطبوعاتلاريندا، رسمي
شکيلده بايکوت ائديلدي. حتي آذربايجان ميللي حرکتينه قارشي بوتون سلطنت طلب،
مجاهد، جمهوريخواه، ساغدان– سولا، رنگ به رنگ گروپلار ضداينساني سياست يورودولر. بو
آرادا، يالنيز ايرانداکي غيرفارس ميللت لر، آذربايجان ميللي حرکتينه صميمي
ياناشديلار.
ايران ايسلام
دؤولتي نين مسئوللاري، اؤز امنيت دايره لريندن، والي لرين(استاندارلارين) باغلي
قاپيلي «امنيت شورلاريندان» آلديقلاري معلوماتلاردا، آذربايجانين چالخانماسين ياخشي
دويوب ودوشونورلر.
بو آغالارا
آيدين اولورکي، آذربايجانليلار ايچينده، اؤزميللي وارليغينا گووه نن لرين سايي
گونو- گوندن آرتماقدادير و ميللي حرکت درينلشمکده دير. بو ميللت تئز يا گئج معيين
پروسسلردن کئچه رک، دونيانين باشقا آزاد خالقلاري کيمي اؤزلري- اؤز طالعلرين الده
ائتمگي لايقجه سينه باجاراجاقلار. بو دانيلماز بير فاکت دير. ائله بونا گؤره ده،
سيخما- بوغمالارين آرتماسي تصادفي حال دئييل!
بيزه بئله گليرکي،
ايران حاکيميت لري هانسي
آديله اقتداردا اولورسا – اولسون، «پان ايرانيست لر» چئشيتلي شيوه لرله «آپارتايد»
سياستينه داوام ائده جکلر.« ۵۳ ايل پهلوي لر-
۲۹
ايل ايسلام حاکيميتي نين » غيراينساني داورانيشلاري، بو سؤزلرين بارز نمونه سي
دير. آتالار دئميشکن: «بو امام زادا دان، معجزه گؤزله مک اولماز» تاريخين اؤتن آجي
اولايلارين بيرداها سيناماقا جان آتان، بعض ساده لوح سويداشلاريميزا يازيقلار
اولسون!
خارجي
دؤولتلرين رياکسياسي
تاسفله، خارجي اؤلکه
لرده هرشئي دن اؤنجه مادي يارارلارين نظرده آلاراق، ايکينجي نؤوبه ده اينسان
حقوقلارينا ياناشيرلار. آذربايجان حادثه لرينده بئله داورانيشلاري يوخوندان گؤروب و
دويدوق. چوخ واختلار شاهد اولموشوق کي، بو دؤولتلر، اؤزلرينه ماراقلي اولان حتي بير
کيچيک حادثه ني، دونيانين هر يئرينده اولورسا- اولسون دفعه لرله راديو و
تلويزيونلاريندا و مطبوعاتلاريندا يايميشلار. بو واسطه لر، حادثه حاققيندا جمعيت ده
مثبت تاثير بوراخيب. آمما دموکراتيک آدي داشييان اؤزلليکله، باتي (غرب) اؤلکه لري،
آذربايجان حادثه لرين ياييماقدا، بلکه ده بير هفته دن چوخ سوسدولار.
آنجاق کي
خارجده ياشايان آذربايجانليلارين فعاليتلري بايکوتو سينديريب وخبرلرين سرعتله
ياييلماسينا سبب اولدو. (
CNN
و BBC
) ده خبرلري يايماق مجبورينينده اولدولار. تاسفله خبرلر ايرانين رسمي
آژانسلاري اولان (ايسنا و ايلنا) نين سانسورلاريندان سونرا ايستديکلري کيمي داخلده
وخارجده ياييليردي.
يئنه
سويداشلاريميزي ساغ اولسونلار. اونلارين فعاليتي نتيجه سينده، سانسورلار کولگه يه
بوراخيلدي. حدود
۱۰گوندن سونرا آذربايجان ميللي حرکتي نين خبرلري خارجي اؤلکه لرين،
او جمله دن: آذربايجان، ترکيه، ايسوچ، دانمارک، نروژ، انگليس، آلمانيا، کانادا
وآمريکانين، ان معتبر مطبوعاتيندا سرعتله ياييلماغا باشلادي.
سون سؤز:
دئمک اولار، ۱۳۸۵ - جي ايلنين باهاري، آذربايجان ميللتي نين مبارزه سينده دونوش
بيرنقطه دير. چونکي خالقيميز اؤزميللي کيمليگينه سئوکه نه رک، ميللي آزادليغيني محو
ائدن پان ايرانيست لر قارشيسيندا پولاد اراده ايله باش قالديردي و اؤزونو بوتون
دونيا خالقيلارينا تانيتديرماغا بيرداها امکان تاپدي. بو ديرچليش حماسه لري
آذربايجانليلارين يادداشتيندا قيزيل حرفلرله حک اولدو.
آذربايجان ميللي حرکتي نين آدسير– سانسيز وفداکار رهبرلرينين مدني تدبيرلري،
بيرداها بونو گؤستردي کي، ميلتيميزين! مبارزه تاريخينده بيرصحيفه ني قورتاريب،
ايکينجي بيرصحيفه نين اوغورلا باشلانماسي تاريخي دير. بونا گؤره حرکتي اولدوغو کيمي
ساغليم شکيلده قورويوب، گوجلنديرمک ومستقيل ايستقامتده يؤنتمک، بوتون آذربايجانين
صادق اولادلاري نين بوينونا دوشور.
عموميتله، مهاجرت ده کي دياسپورا، ۵/۱ دان، آرتيق خارجده ياشايان
سويداشلاريميزين مادي ومعنوي گوجوندن فايدالانماقا نايل اولا بيلمه دي .
مينلرنفرليک محتشم اعتراض آکسيالاري برپا ائتمک دن عاجزقالدي. تاسفله، برپا اولونان
آکسييالاردا، ايشتراکچيلارين سايي ايچري نين «گورسسينه»، «مناسب سس» اولماماغي
بوتون سويداشلاريميزي خصوصيله فعاللاري معيوس ائتدي. آنجاق بو حقيقتي انکار ائتمک
اولماز، نقصانلارا آچيقجاسينا اعتراف ائديب و اونلارا چيخيش يوللاري آراييب
تاپمالييق.
پروبلملرين يارانماسينا سبب اولان عامل لردن بيرنئچه سي، يوخاري سطيرلرده قيده
آلينيب دير. اؤزلليکله،[خارجده کي بعضي پرنسيپ سيز داورانيشلار]، منه بئله
گليرکي، نقصانلارين قالديريلماسي، گونئي ده، گوجلو سياسي تشکيلاتين يارانماسي ايله
ممکون اولا بيلر. آيدين ديرکي، دموکراتيک پرنسيپلرينه بيگانه اولان ايران دؤولتي،
يئنه سياسي تشکيلاتين يارانماسينا انگللر تؤره ده جک. آنجاق معين تشبوث لرله بئله
بيرتشکيلاتين تئزليکله يارانماسي اؤنملي خاراکتر داشايير. بو استقامتده، آذربايجان
ميللي حرکتي نين دالغالاري، سرحدلريميزدن خارجدکي حرکتي، اؤز تاثيري
آلتينا آلماسينا اينانماق اولار.
گؤره سن! بيرميللتين
حاق سسيني بوغماق اولارمي؟ البته کي، يوخ! بوسس بيرقيسا مدت سوسورسادا، آنجاق
شهيدلرين قاني يئرده قالماياجاق. آذربايحانليلارا آپاريلان تحقير دومان توتموش
اؤرکلردن سيلينمه يه جک دير! اسلام دونونا بورونموش قدارشوونيزمين چيرکين
داورانيشلاري نين عمومي فاجعه سيندن آذربايجانليلار متاثر اولمايا بيلمزلر!
گله جکده هرهانسي تجاوزکارليغا قارشي عملي تدبيرلرله آيدين پلانلارين
حياتا کئچمه سي ديققت مرکزينه آلينماليدير.
بوناگؤره ده، کهنه ايجتماعي-
سياسي حيات طرزيندن کئچميش ودونيانين ايستي- سويوغون دادميش داها تجربه لي وزنگين
دونيا گؤروشلو سويداشلاريميزين سفربر اولماقلاري جدي خاراکتر داشايير. بو
سويداشلاريميز، يانليشليق و نقصانلارا مطلق گؤز يوماماليديرلار. بئله ليکله
آذربايجان ميللي حرکتين تهديد ائدن عامللرين محو اولماسي ويئني نسله اؤرنک اولماسي
دييه، حرکتين داها سرعتله ديرچلمه سي هاميني- هاميميزي سئوينديره جکدير.
آذربايجان
ميللي حرکتي حاققيندا، بيرپارا فيکيرلريمي آچيق -آشکار، بو عنوانلار ايله بو سون
ايللرده قلمه آلميشام: [
www.varliginsesi.comوارليغين سسي، سايي،
۳- ۴- ۶- ۹«يولدا اولان
انگللر- تاريخ تکرار اولونماقدادير- انکار ائديلمز حقيقت لر- سوچلو اولدوغوموز
ندندير؟- ساتقين جاهيللر- عاليملرين سوسماسي- ميللي حرکتده اوردونون(آرتشين)
تدبيري! - ايران حاکميتي نين سيماسي-
ايران اوپوزوسيونون سيماسي-
ايران اپوزوسيونونا اينانان وطنداشلار!-
آذربايجان ميللي
حرکتي نين قاباريق پروبلملري-
خارجده کي
داورانيشلار»
ميرموسي
هاشمي
۳۰- سپتامبر۲۰۰۶
ايسوچ-
مالمو
|